Oficina virtualSuper User
A Alianza Industrial Galega do Hidróxeno Verde celebra o seu primeiro pleno co foco posto na conexión coa meseta
- A secretaria xeral de Industria, Paula Uría, participou nesta reunión na que se constituíron comités executivos que se encargarán de avanzar nos distintos retos: proxectos e infraestruturas, formación e innovación, normativa ou capacidades industriais.
A secretaria xeral de Industria, Paula Uría, participou no primeiro pleno da Alianza Industrial Galega do Hidróxeno Verde no que se puxo en valor o Pacto pola Enerxía con Enagás, que posibilitará cumprir cun dos principais obxectivos fixados pola Alianza: o desenvolvemento do corredor atlántico do hidróxeno. Grazas a este acordo, Enagás comprométese a realizar investimentos na Comunidade e realizar o hidroduto entre Guitiriz e Zamora, facilitando a conexión coa Meseta.
No pleno avaliouse a incorporación de novos integrantes á Alianza, como é o caso de Ence, que se sumou recentemente, permitindo contar xa con 10 empresas tractoras, 10 clústeres e asociacións empresariais -que representan a máis de 700 compañías-, as tres universades galegas, así como axentes e administracións públicas.
Ante a amplitude de integrantes e, coa previsión de seguir incorporando máis -como o caso de Enagás-, a Alianza acordou aprobar un modelo de cogobernanza no que se inclúen varios comités executivos que se encargarán de traballar e avanzar nos seus diferentes obxectivos e retos en eidos como os dos proxectos e infraestruturas, a formación e a innovación, a normativa ou as capacidades industriais.
A secretaria xeral destacou que esta estratexia de colaboración público-privada ten como finalidade facer de Galicia unha rexión de referencia internacional no desenvolvemento da cadea de valor do hidróxeno renovable.
A Xunta pon en valor o proxecto SoNNMESyC de mobilidade sostible no que participan empresas galegas e confía en que se axilice o novo Perte do vehículo eléctrico
- O novo proxecto tractor será beneficiario de 32,8 millóns de euros no marco do Perte VEC permitindo transformar a mobilidade no transporte de mercadorías e pasaxeiros, abordando a electrificación de autobuses, vehículos semipesados para usos especiais, e vehículos lixeiros, motocicletas e para repartición de última milla.
- A iniciativa inclúe actuacións nos eixos da circularidade das materias primas, a electrificación dos vehículos e a conectividade, e conta coa participación de máis de vinte empresas do sector presentes na cadea de valor da industria da automoción de oito comunidades autónomas, entre as cales figuran as empresas galegas Castrosúa, Little Cars e Urovesa.
- O Goberno galego agarda que no próximo reparto de axudas do Perte VEC os principais fabricantes de España, incluíndo Stellantis, atopen unha resposta aos seus plans de futuro.
A Xunta de Galicia participou esta mañá no acto inaugural do proxecto Solucións ás novas necesidades de mobilidade eléctrica baseadas en criterios de sustentabilidade e conectividade (SoNNMESyC), que se lanza no marco do Programa de axudas á cadea de valor do Perte do Vehículo eléctrico e Conectado (Perte VEC) e que conta con representación galega.
A proposta céntrase en iniciativas que abarcan toda a cadea de valor do vehículo eléctrico e conectado, desde a fabricación de baterías ata o tren de potencia e outros sistemas como a recarga intelixente, a automatización de procesos de fabricación e a realidade aumentada.
Rueda asegura para Galicia unha posición privilexiada nun futuro marcado polo coñecemento e a innovación
- Salienta que na fase de elaboración da Estratexia de Especialización Intelixente (RIS3) participaron máis de 800 representantes de 500 axentes diferentes, que incluíron empresas, centros de coñecemento e tecnolóxicos e administracións.
- Subliña que as prioridades do Fondo Europeo de Desenvolvemento Rexional (Feder) para o período 2021-2027 pasan por construír unha Galicia máis competitiva e intelixente, máis verde e máis conectada e social.
