• O director do Igape, Fernando Guldrís, asina un convenio con representantes das sociedades de garantía recíproca (SGR) Afigal, Sogarpo e Iberaval na procura de dotar ao tecido empresarial galego das ferramentas necesarias para reforzar a súa solvencia e que poidan “gañar músculo, manter e xerar emprego, e desenvolver proxectos que contribúan á reactivación económica”.
• A liña, impulsada no marco da Axenda Financeira, abrirase o vindeiro 12 de maio e busca dar resposta ás necesidades das pequenas e medianas empresas no actual contexto económico, financiando investimentos produtivos e circulante estrutural, pagamentos e reestruturación de débedas, e favorecendo a capacidade do tecido empresarial galego para outorgar garantías fronte a terceiros.
• A modalidade de apoio poderá consistir na bonificación do tipo de xuro dos préstamos, na bonificación da comisión do aval, así como no reaval do risco asumido polas SGR.

O director do Instituto Galego de Promoción Económica (Igape), Fernando Guldrís, asinou esta mañá un convenio con representantes das sociedades de garantía recíproca (SGR) Afigal, Sogarpo e Iberaval, na procura de facilitar, un ano máis, o acceso ao financiamento de pemes e autónomos galegos. Neste sentido, e como destacou Guldrís, o acordo permite cubrir operacións de investimento, circulante e garantías de pequenas e medianas empresas por importe de 60 millóns de euros.

O convenio, afondou o director do Igape, sitúase no marco da Axenda Financeira que promove o Goberno galego para axudar a pemes e autónomos a reforzar a súa solvencia e darlle acceso a crédito para que poidan “gañar músculo, manter e xerar emprego, e desenvolver proxectos que contribúan á reactivación económica e a competitividade dos sectores estratéxicos galegos”. 

Así, o obxectivo do acordo asinado hoxe é facilitar, dun lado, o acceso a préstamos a longo prazo para financiar tanto investimentos produtivos como circulante estrutural, dando a posibilidade tamén de aplicar os fondos ao pagamento ou á reestruturación de débedas con entidades financeiras; e, por outra parte, favorecer a capacidade das pemes para outorgar garantías fronte a terceiros.

Neste marco, explicou Guldrís, a modalidade de apoio consistirá tanto na bonificación do tipo de xuro dos préstamos, como na bonificación da comisión do aval, e no reaval do risco asumido polas SGR que faciliten o acceso ao crédito.

A concesión das axudas, cuxo período de solicitude estará aberto desde o 12 de maio e ata o 29 de setembro, será por concorrencia non competitiva, deste xeito son subvencionables todos os proxectos que cumpran os requisitos establecidos nas bases reguladoras ata o esgotamento do crédito. Deste xeito, apuntou Guldrís, axilízase a execución desta liña de financiamento para pequenas e medianas empresas e autónomos que teñen o seu domicilio social e desenvolven a súa actividade económica en Galicia.

“En definitiva, trátase de ofrecer ao tecido empresarial galego as mellores condicións de financiamento para fortalecer a súa solvencia. Por este motivo, mantemos intactas as capacidades de investimento tradicionais de fondo perdido e préstamos e avais, e reforzamos os fondos de apoio necesarios para unha adaptación ao complexo escenario actual”, informou o director do Igape, quen lembrou que, tamén no marco da Axenda Financeira, está en marcha a liña de préstamos directos para investimentos estratéxicos ou para infraestruturas de centros tecnolóxicos.

• O vicepresidente primeiro e conselleiro de Economía, Industria e Innovación, Francisco Conde, mantivo unha reunión con representantes da comisión de enerxía da Confederación de Empresarios de Galicia (CEG).

O vicepresidente primeiro e conselleiro de Economía Industria e Innovación, Francisco Conde, mantivo unha reunión coa comisión de enerxía da Confederación de Empresarios de Galicia (CEG), na que fixo fincapé nas oportunidades que achega a transición ecolóxica para a implantación dun novo modelo industrial.

