Oficina virtualSuper User
A Xunta subliña en Lugo a aposta pola xestión responsable dos recursos naturais para impulsar cadeas de valor eficientes, innovadoras e colaborativas
- O director do Igape, Fernando Guldrís, inaugurou a xornada do ciclo Capacita Directivos Galicia con valor engadido, onde subliñou o compromiso do Goberno galego coa “transformación dixital e sustentable” do tecido produtivo da Comunidade.
O director do Igape, Fernando Guldrís, participou esta mañá na inauguración da xornada do ciclo Capacita Directivos Galicia con valor engadido, centrado desta volta no aproveitamento das materias primas e dos recursos naturais, onde avogou por unha xestión responsable destes na procura de impulsar cadeas de valor eficientes, innovadores e colaborativas.
“Os recursos naturais desempeñan un papel fundamental nas cadeas de valor dos nosos sectores económicos, desde a obtención das materias primas ata a entrega final ao consumidor e o seu aproveitamento adecuado pode xerar un impacto significativo na creación de valor económico e social”, incidiu Guldrís.
Neste marco, o director do Igape subliñou o compromiso do Goberno galego coa “transformación dixital e sustentable” do tecido produtivo da Comunidade. Así, afondou, “Galicia ten moito que achegar”, desde o aproveitamento da biomasa forestal ata os diferentes usos que se fan do granito e da lousa, ou o saber artesán no emprego da cerámica. Materias e usos aos que se atende tamén na Estratexia de Especialización Intelixente (RIS3), que ten entre os seus retos o desenvolvemento dun modelo de xestión de recursos naturais e culturais baseado na innovación.
Así mesmo, Guldrís puxo en valor a Axenda Industrial 2025 de Galicia, que aspira a que as empresas galegas reforcen a súa aposta pola dixitalización, aproveitando as oportunidades da sociedade dixital para cambiar os modelos de negocio. “Desde a colaboración público-privada, e poñendo o foco nas pequenas e medianas empresas, unha parte importante do noso traballo pasa por contribuír á modernización dos sectores tradicionais galegos a través da introdución de innovacións que incidan na mellora da eficiencia e o rendemento no uso dos recursos endóxenos e a súa reorientación cara a usos alternativos", afondou Guldrís.
O encontro celebrado hoxe desenvólvese no marco do programa Capacita Directivos, iniciativa promovida polo Igape que inclúe a organización de xornadas que buscan concienciar e promover a colaboración entre empresas, emprendedores, administracións, clústeres e centros de coñecemento. O programa, xa consolidado, suma seis edicións impulsando actividades formativas, tanto presenciais como en liña.
A Xunta aposta pola transformación industrial das pemes galegas con novos apoios que permitirán promover máis de 200 proxectos de dixitalización
- O director do Igape, Fernando Guldrís, visita en Nigrán as instalacións de Gaictech, empresa dedicada á fabricación de maquinaria para o sector conserveiro e do conxelado que implementou unha xestión integral dixital do seu proceso produtivo grazas ao programa de Dixitalización Industria 4.0.
- Subliña que a nova convocatoria, publicada hoxe no Diario Oficial de Galicia, conta con 5M€ para apoiar a posta en marcha de sistemas de fabricación distribuída, de facturación ou de procesos entre un líder industrial cara ás empresas que conforman a súa cadea de valor.
- En réxime de concorrencia competitiva, cóbrense tanto proxectos colectivos como individuais que busquen implantar solucións de interacción, sistemas de intelixencia artificial ou aqueles encamiñados á dixitalización de procesos.
O director do Igape, Fernando Guldrís, visitou hoxe en Porto do Molle (Nigrán) as instalacións de Gaictech, empresa dedicada á fabricación de maquinaria para o sector conserveiro e do conxelado que implementou, grazas ao programa de Dixitalización Industria 4.0, unha xestión integral dixital do seu proceso produtivo, acadando unha maior eficiencia e control desde o pedido do cliente ata a subministración, pasando pola compra do material, o seu almacenamento e o corte láser do mesmo.
