• A conselleira de Economía e Industria, María Jesús Lorenzana, visitou hoxe as instalacións da empresa Marine Instruments
• A conselleira destaca que Marine Instruments aplica xa a tecnoloxía ao medio mariño a través de distintos produtos e servizos
• Pon en valor que a tecnoloxía e a innovación é unha parte fundamental para que as empresas poidan seguir crecendo
• Lembra que o Igape publicou esta mesma semana o primeiro paquete de axudas para fomentar a innovación do tecido produtivo galego con máis de 15 millóns de euros

Nigrán (Pontevedra), 15 de xaneiro de 2025

A conselleira de Economía e Industria, María Jesús Lorenzana, animou hoxe ás empresas galegas a diversificar mercados e explorar as oportunidades de negocio que ofrece o sector da Seguridade e a Defensa.

Lorenzana, visitou as instalacións de Marine Instruments onde subliñou que “para a Xunta é un orgullo que unha empresa galega coma esta sexa punteira e estea absolutamente internacionalizada con establecementos en máis de 30 localizacións no mundo”. Durante a súa intervención, explicou que Marine Instruments aplica xa a tecnoloxía ao medio mariño a través de distintos produtos e servizos e puxo en valor que o seu éxito “está no talento que temos aquí pero tamén en como souberon facer esa diversificación e internacionalización do produto”.

Segundo expuxo, isto “é unha mostra de como a tecnoloxía e a innovación é parte fundamental para que as empresas poidan seguir crecendo e tamén para ver as posibilidades que ofrece a dualidade das tecnoloxías entre a parte civil e a parte de Seguridade e Defensa”, dixo.

Ademais, a titular de Economía e Industria, puxo en valor que precisamente niso é no que está traballando a Xunta no sector aeronáutico “tratando de que as empresas apliquen procedementos industriais duais” para mellorar a competitividade da industria, fomentar a súa internacionalización, e impulsar a innovación empresarial.

Neste marco, lembrou que o Goberno galego acaba de publicar “o primeiro paquete de axudas do Igape para a innovación das empresas” con máis de 15 millóns de euros, e sinalou que “continuamos a traballar na estratexia para que todas as empresas dentro do eido da aeronáutica poidan estender a súa liña de negocio á Seguridade e á Defensa”, subliñou.

• A directora do Igape, Covadonga Toca, participa no II Foro Innovación Empresarial, levado a cabo no marco do programa Conecta Lugo, onde subliña que no que levamos de semana activáronse “15 liñas de apoio” para facilitar a planificación e as novas iniciativas de pemes e autónomos
• Destaca que hoxe mesmo o Diario Oficial de Galicia publica dúas destas liñas de axuda - IA 360 e Igape Innova-, novidosos programas encamiñados a incrementar o potencial de innovación das empresas galegas mediante a intelixencia artificial e o deseño de produtos e servizos
• Subliña que esta aposta se complementa coa área de innovación do Igape, que contribúe ao deseño e xestión de iniciativas innovadoras en sectores estratéxicos, fomentando a modernización das pemes e potenciando a transferencia de coñecemento

Chantada (Lugo), 14 de xaneiro de 2025

A  directora do Igape, Covadonga Toca, acompañada polo delegado territorial da Xunta en Lugo, Javier Arias, participou hoxe no II Foro Innovación Empresarial, celebrado no Auditorio Municipal de Chantada no marco do programa Conecta Lugo -iniciativa da Xunta en colaboración coa Confederación de Empresarios de Lugo-, que busca reforzar o tecido empresarial da provincia mediante o apoio e asesoramento continuado.

Durante a súa intervención, Toca destacou que esta semana publicáronse 15 liñas de axudas que suman máis de 172 millóns de euros, unha “cifra histórica” destinada a mellorar a competitividade, a innovación e o financiamento de pemes e autónomos galegos.

Estas axudas, agrupadas en tres grandes bloques – financiamento, competitividade e innovación –, buscan dotar ás empresas dos “recursos necesarios para afrontar os retos globais e liderar a transición cara a un futuro máis sustentable e tecnolóxico”.

Neste contexto, a directora subliñou a importancia dos novos programas IA 360 e Igape Innova, publicados hoxe mesmo no Diario Oficial de Galicia (DOG), que constitúen unha aposta decidida pola modernización e transformación dixital do tecido empresarial galego.

