• Balidea foi unha das 52 beneficiarias da liña de axudas para certificacións (1,5 M€) que a Xunta convocou por primeira vez este ano, e que é unha das medidas que recolle a Estratexia de Seguridade, Defensa e Aeroespazo (Iesda) para as empresas que queiran dar o salto cara a esta industria
• “Sempre dicimos que calquera empresa de sectores civís pode sumarse a esta estratexia, e Balidea é unha boa mostra”, di

Santiago de Compostela, 4 de setembro de 2026

A conselleira de Economía e Industria, María Jesús Lorenzana, visitou hoxe as instalacións da tecnolóxica galega Balidea, onde destacou as achegas que as empresas do sector TIC poden facer á industria da seguridade e a defensa.

Lorenzana cualificou Balidea como “unha das principais empresas tecnolóxicas de Galicia e de España”, con case 25 anos de traxectoria, e que neste momento “está dando pasos” cara a estes sectores, onde este tipo de compañías están xa desenvolvendo tecnoloxías duais, abondou.

Segundo indicou, é unha empresa que foi unha das 52 beneficiarias da liña de axudas para certificacións (1,5 M€) que a Xunta convocou por primeira vez este ano, e que é unha das medidas que recolle a Estratexia de Seguridade, Defensa e Aeroespazo (Iesda) para as empresas que queiran dar o salto cara a esta industria. “Sempre dicimos que calquera empresa de sectores civís pode sumarse a esta estratexia, e Balidea é unha boa mostra”, asegurou.

Xunto con isto, a conselleira tamén apuntou que foi tamén unha empresa que concorreu ás dúas convocatorias da liña IA360. Esta última edición, que pechou en agosto, contou cun investimento público de 10 millóns de euros, e deu apoio a 97 proxectos (43 de desenvolvemento tecnolóxico e 54 de solucións IA).

• Lembra que a Xunta vén de resolver en agosto as convocatorias de axudas dos programas IA360, Igape Innova e Ticket Innova que concederá case 15 millóns de euros en axudas directas á innovación empresarial a máis de 500 empresas de Galicia
• Sinala que estes apoios enmárcanse na Estratexia Galega de Innovación 2026-2028 que busca reforzar a innovación como un dos piares da “nosa política industrial para impulsar a produtividade, a competitividade e o crecemento económico”

Pontevedra, 2 de setembro de 2026

A conselleira de Economía e Industria, María Jesús Lorenzana, destacou hoxe a aposta da Xunta pola innovación para crear un ecosistema industrial atractivo que permita captar novas empresas e atraer talento.

Lorenzana, visitou en Pontevedra as instalacións de Hifas da Terra, unha empresa biotecnolóxica especializada no desenvolvemento de proxectos relacionados coa saúde e o benestar a partir de fungos, onde destacou a importancia de incentivar a innovación tecnolóxica para que as empresas “poidan incrementar as oportunidades de gañar conta de mercado”, dixo. “Dándolles respaldo axudámoslles a modernizar os seus procesos para adaptarse aos mercados cada vez máis dinámicos e competitivos”, engadiu.

Neste marco, lembrou que o Goberno galego vén de resolver este mes de agosto as convocatorias de axudas dos programas IA360, Igape Innova e Ticket Innova que permitirán conceder case 15 millóns de euros en axudas directas á innovación empresarial a máis de 500 empresas de Galicia.

En concreto, no Ticket Innova concedéronse 66 axudas por importe de un millón de euros; na liña de Igape Innova concedéronse case catro millóns de euros que beneficiarán a 40 proxectos, e coa IA360 apoiáronse 97 proxectos cun investimento público de 10 millóns. “As tres liñas configuran unha oferta integral de apoio á innovación das empresas galegas”, subliñou.

Estes apoios enmárcanse na Estratexia Galega de Innovación 2026-2028 que busca reforzar a innovación como un dos piares da nosa política industrial para impulsar a produtividade, a competitividade e o crecemento económico.

