Lorenzana traslada a Ageinco o esforzo da Xunta por ser unha administración facilitadora da actividade empresarial

A conselleira de Economía, Industria e Innovación, María Jesús Lorenzana, asistiu en Vigo a un almorzo organizado pola Asociación Clúster de Empresas de Enxeñaría, Consultoría e Servizos Tecnolóxicos de Galicia (Ageinco), onde lles trasladou o esforzo que a Xunta está realizando para ser unha administración facilitadora da actividade empresarial.

Neste sentido, referiuse ás medidas que se están adoptando para conseguir unha redución de órganos e trámites que permita unha interlocución fluída e áxil entre o tecido e a administración. É o caso da Oficina Económica de Galicia, que actuará como xanela única con persoal especializado; o Plan de impulso e aceleración de proxectos industriais ,que inclúe accións de acompañamento e asesoramento; ou a adaptación do modelo de proxectos industriais estratéxicos que se estende aos de menor tamaño -a partir de 2 M€ e 25 empregos-.