Así, o programa IA 360 está deseñado especificamente para fomentar a adopción da intelixencia artificial nas empresas. Cun orzamento de 10,2 millóns de euros ofrece financiamento para tres áreas clave: para iniciativas de desenvolvemento tecnolóxico baseadas en IA, para a implantación de solucións comerciais que integren intelixencia artificial nos seus procesos, e para a formación do persoal das empresas co obxectivo de garantir unha adaptación efectiva ás novas tecnoloxías.

Pola súa banda, o programa Igape Innova, cunha dotación de 4 millóns de euros, céntrase no impulso da modernización dos procesos empresariais e o desenvolvemento de novos produtos e servizos. A liña, explicou Toca Carús, dá prioridade ao deseño sustentable e á transformación dixital, aspectos clave para que as pemes galegas poidan competir nun mercado global cada vez máis esixente.

Ambos programas compleméntase, no ámbito da innovación, co Ticket Innova, publicado onte no DOG e que facilita o acceso a servizos de certificación, deseño industrial e tecnoloxías emerxentes ás empresas que están a comezar o seu camiño na innovación.

Neste marco, a directora destacou tamén a creación da área de innovación empresarial no Igape, que potencia a colaboración entre centros tecnolóxicos, universidades e empresas, garantindo que o coñecemento xerado se converta en solucións aplicables ao mercado. Segundo Toca Carús, “a innovación é a chave para liderar os mercados e transformar os retos globais en oportunidades”.

O II Foro Innovación Empresarial contou coa participación de expertos como Xavier Marcet, que abordaron o papel do talento e a innovación na transformación territorial, consolidándose como un espazo clave para impulsar o futuro do tecido empresarial galego.

• A conselleira de Economía e Industria mantivo unha reunión de traballo con responsables de Gestamp, firma especializada en deseño, desenvolvemento e fabricación de compoñentes metálicos para o automóbil, cos que analizou a situación desta industria e coñeceu o plan de futuro da planta viguesa

Santiago de Compostela, 14 de xaneiro de 2025

A conselleira de Economía e Industria, María Jesús Lorenzana, mantivo esta mañá unha reunión de traballo con responsables en Vigo da empresa auxiliar de automoción Gestamp, firma especializada no deseño, desenvolvemento e fabricación de compoñentes metálicos para o automóbil. O encontro serviu para analizar a situación que está a atravesar a industria auxiliar galega da automoción neste período de transición cara unha mobilidade sustentable e abordar os apoios que o Goberno galego está a prestar para garantir o mantemento do emprego e evitar a súa deslocalización. Tamén para coñecer o plan de futuro da planta viguesa.

Nesta liña, Lorenzana lembrou que a Xunta acaba de convocar unha nova liña de axudas para continuar apoiando a automoción galega por importe de 14 millóns de euros centrada en innovación, eficiencia enerxética e investimentos. Aquelas empresas interesadas poderán solicitar estes apoios a partir da vindeira semana e ata o vindeiro 30 de abril. O obxectivo, lembraba Lorenzana, é facilitar os cambios cara á electrificación do automóbil seguindo as directrices marcadas pola Unión Europea,  con máis infraestruturas; na que se impulsen os vehículos non contaminantes; máis intelixente; máis eficiente e segura; e más competitiva.

A conselleira de Economía e Industria aproveitou a cita desta mañá para recordar que o Goberno galego agarda aprobar nas vindeiras semanas o Plan director da automoción, pendente nestes momentos do informe do Consello Económico e Social (CES).  Un documento que busca promover a transformación tecnolóxica e dixital, mellorar a capacitación dos profesionais, e fomentar a colaboración entre empresas, centros de investigación e administracións públicas, co fin de acompañar ao sector no seu proceso de transición e fortalecer a súa competitividade futura.

