• A liña, que abre hoxe o período de presentación de solicitudes, busca estimular proxectos para o desenvolvemento e mellora de factores ambientais, sociais e de gobernanza (ASG)
• Un dos obxectivos é promover iniciativas de implantación de solucións avanzadas que acaden reducións e aforros de recursos e diminucións na xeración de refugallos
• Tamén se apoiarán actuacións dirixidas a desenvolver a responsabilidade social empresarial e avanzar nos mellores modelos de gobernanza nas organizacións

Santiago de Compostela, 9 de maio de 2024

A Xunta de Galicia vén de activar un novidoso programa que, dotado cun orzamento de 1 millón de euros, permitirá promover entre as pemes galegas modelos de negocio máis sostibles e responsables. O prazo de solicitudes iníciase hoxe e permanecerá aberto ata o vindeiro 15 de setembro.

A liña, que se pon en marcha por primeira vez este ano, estimulará proxectos centrados no desenvolvemento e mellora dos chamados factores ASG: ambientais, sociais e de gobernanza. A finalidade é que as pemes galegas implanten solucións avanzadas coas que reducir e aforrar recursos e diminuír a xeración de refugallos, dun lado, e desenvolver a responsabilidade social empresarial e avanzar nos mellores modelos de gobernanza, doutro. Para acadar estas metas, impulsaranse proxectos tanto individuais como colectivos, que comprenden polo menos tres pemes con centro de traballo en Galicia que abordan solucións de maneira conxunta.

As iniciativas agrúpanse en torno a catro tipoloxías: unha primeira que atende a aspectos globais que se deben ter en conta nas organizacións, e outras tres baseadas nos propios factores ASG. Así, no que respecta aos mencionados aspectos globais, colaborarase coas pemes galegas na auditoría e avaliación de riscos ASG e na consultaría e certificación de empresas B-CORP, que son aquelas que amosan o seu compromiso coa xeración dun impacto positivo nos eidos ASG.

Así mesmo, no apartado relativo aos factores ambientais, promoveranse iniciativas que permitan tanto a reutilización como a redución do consumo de recursos nos procesos produtivos, contribuíndo á mellora da eficiencia enerxética ou da pegada de carbono. No campo dos proxectos sociais, atenderase a aspectos como a diversidade e inclusión ou a ética laboral. E no relativo á gobernanza, fomentarase a ética empresarial e a transparencia financeira.

Para avanzar nestes eidos, apoiarase tanto a adquisición de activos materias e inmateriais -sensores, sistemas para a medición e control de parámetros produtivos e ambientais, hardware e software intelixente, nova maquinaria e bens de equipo-, como os servizos de consultaría externa de carácter tecnolóxico, de deseño de procesos ou produtos máis eficientes, e organizativos.

As axudas, en concorrencia non competitiva, cubrirán o 35 % dos custos de adquisición de activos materiais e inmateriais para pequenas empresas e o 25 % para as medianas, mentres que para os gastos de consultaría chegarán ata o 50 %, e os beneficiarios poderán solicitar anticipos de ata o 80 % da mesma.

Con esta nova liña o Goberno galego dá continuidade ao programa para a posta en marcha de proxectos de economía circular, que permitiu apoiar, nos últimos dous anos, 22 iniciativas que están a mobilizar preto de 1,4 millóns de euros na implantación de solucións avanzadas para a produción, transporte e distribución de materias primas, compoñentes, semielaborados e produtos finais, acadando reducións e aforros na utilización de recursos naturais, auga e enerxía e diminucións na xeración de refugallos, subprodutos ou desfeitos.

• A conselleira de Economía e Industria, María Jesús Lorenzana, participou en Vigo na entrega dos Premios Emprende XXI, organizados por Caixabank e Enisa
• Lembra que o Igape conta cun programa dotado con 1,5 millóns de euros para apoiar os emprendedores galegos no lanzamento e consolidación das súas startups
• Tamén se vén de ampliar a rede de aceleradoras coa posta en marcha da nova Business Factory Climatech, que permite o impulso de proxectos empresariais no sector de solucións ambientais e economía circular

Vigo, 8 de maio de 2024

A conselleira de Economía e Industria, María Jesús Lorenzana, participou hoxe no acto de entrega do Premio Emprende XXI en Galicia, organizado por Caixabank e Enisa, onde recoñeceu e felicitou a todas as empresas finalistas, así como á gañadora, que, tal e como subliñou, son exemplos do nivel excepcional de innovación e dedicación presentes no tecido empresarial galego.

