• A conselleira de Economía e Industria, María Jesús Lorenzana, mantivo en Oslo un encontro coa embaixadora de España en Noruega, Alejandra del Río Novo, e co agregado comercial xefe da Oficina Económica e Comercial de España, Julio Rasilla Álvarez
• Destaca que Noruega é un referente e un modelo a seguir no relativo a eólica offshore, que abre oportunidades recíprocas de negocio para o naval, o sector metalmecánico e o enerxético
• O país nórdico ocupa o posto 33 na clasificación de destinos aos que Galicia exporta, principalmente, vehículos automóbiles, produtos minerais e metalmecánicos; se ben, cómpre destacar o incremento que se vén rexistrando nas vendas do sector forestal-madeira así como o naval
• O comercio bilateral entre Galicia e Noruega acadou en 2024 os 96,1 M€, cunha balanza comercial positiva e un número de empresas exportadoras regulares que se mantén estable no tempo en torno ás 90

Oslo (Noruega), 7 de xuño de 2025

A conselleira de Economía e Industria, María Jesús Lorenzana, mantivo hoxe un encontro coa embaixadora de España en Noruega, Alejandra del Río Novo. Un encontro que estivo precedido pola reunión de traballo co agregado comercial xefe da Oficina Económica e Comercial de España, Julio Rasilla Álvarez. Con ambos mandatarios, a conselleira abordou oportunidades recíprocas de investimento entre Galicia e o país nórdico.

A conselleira salientou que, actualmente, Noruega ocupa o posto 33 na clasificación de países aos que Galicia exporta, principalmente, vehículos automóbiles, produtos minerais e metalmecánicos; se ben, cómpre destacar o incremento que se vén rexistrando nas vendas do sector forestal-madeira así como o naval.

Segundo sinalou, o comercio bilateral entre Galicia e Noruega acadou en 2024 os 96,1 M€, cunha balanza comercial positiva e un número de empresas exportadoras regulares que se mantén estable no tempo, en torno ás 90. En concreto, o ano pasado venderon os seus produtos e servizos naquel país 232 empresas, das que 82 xa o fan regularmente. 

Ata marzo de 2025, as exportacións galegas a Noruega acadaron os 25,5 M€ e foron 126 as empresas que operaron alí, 57 regulares.

Lorenzana quixo poñer en valor a aposta que está facendo Galicia por atraer investimentos en sectores, fundamentalmente, vinculados coa economía verde e as enerxías renovables dada a vontade do Goberno galego de xestionar un mellor aproveitamento dos recursos naturais para abaratar os custos enerxéticos e incrementar a competitividade industrial.

Neste sentido, destacou que Noruega, en particular, é un referente e un modelo a seguir no relativo a eólica offshore, que abre oportunidades recíprocas de negocio para o naval, o sector metalmecánico e o enerxético. Tamén sinalou que ten en común con Galicia que conta cunha industria forestal consolidada, polo que existe potencial para seguir crecendo na exportación de madeira tratada para exteriores ou solucións para construción sustentable ou deseño interior.

Outros sectores con potencial de crecemento, segundo se puxo de manifesto nas xuntanzas, son o agroalimentario e a acuicultura, ou o da construción, polo compromiso de Noruega co desenvolvemento sustentable e a conectividade.

Lorenzana agradeceu a receptividade da embaixadora e do agregado comercial xefe da Oficina Económica e Comercial de España, e a súa disposición a colaborar na busca de sinerxías comerciais e económicas entre ambos os dous territorios.

Oslo (Noruega), 6 de xuño de 2025

A conselleira de Economía e Industria, María Jesús Lorenzana, mantivo hoxe un encontro con representantes do clúster do naval, Aclunaga, que estes días participa cun expositor propio na feira Nor-Shipping de Oslo, unha das máis relevantes a nivel internacional do sector naval e o transporte marítimo.

Aclunaga acode a esta feira co apoio do Instituto Galego de Promoción Económica (Igape), no marco dos programas de internacionalización Foexga e Galicia Exporta Organismo Intermedios, xunto con máis de 30 empresas galegas do sector ás que representa.

