• Os Orzamentos da Consellería de Economía e Industria ascenden a 453,8 M€, un 6 % máis que no pasado exercicio porque, pese a perder 41,7 M€ do Mecanismo de Recuperación e Resiliencia da UE (MRR), increméntanse os fondos propios
• Lorenzana apunta que a Lei de medidas fiscais e administrativas recolle diversas iniciativas para axilizar as tramitacións e facer máis flexibles os mecanismos de venda ou alugueiro do solo industrial
• Avanza que durante o 2026 elaborarase unha base de datos cartográfica e un primeiro borrador do plan sectorial eólico, incluíndo as zonas de aceleración renovable, así como o Documento Inicial Estratéxico e a posterior redacción do Estudo Ambiental Estratéxico
• “Con estes orzamentos seguimos dándolle a benvida aos proxectos industriais que xurdan de Galicia ou veñan a Galicia, porque en Galicia, a industria é benvida”, di

Santiago de Compostela, 24 de outubro de 2025

A conselleira de Economía e Industria, María Jesús Lorenzana, resaltou hoxe a aposta que vai facer a Xunta de Galicia pola innovación industrial nos Orzamentos de 2026, que recollen cinco novas liñas específicas de axuda para empresas que suman máis de 47 millóns de euros.

Lorenzana compareceu esta tarde na Comisión 3ª de Economía, Facenda e Orzamentos para explicar as contas do seu departamento para 2026, que ascenden a 453,8 millóns de euros, un 6 por cento máis que no pasado exercicio. Isto é porque, pese a perder 41,7 millóns de euros do Mecanismo de Recuperación e Resiliencia da UE (MRR), incrementa os fondos propios en 11,5 millóns de euros e o gasto de investimento en 22 millóns, un 8,5 por cento máis, ao tempo que se reduce o gasto corrente.

En concreto, o Igape contará cun orzamento para 2026 de 280,7 millóns de euros, onde destacan, como novidade, as liñas de axuda específicas para innovación. Unha delas, Vía rápida á innovación empresarial, pretende atraer e consolidar proxectos innovadores vinculados con sectores estratéxicos que se presentaron a convocatorias europeas ou nacionais de recoñecido prestixio e que, superando os criterios técnicos de avaliación, non foron seleccionados por esgotamento orzamentario. Outra será o programa de Autonomía estratéxica de Galicia (TIC-MAQ), que responde á necesidade de reducir a dependencia de solucións externas e fomentar unha oferta tecnolóxica propia de Galicia e impulsar o deseño e fabricación de bens de equipo na nosa comunidade.

Tamén vai ser novidade a liña Innomercado, para impulsar a comercialización en empresas galegas de produtos ou servizos desenvolvidos por startups participantes nas Business Factory. O programa Innotalento, que busca apoiar proxectos estratéxicos, que supoñan a atracción dun perfil de alta dirección (CEO, director de Operacións, director de Tecnoloxía…) específico para deseñar e executar un proxecto de mellora, transformación ou innovación relevante. E a liña Industria Innova (antigo Fábrica Intelixente), para impulsar proxectos de investigación industrial, de desenvolvemento experimental, e de innovación de procesos e organización nas empresas galegas.

Xunto con isto, Lorenzana apuntou, ademais, que se vai dar continuidade ao programa de apoios para intelixencia artificial pero aplicada á industria e dando prioridade aos proxectos vinculados cos sectores estratéxicos de Galicia. Haberá, así, dúas tipoloxías de axudas: para o desenvolvemento de tecnoloxías e para proxectos de implantación e aplicación de servizos e solucións comerciais con intelixencia artificial.

Iniciativa Estratéxica de Seguridade, Defensa e Aerospazo

“Debemos centrarnos na atracción e impulso de iniciativas empresariais que permitan crear emprego de calidade e no pulo aos sectores estratéxicos industriais, tanto dos consolidados, como dos emerxentes ou con maior potencial futuro, como o da seguridade e da defensa”, dixo. Ao respecto, anunciou que a Xunta vai destinar 2,6 millóns de euros para a adxudicación dos primeiros grandes contratos de desenvolvemento tecnolóxico coas empresas tractoras que serán socios estratéxicos da Xunta na Iniciativa Estratéxica de Seguridade, Defensa e Aerospazo (IESDA), logo de que se identificasen xa 29 proxectos de investimento de alto interese para seren desenvolvidos ben sexa mediante estes acordos de asociación ou das convocatorias de axudas previstas.