-
O investimento total dos Feder para o novo período elévase a 1.567 M€, mentres que o RIS3 implicará a posta en marcha dun esforzo sen precedentes en I+D+i que ten como meta mobilizar preto de 5.000 M€ entre fondos públicos e privados.
O presidente da Xunta, Alfonso Rueda, asegura para Galicia unha posición privilexiada nun futuro marcado polo coñecemento e a innovación. O mandatario galego reafirmouno na súa intervención na presentación do Programa Operativo Feder 2021-2017 e da Estratexia de Especialización Intelixente (RIS3) Galicia 2021-2027, nun acto en Santiago de Compostela no que participaron tamén o vicepresidente primeiro e conselleiro de Economía, Industria e Innovación, Francisco Conde, e o conselleiro de Facenda e Administración Pública, Miguel Corgos.
O titular do Goberno galego asentou as súas palabras en datos esperanzadores, como o feito de que Galicia fora a rexión que máis crecera en termos de PIB per cápita en toda España, un 3,2 % de media anual entre os anos 2000 e 2021, case un punto por riba do crecemento medio anual do Estado. A Comunidade galega, ademais, foi quen de recuperar o PIB prepandemia antes que a media estatal.
Por outra banda, o Fondo Europeo de Desenvolvemento Rexional (Feder), grazas a un investimento de máis de 7.500 millóns de euros ao longo das últimas décadas, permitiu que Galicia se achegue ás rexións máis avanzadas da Unión Europea.
Alfonso Rueda subliñou que nos últimos anos “asistimos a un rexurdimento económico de Galicia” e a “un reforzo do ecosistema galego de I+D+i”. De feito, as empresas galegas deron un salto sen precedentes en I+D cun incremento do 40 % e un aumento do seu persoal investigador de ata un 92 %.
O presidente da Xunta falou dun “logro colectivo”. No que se refire ao gasto en I+D sobre o PIB, Galicia pasou de situarse no posto doce entre as Comunidades autónomas a estar agora na sétima posición, sendo a terceira que máis medrou na última década. Polo que respecta ao capital humano, contaba hai dous anos con 11.435 persoas dedicadas a I+D e un total de 7.462 investigadores.
Alfonso Rueda referiuse á nova etapa que se abre da man da RIS3, que na súa fase de elaboración contou coa participación de máis de 800 representantes de 500 axentes diferentes, que incluíron empresas, centros de coñecemento e tecnolóxicos e administracións.
Polo que respecta ao Programa Operativo Feder 2021-2027, o titular do Goberno galego subliñou que as prioridades para o período 2021-2027 pasan por construír unha Galicia máis competitiva e intelixente, máis verde e máis conectada e social.
O presidente da Xunta indicou que, con estas accións, Galicia persegue que “o futuro que vén por diante sexa o noso futuro, o que nós construímos” e remarcou que nese obxectivo van ser investidos os fondos comunitarios.
Novos investimentos
O investimento total do programa Feder elévase nesta nova etapa a 1.567 millóns de euros (940,2 millóns de axudas da UE e 626,8 millóns de contribución a través do cofinanciamento autonómico). Deses fondos, 419,2 millóns vanse investir na construción dunha Europa máis competitiva e intelixente; 378,7 son para unha Europa máis verde; para unha Europa máis conectada se destinan 63,1 millóns e 79,2 millóns máis son para unha Europa máis social e inclusiva. Tamén se destinará un 30,2 % dos recursos aos obxectivos da loita contra o cambio climático e un 8 % aos de biodiversidade.
A RIS3, pola súa banda, implica a posta en marcha dun esforzo sen precedentes en I+D+i en Galicia. Ten como meta mobilizar entre 2022 e 2027 preto de 5.000 millóns dos que 3.000 corresponden a fondos públicos das diferentes administracións, e 2.000 millóns a mobilización privada.
Rueda pon en valor o compromiso de Sentury con Galicia a través do impulso dunha planta de pneumáticos nas Pontes que xerará 750 empregos
- O presidente da Xunta de Galicia, Alfonso Rueda, reuniuse en Santiago de Compostela co presidente do Grupo, Qin Long, para avaliar o avance da tramitación desta iniciativa, un dos catro proxectos industrias estratéxicos declarados polo Goberno galego.
