• A representante do Goberno visitou as instalacións da empresa Calor Color, beneficiaria o pasado ano das axudas deste programa que busca favorecer a proxección exterior e mellorar a competitividade internacional do tecido produtivo galego

Ames  (A Coruña), 29 de abril de 2026

A delegada da Xunta na Coruña, Belén do Campo, acompañada polo director territorial da Consellería de Economía e Industria, Isidoro Martínez, visitou hoxe en Ames as instalacións da empresa Calor Color, beneficiaria o pasado ano das axudas do programa Galicia Exporta Empresas, unha liña impulsada polo Instituto Galego de Promoción Económica (Igape) para favorecer a proxección exterior e mellorar a competitividade internacional do tecido produtivo galego.

Durante a visita, a representante do Goberno galego coñeceu de primeira man as accións desenvolvidas pola firma grazas a este apoio autonómico, que lle permitiu reforzar a súa presenza en mercados internacionais e avanzar na súa estratexia de dixitalización para a internacionalización. Belén do Campo destacou que esta empresa conta con 24 traballadores e que exporta a países como Italia, Estados Unidos, Dubai, Alemania, Mexico ou Ecuador, entre outros.

En concreto, Calor Color levou a cabo un proxecto global de promoción exterior cun investimento total de máis de 103.000 euros, para o que contou cunha achega da Xunta superior aos 74.000 euros.

Belén do Campo explicou que esta axuda permitiu financiar actuacións de márketing e comunicación internacional, así como accións de dixitalización orientadas á apertura de novos mercados. Entre elas inclúense a participación nas feiras internacionais Euroluce 2025, celebrada en Milán, e Light Design Expo, en San Francisco, ademais da elaboración de catálogos promocionais específicos para ambas citas, a incorporación da empresa á plataforma especializada Archiproducts e a creación dunha nova canle de venda a través dunha plataforma de comercio electrónico.

A delegada salientou que “este tipo de iniciativas permiten ás empresas galegas dar un salto cualitativo na súa presenza exterior, acceder a novos clientes e consolidar a súa marca en mercados internacionais cada vez máis esixentes e competitivos”.

Impulso á internacionalización empresarial

Belén do Campo lembrou que a Xunta mantén como unha das súas prioridades o acompañamento ás pemes galegas no seu proceso de apertura ao exterior, “porque internacionalizarse é gañar en competitividade, en capacidade de crecemento e en estabilidade”.

Neste sentido, destacou que o programa Galicia Exporta Empresas apoia accións de promoción exterior que contribúen a mellorar o posicionamento das firmas galegas e reforzar a súa presenza internacional, mediante a participación en feiras e eventos, campañas de márketing e comunicación en mercados exteriores, prospección comercial, análise de novos destinos e proxectos de dixitalización e e-comerce.

A convocatoria deste ano 2026, segundo lembrou, conta cun orzamento global de 9 millóns de euros e mantén aberto o prazo de solicitude ata o vindeiro 30 de setembro.

“A Xunta activou xa a comezos de ano a maior parte das liñas de axuda do Igape para que o empresariado galego poida planificar con tempo os seus investimentos e as súas estratexias de crecemento. Queremos ser un aliado útil para que as nosas pemes poidan competir con garantías nos mercados internacionais”, indicou.

Máis de 1,5 millóns para 64 empresas da provincia da Coruña

Belén do Campo lembrou que o a convocatoria do ano pasado contou cun orzamento para toda Galicia de 8,3 millóns de euros. Nesta liña puxo en valor o impacto desta orde de apoios na provincia coruñesa, onde na convocatoria de 2025 resultaron beneficiarias 64 empresas pertencentes a 25 concellos, cun investimento autonómico total de máis de 1,5 millóns de euros que movilizaron máis de 2,5 millóns de euros.

No caso concreto da comarca de Santiago, repartíronse 16 axudas entre empresas dos concellos de Santiago, Teo e Ames, por un importe superior aos 377.000 euros  que movilizaron máis de 377.000 euros.