Finalmente, a titular de Economía e Industria, María Jesús Lorenzana, felicitou a todo o equipo de profesionais de Hifas da Terra, que con case 30 anos de historia xa ten presenza en máis de 25 países do mundo con sociedades filiais en Francia, Alemaña, Italia e Reino Unido.

Santiago de Compostela, 2 de setembro de 2026

A conselleira de Economía e Industria, María Jesús Lorenzana, felicitou esta mañá á empresa galega Vig-Sec Drone, tras ser seleccionada para formar parte do programa de aceleración DIANA (Defence Innovation Accelerator for the North Atlantic) que impulsa a OTAN. Vaino facer coa plataforma de xestión e coordinación táctica do espazo aéreo de media e baixa cota denominada Suite ACRE, no marco da fase Mission Track. 

Lorenzana, que a pasada semana visitou as instalacións que esta firma pontevedresa ten no municipio de Nigrán, celebrou que a tecnolóxica galega especializada en servizos aeronáuticos, formación e desenvolvemento de software de xestión de espazo aéreo, forme parte dun selecto grupo de 15 empresas a nivel mundial cuxas solucións innovadoras son consideradas de alto valor engadido para os países da que integran a OTAN. Precisamente, a participación nesta fase da aceleradora tecnolóxica daralles a posibilidade de presentar a súa tecnoloxía aos departamentos de Defensa dos países que integran a Alianza. 

Finalmente, a titular de Economía e Industria lembrou que Vig-Sec Drone creceu co apoio da Xunta de Galicia a través de aceleradoras como a BFAero ou ViaGalicia, así como coa participación directa de Xesgalicia no seu capital.

• Ofrécelle participar na convocatoria dos acordos de asociación; “o instrumento máis potente que ten a estratexia”, di, cun orzamento de 40 M€
• Apunta que Thune Eureka xa foi beneficiaria da liña de apoios que tamén recolle a Iesda para certificacións
• Considera a compañía “unha mostra máis desas empresas familiares que, desde Galicia, son quen de chegar a todo o mundo”

Vilagarcía de Arousa (Pontevedra), 31 de agosto de 2026

A conselleira de Economía e Industria, María Jesús Lorenzana, convidou hoxe a Thune Eureka a sumarse á Iniciativa Estratéxica de Seguridade, Defensa e Aeroespazo (Iesda) que, neste momento, ten aberta cun orzamento de 40 millóns de euros a convocatoria dos acordos de asociación, para conformar consorcios empresariais que desenvolvan e fabriquen en Galicia produtos ou servizos neste ámbito.

“Estamos traballando coas empresas galegas que teñen capacidade para incorporarse a este sector”, explicou Lorenzana nunha visita ás instalacións desta compañía para estudar as posibilidades de que participe nesta convocatoria; “o instrumento máis potente que ten a estratexia”, dixo, co prazo aberto ata o vindeiro 30 de setembro.

A conselleira apuntou que Thune Eureka xa foi beneficiaria da liña de apoios que tamén recolle a Iesda para certificacións, que contou cun orzamento de 1,5 millóns de euros. Con ela, abondou, a Xunta busca “apoiar o empresariado galego para que, pouco a pouco, vaia entrando neste mundo, ás veces, complicado para as empresas do ámbito civil”.

Con máis de 50 anos de historia, Thune Eureka está especializada na fabricación de equipos e compoñentes para diversos sectores como o da construción naval, o offshore, a industria frigorífica ou o sector da defensa, entre outros. É, dixo Lorenzana, “unha mostra máis desas empresas familiares que, desde Galicia, son quen de chegar a todo o mundo”.

Moraña (Pontevedra), 28 de agosto de 2026

A conselleira de Economía e Industria, María Jesús Lorenzana, visitou hoxe en Moraña Celtic Estores, onde puxo de manifesto o peso económico das empresas familiares galegas e a súa adaptación constante aos retos da transformación dixital ou a sustentabilidade.

Lorenzana apuntou que en Galicia, actualmente, operan máis de 60.500 empresas familiares e, nos últimos dez anos, o seu impacto económico duplicouse. En 2025, estas empresas contribuíron ao PIB autonómico con 40.800 millóns de euros, un 130 por cento máis que en 2015.