Solo industrial

En materia de solo industrial, Lorenzana concretou que os Orzamentos da Consellería  de Economía e Industria para 2026 recollen unha partida de 30,3 millóns de euros para 26 actuacións que abranguen máis de nove millóns de metros cadrados (9.051.746,23) en diferentes parques empresariais. Destes, 6,6 millóns de euros investiranse na provincia da Coruña; 7,2 millóns na de Lugo; 5,4 millóns en Ourense; e 11,1 millóns na de Pontevedra. Ademais, indicou que o orzamento dirixido a convocatorias de axudas para a mellora de infraestruturas e servizos nos polígonos industriais de Galicia suma máis de 7,1 millóns de euros para o ano 2026.

Neste contexto, a conselleira apuntou, tamén, que a Lei de medidas fiscais e administrativas que acompaña estes orzamentos recolle diversas iniciativas para axilizar as tramitacións e facer máis flexibles os mecanismos de venda ou alugueiro do solo empresarial promovido por Xestur. Incluirán melloras tanto nos prazos como nas formas ou condicións de pagamento, e permitirán dispoñer dunha oferta de solo continua e permanentemente aberta. Ademais, adaptaranse os custos das parcelas para acadar prezos máis competitivos, co fin de impulsar actividades en zonas que actualmente están menos desenvolvidas no ámbito industrial.

Seguridade industrial e mineira

Lorenzana destacou como outra novidade deste orzamentos a medida extraordinaria que fará posible que as instalacións sometidas a regulamentos de seguridade industrial que foron executadas ou reformadas sen que o seu titular levase a cabo o preceptivo rexistro da Consellería competente en materia de industria, poidan ser regularizadas de forma excepcional. Isto, puntualizou, sempre que se demostre que cumprían os regulamentos correspondentes no momento da súa instalación.

As actuacións en materia de seguridade industrial van contar un orzamento de 0,4 millóns de euros e, no caso concreto da seguridade mineira, avanzou a aprobación dun plan de inspección que permita garantir un mellor control dos dereitos mineiros e así, avalar unha adecuada explotación e mantemento.

Industria Forestal

O orzamento da Axencia Galega da Industria Forestal (Xera) destacouno porque crece un 23,7 por cento ata os 24 millóns de euros, que estarán destinados, principalmente ás liñas de axuda habituais para tecnoloxías forestais, valorización e construción en madeira. As partidas recollidas para innovación forestal e desenvolvemento de proxectos de mellora que, en total, suman 1,5 millóns de euros, van servir para reforzar os traballos de mellora forestal e ofrecer alternativas á situación sanitaria do piñeiro.

Enerxías renovables

Con respecto ao ámbito enerxético, avanzou que durante o 2026 elaborarase unha base de datos cartográfica e un primeiro borrador do plan sectorial eólico, incluíndo as zonas de aceleración renovable, así como o Documento Inicial Estratéxico e a posterior redacción do Estudo Ambiental Estratéxico.

“Con estes orzamentos seguimos dándolle a benvida aos proxectos industriais que xurdan de Galicia ou veñan a Galicia, porque en Galicia, a industria é benvida”, concluíu.

• Apunta que a Xunta ten previsto aprobar por anticipado de gasto, para que estea aplicable a comezos de ano, a convocatoria para a obtención de certificacións
• Precisa que se traballa, tamén, coa previsión de lanzar a licitación que definirá que empresas e centros tecnolóxicos van traballar en programas conxuntos de investimento coa Administración autonómica
• Destaca a aposta da Xunta por que Galicia sexa pioneira no desenvolvemento de tecnoloxías neste ámbito. “A nosa máxima aspiración agora mesmo é que se fabriquen e se comercialicen en Galicia”, asegura

Vigo, 23 de outubro de 2025

A conselleira de Economía e Industria, María Jesús Lorenzana, anunciou hoxe que a comezos de ano estarán dispoñibles as primeiras axudas para as empresas que participen na Iniciativa Estratéxica de Seguridade, Defensa e Aerospazo, aprobada este ano pola Xunta de Galicia.