Neste marco, Guldrís sinalou que o Diario Oficial de Galicia (DOG) publica hoxe unha nova convocatoria desta liña de apoios, cuxo prazo de presentación de solicitudes se abre mañá, e coa que se aspira a facilitar a transformación industrial das pemes galegas con novas axudas que permitirán promover máis de 200 proxectos de dixitalización.
Cun orzamento de 5 millóns de euros, facilitarase a posta en marcha de sistemas de fabricación distribuída, de facturación ou de procesos entre un líder industrial cara ás empresas que conforman a súa cadea de valor; ou proxectos individuais cara á dixitalización e conectividade da peme.
Esta é a octava convocatoria do programa, que conta cunha ampla demanda desde o seu arranque en 2018, apuntou Guldrís, quen resaltou a súa importancia para impulsar a reactivación do tecido empresarial a través da transformación tecnolóxica e o impulso aos procesos de dixitalización.
En réxime de concorrencia competitiva, cóbrense tanto proxectos colectivos como individuais que busquen implantar solucións de interacción, sistemas de intelixencia artificial ou aqueles encamiñados á dixitalización de procesos. As axudas cobren o 35% dos investimentos materiais e inmateriais subvencionables para as pequenas empresas, e do 25% para as medianas, e nos dous casos o 50% dos custos de colaboracións externas.
Internacionalización
Guldrís salientou tamén a aposta de Gaictech pola internacionalización, ao contar con equipos en 45 países. Un compromiso co que tamén ten contado co apoio do Goberno galego, tanto a través do programa Galicia Exporta como de diversas accións comercias levadas a cabo no marco do plan Foexga.
“Gaictech é un exemplo inmellorable das vantaxes da innovación, da dixitalización e da procura de novos mercados. Un traballo que está a permitir que Galicia acade, nos últimos anos, cifras récord nas súas exportacións”, concluíu o director do Igape.
A Xunta destaca a importancia de que os talleres de vehículos aposten pola dixitalización e a formación para dar resposta aos avances no sector da automoción
- O vicepresidente primeiro e conselleiro de Economía, Industria e Innovación, Francisco Conde, mantivo un encontro en Ourense coa Asociación provincial de talleres de reparación de vehículos.
- No mes de xuño lanzarase a nova convocatoria das axudas de dixitalización e Industria 4.0 do Instituto Galego de Promoción Económica.
O vicepresidente primeiro e conselleiro de Economía, Industria e Innovación, Francisco Conde, acompañado polo delegado territorial da Xunta de Galicia en Ourense, Gabriel Alén, mantivo un encontro coa Asociación provincial de talleres de reparación de vehículos (Atave).
Na xuntanza, Conde salientou a importancia de que os talleres de reparación de vehículos aposten pola dixitalización e a formación para dar resposta aos avances que se están a producir no sector da automoción, en eidos como a electrificación, a automatización, a redución de emisións e a seguridade a bordo. Neste sentido, no mes de xuño lanzarase a nova convocatoria das axudas de dixitalización e Industria 4.0 do Instituto Galego de Promoción Económica (Igape), que desde a súa posta en marcha levan mobilizados máis de 50 millóns de euros e suman máis de 1.000 solicitudes, e á que podería acollerse Atave.
A Asociación provincial de talleres de vehículos de Ourense conta con 400 empresas asociadas que supoñen o total de talleres da provincia. Tal e como trasladaron desde esta entidade na reunión celebrada esta tarde, o reto do sector pasa pola modernización das súas instalacións, a dixitalización, a adopción de medidas de aforro e eficiencia enerxética para reducir o custo da electricidade, así como a formación axustada ás necesidades concretas de postos de traballo. Nestes obxectivos está a traballar a Xunta de Galicia con todo o tecido empresarial, poñendo á súa disposición diferentes programas de apoio á medida das súas necesidades.
A Xunta informa no XI Congreso de Business Angels en Santander da Axenda Financeira de Galicia
- O director do Igape, Fernando Guldrís, participa nunha mesa redonda celebrada no marco do encontro organizado pola Asociación Española de Business Angels (Aeban), onde pon en valor a importancia da Axenda na mellora competitiva do tecido produtivo de Galicia.