Na súa intervención, a responsable de Economía e Industria resaltou o compromiso da Xunta co impulso do emprendemento e a innovación, creando un entorno favorable para o crecemento das startups en Galicia. Así, proporciónanse recursos, financiamento e oportunidades de crecemento. Neste eido, está aberta ata o 30 de setembro unha liña de axudas dotada con 1,5 millóns de euros para subvencionar os gastos e investimentos nos que incorran os emprendedores no lanzamento e consolidación das súas startups.

Esta aposta tamén se reflicte na recente ampliación da rede de aceleradoras, coa incorporación de Climatech, a máis recente business factory, que permite o impulso de proxectos empresariais no sector de solucións ambientais e economía circular, respaldando así a sustentabilidade ambiental do tecido produtivo galego.

Esta nova iniciativa súmase a unha rede de aceleradoras xa consolidada, especializada en sectores clave, e da que forman parte as business factories BFAuto, BFAero, BFFood e BFMedicines. A estas súmanse outras iniciativas como ViaGalicia, Galicia Avanza ou Turislab, que contribúen ao fomento do emprendemento e da innovación en diversos ámbitos.

• A conselleira de Economía e Industria, María Jesús Lorenzana, mantivo hoxe un encontro con representantes do Clúster de Enerxías Renovables de Galicia
• A asociación achegará as súas propostas ao futuro plan director da industria metalmecánica, que contará coas medidas, mecanismos e medios necesarios para fortalecer o sector e mellorar a súa competitividade

Santiago de Compostela, 7 de maio de 2023

A conselleira de Economía e Industria, María Jesús Lorenzana, mantivo hoxe un encontro con representantes do Clúster de Enerxías Renovables de Galicia (Cluergal), con quen avaliou novas vías de colaboración para continuar reforzando este sector, así como as necesidades de desenvolvemento industrial ligadas ás renovables e as posibilidades de instalación en Galicia deste tipo de industria e dos componentes asociados. Neste contexto, a conselleira lembrou tamén que se está a elaborar o plan director da industria metalmecánica, un dos sectores declarados estratéxicos pola Xunta de Galicia xunto coa industria da automoción, a construción naval, o sector forestal-madeira, a industria das TIC e a da loxística.

O plan director contará coas medidas, mecanismos e medios necesarios para fortalecer o sector, mellorar a competitividade, fomentar a súa internacionalización e sustentabilidade, impulsar a innovación industrial, incrementar o emprego e estimular a captación de investimento. Como primeiro fito, levouse a cabo unha consulta pública a través do portal de transparencia e goberno aberto para solicitar a opinión da cidadanía e das organizacións e asociacións máis representativas. Ademais, na elaboración do plan participará o sector privado, representantes dos traballadores e resto de axentes implicados, polo que contará tamén coas achegas de Cluergal.

Os plans directores, xunto co Plan autonómico de impulso e aceleración de proxectos industriais, son instrumentos da planificación da política industrial da Xunta enmarcados nunha estratexia que ten como obxectivo facilitar o proceso de adaptación e transformación enerxética e dixital da industria galega. Antes da súa aprobación por parte do Consello da Xunta de Galicia será necesario o informe do Consello Galego de Economía e Competitividade.

• A conselleira de Economía e Industria, María Jesús Lorenzana, impartiu esta tarde unha clase maxistral na Escola Universitaria de Relacións Laborais da Universidade da Coruña
• Subliña a importancia de apoiar a base industrial para incrementar as oportunidades laborais das persoas que agora están formándose e impulsar o talento galego

A Coruña, 6 de maio de 2024

A conselleira de Economía e Industria, María Jesús Lorenzana, achegou hoxe ao estudantado a política económica e industrial da Xunta como garante dun emprego de calidade para os vindeiros anos. Fíxoo durante unha charla con alumnos da Escola Universitaria de Relacións Laborais da Universidade da Coruña, aos que trasladou a importancia de apoiar o desenvolvemento da base industrial para incrementar as oportunidades laborais das persoas que agora están formándose e impulsar o talento galego. 