Belén do Campo subliñou que estes datos “amosan o dinamismo do tecido empresarial da comarca e a capacidade das nosas pemes para abrirse paso no exterior con produtos innovadores, deseño, calidade e valor engadido”.

A Xunta vén ofrecendo actualizacións da situación económica en distintos mercados mundiais a través de Xornadas País coas Antenas da Xunta de Galicia. O obxectivo é transmitir unha información actualizada e afondar en novas oportunidades para as empresas galegas que queiran exportar os seus produtos, neste caso, a Xapón.

A Antena en Xapón, o día 12 de maio, xunto coas empresas Paco & Lola e Coren, compartirá a súa experiencia directa no mercado xaponés e as claves para abordar con éxito un dos destinos máis esixentes e sofisticados do mundo. Se está interesado, tamén terá a posibilidade de programar unha reunión individual co responsable da Antena en Xapón durante os días 12 e 13 de maio. Solicite a reunión ao realizar a súa inscrición.

Día: 12 de maio | Hora: 09:30-11:00 | Modalidade: Presencial (Edificio Bandalux. Salón Bridge, Santiago de Compostela)

✍️ Inscricións

➡️ Descarga o programa

A Xunta vén ofrecendo actualizacións da situación económica en distintos mercados mundiais a través de Xornadas País coas Antenas da Xunta de Galicia. O obxectivo é transmitir unha información actualizada e afondar en novas oportunidades para as empresas galegas que queiran exportar os seus produtos, neste caso, a Emiratos Árabes Unidos.

A Antena en EAU, o día 6 de maio, informará sobre a situación actual do mercado en EAU, a economía e as oportunidades de negocio en Oriente Medio para as empresas galegas. Se está interesado, tamén terá a posibilidade de programar unha reunión individual co responsable da Antena en Emiratos Árabes Unidos durante os días 7 e 8 de maio.

Solicite a reunión ao realizar a súa inscrición.

Día: 6 de maio de 2026 | Hora: 09:30-11:00 | Modalidade: Online

✍️ Inscricións

➡️ Descarga o programa

• Destaca a oportunidade que supón para Galicia que compañías chinesas decidan investir ou abrir novas liñas de negocio na comunidade
• O presidente e a conselleira de Economía e Industria visitarán empresas líderes en sectores da automoción e as enerxías renovables
• “Imos facer valer que somos un lugar seguro para investir e que temos moitas vantaxes que podemos ofrecer a quen aposte por nós”, asegura
• Tamén manterán encontros con operadores turísticos chineses para promocionar o Xacobeo 2027 e “Galicia como destino”

Santiago de Compostela, 22 de abril de 2026

O presidente da Xunta, Alfonso Rueda, iniciará mañá a súa primeira viaxe oficial a China para explorar novas relacións comerciais e turísticas co país asiático. Tres días nos que o titular do Goberno autonómico, acompañado da conselleira de Economía e Industria, María Jesús Lorenzana, manterá encontros con empresas de sectores claves como a automoción e as enerxías renovables ou con operadores turísticos chineses.

Tal e como explicou Rueda, o obxectivo desta visita é afianzar as relacións cun país “cun potencial enorme, que está medrando e ten moitísimas posibilidades” para promover novos investimentos de compañías chinesas en Galicia. O presidente defenderá a estabilidade institucional e a seguridade xurídica que ofrece a comunidade e que converte Galicia nun lugar atractivo para investir e implantar novas liñas de negocio.

Na primeira xornada, Rueda visitará o centro de I+D de SAIC Motors, empresa líder da automoción en China. Logo de percorrer o centro R&D Anting que SAIC ten en Shanghái, a delegación galega trasladarase a Pekín para manter un encontro co presidente da compañía, Xiaoqiu Wang, e outros membros da directiva.

O venres, Rueda e Lorenzana visitarán o salón do automóbil Beijing Auto Show e manterán unha reunión con representantes de Goldwind, un dos principais proveedores a nivel mundial de turbinas para a enerxía eólica. A axenda económica rematará o sábado cunha visita á fabrica de baterías que SAIC Motors ten en Zhengzhou.