• A directora do Igape, Covadonga Toca, coñece de primeira man a evolución desta empresa innovadora, especializada no desenvolvemento de solucións avanzadas para os ámbitos farmacéutico, sanitario e cosmético
• A compañía contou co apoio da Consellería de Economía e Industria, a través do Igape, en distintas fases do seu crecemento mediante programas como as axudas para startups, e as liñas Igape Innova ou Tícket Innova
• A Xunta reforza a súa aposta polo emprendemento innovador para favorecer a creación de novas empresas, impulsar a innovación e consolidar un ecosistema emprendedor competitivo en Galicia

Santiago de Compostela, 27 de agosto de 2026

A Xunta de Galicia puxo hoxe a Smart Vitamins como exemplo do potencial do ecosistema startup galego durante a visita que a directora do Instituto Galego de Promoción Económica (Igape), Covadonga Toca, realizou ás instalacións da compañía. A empresa exemplifica o modelo de apoio da Consellería de Economía e Industria ao emprendemento innovador, acompañando ás startups desde as súas primeiras fases de desenvolvemento ata a súa consolidación e crecemento.

Durante o percorrido, a directora coñeceu de primeira man a evolución da empresa e os seus proxectos de investigación e desenvolvemento, baseados nunha tecnoloxía propia de nanoencapsulación que permite mellorar a administración e a biodispoñibilidade de compostos activos para o desenvolvemento de novos produtos destinados aos ámbitos farmacéutico, sanitario, nutracéutico e cosmético.

Ao longo da súa traxectoria, Smart Vitamins contou co apoio do Igape a través de diferentes instrumentos adaptados ás distintas etapas do seu desenvolvemento empresarial, entre eles as Axudas a Startups, Igape Innova e, máis recentemente, Ticket Innova, que lle permitiron impulsar novos proxectos de I+D, desenvolver solucións innovadoras e reforzar a súa capacidade competitiva.

Como destacou Covadonga Toca, casos como o de Smart Vitamins evidencian a capacidade do ecosistema emprendedor galego para transformar coñecemento e innovación en proxectos empresariais con alto valor engadido, capaces de medrar, atraer talento e competir nos mercados nacionais e internacionais.

Neste contexto, a directora lembrou que o apoio ao emprendemento innovador constitúe un dos eixos estratéxicos da política económica da Xunta, complementándose con iniciativas como a Rede de Business Factories, un modelo pioneiro de aceleración especializada que impulsa a creación e consolidación de empresas innovadoras en sectores estratéxicos para Galicia.

A través deste conxunto de instrumentos, a Xunta acompaña ás startups nas diferentes etapas do seu desenvolvemento, facilitando o acceso ao financiamento, á innovación, á aceleración empresarial e á colaboración co ecosistema científico, tecnolóxico e industrial galego. O obxectivo é favorecer que máis proxectos innovadores se convertan en empresas competitivas, con capacidade para crecer, desenvolver tecnoloxía propia, atraer investimento e xerar emprego cualificado en Galicia.

• É a través dos acordos de asociación, cuxa convocatoria aínda está aberta ata o 30 de setembro, e que constitúe unha das principais medidas da Iniciativa Estratéxica de Seguridade, Defensa e Aeroespazo (Iesda)
• A partir da fórmula da Compra Publica Precomercial o obxectivo é financiar proxectos en fases de innovación moi avanzadas

Nigrán (Pontevedra), 26 de agosto de 2026

A conselleira de Economía e Industria, María Jesús Lorenzana, destacou hoxe que, a través dos acordos de asociación, cuxa convocatoria aínda está aberta ata o 30 de setembro, a Xunta destina un investimento público de 40 millóns de euros para promover o desenvolvemento e a fabricación en Galicia de produtos e servizos nos sectores da defensa, a seguridade e o aeroespazo.

Nunha visita ás instalacións da empresa Vig-Sec Drone, en Nigrán, Lorenzana explicou que se trata dunha das principais medidas que o Goberno galego está a desenvolver no marco da Iniciativa Estratéxica de Seguridade, Defensa e Aeroespazo (Iesda) a partir da fórmula da Compra Publica Precomercial, coa que se van financiar proxectos en fases de innovación moi avanzadas, dixo.