Lorenzana interveu hoxe no VII Congreso Internacional Aeroespacial, onde deu conta dos principais instrumentos de apoio que se van poñer en marcha o vindeiro ano no marco desta estratexia, que vai contar cunha partida de 14,8 millóns de euros nos Orzamentos de 2026.

Así, indicou que o Goberno galego ten previsto lanzar, por anticipado de gasto para que estea aplicable a comezos do 2026, a convocatoria de apoio ás empresas galegas para que exerzan como subministradoras nos eidos da defensa e a seguridade, a través da obtención de certificacións específicas, homologación de sistemas e produtos, obtención de autorizacións de seguridade e elaboración de propostas de proxectos para participar en convocatorias nacionais ou europeas.

Segundo precisou, a Xunta tamén traballa coa previsión de convocar nos primeiros meses do ano a licitación que definirá que empresas e centros tecnolóxicos van traballar en programas conxuntos de investimento coa Administración autonómica, logo de recibir un total de 78 propostas que se están a avaliar agora en diferentes reunións de traballo coas empresas promotoras. Unha vez rematado este proceso este mesmo mes de outubro, engadiu, afondarase en cada proxecto industrial de forma específica para coñecer as súas capacidades con máis detalle e definir as necesidades de apoio para que se radique en Galicia.

E, en terceiro lugar, tamén nos primeiros meses do ano 2026 convocarase unha liña de axudas para investimentos en tecnoloxías duais, na que se concederá unha maior puntuación nos criterios de valoración a aqueles proxectos situados na contorna do Parque Industrial de Rozas.

Sobre este enclave, Lorenzana apuntou que a intención da Xunta é transformalo nun gran parque empresarial onde empresas e centros tecnolóxicos se asenten para construír un gran nodo de alta tecnoloxía que sexa referente en Europa. A día de hoxe, ademais de contar xa coa presenza de empresas como Avincis e Indra, existen espazos dispoñibles para este novo asentamento empresarial, lembrou.

Na mesma liña, apuntou que o Parque Industrial de Rozas vai ser o primeiro banco de probas de toda España do Ceo Dixital Europeo, o emprazamento da nova aceleradora espacial que vai crear a Xunta de Galicia, e aspira a ser sede do Centro de Incubación de Empresas da Axencia Espacial Europea (ESABIC).

Lorenzana concluíu ratificando a aposta da Xunta por que Galicia sexa pioneira no desenvolvemento de tecnoloxías para o sector da seguridade, a defensa e o aerospazo. “A nosa máxima aspiración agora mesmo é que se fabriquen e se comercialicen en Galicia”, asegurou.

• A directora do Igape, Covadonga Toca, participou hoxe na inauguración do encontro Atlantic Green Hub, impulsado por Viratec e Aclima, que converte Galicia en punto de referencia da sustentabilidade e da innovación ambiental no Atlántico
• Subliña que a cooperación entre clústeres e ecosistemas empresariais de Galicia e Euskadi marca un fito na creación dun modelo industrial máis limpo, competitivo e sostible
• Destaca que a Xunta, a través do Igape, aposta por programas que combinan innovación, dixitalización e sustentabilidade para fortalecer o tecido produtivo galego e impulsar a transición verde en liña co Pacto Verde Europeo

Santiago de Compostela, 23 de outubro de 2025

A directora do Igape, Covadonga Toca, participou hoxe na inauguración do encontro Atlantic Green Hub, celebrado na Cidade da Cultura, que reúne durante dous días a empresas, centros tecnolóxicos e expertos de Galicia e Euskadi co obxectivo de avanzar conxuntamente na transición ecolóxica e na competitividade industrial.

Na súa intervención, Toca destacou que “Galicia é hoxe o epicentro do eixo atlántico verde”, un encontro que “sitúa Galicia como referente do eixo atlántico en sustentabilidade e innovación medioambiental”. Lembrou que “non é casualidade que este encontro sexa en Galicia: somos unha terra innovadora e comprometida, onde empresas, clústeres, universidades e administracións traballan cada vez máis unidas para dar respostas reais aos grandes retos ambientais”.