O director do Igape, Fernando Guldrís, participou hoxe en Santander nunha mesa redonda celebrada no marco do XI Congreso Nacional de Business Angels organizado por Aeban, na que puxo en valor o peso e a importancia da Axenda Financeira que vén promovendo o Goberno galego, e que está a mobilizar 400 M€ para facilitar o financiamento do tecido empresarial galego.
A Axenda, explicou Guldrís, configúrase como unha completa folla de ruta con medidas de apoio financeiro para o tecido empresarial galego. Así, a través dos distintos programas, propicia investimentos directos na procura de reforzar a solvencia financeira das empresas galegas, contribuíndo con iso á reactivación da economía galega e á mellora da competitividade do tecido produtivo.
“Na Administración autonómica somos conscientes de que debemos axudar ás pemes e aos traballadores autónomos para darlle acceso ao crédito, na procura de que poidan gañar músculo, contribúan á xeración e ao mantemento do emprego, e desenvolvan proxectos que impulsen á reactivación económica e a competitividade dos nosos sectores estratéxicos”, afondou o director do Igape.
A Xunta avanza unha nova convocatoria das axudas á dixitalización industria 4.0 para impulsar a competitividade do tecido empresarial galego
O director do Igape, Fernando Guldrís, participou hoxe nos obradoiros de dixitalización promovidos por Asime e que afondaron, desta volta, no sector naval e nas posibilidades que ofrece a enerxía eólica offshore. Durante a súa intervención, Guldrís puxo en valor a importancia que ten a dixitalización como “factor determinante para o crecemento e a competitividade dos sectores chave da nosa economía”, e avanzou a próxima convocatoria dunha nova edición das axudas á Dixitalización Industria 4.0.
Neste sentido, este ciclo de obradoiros permitiu explorar tanto a relación entre o sector naval e conceptos como o xemelgo dixital, ciberseguridade, visión artificial e realidade aumentada, como a intersección entre a enerxía offshore e conceptos como a economía circular, o Internet das cousas (IoT), o Big Data e o Cloud computing.
A Xunta convoca os premios Artesanía de Galicia 2023 para recoñecer a mestría dos artesáns galegos
- As candidaturas poderanse presentar entre o 18 e o 29 de setembro de 2023.
A Vicepresidencia primeira e Consellería de Economía, Industria e Innovación vén de publicar no Diario Oficial de Galicia a convocatoria dos Premios Artesanía de Galicia 2023, co obxectivo de recoñecer a mestría e o talento no sector artesanal galego. Como en anos anteriores, os galardóns dividiranse en tres categorías: Premio Artesanía de Galicia, Premio Traxectoria e Premio Bolsa Eloy Gesto. O prazo de presentación de candidaturas estará aberto entre o 18 e o 29 de setembro.
No caso da modalidade Premio Artesanía de Galicia, a solicitude deberase presentar presencialmente na sede da Fundación Artesanía de Galicia, en Santiago de Compostela, mentres que para as outras dúas categorías as solicitudes realizaranse obrigatoriamente a través de medios electrónicos.
Os Premios Artesanía de Galicia teñen como obxectivo principal recoñecer e visibilizar o traballo do sector artesán galego. Estes galardóns contribúen a divulgar os oficios artesanais, potenciar a creatividade dos profesionais, incentivar os novos talentos en Artesanía de Galicia, promover o relevo xeracional e mais apostar pola introdución da innovación e do deseño nos procesos de produción.
O Premio Artesanía de Galicia 2023, dotado con 9000 euros, está dirixido a obradoiros artesáns inscritos no Rexistro Xeral de Artesanía de Galicia. Premiarase a obra que represente as liñas desexadas para unha artesanía competitiva no mercado actual como son o deseño, a adaptación ou a conservación das técnicas e valores tradicionais máis característicos da artesanía galega, a incorporación ás tendencias actuais, a innovación e a boa calidade da obra. Poderanse presentar a esta categoría todos os obradoiros artesáns inscritos no Rexistro Xeral de Artesanía de Galicia.