- Ofrece o apoio da Administración autonómica para acompañalos na súa implantación na Comunidade co obxectivo de que inicie a súa construción este mesmo ano.
O presidente da Xunta, Alfonso Rueda, acompañado do vicepresidente primeiro e conselleiro de Economía, Industria e Innovación, Francisco Conde, reuniuse esta mañá en Santiago de Compostela co presidente do Grupo Sentury, Qin Long. Rueda puxo en valor o compromiso con Galicia demostrado por Sentury a través da implantación dunha planta de pneumáticos no concello das Pontes.
No encontro avaliouse o estado de tramitación desta iniciativa que, ademais, é un dos catro proxectos industriais estratéxicos declarados polo Goberno galego. Entre outras vantaxes, esta figura supón carácter prioritario de tramitación, así como a redución á metade dos prazos establecidos no procedemento.
Rueda trasladou todo o apoio ao alcance das competencias da Administración autonómica -que está facendo un gran esforzo no eido da axilización e a simplificación para a captación de investimentos- para acompañar a Sentury en todo o proceso de instalación en Galicia co obxectivo de que poida iniciar este ano a súa construción.
O proxecto de Sentury nas Pontes consiste na construción dunha planta de pneumáticos de alto rendemento co obxectivo de alcanzar unha produción anual de 12 millóns de pneumáticos. Prevé un investimento de 531 M€, así como a creación de 750 empregos directos.
A Xunta avalía con Zinpro os plans de futuro desta empresa en Galicia
- O vicepresidente primeiro e conselleiro de Economía, Industria e Innovación, Francisco Conde, mantivo unha reunión co representante da multinacional estadounidense, que abrirá proximamente unha oficina e un laboratorio na Sionlla Biotech.
O vicepresidente primeiro e conselleiro de Economía, Industria e Innovación, Francisco Conde, mantivo esta semana unha reunión de traballo co representante en Galicia da multinacional estadounidense Zinpro, Arturo Gómez, para avaliar os plans de futuro desta compañía na Comunidade.
O Goberno galego valorou a oportunidade que supón a implantación desta multinacional en Galicia, xa que sería interesante sumar a súa experiencia ao ecosistema galego de I+D contando, ademais, con que a Comunidade é un referente tanto no sector gandeiro como no que a industria alimentaria se refire posibilitando, deste xeito, posibles sinerxías.
A Xunta destaca que o centro de investigación empresarial de Mestrelab sitúa a Marca Galicia como referente internacional en biotecnoloxía
- O vicepresidente primeiro e conselleiro de Economía, Industria e Innovación, Francisco Conde, visitou esta mañá en Santiago de Compostela as novas instalacións.
- Cunha axuda autonómica de 4,2M€ para un investimento de oito millóns, converterase nun centro neurálxico para o ecosistema galego de I+D+i vinculado ás ciencias da vida.
O vicepresidente primeiro e conselleiro de Economía, Industria e Innovación, Francisco Conde, visitou esta mañá en Santiago de Compostela as instalacións do novo centro de investigación empresarial de Mestrelab, do que destacou que sitúa a Marca Galicia como referente internacional en biotecnoloxía.
Na súa intervención, Conde explicou que se trata dun centro pioneiro xa que, xunto co impulsado por Borgwarner, será dos primeiros que se poñerán en marcha no marco do programa das Unidades Mixtas de Investigación do Goberno galego. En concreto, agárdase que actúe como centro neurálxico para o ecosistema galego de I+D+i vinculado ás ciencias da vida con achegas á investigación farmacéutica, química e biotecnolóxica.
O programa conta cunha axuda da Axencia Galega de Innovación de 4,2M€ para un investimento total de 8M€ e prevese que dea traballo a máis dunha trintena de profesionais e que conte con 15 empresas entre usuarias e colaboradoras nos proxectos de investigación que se poñerán en marcha.