• A conselleira de Economía e Industria, María Jesús Lorenzana, visitou hoxe a Feira Nor-Shipping á que asiste unha delegación de preto de trinta empresas galegas
• Destaca que se trata dunha oportunidade única para explorar no mercado internacional novas oportunidades de negocio nun momento en que o naval galego rexistra a maior carga de traballo desde 2019
• Lembra que a Xunta aprobou recentemente o Plan director do naval con medidas que suman 62 M€ para contribuír a que as empresas galegas do sector poidan internacionalizarse, diversificar mercados e investir en innovación tecnolóxica e sustentabilidade
• Avoga por promover unha forte aposta por novos nichos de futuro para o sector, que están na eólica offshore e, tamén, na industria da defensa, tal e como promove a Estratexia de defensa e seguridade da Xunta

Oslo (Noruega), 6 de xuño de 2025

A conselleira de Economía e Industria, María Jesús Lorenzana, reivindicou hoxe o “momento clave” que atravesa o sector naval galego, presente estes días na prestixiosa feira internacional de construción naval e transporte marítimo de Noruega, Nor-Shipping 2025, que se celebra en Oslo do 3 ao 6 de xuño.

Lorenzana visitou hoxe este certame acompañando unha delegación de preto de trinta empresas galegas do sector encabezadas por Aclunaga, Asime e a Cámara de Comercio de Pontevedra, Vigo e Vilagarcía, presentes nesta feira co apoio do Instituto Galego de Promoción Económica (Igape).

Nor-Shipping atrae cada ano ás principais empresas marítimas do mundo, armadores, estaleiros, fabricantes de equipos, asociacións e autoridades portuarias. Representando a Galicia, contan con expositor propio Astilleros Armón, Ibercisa, Metalships, Progener-Grupo Emenasa e Aclunaga.

A conselleira destacou que se trata dunha oportunidade única para explorar no mercado internacional novas oportunidades de negocio nun momento en que o naval galego rexistra a maior carga de traballo desde 2019.

Segundo dixo, Galicia finalizou 2024 cunha vintena de contratos (22) na carteira de pedidos, que supón o 40 % do total nacional. A actividade ponderada representa o 41 %, por riba de Asturias (34 %) e País Vasco (26 %), o que sitúa Galicia como líder nacional. Ademais, o naval galego duplicou a súa actividade industrial con respecto a 2023 e consolídase como a comunidade con maior estabilidade histórica de pedidos, o cal garante continuidade e planificación produtiva a medio prazo para os estaleiros galegos.

Lorenzana indicou que para contribuír a esa estabilidade, e a que as empresas galegas do sector poidan internacionalizarse, diversificar mercados e contratos, e investir en innovación tecnolóxica e sustentabilidade, é polo que a Xunta aprobou recentemente o Plan director do naval, con medidas que suman 62 M€.

Na mesma liña, avogou por promover unha forte aposta por novos nichos de futuro para o sector, que están na eólica offshore e, tamén, na industria da defensa, dixo, tal e como promove a Estratexia de defensa e seguridade aprobada pola Xunta que busca, entre outras cousas, atraer cara a este segmento e actividade sectores como o naval, a automoción, o metalmecánico ou as TIC.

• A conselleira de Economía e Industria, María Jesús Lorenzana, mantivo hoxe un encontro con directivos da empresa norueguesa
• A planta xa conta con todos os permisos para ocupar en torno a 20.000 m² no porto de Burela, nunha nave na que prevé producir unhas 3.300 toneladas de salmón ao ano e na que se estima que creará ata un cento de postos de traballo directos e indirectos
• Supón un investimento de 80 M€ aos que a Xunta achegará, previsiblemente, uns 30 M€
• Lorenzana subliña que é “unha moi boa nova pola que se agardaba en Burela e un verdadeiro motivo de satisfacción, porque se trata dun proxecto industrial máis que se instala en Galicia, que confía e que aposta por Galicia”

Oslo (Noruega), 6 de xuño de 2025

A conselleira de Economía e Industria, María Jesús Lorenzana, mantivo hoxe un encontro en Oslo con directivos da empresa norueguesa Seafood Legacy, quen lle confirmaron que a finais de ano comezarán as obras da que vai ser a primeira planta de cría de salmón en Galicia.

O proxecto, que vai instalarse no concello de Burela, supón un investimento de 80 millóns de euros, dos que a Xunta achegará, previsiblemente, uns 30 millóns.

A planta xa conta con todos os permisos para ocupar en torno a 20.000 m² no porto de Burela nunha nave na que prevé producir unhas 3.300 toneladas de salmón ao ano e na que se estima que creará ata un cento de postos de traballo directos e indirectos.

Lorenzana asegurou que “é unha moi boa nova pola que se agardaba en Burela e para nós un verdadeiro motivo de satisfacción porque se trata dun proxecto industrial máis que se instala en Galicia, que confía e que aposta por Galicia”.