Cunha mobilización prevista de 900 millóns de euros, o obxectivo desta estratexia, apuntou, é potenciar o crecemento das empresas que xa operan nestes sectores e facilitar a incorporación daquelas outras que xa están traballando en tecnoloxías duais; é dicir, que poden ter aplicacións tanto de uso civil como para defensa e seguridade.

Neste contexto, Lorenzana puxo en valor o traballo que desenvolve Vig-Sec Drone, especializada en servizos aeronáuticos, formación e desenvolvemento de software de xestión de espazo aéreo. Unha empresa que, lembrou, participou en aceleradoras como ViaGalicia, a BFAero e, tamén, na Aceleradora de Innovación en Defensa da OTAN.

• A convocatoria pechou o prazo de presentación cunha elevada participación, confirmando a aposta das empresas galegas pola dixitalización como panca de competitividade
• O programa apoia proxectos de automatización de procesos, sistemas de xestión, ciberseguridade, loxística, solucións ASG e canles dixitais de relación con terceiros
• Desde 2018, a iniciativa permitiu apoiar 1.421 proxectos, con 28,55 millóns de euros en axudas que mobilizaron máis de 70 millóns en investimentos

Santiago de Compostela, 21 de agosto de 2026.

A Xunta de Galicia vén de pechar o prazo de presentación de solicitudes da convocatoria de axudas á transformación dixital das pemes, impulsada pola Consellería de Economía e Industria, a través do Igape, cunha elevada resposta do tecido empresarial galego: rexistráronse 399 solicitudes, un 196 % máis que na edición anterior que houbo 203 peticións. O interese amosado confirma, un ano máis, a aposta das empresas pola transformación dixital como un factor clave para mellorar a súa competitividade, produtividade e capacidade de adaptación aos novos retos do mercado. Agora haberá que agardar á resolución para coñecer cantas resultan finalmente concedidas.

A convocatoria, dotada con tres millóns de euros, permite apoiar proxectos orientados á implantación e posta en produción de solucións dixitais que melloren os procesos internos das empresas, as súas relacións comerciais e operativas con terceiros e a súa interconexión dixital na cadea de valor. Deste xeito, a Xunta continúa acompañando ao tecido produtivo galego na incorporación de tecnoloxías que favorecen a modernización e o crecemento empresarial.

Entre as actuacións subvencionables inclúense proxectos de dixitalización e automatización de procesos, implantación de sistemas integrais de xestión, desenvolvemento de interfaces e canles dixitais de relación con clientes e provedores, mellora da función loxística, actuacións de ciberseguridade e solucións tecnolóxicas orientadas á medición e seguimento de criterios ambientais, sociais e de gobernanza (ASG). A convocatoria incorporou, ademais, actuacións específicas vinculadas ás solucións en nube e en modalidade SaaS, adaptándose así aos novos retos tecnolóxicos das pemes galegas.

A elevada demanda rexistrada pon de manifesto que esta liña responde ás necesidades reais das empresas e consolídase como un dos principais instrumentos da Xunta para acelerar a transformación dixital e a modernización do tecido produtivo galego. A través desta iniciativa, a Consellería de Economía e Industria reforza o apoio a proxectos con implantación efectiva e resultados verificables, orientados a incrementar a eficiencia, a innovación e a competitividade das pemes.

O programa conta cunha ampla traxectoria desde a súa posta en marcha en 2018. Neste período apoiáronse 1.421 proxectos promovidos por autónomos e pemes galegas, cun volume de 28,55 millóns de euros en axudas que permitiu mobilizar máis de 70 millóns de euros en investimentos, consolidándose como unha ferramenta de referencia para impulsar a dixitalización empresarial en Galicia.

Con esta convocatoria, a Xunta continúa avanzando na súa estratexia de reforzar a competitividade do tecido empresarial galego mediante a innovación e a transformación dixital, contribuíndo a que as pemes incorporen tecnoloxías avanzadas que lles permitan afrontar con maiores garantías os desafíos da economía actual e aproveitar novas oportunidades de crecemento.