Mestrelab desenvolve solucións de software que, actualmente, están a ser utilizadas por preto de 500 clientes da industria farmacéutica, biotecnolóxica e química e por máis de 2000 universidades de todo o mundo. Grazas á súa tecnoloxía, por exemplo, as vacinas contra a covid desenvolvéronse en tempo récord. Conde rematou subliñando que este novo centro permitirá incrementar a carteira de solucións e produtos do sector biotecnolóxico galego e redobrar a excelencia do Campus Vida, ademais de complementar a actividade do Polo biotecnolóxico da Sionlla.
A Xunta avaliará a solicitude que Ence ten previsto solicitar en breve para tramitar a planta das Pontes como proxecto industrial estratéxico
- O vicepresidente primeiro e conselleiro de Economía, Industria e Innovación, Francisco Conde, sinala que esta figura permite a redución de prazos, incluíndo a concesión da licenza de obra.
- Resalta que os resultados positivos das probas piloto tamén contribúen a que o proxecto se poida poñer en marcha canto antes.
- Apela a seguir traballando desde as diferentes administracións para que poida acceder a fondos europeos un proxecto “absolutamente referente” no eido da economía circular.
O vicepresidente primeiro e conselleiro de Economía, Industria e Innovación, Francisco Conde, salientou que a Xunta vai avaliar a solicitude que Ence ten previsto presentar nas próximas semanas para tramitar a planta das Pontes como proxecto industrial estratéxico. Tal e como subliñou Conde, esta figura permitiría a redución de prazos administrativos, incluíndo a concesión da licenza de obra no propio expediente. Do mesmo xeito, sinalou que tamén é boa sinal o resultado positivo das probas piloto, que xa marcan “unha clara orientación para que se poida poñer en marcha canto antes”.
Segundo Conde, esta iniciativa pon en valor o compromiso que Ence ten con Galicia, que pasa pola planta de Lourizán e que agora vai pechar o ciclo cun novo proxecto de economía circular e cun compoñente de innovación e tecnolóxico “que vai permitir que Galicia sexa tamén un referente neste tipo de proxectos”.
O responsable de Economía, Industria e Innovación apuntou que a planta de Ence se suma a diferentes iniciativas que tamén se están tramitando, como a planta de pneumáticos de Sentury Tire nas Pontes, o proxecto de Biomasa Forestal (Triskelion) para producir metanol verde en Mugardos ou a planta de hidróxeno verde de Reganosa e EDP Renovables. Conde, que tamén fixo referencia a iniciativas vinculadas a Nervión Naval Offshore e IFFE Biotech, sinalou que no actual contexto de transformación do tecido produtivo se pode converter unha situación de dificultade como o peche da central térmica nunha oportunidade.
O vicepresidente económico remarcou que o de Ence é un proxecto disruptivo e innovador que dá resposta aos elementos que está pedindo a Comisión Europea, e nese sentido fixo fincapé en que “imos seguir colaborando entre as distintas administracións e neste caso apoiando para que Ence poida acceder aos fondos europeos”.
A Xunta subliña en Sevilla a aposta pola cooperación público-privada para a internacionalización do tecido produtivo
- O director do Igape, Fernando Guldrís, participa, no marco do XXIII Foro de Axencias de Desenvolvemento Rexional, nun panel sobre as posibilidades que ofrecen as ADR como instrumentos na cooperación iberoamericana.
- Destaca o traballo realizado polas Antenas do Igape, que acompañan ás pemes galegas nos seus procesos de internacionalización sumando máis de 1400 servizos nos últimos tres anos.
- Lembra que está en marcha una nova convocatoria do Plan de Misións Comerciais, que desde a súa posta en marcha no 2014 permite impulsar misións empresariais directas e a participación das pemes galegas en feiras e eventos internacionais, con actuacións en ata 70 países.
O director do Igape, Fernando Guldrís, participou esta mañá nunha mesa de traballo no XXIII Foro de Axencias de Desenvolvemento Rexional (ADR) na que se afondou nas posibilidades que ofrecen estes organismos como instrumentos estratéxicos na cooperación iberoamericana. Un marco no que salientou a importancia da cooperación público-privada para fortalecer a Marca Galicia e consolidar a internacionalización do tecido produtivo galego.