O Premio Traxectoria 2023, de carácter honorífico, será outorgado a proposta do propio sector artesanal. O obxectivo é recoñecer a traxectoria profesional consolidada dun profesional da artesanía galega, a súa contribución á posta en valor e á promoción da nosa artesanía, a calidade do seu traballo, así coma o seu compromiso coa divulgación e coa transmisión pedagóxica dos principais valores positivos no eido da artesanía. O galardón está dirixido a artesáns en activo ou retirados que estean ou estiveran inscritos no Rexistro Xeral de Artesanía de Galicia e cunha actividade mínima e demostrable no sector de 20 anos. As candidaturas poderanas presentar obradoiros rexistrados, asociacións profesionais de artesáns de Galicia ou outras entidades públicas ou privadas.
Por outra banda, os Premios Artesanía de Galicia fan especial fincapé na incorporación dos artesáns máis novos a través do apoio á súa formación especializada co Premio Bolsa Eloy Gesto, que está dotado con 4000 euros para investir nun centro de formación de prestixio. Nesta categoría, a Xunta busca potenciar o relevo xeracional no sector, o acceso de novos talentos á artesanía e a súa profesionalización.
Premiarase a candidatura que presente unha proposta para a súa formación nun centro formativo ou nun obradoiro artesanal de referencia no eido da artesanía e do deseño. Valorarase o carácter innovador do proxecto, a transferencia de coñecemento que se pretende acadar con esa formación, a incorporación das novas tecnoloxías, o currículo da persoa candidata e a potencialidade de incorporación desta formación para a elaboración dun produto artesanal innovador. Tamén se terá en conta o grao de madurez, a calidade na presentación da proposta, así como a colaboración entre distintas actividades artesanais. Nesta categoría poderán participar todos os artesáns inscritos no Rexistro Xeral de Artesanía de Galicia cunha idade máxima de 40 anos no ano 2023.
A Unidade mixta de Emenasa e Anfaco-Cecopesca que apoia a Xunta reforza a competitividade da industria alimentaria aplicando novas tecnoloxías ao control de calidade
- O vicepresidente primeiro e conselleiro de Economía, Industria e Innovación, Francisco Conde, participou en Vigo nun encontro sobre esta iniciativa que permite coñecer as propiedades físicas e químicas dos alimentos.
- Subliña a importancia de desenvolver proxectos que xeren pegada industrial e que permitan a Galicia diferenciarse nos mercados internacionais.
O vicepresidente primeiro e conselleiro de Economía, Industria e Innovación, Francisco Conde, participou hoxe en Vigo no acto organizado por Emenasa e Anfaco-Cecopesca onde se deron a coñecer os resultados da Unidade Mixta de Investigación (UMI) na que colaboran a empresa e o centro tecnolóxico. A iniciativa, que naceu en 2016, contribúe a reforzar a competitividade da industria alimentaria aplicando novas tecnoloxías ao control de calidade. En concreto, baséase na imaxe hiperespectral, que permite coñecer as propiedades físicas e químicas dos alimentos sen contacto con eles.
A colaboración de Anfaco-Cecopesca con Emenasa nesta UMI conta cunha axuda da Xunta de Galicia de 1,15 millóns de euros para un investimento total de 3,8 millóns de euros, e implicou a un total de 19 persoas. Segundo subliñou Conde, esta iniciativa é un exemplo do potencial que ten Galicia para crear solucións innovadoras que poidan achegar unha maior competitividade ao tecido empresarial.
Tal e como apuntou o vicepresidente económico, a través de iniciativas como as Unidades Mixtas de Investigación a comunidade está facendo un importante esforzo por poñer en contacto a investigación dos centros tecnolóxicos e de coñecemento coas demandas da industria e, neste proceso, a colaboración público-privada é fundamental. O responsable de Economía, Industria e Innovación do Goberno galego sinalou así mesmo a importancia de que “a través do coñecemento e a transferencia ao mercado poidamos desenvolver proxectos que permitan xerar pegada industrial en Galicia e a partir de aí diferenciarnos do resto de mercados e do resto de países”.