A directora subliñou que o Atlantic Green Hub, impulsado por Viratec -Clúster Galego de Solucións ambientais e Economía Circular- e co liderado compartido con Aclima           -Clúster del Medio Ambiente Vasco- “está concibido para consolidarse como a gran cita da sustentabilidade e a competitividade industrial do eixo atlántico”. Engadiu que a colaboración entre Viratec e Aclima “marca un fito na cooperación empresarial e tecnolóxica entre Euskadi e Galicia, dúas rexións que comparten unha visión común: impulsar un modelo industrial sostible, innovador e competitivo desde o Atlántico”.

Toca Carús destacou que “os retos ambientais son globais, pero as solucións poden, e deben, construírse desde os territorios, desde a colaboración e desde a experiencia compartida”. Reivindicou tamén que esta alianza “é un exemplo de colaboración público-privada eficaz, na que administracións, empresas, universidades e centros tecnolóxicos suman capacidades para xerar valor”, e que “simboliza ese espírito atlántico que Galicia quere seguir liderando: unha rede de rexións que cooperan para competir, que comparten valores e que entenden que o futuro será sostible”.

Neste contexto, a directora lembrou que Galicia comparte plenamente os obxectivos do Pacto Verde Europeo, “a gran estratexia da Unión Europea para alcanzar a neutralidade climática en 2050”, así como do Pacto Industrial Limpo, “que promove unha industria europea descarbonizada, dixital e resiliente, capaz de producir con menos emisións e maior valor engadido”.

Toca Carús destacou o compromiso da Xunta coa innovación e a sustentabilidade, dúas caras da mesma moeda no novo modelo económico galego. Neste marco, subliñou o conxunto de programas e iniciativas que impulsa o Igape para apoiar as empresas na súa transformación tecnolóxica e verde, favorecendo o ecodeseño, a dixitalización e a creación de emprego cualificado. Tamén lembrou a aposta pola colaboración público-privada a través de redes como as Business Factories, entre elas a BF ClimaTech, que promoven proxectos innovadores e contribúen a construír un tecido industrial máis sostible e con futuro.

• A directora do Igape, Covadonga Toca, participou en Allariz na xornada Moda con propósito: sustentabilidade, deseño e territorio, onde puxo en valor o modelo galego de desenvolvemento baseado na innovación, o talento e o compromiso co entorno
• Destaca que Galicia é a comunidade líder en exportacións do sector téxtil en España, con máis de 7.900 millóns de euros e máis de 800 firmas vendendo nos cinco continentes
• Subliña o impulso á integración da sustentabilidade e o deseño responsable nas empresas galegas, acompañando o sector a través de programas como ASG, ReAcciona ou as Business Factory, que promoven a innovación, a economía verde, a competitividade e a internacionalización

Allariz (Ourense), 22 de outubro de 2025

A directora do Igape, Covadonga Toca, participou hoxe en Allariz na xornada Moda con propósito: sustentabilidade, deseño e territorio, un encontro organizado polo Círculo de Empresarios de Galicia e o Clúster Galego da Moda e o Téxtil (Cointega) dentro do ciclo Xeografía empresarial: ruta para o futuro de Galicia.

Durante a súa intervención, Covadonga Toca destacou que Galicia é hoxe un referente internacional en moda e deseño grazas á combinación de tradición, innovación e sustentabilidade. “A moda galega non é só deseño, é identidade, comunidade e futuro”, afirmou, subliñando que o sector téxtil é un dos grandes piares da economía galega e o segundo en valor de exportacións, só por detrás da automoción.

A directora lembrou que as exportacións galegas de téxtil e moda superaron os 7.900 millóns de euros en 2024, o que representa preto dun terzo das exportacións españolas do sector, con máis de 800 empresas galegas presentes en mercados de Europa, América e Asia. “Exportar non é só vender fóra; é conectar co mundo desde o que somos”, engadiu.

Toca Carús salientou tamén o papel de Ourense e Allariz como berce do deseño galego, cunha tradición que soubo reinventarse apostando pola recuperación patrimonial, a moda de autor e o comercio local. “Allariz é hoxe un símbolo de como a sustentabilidade pode converterse nun motor de desenvolvemento económico e social”, afirmou.