• Son un total de 15 liñas que sairán publicadas no Diario Oficial de Galicia (DOG) dos vindeiros días 13 e 14 de xaneiro
• O obxectivo é facilitarlles que poidan planificar con antelación as súas necesidades de financiamento e coñecer os apoios públicos dos que van dispoñer
• Entre os apoios que se van convocar destacan os préstamos para incentivar a concentración empresarial, os de desenvolvemento tecnolóxico, a nova liña para a implantación da Intelixencia Artificial nas pemes, as axudas a startups ou o programa de atracción de empresas

Santiago de Compostela, 10 de xaneiro de 2025

A conselleira de Economía e Industria, María Jesús Lorenzana, anunciou hoxe que, “por primeira vez na historia”, a Xunta de Galicia convocará na primeira quincena de xaneiro a maior parte das axudas do Instituto Galego de Promoción Económica (Igape) para pemes e autónomos, co obxectivo de facilitarlles que poidan planificar con antelación as súas necesidades de financiamento e coñecer os apoios públicos dos que van dispoñer.

Segundo indicou, son un total de 15 liñas de axuda que suman 172,6 M€ que sairán publicadas nos Diarios Oficiais de Galicia (DOG) dos vindeiros días 13 e 14 de xaneiro, que van ser fundamentalmente de carácter económico. Beneficiaranse delas milleiros de empresas galegas, que poderán solicitalas este mesmo mes. “Queremos dar unha maior marxe de planificación ás pemes e aos autónomos concentrando todas esas axudas en dous diarios consecutivos, o cal facilita a súa consulta e o seu coñecemento, e mesmo a localización da normativa reguladora de cada axuda”, explicou Lorenzana.

En concreto, as liñas que sairán publicadas proximamente divídense en tres bloques. Por un lado, as relativas a financiamento, que suman 110 M€. Son as de acceso ao crédito (19 M€); os préstamos directos (50 M€); os préstamos para grandes empresas (37 M€); e as novacións das débedas de Igape (4 M€). Lorenzana salientou a flexibilidade nos préstamos, tanto nos períodos de amortización e carencia como na baixada dos xuros, que poden chegar ao cero por cento. E, por modalidades, sinalou como dúas novidades importantes os préstamos para concentración empresarial e os de proxectos de desenvolvemento tecnolóxico e innovación en pemes.

Competitividade e innovación

No bloque de competitividade, que ascende a 47,3 M€, destacan, por importe, as axudas para a atracción de empresas (12 M€); convocarase tamén a segunda edición dos apoios a startups (1,5 M€); os de obradoiros multidisciplinares para pemes (1 M€); para equipamento e investimentos xerais (10 M€); transformación dixital (3 M€); os apoios aos clústeres (3 M€); o programa ReAcciona (2,8 M€); e a liña para os provedores da automoción (14 M€).

No que respecta ao eido da innovación, que suma 15,2 M€, sairán publicadas nos vindeiros días o novo Ticket Innova (1 M€), a liña para a implantación da Intelixencia Artificial IA360 nas pemes (10,2 M€), que se convoca como novidade por primeira vez, e o Igape Innova (4 M€). Neste punto, Lorenzana puxo en valor a posta en marcha, por primeira vez, dunha área específica de innovación empresarial no Igape.

De todo este montante de 172,6 M€, un total de 83,5 M€ proceden de fondos propios (case o 50%) e os restantes son Fondos FEDER, procedentes do Mecanismo de Recuperación e Resiliencia (MRR) e do Fondo de Transición Xusta. A isto hai que sumarlle as axudas para internacionalización, que serán convocadas no primeiro trimestre do ano.

Lorenzana asegurou que esta forma de proceder vai en liña co obxectivo de  simplificación administrativa, desburocratización e aceleración das tramitacións porque a Administración, dixo, “nunca pode ser un estorbo”. “Polo tanto, axilización, na primeira semana de xaneiro e simplificación en dous DOG concretos”, remarcou.

• Como novidade, estas axudas inclúen máis de 10 millóns para fomentar o uso da Intelixencia Artificial (IA) nas empresas
• Insiste na importancia de continuar apoiando a aquelas compañías que queren seguir medrando na Comunidade

Cerdedo-Cotobade (Pontevedra), 9 de xaneiro de 2025

A conselleira de Economía e Industria, María Jesús Lorenzana, avanzou hoxe que a Xunta aprobará proximamente unha partida de 14 millóns de euros para impulsar a innovación, a dixitalización e a internacionalización do tecido produtivo de Galicia. 