A planta de acuicultura de Seafood Legacy, engadiu, supón “un plus” para o sector da acuicultura en Galicia que, por primeira vez, vai ofertar, tamén, o salmón. Unha planta que se suma ás que xestiona a tamén norueguesa Stolt Sea Farm, Nueva Pescanova ou Profand.

A acuicultura en Galicia suma 2.510 empresas e dá emprego a 4.460 persoas. O grupo de establecementos de criadoiros, granxas mariñas e liñas de cultivo é a segunda maior fonte de ingresos dentro do sector: conta con 618 persoas ocupadas, o 14 por cento do emprego, e continúa gañando peso en termos de facturación, posto que actualmente representa máis do 47 por cento (137,92 millóns de euros) dun total de 290 millóns de euros.

• A conselleira visitará a feira Nor-Shipping 2025, un dos principais puntos de encontro da industria marítima mundial que se celebra estes días, onde contan con expositor propio Astilleros Armón, Ibercisa, Metalships, Progener-Grupo Emenasa e Aclunaga
• Esta misión comercial a Oslo está encabezada polo clúster do naval, Aclunaga, o do metal, Asime, e a Cámara de Comercio de Pontevedra, Vigo e Vilagarcía, que participan nesta feira internacional co apoio do Igape
• Na súa estancia en Oslo, a conselleira tamén terá ocasión de reunirse coa embaixadora de España en Noruega, Alejandra del Río Novo, e con empresas do sector da acuicultura

Santiago de Compostela, 4 de xuño de 2025

A conselleira de Economía e Industria, María Jesús Lorenzana, inicia mañá unha viaxe a Noruega acompañando unha delegación de preto de trinta empresas galegas do naval que participan na feira Nor-Shipping 2025, un dos principais puntos de encontro da industria marítima mundial.

Esta misión comercial a Oslo está encabezada polo clúster do naval, Aclunaga, o do metal, Asime, e a Cámara de Comercio de Pontevedra, Vigo e Vilagarcía, que participan nesta feira internacional co apoio do Instituto Económico de Galicia (Igape), a través do programa Foexga (2,4 M€) e Galicia Exporta Organismos Intermedios (1,5 M€), convocados recentemente.

Nor-Shipping é unha feira e congreso internacional de construción naval e transporte marítimo que se está a celebrar en Oslo (Noruega) do 3 ao 6 de xuño. Trátase dun dos principais eventos do sector a nivel internacional no que, ademais das empresas galegas que estarán de visita estes días, contarán con expositor propio Astilleros Armón, Ibercisa, Metalships, Progener-Grupo Emenasa e Aclunaga.

Na súa estancia en Oslo, a conselleira tamén terá ocasión de manter un encontro coa embaixadora de España en Noruega, Alejandra del Río Novo, e con empresas do sector da acuicultura.

Cambados (Pontevedra), 31 de maio de 2025

A conselleira de Economía e Industria, María Jesús Lorenzana, salientou hoxe o apoio da Xunta ao sector vitivinícola galego, que conta con máis de 10.000 profesionais e case 450 adegas que elaboran viño baixo algúns dos cinco selos de denominación de orixe ou indicación xeográfica protexida.

Lorenzana visitou este mediodía a adega Palacio de Fefiñanes, da D. O. Rías Baixas, que produce e comercializa unha media de 175.000 botellas ao ano, das que aproximadamente o 50 % ten como destino a exportación a uns 25 países.

A conselleira lembrou que a Xunta, a través do Instituto Económico de Galicia (Igape), convocou en 2023 e 2024 un programa de axudas para financiar a adquisición de uva por parte das adegas galegas por importe de 2 M€. En total, as dúas convocatorias suman 67 solicitudes, a maioría, na provincia de Pontevedra (38).

• En 2024 as exportacións galegas a Filipinas acadaron os 15 M€
• Por sectores, as industrias químicas, o téxtil e o metalmecánico amosaron nos últimos anos saldos comerciais positivos e ascendentes
• Lorenzana ratifica o compromiso do Goberno galego con dar apoio ao tecido empresarial para expandirse no mercado exterior e ampliar a súa capacidade exportadora, logo de que no ano 2024 Galicia alcanzase un novo máximo histórico ao superar os 31.000 M€

Santiago de Compostela, 28 de maio de 2025

A conselleira de Economía e Industria, María Jesús Lorenzana, recibiu hoxe unha delegación da Embaixada de Filipinas en España, encabezada polo cónsul xeral, Mark Hamoy, con quen abordou as oportunidades que existen para afianzar as relacións comerciais entre Galicia e o país asiático.

