Oficina virtual
- A conselleira de Economía e Industria, María Jesús Lorenzana, reuniuse con representantes da Confederación de Industrias Téxtiles de Galicia para abordar os retos desta industria na Comunidade
Vigo, 15 de novembro de 2024
A conselleira de Economía e Industria, María Jesús Lorenzana, reuniuse con representantes da Confederación de Industrias Téxtiles de Galicia (Cointega), co obxectivo de avaliar estratexias de modernización e innovación no sector téxtil na Comunidade e abordar os seus retos de futuro.
A conselleira e os representantes de Cointega coincidiron na importancia de seguir apoiando esta industria estratéxica para Galicia que no ano 2023 constituíu o principal sector exportador da Comunidade cun 23,1 % das exportacións galegas.
Neste contexto, o obxectivo é o de impulsar a competitividade e as novas oportunidades de negocio; e tamén buscar novas fórmulas para revitalizar a moda galega e visualizar a calidade dos seus produtos e o bo facer das empresas e traballadores e traballadoras vinculadas a esta industria.
No encontro, abordáronse ademais as necesidades que o sector ten para facer fronte aos futuros retos no eido da formación de directivos, retención de talento, modernización, dixitalización ou sustentabilidade.
Así mesmo, a titular de Economía e Industria, puxo en valor o compromiso da Xunta cos emprendedores e cas pemes galegas e resaltou o papel da Oficina Económica de Galicia que desde a súa posta en marcha en abril deste ano xa atendeu máis de 10.000 consultas. Esta oficina actúa como punto centralizado de atención a empresas, persoas autónomas e emprendedores e ofrece un sistema de información, asesoramento e acompañamento personalizado e especializado.