“Imos tentar buscar puntos de encontro nos aspectos que máis nos interesan”, indicou, ao tempo que asegurou que “imos facer valer que somos un lugar seguro para investir e que temos moitas vantaxes que podemos ofrecer a quen aposte por nós”.

Esta viaxe encádrase nos contactos que se veñen mantendo desde a Administración autonómica galega co obxectivo de aproveitar as posibles oportunidades de cooperación entre Galicia e o país asiático.

Entre outras accións, en setembro tivo lugar en Santiago de Compostela un foro entre empresas da comunidade autónoma e de China; e en novembro responsables da consellería de Economía e Industria desprazáronse a aquel país para facilitar contactos empresariais. Neste punto, a antena en China do Igape está xogando un papel fundamental á hora de identificar oportunidades e reforzar o papel de empresas galegas.

Cómpre lembrar que, actualmente, hai 190 empresas galegas presentes en China de maneira constante e un 43% que exportan de maneira estable ao país.

Relacións turísticas

En materia turística, a Xunta leva tempo traballando para achegar Galicia a máis mercados internacionais, entre eles o país chinés. Rueda manterá unha reunión con diferentes operadores turísticos de China “para presentarlles Galicia como destino; a nosa cultura, paisaxes, patrimonio...”, facendo especial fincapé na oportunidade que supón o Camiño de Santiago para atraer novos turistas -o número de peregrinos chineses rexistra unha tendencia ascendente- e a celebración do Xacobeo 2027.

• A directora do Igape, Covadonga Toca, participa na xornada “Empresas que transforman territorios: o papel das Empresas de Tamaño Intermedio”, onde subliña a importancia de impulsar o crecemento empresarial para gañar competitividade
• Destaca o “histórico” paquete de apoio empresarial que ten en marcha a Consellería a través do Instituto e que suma máis de 282 M€ en ámbitos como a innovación, o financiamento e a internacionalización
• Defende o impulso ao crecemento empresarial mediante instrumentos como a Oficina Económica de Galicia e aposta por promover novos proxectos industriais con impacto no territorio

Santiago de Compostela, 21 de abril de 2026

A directora do Igape, Covadonga Toca, clausurou hoxe en Santiago de Compostela a xornada “Empresas que transforman territorios: o papel das Empresas de Tamaño Intermedio”, onde puxo en valor o papel estratéxico das denominadas ETI (empresas de tamaño intermedio) como eixo clave para o desenvolvemento económico de Galicia.

Durante a súa intervención, Toca Carús sinalou que Galicia conta cun tecido empresarial dinámico e con potencial de crecemento no tamaño das súas empresas, o que permitirá seguir reforzando capacidades fundamentais como a innovación, o acceso a financiamento ou a internacionalización.

A directora do Igape fixo fincapé en que as empresas de tamaño intermedio representan unha peza clave neste proceso, ao combinar capacidade de competir a nivel global cun forte arraigo territorial. Neste sentido, puxo como exemplo compañías galegas que xa operan como referentes internacionais en sectores estratéxicos, destacando o seu impacto en innovación, emprego e atracción de talento.

Neste marco, Toca Carús explicou que a Consellería de Economía e Industria, a través do Igape, está a desenvolver unha estratexia integral de apoio ao tecido empresarial, cun volume de recursos que supera os 282 millóns de euros, orientada a acompañar ás empresas en todas as fases do seu crecemento.

O paquete de apoios céntrase na innovación e transformación, impulsando a incorporación de tecnoloxías avanzadas, a modernización de procesos e o desenvolvemento de novos produtos, así como no reforzo financeiro, con préstamos orientados ao crecemento empresarial. Ademais, promove a internacionalización, nun contexto de forte dinamismo exportador, e a mellora da competitividade mediante a profesionalización da xestión e a captación de talento.