Nos últimos anos, as exportacións galegas a Filipinas foron crecendo e pasaron de 7,9 M€ en 2020 a 15 M€ o pasado ano. Ata marzo de 2025, xa suman 6,1 M€. En relación ao número de empresas exportadoras, en torno a unha vintena xa o levan facendo de forma regular neste período. En 2024 foron 88 as empresas galegas que comercializaron os seu produtos e servizos no mercado filipino, das que 23 eran exportadoras regulares. E en 2025 son, ata o de agora, 36, das que 17 exportan regularmente ao país.

Por sectores, as industrias químicas, o téxtil e o metalmecánico amosaron saldos comerciais positivos, con exportacións crecentes nos últimos anos e niveis de importación baixos. Destaca, especialmente, o primeiro deles (industrias químicas) que pasou de exportar en 2020 0,3 M€ a 5,1 M€ o ano pasado. Filipinas tamén é un mercado de vendas para o sector agroalimentario galego, a industria da maquinaria e o TIC.

Neste contexto, na xuntanza púxose de manifesto que existen oportunidades para diversificar e incrementar as exportacións galegas a Filipinas en sectores industriais. E, ao respecto, informou de que as liñas de axudas da Xunta para internacionalización, o programa Foexga (2,4 M€) e Galicia Exporta Organismos Intermedios (1,5 M€), xa están convocados.

Xestionados polo Instituto Económico de Galicia (Igape), o primeiro destes programas, o Foexga, realízase en colaboración coas cámaras de comercio e contempla a organización de máis de 100 misións empresariais ao estranxeiro nas que se prevé que participen arredor de 400 pemes galegas. Unha delas, de feito, será a Filipinas e Indonesia e terá lugar o vindeiro mes de xuño coa Cámara de Comercio de Pontevedra, Vigo e Vilagarcía de Arousa.

Lorenzana concluíu ratificando o compromiso do Goberno galego con dar apoio ao tecido empresarial para expandirse no mercado exterior e ampliar a súa capacidade exportadora, logo de que no ano 2024 Galicia alcanzase un novo máximo histórico ao superar os 31.000 millóns de euros (31.019M€).

• A directora do Igape, Covadonga Toca, participa na mesa redonda ‘Importancia dos Ecosistemas Rexionais en España’ no marco da presentación do Informe Empresas Tech e Innovadoras
• Subliña que o modelo galego combina financiamento público, redes de internacionalización e aceleradoras sectoriais que teñen permitido apoiar máis de 830 proxectos e crear 1.400 empregos cualificados
• Destaca que a Oficina Económica de Galicia e Xesgalicia consolidan a estrutura de acompañamento e capital que fai posible transformar ideas en empresas viables, mentres que a rede de hubs tecnolóxicos e a conexión coas universidades garante a transferencia efectiva do coñecemento ao tecido produtivo

Madrid, 28 de maio de 2025

A directora do Igape, Covadonga Toca, participou hoxe na mesa redonda ‘Importancia dos Ecosistemas Rexionais en España’ no marco da presentación do Informe Empresas Tech e Innovadoras, un escenario no que puxo en valor o modelo galego de apoio ao emprendemento como motor de transformación económica e social, atraendo talento e impulsando a innovación desde o territorio. Neste sentido, destacou que Galicia “non pretende competir por volume, senón por especialización, madurez dos sectores e valor engadido”.

Durante a súa intervención, Toca sinalou que a Comunidade conta cun ecosistema que integra instrumentos financeiros como Xesgalicia, estruturas de acompañamento como a Oficina Económica de Galicia -que xa atendeu máis de 21.000 consultas e 950 reunións empresariais desde a súa creación en 2024-, e unha rede de aceleradoras sectoriais (Business Factories) que permiten transformar ideas en empresas e motores de cambio.

Toca Carús detallou o bo facer desta rede de Business Factories impulsadas pola Xunta en colaboración coas empresas tractoras e os centros tecnolóxicos. Estas aceleradoras, como BFAuto, BFFood, BFAero ou BF ClimaTech, levan apoiados máis de 830 proxectos empresariais e xerado máis de 1.400 empregos cualificados.