Lorenzana apuntou que o sector industrial é un potente factor de innovación e de competitividade, e un ámbito crucial para as transicións ecolóxica e dixital, que contribuirá ao desenvolvemento de novas tecnoloxías, produtos, servizos, mercados e modelos de negocio, configurando, á súa vez, novos tipos de emprego que están por existir e que requirirán novas capacidades.

Dentro do proceso de transformación da industria galega, sinalou que a Xunta está a desenvolver unha estratexia de política industrial que busca, fundamentalmente impulsar novos sectores industriais estratéxicos; detectar e integrar novas cadeas de valor; promocionar a formación, a atracción de talento e o emprego de calidade; e mellorar a competitividade da industria galega a través da innovación, a dixitalización, a sustentabilidade e a internacionalización.

A conselleira de Economía e Industria adiantou que a Xunta vai dar un verdadeiro impulso á Lei de promoción dos beneficios sociais e económicos dos proxectos que utilizan os recursos naturais de Galicia, que ten a finalidade de asegurar a xestión responsable dos recursos naturais de maneira que se protexa o medio ambiente, se cree riqueza e que a riqueza creada impacte no territorio.

A mesma filosofía, dixo, coa que naceu en novembro de 2023 a sociedade Recursos de Galicia (RDG), participada nun 30% pola Xunta, que persegue que o desenvolvemento enerxético sexa equit

• A directora do Igape, Covadonga Toca, visita en Nigrán as instalacións de Marine Instruments, que potenciou a súa presenza nos Estados Unidos cunha misión comercial levada a cabo no marco da liña para grandes empresas do Foexga
• Apunta que este programa, que vén de abrir unha nova convocatoria, permite aproveitar a “experiencia e o saber facer” destas compañías consolidando a aposta do tecido empresarial galego pola internacionalización
• As axudas cobren o 30 % dos gastos subvencionables da participación das grandes empresas nas misións comerciais e feiras internacionais incluídas na programación de actividades internacionais do Plan Foexga

Nigrán (Pontevedra), 3 de maio de 2024

A directora do Igape, Covadonga Toca, visitou hoxe as instalacións de Marine Instruments no polígono de Porto do Molle, en Nigrán (Pontevedra), onde puxo en valor a importancia do “efecto tractor” que grandes empresas galegas dos distintos sectores poden facer de cara a promover e impulsar a saída ao exterior de pemes e autónomos.

Neste sentido, Toca Carús destacou a recente apertura dunha nova convocatoria da liña para grandes empresas do Plan Foexga que ten por obxectivo, precisamente, aproveitar ese “efecto tractor para favorecer a imaxe da economía galega nos mercados exteriores”, fomentando e consolidando a presenza do tecido empresarial da Comunidade nos mercados internacionais, e acadando unha maior diversificación, tanto sectorial como xeográfica, das exportacións galegas.

“Esta liña permítenos valernos da experiencia e o saber facer das compañías galegas, potenciando a súa presenza no exterior e aproveitando as sinerxías para que pemes e autónomos aposten tamén pola busca de novos mercados”, afondou Toca Carús.

A directora do Igape puxo como exemplo da produtividade do Plan Foexga á propia Marine Instruments, que a través desta liña asistiu o ano pasado a Feira Auvsi Xponential en Denver (Estados Unidos). “Estamos a falar do principal congreso mundial no sector da tecnoloxía e desenvolvemento de sistemas non tripulados e autónomos”, explicou, sinalando que a misión comercial permitiu á compañía manter tamén reunións con algunhas das principais empresas do sector de vehículos non tripulados, ampliando a súa rede comercial en beneficio do tecido produtivo galego.

Toca Carús lembrou que este programa, que desenvolve a Consellería de Economía e Industria, a través do Igape e en colaboración coas cámaras de comercio galegas, aspira este ano a que arredor de 40 grandes empresas tomen parte nas accións de promoción, aproveitando o seu efecto tractor para favorecer a imaxe da economía galega nos mercados exteriores.