Como novidade, estes apoios incluirán unha liña de 10,3 millóns de euros para fomentar o uso da Intelixencia Artificial (IA) nas empresas, unha ferramenta chave hoxe en día para gañar en produtividade e posicionarse no mercado internacional.

Durante unha visita ao novo centro loxístico da empresa familiar Krack en Cerdedo-Cotobade, Lorenzana destacou o traballo conxunto do concello, da propia compañía e da Administración galega para que “esta nave loxística, crucial para todo o traballo de  modernización e expansión que está a facer a empresa, sexa unha realidade desde hai máis dun ano”, subliñou.

Neste marco, puxo en valor os apoios públicos que, segundo explicou “son necesarios para as empresas que queren seguir crecendo en Galicia e por iso imos seguir traballando coa Oficina Económica de Galicia e con eles neste proceso de expansión no que están inmersos”, dixo.

Finalmente, a titular de Economía e Industria apuntou que “cremos que este é o camiño, apoiar ao tecido empresarial para facilitar o máis rápido posible o solo industrial e facer as tramitación máis sinxelas” co obxectivo de atraer investimentos e emprego a Galicia.

• A conselleira subliña que a convocatoria de apoios se publicará mañá no DOG e anima a presentar a súa solicitude a todos os empresarios que precisen facer unha reforma no ámbito da eficiencia enerxética
• Como novidade, amplíase o prazo de presentación de solicitudes que pasa de dous a oito meses e incorpora a posibilidade de subvencionar instalacións novas
• Lorenzana pon en valor o proxecto que contou con apoios da Xunta e subliña que “para nós é moi importante ver que as axudas están chegando aos empresarios”

Vigo, 8 de xaneiro de 2025

A conselleira de Economía e Industria, María Jesús Lorenzana, anunciou hoxe unha nova convocatoria de axudas por importe de 7,5 millóns de euros para promover o aforro de enerxía e que “permitirá reducir 4,5 millóns na factura eléctrica das empresas galegas e das persoas autónomas”, subliñou.

Segundo avanzou, a convocatoria de apoios que se publicará mañá no Diario Oficial de Galicia (DOG) e que se poderán solicitar a partir do venres da vindeira semana, “apoiará proxectos conxuntos que melloren a eficiencia nas edificacións” polo que animou a todos os empresarios e autónomos que precisen calquera tipo de reforma no ámbito da eficiencia enerxética “a que presenten a súa solicitude”.

Esta convocatoria ten como novidade que se amplía o prazo de presentación de solicitudes de dous a oito meses e que incorpora a posibilidade de subvencionar instalacións novas e aquelas actuacións que promovan un Certificado de Aforro Enerxético. O Goberno galego, vén convocando desde hai 11 anos esta liña de axudas, cun orzamento de case 56 millóns de euros e 1.640 proxectos aprobados.

Apoio da Xunta

Durante a visita ao Atendo Senior Living, a titular de Economía e Industria, puxo en valor o carácter innovador e interxeneracional deste proxecto “que presta unha atención diferente aos nosos maiores cunha nova fórmula e un novo modelo de coidados”, sinalou.

Neste marco, explicou que a Xunta participou na rehabilitación integral do edificio para a posta en marcha deste novo centro cunha subvención de algo máis de 105.000 euros. “Para nós é moi importante ver que as axudas do Inega está chegando aos nosos empresarios”, destacou.

As axudas permitiron, entre outras cousas, instalar unha caldeira de aerotermia, un sistema de ventilación mecánica, iluminación led, fachada con cámara e fiestras de aluminio ou ascensores hidráulicos.

• As subvencións oscilan entre os 10.000 e os 20.000 euros e cobren o cen por cento
• Trátase dunha liña de apoios que se puxo en marcha por primeira vez o pasado ano para impulsar iniciativas empresariais emerxentes de carácter innovador e tecnolóxico
• En Galicia hai actualmente 311 startups, que xeran 2.662 empregos e suman unha facturación conxunta de máis de 241,2 M€
• A rede de aceleradoras da Xunta vai contar cun investimento de 7 M€ e vaise ampliar con tres novas no eido da saúde e o benestar, a industria do deporte e as enerxías renovables

Santiago de Compostela, 6 de xaneiro de 2025

A Consellería de Economía e Industria, a través do Instituto Galego de Promoción Económica (Igape), convocará a mediados deste mes a liña de axudas específica para startups que, por segundo ano, volverá contar cun orzamento de 1,5 M€.