Unha rede á que, como explicou, sumouse este ano a nova BFSport, centrada en tecnoloxía e rendemento deportivo, ao tempo que xa se está a traballar nas vindeiras dedicadas á saúde e ás enerxías renovables. “Son aceleradoras que nacen dende dentro do sistema produtivo galego e que dan resposta a retos reais, xerando innovación aplicada e oportunidades laborais”, apuntou.

Retención e atracción de talento 

A directora do Igape tamén fixo fincapé na capacidade do ecosistema galego para fixar talento local e atraer talento retornado ou especializado. A través da Estratexia Galicia Retorna, a Xunta busca facilitar o regreso de 30.000 galegos do exterior. O apoio ao emprendemento retornado, a visibilización do talento galego a través da rede de antenas internacionais ou a internacionalización de startups son algúns dos mecanismos que permiten crear conexións globais.

Por último, a directora sinalou que o ecosistema galego é posible grazas á colaboración efectiva entre administracións, universidades, centros tecnolóxicos e empresas. Iniciativas como os hubs de innovación dixital (DIHGIGAL e DATALIFE), os programas IGAPE Innova, IA360 ou Ticket Innova, e a participación activa das universidades e centros como CTAG, AIMEN ou ANFACO son clave para garantir unha transferencia de coñecemento efectiva.

• A directora do Igape, Covadonga Toca, participa no I Gran Foro de Competitividade e Reindustrialización, onde subliña que “reindustrializar Galicia é unha oportunidade para crear emprego, reter talento e facer medrar as nosas pemes sen que perdan a súa esencia”
• Reivindica o papel da Oficina Económica como eixo vertebrador do acompañamento ás pemes e subliña que Galicia está a reforzar a súa aposta pola innovación, a capacitación e a internacionalización como eixos clave para a competitividade empresarial
• Resalta que a Xunta está a activar medidas específicas para facer fronte ás barreiras arancelarias, con préstamos brandos, asesoramento técnico e novos servizos de consultaría

Santiago de Compostela, 27 de maio de 2025

A directora do Igape, Covadonga Toca, participou hoxe no I Gran Foro de Competitividade e Reindustrialización, un marco no que expuxo as principais liñas que está a promover a Xunta de cara a impulsar a competitividade do tecido empresarial galego cunha aposta decidida pola innovación, o talento, a internacionalización e o reforzo da capacidade financeira, “piares para construír unha Galicia máis forte, resiliente e conectada co mundo”.

Durante a súa intervención, a directora do Igape sinalou que “reindustrializar Galicia é unha oportunidade para crear emprego, reter talento e facer medrar as nosas pemes sen que perdan a súa esencia”.

Así, Toca Carús, salientou que a Xunta está a reforzar a súa aposta pola innovación, a capacitación e a internacionalización como eixos clave para a competitividade empresarial en Galicia, a través de programas que impulsan o uso da intelixencia artificial, o apoio a proxectos sostibles e o acceso das pemes a servizos especializados. Xunto a isto, destacou o investimento no desenvolvemento do talento directivo e a formación en ámbitos estratéxicos como o comercio exterior ou a transformación dixital.

No ámbito exterior, Galicia consolida o seu liderado exportador cun apoio público centrado na identificación de mercados, a dixitalización e a coordinación de misións comerciais para ampliar a presenza internacional das empresas galegas.

Ademais, a Xunta está a activar medidas específicas para facer fronte ás barreiras arancelarias, con préstamos brandos de ata un millón de euros, asesoramento técnico en coordinación coa Antena do Igape en Miami, e novos servizos de consultaría no marco do programa Reacciona.

Oficina Económica e Plans directores

Neste contexto, expuxo a directora, a Oficina Económica de Galicia, creada en 2024, consolídase como un referente no acompañamento empresarial: máis de 21.000 consultas atendidas, 200 proxectos estratéxicos e 950 reunións coordinadas no seu primeiro ano. “A Oficina Económica non centraliza, facilita. É un espazo que escoita, orienta, conecta e resolve”, resumiu.

“Cada programa -xa sexa de innovación, formación, internacionalización, financiamento ou competitividade- deséñase pensando nas necesidades específicas de cada sector estratéxico”, apuntou, indicando que, deste xeito, todos os recursos públicos actúan de forma coordinada e coherente, “acompañando ás empresas en cada paso da súa transformación e contribuíndo aos obxectivos de crecemento, emprego de calidade e sustentabilidade”.