Para esta convocatoria prevense máis de 60 mercados prioritarios de acción comercial entre os que se sitúan China, India, Xapón, Reino Unido, Alemaña, Marrocos, Brasil, México, Emiratos Árabes, Estados Unidos ou Canadá, así como outros países para os que se xustifique a idoneidade do mercado para as empresas galegas.

Desde o ano 2019 o Goberno galego ten destinado máis de 1,5 millóns á organización destas misións internacionais, cunha participación media de 40 grandes empresas. Unha liña á que se suma o tradicional Plan Foexga para pemes e autónomos, activado no 2014, e que suma ata o de agora outros 14 millóns cunha participación media anual de máis de 170 pemes, o que ten permitido impulsar actuacións en 70 países diferentes.

“Con este tipo de actuacións potenciamos a colaboración co tecido empresarial galego para seguir a acadar rexistros históricos nas nosas exportacións”, resaltou a directora do Igape, que lembrou que Galicia vén de lograr o seu récord histórico en exportacións: máis de  30.000 millóns ao peche de 2023.

Unha tendencia que se consolida este ano. Galicia exportou en febreiro, último mes coñecido, por valor de 2.463,4 millóns de euros, un 13,4 % máis que no mesmo mes do ano anterior.

• A conselleira de Economía e Industria visitou en Vigo as instalacións desta compañía, da que forman parte máis de 20 empresas que integran a pesca, a transformación e a comercialización de produtos do mar

Vigo, 2 de maio de 2024

A conselleira de Economía e Industria, María Jesús Lorenzana, visitou hoxe en Vigo as instalacións do Grupo Pereira, que destacou como exemplo da aposta pola innovación e a dixitalización da cadea mar industria galega. Do mesmo xeito, sinalou o carácter exportador e a aposta pola responsabilidade social empresarial deste grupo familiar, fundado en 1955 e que integra máis de 20 empresas dedicadas á pesca, elaboración, comercialización e distribución de produtos do mar. 

Partindo do sector extractivo, Grupo Pereira, que conta coa colaboración do Igape e do Inega en diferentes proxectos, soubo completar o círculo e afondar na busca de valor engadido, entrando na transformación e comercialización dos produtos. Dispón de filiais en Senegal, Mauritania, Namibia, Sudáfrica e Malvinas. 

O complexo mar-industria de Galicia achega preto do 5% do PIB de Galicia e ten un papel fundamental na vertebración do territorio, xa que se estende por toda a costa e permite fixar poboación. A Comunidade, que alberga todas as fases do proceso, é a 11ª exportadora mundial de produtos de pesca, por diante de Xapón ou Islandia, e os seus produtos chegan a máis de 120 países. 

A recente aprobación do Perte da cadea mar-industria, demandado de maneira reiterada polo sector, pode supoñer unha oportunidade para a transformación industrial, dixital e medioambiental das empresas desta cadea industrial. 

• A conselleira de Economía e Industria, María Jesús Lorenzana, visitou hoxe o Concello do Porriño, adherido desde febreiro á rede de Concellos Emprendedores
• Destaca que a figura dos Concellos Emprendedores vai ser moi importante nesta lexislatura en que a Xunta vai redobrar a súa aposta pola industria
• “Ese pacto pola industria e a enerxía que o presidente Rueda ofreceu a todos os partidos e administracións pódese facer realidade dando pasos coma este, onde todos teñamos claro que para continuar avanzando na industria e no emprego é necesario a colaboración entre administracións e a colaboración público-privada”, asegura

O Porriño (Pontevedra), 30 de abril de 2024

A conselleira de Economía e Industria, María Jesús Lorenzana, apelou hoxe ao traballo coordinado entre a Administración autonómica e os Concellos Emprendedores para incentivar a actividade empresarial e a implantación de tecido industrial en Galicia.

Nunha visita ao Concello do Porriño que, desde febreiro este ano, conta con esta distinción, Lorenzana destacou que a figura dos Concellos Emprendedores vai ser moi importante nesta lexislatura en que a Xunta vai redobrar a súa aposta pola industria. Esta iniciativa, dixo, “encaixa perfectamente co pulo industrial que o presidente Rueda quere poñer como un dos acentos e das cuestións máis importantes a liderar nesta lexislatura”.