“O bo facer e o prestixio das nosas marcas líderes internacionais fortalece a Marca Galicia, do mesmo xeito que o prestixio da nosa terra potencia o posicionamento competitivo das empresas galegas nos mercados internacionais”, indicou Guldrís, quen salientou que “ao longo destes anos fomos creando comunidades moi sólidas en todo o mundo, tamén en Iberoamérica”.
Un traballo conxunto que, como explicou o director do Igape, se materializa en boas prácticas capaces de consolidar “lazos comerciais”. Neste sentido, resaltou, entre outros, os distintos acordos asinados co Estado de México, co Estado de Antioquia (Colombia), ou coa provincia de Tungurahua (Ecuador), que facilitan o diálogo e supoñen vantaxes directas para as empresas galegas promovendo os investimentos e o comercio bilateral coas rexións.
Así mesmo, Guldrís fixo fincapé no papel que están a desempeñar as Antenas do Igape, que acompañan ás pemes galegas nos seus procesos de internacionalización sumando máis de 1400 servizos nos últimos tres anos.
Neste mesmo marco de aposta pola internacionalización, lembrou Guldrís, activouse hai uns meses unha nova convocatoria da liña de bolseiros de internacionalización, que permite aos participantes adquirir competencias profesionais en mercados exteriores. A iniciativa suma, desde a súa posta en marcha, 400 novos titulados galegos especializados en comercio exterior, que colaboran coa internacionalización das empresas en mercados como Estados Unidos, Filipinas, Dubai, Arxentina, Xapón, Canadá, Tailandia, Brasil, Corea do Sur, México ou Emiratos Árabes.
Así mesmo, o director do Igape indicou que está en marcha unha nova convocatoria do Plan de Misións Comerciais, que desde a súa posta en marcha no 2014 permite impulsar accións directas e a participación das pemes galegas en feiras e eventos internacionais, con presenza en ata 70 países.
“Todas estas prácticas e actuacións representan moi ben a Galicia na que estamos a traballar: unha Galicia moderna e de futuro, innovadora e aberta ao mundo. Unha Galicia que, como saben, alcanzou novos fitos en exportacións: falamos dun récord histórico con case 30.000M€ en exportacións e dun total de 8.496 compañías que realizaron vendas no exterior durante o ano pasado”, concluíu Guldrís.
Rueda destaca o bo comportamento do sector galego da automoción, que pechou 2022 coa cifra de negocios no seu nivel máis alto e con récord de exportacións
- O presidente da Xunta participou na clausura da asemblea do Clúster de Empresas de Automoción de Galicia (Ceaga).
- Reclama que Stellantis Vigo poida acceder á nova convocatoria do Perte do vehículo eléctrico e conectado, tras quedarse sen asignar máis de 2.000 M€ de fondos europeos na primeira edición.
- Solicita do Goberno central un trato xusto con Galicia, tendo en conta que a industria da automoción contribúe a que España sexa o segundo país produtor de Europa.
O presidente da Xunta, Alfonso Rueda, destaca o bo comportamento do sector galego da automoción, que pechou o 2022 coa cifra de negocios no seu nivel máis alto e con récord de exportacións. Na clausura da asemblea do Clúster de Empresas de Automoción de Galicia (Ceaga), o titular do Goberno autonómico solicitou do Goberno central un trato xusto con Galicia no reparto dos fondos europeos, tendo en conta que o este sector contribúe a que España sexa o segundo país produtor de Europa.
Alfonso Rueda, que asistiu acompañado polo vicepresidente primeiro e conselleiro de Economía, Industria e Innovación, Francisco Conde, puxo en valor os bos resultados do sector nun ano difícil para a automoción galega polos problemas de aprovisionamento, a suba de prezos das materias primas, a crise enerxética e a inflación. Malia todo, resistiu e pechou o último exercicio contable coa cifra de negocios no seu nivel máis alto e con récord de exportacións. Destacou, ademais, que Galicia lidera o ránking nacional e que o sector galego da automoción representa o 13,8 % do emprego industrial na Comunidade. Galicia, co grupo Stellantis á cabeza e con toda a súa industria auxiliar, fabricou o 19 % dos vehículos producidos en España.