A través desta Unidade Mixta, que contou coa colaboración de 14 empresas, avanzouse na tecnoloxía con imaxe hiperespectral para contar con sistemas que permitan o control total de cada materia prima nas liñas de procesado da industria, dispoñendo de xeito áxil de información dos parámetros de calidade e seguridade das distintas materias primas. O obxectivo despois de sete anos de traballo é chegar ao mercado coas distintas solucións desenvoltas no proxecto.
A Xunta destaca o compromiso de Magnesitas de Rubián coa eficiencia enerxética e a sustentabilidade
- O vicepresidente primeiro e conselleiro de Economía, Industria e Innovación, Francisco Conde, visitou no Incio as instalacións da compañía, da que dependen 60 empregos directos e indirectos.
- A empresa conta xa con 1 MW de enerxía solar fotovoltaica que permite substituír o 25 % do consumo da planta por autoconsumo, e está a instalar 1 MW máis na mina.
- Fai fincapé en que a industria invista en eficiencia enerxética para reducir custos e para avanzar na descarbonización dos seus procesos.
- Subliña que a Axenda da Minería Sustentable “vai na dirección que están marcando empresas como Magnesitas de Rubián”.
O vicepresidente primeiro e conselleiro de Economía, Industria e Innovación, Francisco Conde, destacou esta mañá o compromiso de Magnesitas de Rubián coa eficiencia enerxética e a sustentabilidade. Conde, que visitou as instalacións desta compañía no Incio (Lugo), apuntou ademais que a empresa, da que dependen 60 empregos directos e indirectos, “é un exemplo claro de fixación de poboación no rural”.
Tal e como sinalou o vicepresidente primeiro, a compañía vén de instalar 1 MW de enerxía solar fotovoltaica que permite substituír por autoconsumo arredor do 25 % do consumo enerxético da planta. Ademais, están a instalar outro megawatt tamén de enerxía fotovoltaica na mina. En total, estas actuacións supoñen un investimento de 1,4 millóns de euros, dos cales máis de 442.000 euros proceden de axudas da Xunta de Galicia.
A compañía extrae neste xacemento 70.000 toneladas de magnesita ao ano con aplicacións diversas: un 80 % da produción vai dirixido á industria alimentaria, como ingrediente para pensos de gando bovino. Tamén se usa en fertilizantes, tratamento de augas residuais, corrección do PH de solos agrícolas, na industria do papel ou no refinado de azucre.
Durante a súa visita, Conde fixo fincapé en que “é fundamental que toda a industria poida investir en eficiencia enerxética e polo tanto reducir os seus custos directos e ao mesmo tempo avanzar na sustentabilidade e na descarbonización dos seus procesos”.
Neste sentido, Conde apuntou que Magnesitas de Rubián non é só un referente no eido da eficiencia enerxética, investindo tamén noutras melloras no ciclo de produción, senón tamén desde o punto de vista ambiental, subliña que a Axenda da Minería Sustentable “vai na dirección que están marcando empresas como Magnesitas de Rubián”.
A través desta folla de ruta, que é froito dun traballo consensuado co sector, Galicia impulsa a modernización e o crecemento axeitado da minaría, que vai ter que actuar como provedor de minerais estratéxicos para a dixitalización.
A Xunta agradece o traballo dos promotores da planta de hidróxeno verde das Pontes para que o proxecto estea máis preto de ser unha realidade para Ferrolterra
- O vicepresidente primeiro e conselleiro de Economía, Industria e Innovación, Francisco Conde, mantivo unha reunión en Ferrol con representantes do proxecto para avaliar o seu avance.
- O seguinte paso é lograr un compromiso do Goberno central para que a iniciativa conte coas infraestruturas eléctricas necesarias que garantan a súa viabilidade e posta en marcha.
O vicepresidente primeiro e conselleiro de Economía, Industria e Innovación, Francisco Conde, mantivo esta mañá unha reunión cos promotores do proxecto H2Pole nas Pontes para avaliar os últimos avances da futura planta de hidróxeno verde, declarada proxecto industrial estratéxico, e cuxa solicitude de autorización ambiental integrada, estudo de impacto ambiental, declaración de utilidade pública e proxecto se atopan sometidos a información pública.