Trátase dunha liña de apoios que se puxo en marcha por primeira vez o pasado ano para impulsar iniciativas empresariais emerxentes de carácter innovador e tecnolóxico. As axudas, por concorrencia non competitiva, oscilan entre os 10.000 e os 20.000 euros e cobren o cen por cento dos gastos ou investimentos necesarios durante a fase de lanzamento ou consolidación do proxecto.

Segundo o informe nacional anual “Empresas Tech e Innovadoras”, en Galicia hai actualmente 311 startups, que xeran 2.662 empregos e suman unha facturación conxunta de máis de 241,2 M€. Concéntranse, na súa maioría, nas cidades de Vigo (54), A Coruña (49), Santiago de Compostela (38), Lugo (23), Nigrán (22), Pontevedra (19) e Oleiros (A Coruña) (12). Por sectores, a maior parte delas pertencen aos ámbitos biotecnolóxico, agroalimentario, ao da saúde, a analítica software, o turismo, o comercio en liña ou enerxía, entre outros.

Xunto coa liña de axudas que se vai convocar proximamente, as startups galegas teñen á súa disposición a rede de aceleradoras da Xunta que coordina o Igape. Dela forman parte a BFAuto, especializada no sector da automoción; a BFAero, no aeroespacial; a BFFood, no sector da alimentación; Climatech, no eido ambiental; VíaGalicia, que abrangue o ámbito das TIC, o sector agroalimentario ou o téxtil, en colaboración co Consorcio da Zona Franca (Vigo e Lugo); e outras iniciativas como a BFMedicines, Agrobiotech, Bioincubatech, Galicia Avanza ou Turislab.

Este ano, esta rede vai contar cun investimento de 7 M€ e vaise ampliar coa posta en marcha tres novas aceleradoras no eido da saúde e o benestar, a industria do deporte e as enerxías renovables, o cal converte Galicia nun ecosistema singular de emprendemento innovador.

O conxunto de aceleradoras con participación da Xunta, leva apoiado máis de 830 proxectos innovadores, dos cales 270 recibiron financiamento para a creación de novas empresas ou para a posta en marcha de proxectos en empresas xa existentes. E, ademais, contribuíu á promoción e impulso de 1.400 postos de traballo cualificados directos.

A través do Igape, a Xunta quere dar maior pulo ao emprendemento innovador, que tamén conta cos servizos da Oficina Económica de Galicia.

• O servizo atendeu 13.731 consultas de empresas, persoas autónomas ou emprendedoras nos seus primeiros oito meses en funcionamento, das que máis do 80 % foron resoltas no momento
• O equipo formado por máis de 100 profesionais de diferentes sectores tamén prestou asesoramento a 204 proxectos de especial relevancia para o territorio galego e mantivo 583 reunións presenciais
• Neste ano 2025, a Xunta abrirá unha nova sede da Oficina Económica de Galicia na Casa de Galicia en Madrid para reforzar a dinamización empresarial e a captación de investimentos

Santiago de Compostela, 2 de xaneiro de 2025

A nova Oficina Económica de Galicia, impulsada pola Consellería de Economía e Industria, xa funciona a pleno rendemento recibindo unha media de máis de 1.700 consultas ao mes. Desde a súa posta en marcha no mes de abril, o servizo vén asesorando, apoiando e acompañando a empresas, persoas autónomas ou emprendedoras para que implanten e desenvolvan os seus proxectos empresariais en Galicia.

A área dependente do Instituto Galego de Promoción Económica (Igape), dirixida por Natalia Barros e formada por máis de 100 profesionais de diferentes sectores, funciona como unha canle única entre empresas e Administración que ofrece información e atención individualizada, personalizada e especializada. Tan só nos seus oito primeiros meses de actividade, a Oficina xa recibiu un total de 13.731 consultas, das que o 82 % foron resoltas no momento, e prestou asesoramento a 204 proxectos de especial relevancia para o territorio galego.