O responsable de Economía, Industria e Innovación resaltou que, a través da Axenda Enerxética de Galicia, a comunidade busca avanzar cara a un modelo sustentable e un novo mix enerxético con novas tecnoloxías -como poden ser o hidróxeno verde, os gases renovables e a economía circular, os biocombustibles, o almacenamento enerxético ou a eólica mariña.

Do mesmo xeito, Conde apuntou que a Xunta aposta por un modelo de transición enerxética ordenada, garantista, sustentable e respectuoso co medio ambiente, que permita achegar a familias, pemes e industria un prezo competitivo.

• O vicepresidente primeiro e conselleiro de Economía, Industria e Innovación, Francisco Conde, mantivo un encontro con representantes da Confederación de Empresarios de Galicia (CEG), UGT e CCOO.
• Lembra que Galicia precisa 1200MW adicionais na planificación da rede eléctrica para que se poidan desenvolver iniciativas empresariais como as de Stellantis, Altri, Resonac ou as dúas plantas de hidróxeno planificadas nas Pontes e Meirama.

O vicepresidente primeiro e conselleiro de Economía, Industria e Innovación, Francisco Conde, mantivo un encontro con representantes da Confederación de Empresarios de Galicia (CEG), UGT FICA Galicia e CCOO Industria para abordar as necesidades enerxéticas dos novos proxectos industriais galegos.

Na xuntanza, Conde sinalou que estes proxectos dependen directamente da planificación eléctrica, e polo tanto precisan que o Goberno central garanta que a Comunidade vai contar coas infraestruturas necesarias para que as empresas se poidan conectar á rede. Segundo salientou o vicepresidente económico, Galicia precisa 1200MW para proxectos como Stellantis, Altri, Resonac ou as dúas plantas de hidróxeno que están planificadas nas Pontes e Meirama, entre outras iniciativas empresariais.

No caso de Stellantis, Conde lembrou que o Goberno se comprometeu a poñer en marcha unha nova subestación e a iniciar a correspondente modificación na planificación eléctrica  non máis tarde do 30 de marzo.

• O vicepresidente primeiro e conselleiro de Economía, Industria e Innovación, Francisco Conde, estivo hoxe nas instalacións desta empresa nas Somozas, onde explicou que a prioridade do Goberno galego no sector eólico é favorecer un desenvolvemento ordenado e compatible co medio ambiente.

O vicepresidente primeiro e conselleiro de Economía, Industria e Innovación, Francisco Conde, destacou hoxe nas Somozas que a aposta de Galicia polas enerxías verdes vai permitir que empresas como Invenergy Services viva un momento de grandes oportunidades.

O vicepresidente económico achegouse esta mañá ás instalacións desta empresa con case 20 anos de traxectoria, referente na Comunidade na instalación, xestión e mantemento de parques eólicos e que é a responsable dos aeroxeradores que Endesa ten nos parques eólicos galegos.

O sector da enerxía vai ser un vector de crecemento e innovación en Galicia e a comarca de Ferrolterra ten potencial para converterse no epicentro da transición enerxética pola capacidade instalada e tamén desde o punto de vista loxístico e industrial a través do desenvolvemento, tamén, da eólica mariña e o hidróxeno verde.

Así, esta zona conta con tres dos catro Proxectos Industriais Estratéxicos declarados pola Xunta: a planta de hidróxeno verde de Reganosa e EDP e a factoría de pneumáticos de Sentury, ambas as dúas nas Pontes e o proxecto de Forestal del Atlántico para a produción de metanol en Mugardos. Súmanse outras iniciativas como a planta de
Iffe-Biotech para producir aceites omega-3 nas Somozas ou as fábricas de compoñentes para eólica mariña de Nervión Naval Offshore no porto exterior de Ferrol e nas antigas instalacións da planta Siemens Gamesa nas Somozas.