A responsable do Igape fixo fincapé en que a sustentabilidade é xa unha vantaxe competitiva real para as empresas e explicou que o organismo autonómico está acompañando o sector neste camiño a través de diferentes programas. Entre eles, citou as axudas ASG, que permiten integrar criterios ambientais, sociais e de bo goberno na xestión empresarial; o programa ReAcciona, que impulsa plans de acción en economía circular, eficiencia enerxética ou impacto social; e as Business Factory, como BF ClimaTech, que apoian proxectos innovadores en sustentabilidade e economía verde.

Toca Carús salientou o deseño galego como marca de identidade e símbolo dunha moda ética, innovadora e creativa. Reivindicou un modelo con propósito que xere valor e emprego de calidade, proxectando ao exterior unha Galicia moderna e sostible, e reafirmou o compromiso da Xunta de apoiar o talento e a competitividade do sector.

• Apunta que a principal liña deste programa de apoios -para a creación de novos produtos ou servizos a través de IA- pechou o pasado mes de abril con récord de solicitudes, un total de 117, o que obrigou a duplicar o seu orzamento inicial de 5,5 a 10,8 M€
• Destaca que Galicia se consolida como o sexto polo de innovación e emprendemento de España, con 388 empresas tecnolóxicas e innovadoras, un 26 % máis que o ano anterior, das cales 229 son startups
• “Os proxectos empresariais que crecen, nacen ou se instalan en Galicia son outro plebiscito en favor da economía galega e un recoñecemento á nosa estabilidade política, social e institucional”, subliña

Santiago de Compostela, 21 de outubro de 2025

A conselleira de Economía e Industria, María Jesús Lorenzana, avanzou hoxe que a innovación seguirá sendo unha peza clave nos Orzamentos da Xunta do vindeiro ano, que van recoller unha nova edición do programa IA360, a primeira convocatoria de axudas en Galicia para introducir a intelixencia artificial nas empresas que resultou todo un éxito.

Lorenzana interveu hoxe na inauguración do I Gran Foro de Innovación e Emprendemento, onde apuntou que a principal liña deste programa de axudas -para a creación de novos produtos ou servizos a través de IA- pechou o pasado mes de abril con récord de solicitudes, un total de 117, o que obrigou a duplicar o seu orzamento inicial de 5,5 a 10,8 M€.

En total, precisou, resultaron beneficiados 82 proxectos empresariais cunha axuda media de 131.000 euros e unha mobilización de máis de 21,7 M€ de investimento total. O sector TIC concentra o 43 por cento das propostas, seguido do alimentario, a enxeñaría, a biotecnoloxía, a saúde, a enerxía ou a loxística. As outras dúas liñas deste paquete de axudas -para a implantación de solucións comerciais de IA e proxectos de xestión de datos, e para accións formativas- teñen aínda o prazo de solicitudes aberto ata o 31 de outubro.

A conselleira salientou que Galicia conta cun sistema de innovación e emprendemento cada vez máis dinámico. De feito, dixo, consolídase como o sexto polo de innovación e emprendemento de España, só por detrás de Madrid, Cataluña, Comunidade Valenciana, País Vasco e Andalucía. Conta con 388 empresas tecnolóxicas e innovadoras, un 26 % máis que o ano anterior, das cales 229 son startups, o que supón un incremento do 44 % respecto a 2024. Estas compañías xeran preto de 2.900 empregos cualificados e superan os 290 millóns de euros de facturación anual.

Neste contexto, Lorenzana abondou en que “empresa e Administración non son dous equipos diferentes, senón un só”. E baixo esa premisa destacou o labor que desempeña a Oficina Económica de Galicia, con case 30.000 consultas en ano e medio de vida, “para poñerlle as cousas fáciles ás empresas”.

“Os proxectos empresariais que crecen, nacen ou se instalan en Galicia son outro plebiscito en favor da economía galega e un recoñecemento á nosa estabilidade política, social e institucional”, subliñou, para remarcar: “É certo que en Galicia aínda existen sectores minoritarios que, diante de calquera iniciativa industrial, reaccionan en contra. Aínda que fagan ruído no presente, pertencen ao pasado e teñen pouco sitio no futuro”.