Durante o mes de decembro, o servizo continuou a súa actividade crecente: aumentou nun 11,61 % o número de consultas atendidas e elevou ata 583 as reunións presenciais. Con este labor de asesoramento e apoio, a Oficina Económica de Galicia facilita a xestión dos proxectos empresariais para que as tramitacións sexan máis rápidas e, en definitiva, máis sinxelas.

Por sectores, as principais consultas proveñen de ámbitos coma o enerxético, a automoción, a economía circular, o sector mar-industria, o turismo, as TIC, a loxística, o contract ou a construción. Ademais, a Oficina realiza labores de coordinación con outros axentes e entidades externas, tanto de forma directa como a través de ICEX/Invest in Spain, á hora de detectar obstáculos administrativos e identificar novas oportunidades de investimento.

Estas medidas, entre outras, enmárcanse no proceso de desburocratización que impulsa a Xunta para continuar simplificando os trámites ao tecido produtivo e ofrecendo unha resposta áxil, rápida e útil. E, deste xeito, posicionar Galicia como un polo de atracción empresarial na Península e nunha Comunidade atractiva tanto para as empresas que xa están instaladas no territorio como para os novos investimentos.

Tras a apertura en setembro dunha sede física da Oficina Económica de Galicia en Santiago de Compostela, o servizo ofrece múltiples vías para facilitar a mellor atención posible adaptada a cada caso. Por iso, empresas, autónomos ou emprendedores poden recibir atención tanto de forma presencial no Complexo administrativo de San Lázaro, sede do Igape, en Santiago de Compostela, como por vía telefónica no número 900 815 151 e online a través de oficinaeconomicagalicia.xunta.gal.

Neste ano 2025, a Xunta abrirá unha nova sede da Oficina Económica de Galicia na Casa de Galicia en Madrid. Segundo explicou a conselleira de Economía e Industria, María Jesús Lorenzana, o Goberno galego dá un paso máis abrindo a primeira oficina fóra de Galicia para reforzar a dinamización empresarial e a captación de investimentos e, así, continuar simplificando o camiño ás empresas que queiran implantarse na Comunidade.

• Será aprobada no vindeiro Consello da Xunta, cun orzamento de 10,3 M€
• Lembra que, por primeira vez, o Igape conta cunha área específica de innovación empresarial, que vai manexar un investimento de 60 M€ e desde a que se vai xestionar esta nova liña de apoios
• “É un orgullo enorme ter empresas familiares en Galicia como esta: máis de 60 anos de tradición familiar, de esforzo, de talento e de intelixencia para converterse nunha fábrica que é líder no sur de Europa”, di sobre Pontevedresa Group

Pontevedra, 21 de decembro de 2024

A conselleira de Economía e Industria, María Jesús Lorenzana, avanzou hoxe que o vindeiro Consello da Xunta aprobará a primeira convocatoria de axudas en Galicia para promover o uso da intelixencia artificial nas empresas.

Nunha visita ás instalacións de Pontevedresa Group, Lorenzana informou de que se trata dunha liña de apoios por valor de 10,3 M€ que implica, dixo, apostar por que as pequenas e medianas empresas non tecnolóxicas poidan contratar servizos doutras compañías que incorporen a intelixencia artificial nos seus procesos produtivos e que, polo tanto, melloren na súa eficiencia e competitividade, explicou.

A conselleira, que estivo acompañada polo delegado territorial da Xunta en Pontevedra, Agustín Reguera, lembrou que, por primeira vez, o Instituto Económico de Galicia (Igape) conta cunha área específica de innovación empresarial, que vai manexar un investimento de 60 M€ e desde a que se vai xestionar esta liña nova liña de apoios.

Con 65 anos de traxectoria, Pontevedresa Group é na actualidade o fabricante independente máis antigo de España no sector nacional do vidro, líder en todo o sur de Europa na fabricación de vidro tépedo ultra lixeiro de alta resistencia, baixo espesor e gran formato.

“É un orgullo enorme ter empresas familiares en Galicia como esta: máis de 60 anos de tradición familiar, de esforzo, de talento e de intelixencia para converterse nunha fábrica que é líder no sur de Europa no tipo de vidro que fabrica, provedora de moitos sectores industriais”, dixo. “Vidro fabricado en Galicia para o mundo”, enfatizou.