A prioridade do Goberno galego no referente ao sector eólico é favorecer un desenvolvemento ordenado e compatible co medio ambiente. Neste sentido, a futura Lei de promoción dos beneficios sociais e económicos dos proxectos que utilizan os recursos naturais de Galicia busca ser garantista desde o punto de vista ambiental e administrativo, xerar beneficio económico onde se asenten os proxectos, así como un impacto positivo na industria.

• Nesta segunda edición do programa, aumentaron as solicitudes un 43 % e as empresas participantes proceden das catro provincias galegas e de sectores moi diversos.
• Galicia Avanza contribúe a reforzar a competitividade das pemes galegas nos mercados exteriores así como a impulsar a Marca Galicia a nivel internacional no eido da innovación.
• As empresas seleccionadas van desde unha firma que desenvolve robots limpacristais, ata unha compañía que elabora complementos alimenticios en formato gominola, unha plataforma que permite ás ONGs xestionar as súas doazóns de maneira dixital, ou unha peme dedicada ao deseño e fabricación de cociñas orgánicas e sostibles.

A directora da Axencia Galega de Innovación da Xunta de Galicia, Patricia Argerey, participou no Parque Tecnolóxico de Galicia (Tecnópole) no acto no que se deron a coñecer as empresas beneficiarias da segunda edición do programa de aceleración para a internacionalización de pemes galegas innovadoras Galicia Avanza. Unha iniciativa posta en marcha en 2022 froito da colaboración entre a Vicepresidencia primeira e Consellería de Economía, Industria e Innovación -a través da Axencia Galega de Innovación (Gain) e do Instituto Galego de Promoción Económica (Igape)- e o Parque Tecnolóxico de Galicia (Tecnópole).

Argerey destacou a alta participación nesta edición, que aumentou un 43 % respecto da primeira celebrada no ano 2022, un dato que constata o interese polo programa e a maior competencia entre as candidatas. Así mesmo, apuntou que as trinta pemes seleccionadas proceden das catro provincias galegas e de sectores moi diversos como a alimentación, a saúde, a enerxía, o téxtil ou as novas tecnoloxías, entre outros.

A directora de Gain explicou que estes datos son especialmente satisfactorios para o seu departamento na medida en que cumpren cun dos obxectivos do Programa de Impulso á Innovación nas Pemes que é aumentar a base de empresas innovadoras galegas, especialmente entre as pemes e microempresas, xa que “a innovación está ao alcance de todos, non é unha cuestión de tamaño, localización ou sector”.

Ademais, Argerey subliñou que apoiando a chegada ao mercado exterior de solucións innovadoras galegas contribúese ademais a impulsar a apertura e visibilidade internacional do ecosistema galego de innovación reforzando así o atractivo da Marca Galicia a nivel internacional no ámbito da innovación, en liña coa Estratexia de Especialización Intelixente de Galicia (RIS3) 2021-2027.

Ademais das empresas beneficiarias, acudiron ao evento as consultoras que as guiarán e asesorarán neste proceso ao longo dos vindeiros meses. Nesta edición, o período de implementación do programa prolóngase a 10 meses, o que permitirá afondar máis nas necesidades das empresas e intensificar a aceleración.

As pemes seleccionadas accederán a un programa integral de apoio á internacionalización entre abril deste ano e febreiro de 2024, con itinerarios personalizados. Traballarase na protección das súas marcas e deseños industriais ou intelectuais, na detección de posibles colaboracións con outras empresas, no acceso a novos segmentos de clientes, na innovación e en incrementar a atracción de financiamento externo, entre outros aspectos.