Segundo apuntou, a día de hoxe, en Galicia hai rexistrados 156 Concellos Emprendedores; 25 deles, na provincia de Pontevedra. Esta condición outorga a estes municipios preferencia á hora de optar a ordes de axuda da Xunta que teñan que ver coa industria, o comercio ou o impulso ao emprego, entre outras. Se se trata de convocatorias de subvencións en réxime de concorrencia competitiva dirixidas a empresas, autónomos ou entidades sen ánimo de lucro asentadas nun Concello Emprendedor, preverase un criterio de valoración específico que, no baremo de puntuación, supoña entre o 5 % e o 10 % do total.

Por outra banda, con respecto aos compromisos que adquiren os Concellos Emprendedores son, entre outros: resolver as licenzas de obra no prazo máximo de 30 días naturais, unha vez que se dispoña de toda a documentación e informes; establecer bonificacións aos prezos das parcelas de titularidade municipal; ofrecer ás empresas a posibilidade de acudir ao dereito de superficie; dar tramitación urxente aos procedementos relacionados coas iniciativas empresariais prioritarias; e aprobar bonificacións fiscais de ata o 95 % en impostos municipais como son o IBI, o IAE e o ICIO.

En palabras de Lorenzana, pertencer a esta rede supón un compromiso por parte do Concello e da Xunta por impulsar a axilización administrativa. Nese sentido, salientou que a Administración autonómica está traballando a través da Oficina Económica do Igape en axilizar os trámites para calquera empresa. Tamén en fomentar a implantación de nova industria co plan de aceleración de proxectos industriais estratéxicos, que compromete un prazo de tramitación de menos dun ano. E, en terceiro lugar, en poñer solo industrial de maneira áxil para todas as empresas.

A conselleira concluíu convidando ao resto de concellos galegos que aínda non o fixeron, a sumarse á rede de Concellos Emprendedores. “Ese pacto pola industria e a enerxía que o presidente Rueda ofreceu a todos os partidos e administracións pódese facer realidade dando pasos coma este, onde todos teñamos claro que para continuar avanzando na industria e no emprego é necesario a colaboración entre administracións e a colaboración público-privada”, remarcou.

Nova convocatoria das Bolsas Igape Internacional 2024. Tes de prazo ata o 22 de xullo de 2024 para solicitar a túa bolsa.

Este é un programa que busca formar especialistas no ámbito da internacionalización empresarial a través de formación práctica nas Oficinas Comerciais e Económicas, tanto no estranxeiro como en Galicia.

Os mozos e mozas realizarán labores de investigación de mercados, estudos de empresas e a súa planificación para internacionalización e investigación das posibilidades de cooperación internacional entre empresas galegas e estranxeiras:

• Duración: 1 ou 2 anos
• Destinos en 25 países
• Alta empregabilidade

A convocatoria vai dirixida a persoas menores de 35 anos, con titulación universitaria superior, e achegará formación práctica en internacionalización que se poderá levar a cabo no estranxeiro e ou en Galicia, en entidades e organismos oficiais relacionados coa internacionalización empresarial.

Os países en que os seleccionados completarán a súa formación no estranxeiro inclúen novos mercados internacionais, algúns deles de interese estratéxico para o tecido empresarial galego. Así, os bolseiros terán como posibles destinos, entre outros, Bogotá, Casablanca, Chicago, Dubai, Dusseldorf, Johannesburgo, Kuala Lumpur, Lima, México, Miami, Montevideo, Oslo, Ottawa, Roma, Seúl, Singapur, Tokio, Varsovia ou Yakarta.

A iniciativa contribúe así á capacitación profesional de novos titulados na internacionalización de empresas, á mellora da súa empregabilidade para facilitar o seu acceso ao mercado laboral e ao desenvolvemento de proxectos de internacionalización das pemes galegas nos cales colaborarán os bolseiros achegando os seus coñecementos ao tempo que reforzan a súa formación práctica.