O presidente da Xunta pediu que, atendendo a estes datos, se actúe en consecuencia e que o Goberno central teña en conta o peso da automoción galega no reparto dos fondos Next Generation, “a maior oportunidade que ten ante si o sector”, subliñou. Nese sentido, aplaudiu que se anunciara unha segunda convocatoria do Perte do vehículo eléctrico e conectado, coa posibilidade de emendar os erros da primeira, pero pediu “resultados”. Alfonso Rueda, de feito, solicitou o apoio do sector para esixir ao Goberno que os máis de 2.000 millóns de euros que quedaron sen asignar no primeiro Perte Vec se repartan tendo en conta as necesidades e as oportunidades da automoción galega; especialmente, de Stellantis Vigo.
Rueda confiou en que se manteñan os prazos e que a convocatoria non se retrase máis alá do mes de maio para que a factoría de Balaídos poida planificar novos investimentos na Comunidade. “Galicia, como principal produtora, quere ser parte da solución”, indicou.
A Xunta impulsa a Axenda de startups co obxectivo de promover o seu crecemento e fomentar a captación de investimentos e novos socios
- O vicepresidente primeiro e conselleiro de Economía, Industria e Innovación, Francisco Conde, participou esta mañá en Santiago de Compostela na xornada organizada por APD e Unirisco ‘Investir en ciencia si é rendible’.
- O Goberno galego tramita un decreto para garantir a estabilidade de máis de 500 investigadores e técnicos de investigación de centros públicos.
O vicepresidente primeiro e conselleiro de Economía, Industria e Innovación, Francisco Conde, participou esta mañá na xornada Investir en ciencia si é rendible, organizada por APD e Unirisco, na que explicou que a Xunta de Galicia impulsa a Axenda de startups co obxectivo de promover o seu crecemento e fomentar a captación de investimentos e novos socios.
Así, no eido do financiamento do emprendemento innovador, Galicia conta con este instrumento -cun orzamento de 14,7M€-, ademais da Axenda Financeira para 2023 na que se reservan 140M€ e que contempla apoios específicos para investimento en innovación. Así, a través de XesGalicia, destínanse por exemplo 10M€ a este ámbito a través dos fondos Galicia InnovaTech e Galicia Iniciativas Emprendedoras.
Conde defendeu que é rendible investir en ciencia tanto polo impacto na saúde e benestar, no medio ambiente, na medicina e na industria; como polo retorno que xera en termos de coñecemento, talento, competitividade e progreso social e económico.
Explicou que Galicia está investindo en ciencia, poñendo en marcha infraestruturas como o Polo biotecnolóxico da Sionlla ou o primeiro centro en Galicia para o desenvolvemento de terapias avanzadas contra o cancro; apoiando o emprendemento innovador a través das business factory (BioIncubaTech, BFAuto, BFFood ou BFMedicines); con iniciativas que contribuirán ao desenvolvemento das capacidades empresariais como os Hubs de Innovación Dixital. Pero tamén a través dun decreto para que a carreira investigadora se poida desenvolver en Galicia coas mellores condicións laborais, garantindo a súa estabilización e do que se poderían beneficiar máis de 500 profesionais entre investigadores e técnicos de investigación.
O vicepresidente económico destacou que Galicia, a través das empresas biotech e os centros de coñecemento, está xerando produtos e servizos innovadores que contribúen a captar e reter talento. É o caso de compañías apoiadas pola Xunta como Celtarys, Libera Bio ou BFlow; ou empresas tractoras que apostan pola Comunidade como Janssen y Lilly, Lonza ou Indukern. Neste sentido incidiu na necesidade de que a ciencia sexa respaldada con apoio tanto público como privado.