A directora do Igape puxo en valor a importancia dun crecemento equilibrado territorialmente, subliñando o papel das ETI na fixación de poboación, a xeración de oportunidades e a dinamización económica en Galicia. Neste contexto, destacou a aposta por promover novos proxectos industriais con impacto no territorio, así como o papel da Oficina Económica de Galicia como instrumento clave para apoiar o crecemento empresarial e axilizar investimentos.

• A directora do Igape, Covadonga Toca, expuxo en Galicia Foro Empresarial o conxunto de instrumentos activados para facilitar o acceso ao financiamento, impulsar a innovación e reforzar a internacionalización
• Lembra que o organismo mobiliza este amo máis de 282 millóns en programas que abarcan desde préstamos directos e acceso ao crédito ata axudas á descarbonización, startups e expansión exterior
• Subliña que as liñas activas neste 2026 permiten adaptar o apoio público ás distintas fases de crecemento empresarial, desde o emprendemento ata grandes proxectos industriais

Vilanova de Arousa (Pontevedra), 16 de abril de 2026

A directora do Igape, Covadonga Toca, participou hoxe na xornada “Decisiones financieras clave para empresas”, organizada por Galicia Foro Empresarial, onde puxo en valor o papel estratéxico das decisións financeiras como elemento determinante para a competitividade e o crecemento do tecido empresarial galego.

Durante a súa intervención, Toca Carús debullou o conxunto de instrumentos que o Igape ten en marcha en 2026, que suman máis de 282 millóns de euros e configuran “un ecosistema integral de apoio ás empresas” que permite acompañar os proxectos empresariais en todas as súas fases, desde o acceso ao financiamento ata a innovación, a expansión internacional ou a transición cara modelos máis sostibles.

Neste sentido, destacou especialmente a liña orientada a facilitar o acceso ao crédito das pemes, como o programa de préstamos avalados, con bonificacións tanto no tipo de xuro como nas comisións de aval, que favorecen a capacidade financeira de autónomos e pemes.

Xunto a esta ferramenta, a directora do Igape puxo o foco nos préstamos directos, que permiten financiar proxectos empresariais con condicións vantaxosas, unha liña que está deseñada para apoiar desde novos investimentos produtivos ata procesos de concentración empresarial, innovación tecnolóxica ou financiamento operativo, adaptándose ás necesidades reais das empresas.

Outro dos eixes abordados por Toca Carús foi o impulso á transición industrial e á sustentabilidade, a través do Fondo de Transición Xusta, que permite apoiar proxectos de descarbonización, renovación industrial e desenvolvemento empresarial en territorios en transformación. Neste ámbito, Toca Carús destacou instrumentos como os préstamos parcialmente reembolsables, que combinan financiamento e subvención directa, favorecendo investimentos produtivos e a creación de emprego.

A directora do Igape destacou que, ademais da aposta polo financiamento, existe un firme compromiso coa innovación a través de programas como Industria Innova, IA 360 ou Igape Innova, orientados a impulsar o desenvolvemento tecnolóxico, a dixitalización e a incorporación da intelixencia artificial nas empresas galegas. Así mesmo, puxo en valor o apoio ao emprendemento innovador e á captación de investimentos, mediante axudas a startups e incentivos destinados a atraer proxectos empresariais a Galicia, favorecendo a creación de emprego e o dinamismo económico. Por último, subliñou a relevancia da internacionalización, con iniciativas como Galicia Exporta Empresas e Foexga, que facilitan a presenza das empresas galegas en mercados exteriores a través de feiras, misións comerciais e accións de promoción.

A directora concluíu subliñando que “a clave está en tomar decisións financeiras informadas, planificadas e aliñadas coa estratexia empresarial”, destacando que  a Consellería de Economía e Industria, a través do Igape, “non só ofrece financiamento, senón acompañamento e asesoramento para que cada empresa atope a mellor solución para o seu proxecto”.