As pemes beneficiarias pertencen a sectores moi diversos e ofrecen produtos e servizos moi dispares. No eido das novas tecnoloxías seleccionouse una empresa que emprega a identificación por radiofrecuencia e visión artificial para a xestión de inventarios e a trazabilidade das cadeas de subministración; outra que persegue internacionalizar a súa plataforma destinada a optimizar a relación entre as entidades sanitarias e as aseguradoras do campo da saúde; unha plataforma baseada na tecnoloxía blockchain que permite ás organizacións sen ánimo de lucro xestionar as doazóns de maneira dixital; unha firma que desenvolve robots limpacristais, fregasolos e robots que limpan paneis fotovoltaicos; un sistema baseado na tecnoloxía IoT (Internet das Cousas) que permite a monitorización das cafeteiras e dos muíños de café da canle food service; un sistema robótico para a recollida e apilado de pezas a granel; xunto a unha plataforma web para apoiar o estudo e realización de instalacións medioambientais cun aforro de tempo e recursos.

No campo alimentario vaise impulsar a internacionalización dunha firma que fabrica estoxos para conxelados e embalaxe para conserva de peixe; outra que quere comercializar entre o sector industrial alimentario internacional o seu coñecemento na produción de ovos e produtos derivados do ovo; unha consultoría centrada no sector pesqueiro e agroalimentario; unha empresa que comercializa cocktails; unha firma familiar que vende polbo ultraconxelado; outra que elabora complementos alimenticios en formato gominola, sen azucre nin alérxenos, e gominolas sen azucre; ademais dunha fábrica de chocolate artesá.

No ámbito da saúde hai unha peme que desenvolve técnicas baseadas na fluorescencia para o descubrimento de novos fármacos; a primeira plataformAPP especializada de formación e teleformación para o sector sociosanitario; así como un acumulador de auga quente sanitaria.

Varias das propostas céntranse no eido enerxético, como unha firma referente a nivel mundial na formación eólica que busca a exportación directa dos seus cursos; outra que ofrece produtos e servizos relacionados co hidróxeno verde e a súa implantación en procesos industriais actuais ou para novas aplicacións como dispensadores de hidróxeno para vehículos industriais; e outra que quere reforzar a exportación dos seus produtos de caldereiría e frío industrial.

No campo da sostibilidade, seleccionouse unha firma especializada no deseño e fabricación de cociñas orgánicas e sostibles; unha empresa dedicada á fabricación artesanal de calzado infantil, con materiais reciclados, ecolóxicos e naturais; outra que desenvolve fertilizantes minerais innovadores e sostibles; e unha peme que busca internacionalizar a súa braga menstrual de baixo impacto ambiental.

Entre as beneficiarias, hai tamén unha empresa dedicada á xestión de riscos biolóxicos e á fabricación de embalaxes para o transporte de materias biolóxicas; unha tecnolóxica que busca expandir e implementar o seu sistema para a xestión da auga en Angola e Tanzania; unha empresa que deseña e elabora produtos para profesionais do viño e a restauración; unha peme que fabrica pixamas e roupa de casa; e unha consultoría que axuda ás empresas a resolver problemas ligados á perda de competitividade debida á mala saúde ou desmotivación dos seus traballadores.

• Salienta o crecemento da riqueza industrial galega e anima ao “optimismo” perante o futuro da Comunidade a pesar das dificultades polas consecuencias da pandemia e polo contexto internacional.
• Destaca as posibilidades para Galicia en sectores como as enerxías renovables.
• Pon en valor a estabilidade que ofrece Galicia para xerar confianza aos inversores e a flexibilidade e axilidade da súa administración na tramitación dos proxectos.

O presidente da Xunta, Alfonso Rueda, animou ao tecido empresarial a aproveitar os novos retos e oportunidades que se lle presentan á industria galega para seguir prosperando. O titular do Goberno galego resaltouno en Vigona súa intervención no xantar-coloquio organizado polo Círculo de Empresarios de Galicia, no que invitou ao “optimismo” perante o futuro da Comunidade a pesar das dificultades polas consecuencias da pandemia e polo contexto internacional. 