A programación das bolsas abrangue o estudo dos sectores máis importantes dos mercados estranxeiros, a análise das oportunidades e debilidades dos sectores estratéxicos galegos en relación coa súa internacionalización e o estudo das formas de introdución das empresas nos mercados internacionais, contando para a aprendizaxe co apoio de titores tanto nas estadías no estranxeiro como en Galicia.

Máis información

• Información da axuda (Publicada 21/06/2024)
• Acta 1: Constitución do Comité de Selección (Publicada 24/06/2024)
• Acta 2: Convocatoria de probas de idioma (Publicada 24/06/2024)
• Acta 3: Acreditación do nivel de idiomas indicados na solicitude (Publicada 25/06/2024)
• Acta 4: Sobre a acreditación dos títulos de grao universitario obtidos no estranxeiro ou en centros privados españois (art. 4.3) (Publicada 08/07/2024)
• Acta 5: Sobre os certificados de idiomas admitidos (Art. 4.4 e 5.2) e previsión de horarios da proba de idiomas do 24 de xullo (Publicada 18/07/2024)
• Acta 6: Previsión de datas para a entrevista persoal (Publicada 29/07/2024)
• Acta 7: Resultados das probas de idiomas e certificados de admitidos, quenda para entrevista persoal e listado de destinos provisionais (Publicada 08/08/2024)
• Anexo I Acta 7 (Publicada 08/08/2024)
• Lista destinos provisionais Acta 7 (Publicada 08/08/2024)
• Acta 8: Lista provisional de solicitudes admitidas e excluídas e puntuación obtida no baremo (Publicada 16/09/2024)
• Acta 9: Lista provisional de solicitudes admitidas e excluídas e puntuación obtida no baremo (corrección de erros) (Publicada 17/09/2024)
• Acta 10: Sobre certificados de idioma admitidos e baremación de graos (Publicada 30/09/2024)
• Información: Listaxe de candidatos admitidos con asignación de destinos e dotacións (Publicada 10/10/2024)

• O Diario oficial de Galicia publica unha nova convocatoria de axudas paro o impulso da transformación industrial e para reforzar a aposta dixital de pemes e autónomos galegos
• Os apoios serán do 35% dos investimentos para as pequenas empresas, e do 25% para as medianas, mentres que para os gastos de consultaría, a intensidade de subvención será do 50%
• Como novidade, nesta convocatoria introdúcese por primeira vez unha liña específica que atende á dixitalización dos procesos loxísticos, e se favorece tamén a implantación de iniciativas que se leven a cabo nun concello emprendedor

Santiago de Compostela, 27 de abril de 2024

O Diario Oficial de Galicia vén de publicar unha nova convocatoria do programa de apoio á dixitalización, que este ano destina 5 millóns de euros ao impulso da transformación industrial e a reforzar a aposta dixital de pemes e autónomos galegos. Neste sentido, a liña potencia o compromiso do Goberno da Xunta neste eido, na procura de mellorar a competitividade do tecido produtivo e de promover unha transformación dixital cada vez máis necesaria no actual contexto económico.

Por este motivo, a Consellería de Economía e Industria, a través do Igape, activa esta nova convocatoria que persegue apoiar a posta en marcha de sistemas cuxa finalidade sexa o soporte de procesos sectoriais multiempresa, como poden ser ordes de fabricación distribuída, sistemas de facturación, procesos entre un líder industrial cara ás empresas que conforman a súa cadea de valor ou proxectos individuais cara á dixitalización ou conectividade da peme.

As axudas, cuxo prazo de presentación de solicitudes permanecerá aberto ata o 27 de maio, serán do 35% dos investimentos para as pequenas empresas, e do 25% para as medianas. Así mesmo, para os gastos de consultaría, a intensidade da axuda ascenderá ata o 50%. Como novidade, favorécese a implantación de iniciativas que se leven a cabo nun concello emprendedor.

Deste xeito, impulsaranse dous tipos de accións. Dun lado, proxectos colectivos nos que un grupo de empresas abordará, de forma conxunta, a implantación de sistemas dixitais, xa sexa nas súas interaccións ou nos procesos de xestión. Doutro, iniciativas individuais nas que unha peme ou un autónomo poderá promover interfaces dixitais, sistemas de intelixencia artificial, sistemas para a dixitalización, ou sistemas de mellora da función loxística da empresa, no que se configura como outra das principais novidades desta convocatoria.