• Lembra que a Xunta vén mantendo reunións mensuais co Ministerio de Economía, Comercio e Industria, no Pleno Interterritorial de Internacionalización, e tamén co ICEX e a Dirección Xeral de Comercio Internacional e Investimentos
• Avanza que o vindeiro luns 26 de maio haberá unha segunda reunión cos sectores económicos máis afectados en Galicia para explicarlles as bases da convocatoria de préstamos ao circulante de ata 1 M€ anunciada pola Xunta
• Destaca que as exportacións galegas a EE.UU subiron en marzo un 40,6 % interanual, (52,84 M€) e, no acumulado de xaneiro a marzo, un 4,7 %, ata situarse nos 161 M€

Santiago de Compostela, 21 de maio de 2025

A conselleira de Economía e Industria, María Jesús Lorenzana, apelou hoxe a traballar de xeito coordinado co Goberno central e a UE para defender os intereses das empresas galegas á espera de coñecer como queda o escenario arancelario definitivo. “Temos que tentar reducir esta guerra comercial ao mínimo posible e tratar de negociar. Esta é a primeira cuestión na que hai que traballar de xeito coordinado coa UE e co Goberno de España”, dixo.

En resposta unha interpelación no Pleno da Cámara galega, Lorenzana lembrou que a Xunta vén mantendo reunións mensuais co Ministerio de Economía, Comercio e Industria, no Pleno Interterritorial de Internacionalización; en concreto, o pasado 10 de abril e 19 de maio. Ademais, indicou que tamén se celebran encontros a través do Igape, co ICEX e coa Dirección Xeral de Comercio Internacional e Investimentos para o seguimento do impacto da escalada arancelaria. “Non sabemos aínda que aranceis se van impoñer nin cando”, observou.

Por parte da Xunta, asegurou que se mantén contacto permanente co tecido produtivo e avanzou que o vindeiro luns 26 de maio haberá unha segunda reunión cos sectores económicos máis afectados en Galicia para explicarlles as bases da convocatoria de préstamos ao circulante de ata 1 M€ anunciada pola Xunta. “Inmediatamente, cando fagan as súas alegacións, sairá publicada” no DOG, afirmou.

Entre outras das medidas postas en marcha pola Administración autonómica, lembrou que a Oficina Económica do Instituto Galego de Promoción Económica (Igape) creou unha unidade especializada de atención con servizos específicos, en coordinación coa súa antena de Miami, desde onde esta semana se veñen organizando webinarios con empresas; hoxe mesmo, do sector da pedra e materiais de construción e, mañá, co biotech e as TIC. Tamén no marco do programa Reacciona, está prevista a próxima posta en marcha dun novo servizo de consultoría especializado en internacionalización. Un plan de resposta, engadiu, que está coordinado co do Goberno de España e incluído no Plan ICEX de Alto Impacto en Competitividade.

Un momento exportador magnífico

Neste contexto, Lorenzana quixo poñer de manifesto o “magnífico” ciclo exportador que vive Galicia, co “mellor dato de exportacións da historia” que, en 2024, acadaron os 31.019 M€, o que supón un crecemento do 3,3 por cento respecto ao ano anterior.

No que vai de 2025, proseguiu, a Comunidade mantén unha posición destacada no panorama estatal, ao representar o 8,1 por cento do total das exportacións españolas rexistradas en marzo, cando Galicia acadou os 2.746,9 M€, unha cifra moi superior aos 2.453,8 do mesmo mes de 2024 (un 12% máis). A balanza acumulada de 2025 amosa, ademais, un valor de 2.213,9 M€.

No que respecta ás relacións comerciais con EE.UU, destacou que no mes de marzo subiron respecto ao ano pasado un 40,6 % interanual, 52,84 M€. E, de igual xeito, no acumulado de xaneiro a marzo creceron un 4,7 % respecto ao mesmo período, ata situarse nos 161 M€.

Aínda así, sinalou que EE.UU é o undécimo mercado das exportacións galegas, que teñen a UE como destino principal. En relación aos sectores galegos máis afectados mencionou as industrias químicas (case 200 M€ de exportacións a EE.UU); o sector agroalimentario e bio (135,8 M€); o metalmecánico (114 M€); o naval (92 M€); e os produtos minerais e da automoción (case 60 M€).

“O que máis nos preocupa é o efecto indirecto dos aranceis recíprocos nas importacións e nas relacións comerciais coa UE e como estas poden afectar aos produtores galegos”, concluíu, para apelar á prudencia e a “estar alerta”.