O mandatario galego incidiu en que todos as análises coinciden en que a riqueza industrial de Galicia non deixou de medrar nos últimos tempos como resultado dunha tradición e dunha experiencia enraizada na Comunidade da que convidou a botar man para saír con éxito tamén dos novos retos e oportunidades. En concreto, o presidente da Xunta destacou as posibilidades para Galicia en sectores como as enerxías renovables. 

Alfonso Rueda indicou que as boas cifras en sectores como a automoción, o naval ou a cadea mar-industria, así como as cifras récord en exportación, o crecemento do emprego e os bos datos do turismo son unha proba do pulo de Galicia no seu tecido económico tradicional. Nese sentido, amosouse convencido de que hai “motivos para a esperanza”, sobre todo nunha cidade como Vigo que é “o corazón industrial de Galicia” e que ten capacidade para “bombear” sectores clave da economía. 

Pero o titular do Goberno galego salientou que as expectativas tamén son moi boas en sectores emerxentes e nas novas oportunidades que ofrecen para Galicia as enerxías renovables. Máis polo miúdo, Rueda referiuse ás posibilidades do vehículo eléctrico, da eólica terrestre e a eólica mariña, das enerxías renovables e do hidróxeno verde. “Hai moito interese no que Galicia pode facer coas enerxías renovables”, asegurou. Nese sentido, o presidente da Xunta puxo en valor a estabilidade que ofrece Galicia para xerar confianza aos inversores e a flexibilidade e axilidade da súa administración para a tramitación dos proxectos.  

Alfonso Rueda destacou que tamén no eido da investigación e da formación Galicia está preparada para asumir os novos retos da man da Universidade e da nova Formación Profesional. Subliñou, ademais, a oportunidade que supón o retorno dos galegos no exterior tanto para loitar contra a crise demográfica como para sumar persoal cualificado e novos emprendedores. 

“Non podemos perder esta oportunidade”, indicou o presidente da Xunta, polo que animou a traballar unidos para acadar as infraestruturas que precisa a Comunidade tanto nas conexións coa Meseta como con Portugal e a esixir que os fondos europeos cheguen en igualdade de condicións ás empresas que os precisan en Galicia ou que queren investir en Galicia. “Se a vostedes lles vai ben -dixo aos empresarios reunidos no acto- a Galicia vaille ir ben”.

• O director do Igape, Fernando Guldrís, mantén un encontro con representantes do Porto de Miami e do Clúster Loxístico de Galicia no que afondan nun documento base para configurar unha ruta comercial directa entre Miami e Galicia.
• O encontro permite poñer en valor o potencial galego no tocante á loxística de frío e a sustentabilidade dos portos da Comunidade ao tempo que se resalta o papel de Miami como hub loxístico e portuario e como punto de conexión co resto de Norteamérica e de Latinoamérica.
• Salienta que un dos motivos para establecer estas liñas de mercadorías entre Galicia e EE.UU radica en que a maior parte da produción de pneumáticos que Sentury prevé fabricar na futura planta serán para exportar ao mercado estadounidense vía Miami.

O director do Igape, Fernando Guldrís, no marco da viaxe que está a levar a cabo estas datas, vén de manter un encontro no Porto de Miami con representantes da propia terminal marítima e do Clúster Loxístico de Galicia­­­­­­. Unha xuntanza que, segundo expuxo, permitiu poñer en valor o potencial loxístico de ambas as dúas rexións ao tempo que se avanzou nun documento marco para o establecemento dunha ruta directa de mercadorías entre Galicia e Miami.

O director do Igape lembrou que o Porto de Miami xa ten “unha relación importante” coas autoridades portuarias de Vigo, A Coruña e Ferrol, e incidiu tanto no potencial galego no tocante á loxística de frío e a sustentabibilidade dos portos da Comunidade como na importancia de Florida como hub loxístico. A rexión configúrase como o terceiro clúster loxístico e de distribución máis importante do país, enlace entre Latinoamérica e o Caribe ao ser o maior exportador cara a estes mercados.