De feito, este apartado loxístico cobre actuacións como a robotización dos procesos, a xeolocalización de cargas ou medios de transporte, a aplicación de vehículos autónomos, a reciclaxe de materiais de envasado, a aplicación da realidade virtual ou aumentada a estes procesos, ou a monitorización da pegada de carbono no transporte e a distribución de mercadorías de cara á súa redución. 

Deste xeito, o Goberno galego mantén a súa aposta pola dixitalización do tecido empresarial da Comunidade como un dos eixos prioritarios de actuación dentro da política económica, na procura de cara a mellorar a súa competitividade e acadar o crecemento económico.

• A conselleira de Economía e Industria, María Jesús Lorenzana, abriu hoxe a Asemblea Xeral da Asociación Galega de Áridos (Arigal)
• Avanza que, no marco da Axenda de Impulso á Minaría Sostible de Galicia, a Xunta está pechando un convenio de colaboración con Arigal que recolle diferentes actuacións para dar a coñecer este sector e as súas potencialidades en diversos ámbitos; entre eles, o educativo
• Lembra o pacto pola industria que quere promover o Goberno galego e subliña que a Xunta “vai seguir defendendo de maneira intensa o feito de que o desenvolvemento industrial e enerxético da nosa comunidade autónoma é compatible co medio ambiente”

Santiago de Compostela, 26 de abril de 2024

A conselleira de Economía e Industria, María Jesús Lorenzana, abriu hoxe a Asemblea Xeral da Asociación Galega de Áridos (Arigal) onde resaltou o compromiso do sector en Galicia coa sustentabilidade, a capacitación técnica dos profesionais e a seguridade e saúde laboral.

Na súa intervención, Lorenzana puxo o acento na importancia da formación e avanzou que, no marco da Axenda de Impulso á Minaría Sostible de Galicia, a Xunta está pechando un convenio de colaboración con Arigal que recolle diferentes actuacións para dar a coñecer este sector e as súas potencialidades en diversos ámbitos; entre eles, o educativo.

A conselleira cualificou a minaría como un sector estratéxico para a economía galega porque proporciona materias primas a moitos dos sectores considerados fundamentais neste momento: as enerxías renovables, a automoción, a aeronáutica, o turismo, a construción ou a enxeñaría civil. Unha industria, indicou, que actúa como un dinamizador económico do rural galego e que tamén está facendo avances de cara á neutralidade climática.

Neste contexto, e lembrando o pacto pola industria que quere promover o Goberno galego, aludiu á Lei de promoción dos beneficios sociais e económicos dos proxectos que utilizan os recursos naturais de Galicia por ser unha norma que afonda na sustentabilidade e que, ao igual que fai a sociedade Recursos de Galicia, vela por que os beneficios dese aproveitamento “queden en Galicia”. “Desde a Xunta imos seguir defendendo de maneira intensa o feito de que o desenvolvemento industrial e enerxético da nosa comunidade autónoma é compatible co medio ambiente”, dixo, para subliñar: ”Somos rigorosos nas tramitacións medioambientais e podemos afirmar isto e dar tranquilidade”.

No plano da tramitación administrativa, Lorenzana referiuse, tamén, ao compromiso do Goberno galego coa desburocratización a través da Oficina Económica do Igape, á que “calquera empresa pode acceder e en sete días se lle fará unha planificación e se lle dará un acompañamento adecuado ás súas necesidades”. E tamén apuntou, entre as vantaxes do plan de aceleración de proxectos industriais da Administración autonómica, que para as iniciativas con interese en instalarse na Comunidade que superen os 800.000 euros de investimento e non obteñan en prazo a licenza do Concello correspondente, van obtela por parte da Xunta. Ao respecto, lembrou que agora que a Consellería de Economía e Industria dispón das competencias en materia de solo industrial, ese asesoramento ás empresas vai ser integral, dixo.

A conselleira finalizou apelando ao diálogo e á colaboración público-privada, e felicitando a Arigal polos seus 25 anos de traxectoria.