• A directora do Igape, Covadonga Toca, subliña que Galicia conta xa con máis de 40 empresas aeroespaciais, 1.700 empregos directos e unha facturación superior aos 165 millóns de euros
• Salienta a posta en marcha da Iniciativa Estratéxica en Aeroespazo, Seguridade e Defensa (IESDA), que prevé mobilizar preto de 900 millóns de euros en investimento
• Destaca o papel clave das pemes para consolidar e ampliar a cadea de valor, así como a necesidade de transformar a innovación en actividade industrial
• Pon en valor o Observatorio da Industria Aeroespacial de Galicia como ferramenta para anticipar retos e oportunidades do sector

Vigo, 14 de abril de 2026

A directora do Igape, Covadonga Toca, participou hoxe en Vigo na clausura da Asemblea Xeral Ordinaria do Consorcio Aeroespacial Galego (CAG), onde puxo en valor o crecemento experimentado polo sector nos últimos anos e reafirmou o compromiso da Xunta de Galicia co seu impulso como un dos eixos estratéxicos da economía galega.

Durante a súa intervención, Toca destacou a evolución “extraordinaria” da industria aeroespacial en Galicia, que pasou de contar cunha presenza moi limitada hai apenas quince anos a integrar hoxe máis de 40 empresas activas, con participación en proxectos internacionais de enxeñaría, fabricación avanzada e desenvolvemento tecnolóxico. Este ecosistema xera xa máis de 1.700 empregos directos e supera os 165 millóns de euros de facturación, con previsións de crecemento a curto prazo.

No actual contexto xeopolítico e tecnolóxico, Toca subliñou que os sectores aeroespacial, de seguridade e defensa están chamados a desempeñar un papel central nas políticas europeas e nacionais, nun escenario que cualificou de “cambio estrutural”.

Neste marco, lembrou a posta en marcha da Iniciativa Estratéxica en Aeroespazo, Seguridade e Defensa (IESDA) 2025-2030, impulsada pola Xunta de Galicia co obxectivo de converter estes ámbitos nunha panca clave de crecemento económico. A estratexia prevé mobilizar preto de 900 millóns de euros en investimento nos vindeiros anos e céntrase en impulsar o crecemento empresarial, atraer investimentos e reforzar as capacidades tecnolóxicas e produtivas do territorio.

Ademais, avanzou que esta iniciativa xa está en execución, con actuacións como o desenvolvemento de proxectos estratéxicos, o apoio a certificacións en defensa, ou programas de formación especializada.

Coñecemento e visión estratéxica para o sector

A directora do Igape tamén destacou o papel do Observatorio da Industria Aeroespacial de Galicia, impulsado en colaboración co CAG, como ferramenta clave para analizar a evolución do sector, identificar oportunidades e facilitar información estratéxica ás empresas para a toma de decisións. Segundo indicou, este instrumento permitirá consolidar a Galicia non só como referente industrial, senón tamén como xerador de coñecemento e visión estratéxica no ámbito aeroespacial.

A directora do Igape destacou que o principal reto do sector pasa por “converter a innovación en industria”, transformando o coñecemento xerado en produtos, procesos e solucións con impacto real no mercado. Para iso, lembrou que o Igape traballa cunha visión integral que inclúe o acceso a financiamento, o apoio á industrialización, o impulso á internacionalización e o acompañamento das pemes nos seus procesos de transformación e escalado.

• UARX Space é única en España, e está entre as cinco de todo o mundo, en fabricar este tipo de sistemas capaces de manobrar no espazo
• OSSIE (Orbit Solutions to Simplify Injection and Exploration) nas súas siglas en inglés, é un vehículo de transferencia orbital deseñado para transportar satélites pequenos e medianos a diferentes órbitas e facilitar, así, que cheguen ao seu destino final
• Lorenzana quixo manifestar o “orgullo inmenso” de toda Galicia por este fito que vai conseguir UARX Space, unha empresa “con moitísimas posibilidades de crecemento dentro do momento económico e industrial actual”

Nigrán (Pontevedra), 7 de abril de 2026

A marca Galicia Calidade viaxará ao espazo no primeiro vehículo de transferencia orbital deseñado en España pola empresa galega UARX Space, e que se lanzará nos vindeiros meses desde a base aérea de Vandenberg, en California.