A Coruña, 10 de agosto de 2026

A directora xeral de Estratexia Industrial e Solo Empresarial, Margarita Ardao, destacou hoxe na Coruña o papel da Iniciativa Estratéxica de Seguridade, Defensa e Aeroespazo (Iesda) como instrumento para impulsar as capacidades de Galicia neste sector. Durante unha visita ao Instituto Tecnolóxico de Galicia, Ardao sinalou que a Xunta vai destinar 183 millóns de euros en cinco anos e que aspira a mobilizar máis de 900 millóns público-privados.

Neste marco, a directora xeral explicou as dúas grandes convocatorias xa en marcha dentro da Iesda. Por un lado, lembrou que as empresas galegas aínda teñen ata o 30 de setembro para participar nos acordos de asociación para desenvolver grandes proxectos industriais de tecnoloxías duais que se fabriquen en Galicia, unha medida para a que o Goberno galego destinará 40 millóns de euros mediante a fórmula da Compra Publica Precomercial. E por outro, puxo en valor a primeira convocatoria de axudas cun orzamento de 1,5 millóns de euros para facilitar que as empresas galegas obteñan certificacións como subministradoras para o sector da seguridade e a defensa.

• O prazo para presentar solicitudes está aberto ata o vindeiro 30 de setembro
• A Xunta destinará 40 M€ a estes acordos, unha das principais medidas da Iniciativa Estratéxica de Seguridade, Defensa e Aeroespazo (Iesda)
• A conselleira salienta que compañías como Centum demostran que en Galicia se pode facer tecnoloxía de primeiro nivel que compite en mercados internacionais

Vigo, 7 de agosto de 2026

A conselleira de Economía e Industria, María Jesús Lorenzana, lembrou hoxe en Vigo que as empresas galegas aínda teñen ata o 30 de setembro para participar nos acordos de asociación para desenvolver grandes proxectos industriais de tecnoloxías duais que se fabriquen en Galicia.

Nunha visita ás instalacións da empresa Centum, Lorenzana explicou que estes acordos de asociación constitúen unha das principais medidas que o Goberno galego está a desenvolver no  marco da Iniciativa Estratéxica de Seguridade, Defensa e Aeroespazo (iesda) á que a Xunta destinará 40 millóns de euros mediante a fórmula da Compra Publica Precomercial, que permitirá impulsar o desenvolvemento de solucións tecnolóxicas innovadoras nos ámbitos da seguridade, defensa e o aeroespazo.

A través desta actuación, pioneira en España, a Xunta busca atraer grandes proxectos de innovación e desenvolvemento tecnolóxico; e como novidade, que “estas solucións tecnolóxicas se fabriquen en Galicia” destacou Lorenzana, que recordou que a previsión é chegar a conformar entre dous e 15 consorcios empresariais e aprobar a adxudicación no primeiro semestre de 2027.

Por outra banda, a conselleira referiuse tamén á primeira convocatoria de axudas cun orzamento de 1,5 millóns de euros posta en marcha polo Executivo autonómico para facilitar que as empresas galegas obteñan certificacións como subministradoras para o sector da seguridade e a defensa.

Neste marco, apuntou que se trata de empresas de ámbitos tan diversos como o naval, o metalmecánico, o aeroespacial, o tecnolóxico, o transporte, o mantemento industrial, a automoción, a electricidade e a electrónica, a consultaría, a construción, a enxeñaría ou a fabricación aditiva. Isto, engadiu, demostra o interese da industria galega por diversificarse cara a este mercado.

Durante a visita a Centum, a titular de Economía e Industria puxo en valor a súa traxectoria como exemplo de empresa galega “que ten demostrado que en Galicia se pode facer tecnoloxía de primeiro nivel que compite no mercado internacional,” sinalou. Isto posiciona á Comunidade como referente no sector aeroespacial que “é o obxectivo de fondo da nosa estratexia”, concluíu.