Durante o encontro, o vicepresidente económico quixo agradecerlles o seu traballo para que este proxecto estea máis preto de ser unha realidade para Ferrolterra. Conde asegurou que esta planta será unha peza fundamental para a descarbonización do sector enerxético galego, contribuíndo a facer de Galicia unha rexión referente nesta enerxía. Do mesmo xeito, favorecerá a reindustrialización da comarca.
Segundo os datos dos seus promotores, o proxecto -que conseguiu 15 M€ a través do Perte de enerxías renovables, hidróxeno renovable e almacenamento- contará cun investimento de 156 millóns de euros, xerará máis de 60 empregos e terá unha capacidade inicial de 20 MW, ampliable ata os 100, co obxectivo de que poida estar operando antes de 2026. Para iso precisará as infraestruturas eléctricas necesarias que garantan a súa viabilidade e posta en marcha, polo que é preciso a confirmación por parte do Goberno central da posibilidade de que os proxectos que se vaian implantar nas Pontes poidan acceder á rede de 400 kV no nó existente e determinar que potencia terán dispoñible.
Conde agradeceu a aposta que Reganosa está facendo por Galicia a través non só desta planta de hidróxeno, senón tamén do centro de produción de fertilizantes e biometano e a planta de hidróxeno, ambos os dous en Meirama (Cerceda), ou o acordo con Enagás, estratéxico para conseguir investimentos para a Comunidade como o hidroduto Guitiriz (Lugo)-Zamora que unirá Galicia co resto da Península Ibérica e con Europa.
Rueda anuncia que a Xunta activa apoios por 3,8 M€ para continuar avanzando na transformación dixital e sustentable do comercio de proximidade galego
- Resalta que nas próximas semanas vaise lanzar un programa de axudas para “impulsar proxectos de contido tecnolóxico, innovador e sustentable”.
- Subliña que as axudas alcanzan o 90 % do investimento subvencionable e poden chegar ata 180.000 euros no caso de pemes comerciais e autónomos, e a 72.000 euros no caso das federacións de comerciantes.
- Financiaranse aplicacións de big data e análise de datos para mellorar a experiencia da clientela; probadores interactivos; asistentes virtuais (chatbots) ou aplicacións de realidade virtual e aumentada.
- Tamén se apoiarán, entre outras actuacións, sensores de presenza para a regulación automática de luces e sistemas de climatización.
O presidente da Xunta, Alfonso Rueda, anunciou hoxe que o Goberno galego vai activar apoios por 3,8 millóns de euros para continuar avanzando na transformación dixital e sustentable do comercio de proximidade galego. “Trátase dun novo programa para impulsar proxectos de contido tecnolóxico, innovador e sustentable entre pemes e autónomos”, indicou. Para iso, nas vindeiras semanas publicarase no Diario Oficial de Galicia (DOG) o programa de axudas do Fondo tecnolóxico, no marco do Plan de recuperación, transformación e resiliencia, financiado pola Unión Europea-Next GenerationEU.
Rueda subliñou que as axudas, que alcanzan o 90 % do investimento subvencionable, poden chegar “aos 180.000 euros no caso das pemes comerciais”, en función do número de traballadores. Os apoios poden chegar “aos 54.000 euros no caso das asociacións de comerciantes” con maior número de asociados, e chegar “aos 72.000 euros” no caso de federacións de ámbito provincial ou autonómico. Concederanse por orde de solicitude e abranguerán actuacións realizadas desde o 1 de xaneiro ata o 29 de setembro deste ano.
No caso dos comercios, entre outras actuacións, o presidente indicou que vanse financiar “aplicacións de big data que son imprescindibles para facer estudos de mercado e coñecer os intereses da clientela; a instalación de probadores interactivos, asistentes virtuais e sistemas de realidade aumentada ou a instalación de sistemas de climatización enerxeticamente eficientes e sensores de presenza para a regulación automática de luces”.
No que respecta ás asociacións de comerciantes, poderán destinar as axudas á instalación de mupis dixitais, redes wifi nas áreas comerciais, procesos ecoeficientes para a correcta separación de residuos ou proxectos para mellorar a eficiencia enerxética, entre outros.