A conselleira de Economía e Industria, María Jesús Lorenzana, visitou hoxe as instalacións desta empresa en Porto do Molle, en Nigrán (Pontevedra), que é única en España e está entre as cinco de todo o mundo en fabricar este tipo de sistemas propios capaces de manobrar no espazo.

OSSIE (Orbit Solutions to Simplify Injection and Exploration) nas súas siglas en inglés, é un vehículo de transferencia orbital deseñado para transportar satélites pequenos e medianos a diferentes órbitas e facilitar, así, que cheguen ao seu destino final. Permitirá a inxección de satélites en órbitas terrestres non tradicionais, ao redor da lúa e en traxectorias ao espazo profundo.

Lorenzana quixo manifestar o “orgullo inmenso” de toda Galicia por este fito que vai conseguir UARX Space, unha empresa “con moitísimas posibilidades de crecemento dentro do momento económico e industrial actual”, dixo. “Seguiremos acompañándoa -subliñou-, porque, dentro da Estratexia de Seguridade, Defensa e Aerospazo é unha das empresas que ten maior potencialidade na comunidade autónoma”, concluíu.

• Neste programa, financiado polo Igape, levan participado máis dun cento de empresas en catro edicións

Santiago de Compostela, 27 de marzo de 2026

A conselleira de Economía e Industria, María Jesús Lorenzana, adiantou hoxe que a Xunta traballa nunha nova edición da aceleradora de internacionalización Galicia Avanza que vai contar cun orzamento de 1,17 millóns de euros.

Así o anunciou nunha visita a Bodegas Lodeiros, unha das trinta empresas participantes na última convocatoria deste programa financiado polo Instituto Galego de Promoción Económica (Igape) que se desenvolve no Parque Tecnolóxico de Galicia (Tecnópole) en San Cibrao das Viñas (Ourense).

Segundo indicou, a súa participación en Galicia Avanza non só lle vai permitir consolidar as súas exportacións a Portugal e República Dominicana, senón chegar a mercados gourmet de Alemaña, Reino Unido, Suíza, Países Baixos, EE.UU e Latinoamérica; en especial, México.

Entre a trintena de empresas participantes nesta cuarta edición, a maioría pertencía ao sector agroalimentario e de produtos ecolóxicos (11 empresas); ao da enxeñaría e o desenvolvemento tecnolóxico (8 empresas); ao da industria de fabricación (5 empresas); á industria téxtil e de moda (4 empresas) e aos servizos profesionais (2 empresas). A maior parte delas (13) da provincia de Pontevedra; 7 de Ourense e da Coruña e 3 de Lugo. En total, levan participado nesta aceleradora 111 empresas nas súas catro edicións.

Lorenzana asegurou na visita que o programa é unha forma de contribuír a ampliar a base exportadora da economía galega e destacou o feito de que cada vez sexan máis empresas as que chegan ao mercado internacional porque o obxectivo está en manter as cifras tan boas de exportacións que Galicia leva rexistrando estes últimos anos, por riba dos 30.000 millón de euros.

Baiona (Pontevedra), 28 de marzo de 2026

A conselleira de Economía e Industria, María Jesús Lorenzana, visitou hoxe o Hotel Boutique Faro Silleiro para poñer en valor a liña de préstamos do Instituto Galego de Promoción Económica (Igape) para favorecer o acceso ao crédito das pemes, que permanece aberta ata o vindeiro 30 de setembro.

Trátase dun programa de apoios no que colaboran as sociedades de garantía recíproca e entidades financeiras, e que ofrece préstamos avalados de entre 3.000 e 1 millón de euros para investimentos produtivos, circulante (terreos, instalacións técnicas, maquinaria, mobiliario, I+D, propiedade intelectual, capital corrente,...) e, tamén, para pagamento ou reestruturación de débedas.