Lorenzana apuntou que a empresa acumula nos últimos anos un gran esforzo investidor tanto nesta planta –o primeiro proxecto singular declarado pola Xunta que se implantou no polígono da Reigosa–, como na que posúe no parque empresarial do Campiño (Pontevedra).

Todo isto fai de Pontevedresa Group o maior investidor industrial e empregador do sector do vidro en Galicia, cun récord de máis de 100 empregos directos, que representa un incremento do 70 por cento desde antes da pandemia.

• Lorenzana destaca o papel da oficina que funciona coma un canal único de atención especializada para as empresas e a industria
• Pola súa banda, José González valora positivamente o establecemento dun modelo regulatorio que dote de uniformidade os procedementos de posta en marcha de actividades comerciais sempre e cando se respecten a singularidades das CC.AA. e dos concellos
• Os titulares de Economía e Comercio da Xunta volveron reclamar ao Goberno central unha política económica que favoreza a atracción de investimentos e o asentamento de empresas, piares do crecemento dun país

Santiago de Compostela, 18 de decembro de 2024

A conselleira de Economía e Industria, María Jesús Lorenzana, e o conselleiro de Emprego, Comercio e Emigración, José González, participaron esta tarde por videoconferencia na Conferencia Sectorial para la Mejora Regulatoria y el Clima de Negocios. Unha xuntanza na que os representantes da Xunta volveron insistir nos importantes avances en materia de desburocratización, axilización e simplificación administrativa que está levando a cabo o Goberno galego para acompañar ás empresas.

Neste marco, a titular de Economía e Industria, destacou a creación da Oficina Económica de Galicia que depende do Igape, e a figura dos proxectos industriais estratéxicos, que se benefician dunha tramitación acelerada nun prazo máximo dun ano, permitindo así que as empresas desenvolvan as súas iniciativas dun xeito máis rápido e gañen en competitividade.

Segundo expuxo, a Oficina Económica de Galicia que tamén terá sede en Madrid -a primeira fóra da Comunidade- funciona coma un canal único para as empresas e a industria, e é o punto de contacto de información e entrada para as iniciativas empresariais e proxectos industriais, facilitando información, asesoramento e acompañamento. Desde a súa posta en marcha no mes de abril xa atendeu unhas 13.000 consultas.

Lorenzana explicou ademais que este servizo de atención especializada e próxima ás empresas permite a Galicia posicionarse como destino atractivo e diferenciado para o investimento, atraer e facilitar a implantación de novos negocios, seleccionar e captar os investimentos que complementen as cadeas de valor, e favorecer o mantemento e ampliación dos investimentos que xa existen na Comunidade.

Ordenanza tipo de comercio minorista

Pola outra banda, no marco da conferencia sectorial de hoxe, abordouse tamén a aprobación dunha ordenanza tipo de comercio minorista, que ten como obxectivo establecer un procedemento uniforme en todos os concellos —actualizando o modelo de 2013— relativo á supresión das licenzas municipais vinculadas á apertura dos establecementos comerciais permanentes de menos de 750 m², substituíndooas por outros medios de control máis áxiles, como as declaracións responsables.

O conselleiro de Emprego, Comercio e Emigración, José González, valorou positivamente o establecemento dun modelo regulatorio que dote de uniformidade os procedementos de posta en marcha de actividades comerciais, sempre e cando, remarcou, se respecten as singularidades das diferentes comunidades autónomas e concellos.

Nesta liña, destacou que a redución de trabas burocráticas é unha liña prioritaria pola que vén apostando de xeito estratéxico o Goberno galego e que constitúe un elemento clave para favorecer que máis emprendedores se animen a abrir os seus negocios, o que redunda, remarcou, na xeración de riqueza e emprego. Ademais, indicou que o impulso ao comercio en Galicia é unha prioridade para a Xunta, polo que no primeiro trimestre do ano que vén está previsto aprobar o Plan estratéxico do comercio 2025-2030.

Finalmente, os titulares de Economía e Comercio da Xunta reclamaron unha vez máis ao Goberno central que desenvolva unha política económica centrada no tecido produtivo, que favoreza a atracción de novos investimentos e o asentamento de empresas, piares fundamentais para o crecemento dun país.