• Salienta a resolución doutras 10 achegas para negocios ou empresas afectadas por valor de 280.000 € e 36 para a recuperación de Tecores e espazos naturais protexidos
• Asegura que “o 80% das axudas para explotacións agrícolas ou forestais” estarán pagadas antes de que remate o ano
• Resalta a celeridade da tramitación e resolución da Xunta, fronte ao Goberno central que “nin sequera convocou” aínda as súas achegas para os afectados

Celanova (Ourense), 20 de outubro de 2025

O presidente da Xunta, Alfonso Rueda, destacou hoxe que o Executivo autonómico xa concedeu 42 axudas a propietarios de vivendas afectadas pola vaga de incendios forestais por un importe de 2,9 millóns de euros. Delas, a gran maioría -37 – corresponden a inmobles situados na provincia de Ourense.

“Recibimos 137 solicitudes, 129 en Ourense e a maioría das xa concedidas foron para residencias habituais”, explicou o presidente que fixo un balance da resolución das principais axudas postas en marcha polo Executivo autonómico a finais de agosto para paliar os efectos da vaga de lumes.

No eido económico, Rueda indicou que a Xunta recibiu 22 peticións de axudas das que “xa se revolveron 10 por un importe de 280.000 euros”. Todas elas corresponden á provincia de Ourense. Do mesmo xeito, Ourense tamén concentrou a maioría de solicitudes para a recuperación dos Terreos Cinexéticamente Ordenados (Tecores). Das 59 peticións de axudas, 42 foron de propietarios de Ourense. Xa están resoltas 24 que permitiron aboar 180.000 euros aos beneficiarios.

En canto as axudas destinadas á reparación de danos en reservas da biosfera e espazos protexidos, a Xunta recibiu 12 solicitudes -oito na provincia de Ourense- das que xa se resolveron sete por un valor de 200.000 euros.

Por último, Rueda salientou que se “solicitaron 1.342 axudas agrícolas e 285 forestais” que, están na fase de comprobación. “O compromiso da Xunta é que antes que remate o ano estean pagadas canto menos o 80%”, indicou.

O presidente salientou que todos os departamento do Executivo autonómico están a traballar “coa máxima celeridade” para axilizar a tramitación e resolución das achegas dirixidas aos afectados polos lumes forestais. Unha premura que, lamentou, contrasta coa actitude do Goberno central que “nin sequera convocou” as axudas estatais para paliar os danos da vaga de incendios.

• A directora do Igape, Covadonga Toca, participa na inauguración da XV Semana Internacional Contract Galicia onde subliña que este sector representa “a nova Galicia industrial: creativa, sostible e aberta ao mundo”, con máis de 7.000 empregos e unha facturación que supera os 400 millóns de euros anuais
• Destaca o compromiso da Xunta coa internacionalización, a dixitalización e o crecemento das empresas galegas do contract, a través do acompañamento financeiro e da colaboración público-privada

Oleiros, 16 de outubro de 2025

A directora do Igape, Covadonga Toca, participou hoxe na inauguración da XV Semana Internacional Contract Galicia, un encontro de referencia que cumpre quince edicións e que se consolida como escaparate da creatividade, a innovación e a capacidade industrial galega.

Durante a súa intervención, Toca destacou que o contract é “unha das mellores expresións da forma de ser e de facer da nosa industria”, un sector que combina talento, destreza e visión empresarial, e que “evolucionou desde os oficios tradicionais cara a unha industria moderna, global e altamente competitiva”. Neste sentido, lembrou que o ecosistema contract galego xera máis de 7.000 postos de traballo e supera os 400 millóns de euros de facturación anual, con presenza en máis dun centenar de países.

“Detrás de cada proxecto hai unha historia de colaboración, de esforzo e de confianza, e sobre todo de orgullo por facer as cousas ben, desde aquí, desde Galicia”, sinalou Toca, quen puxo en valor o carácter colaborativo e o espírito innovador das empresas do sector.

A responsable do Igape incidiu tamén na vocación internacional do contract galego, que “forma parte da historia de éxito exportadora de Galicia”, con empresas presentes en proxectos en Europa, América, Asia e Oriente Medio. “Nun contexto global complexo, Galicia segue a medrar, diversificando mercados e consolidando a súa presenza exterior”, afirmou.

Toca subliñou o compromiso da Xunta de Galicia co sector, a través do acompañamento ás empresas nos seus procesos de internacionalización, modernización e impulso competitivo. “Queremos que dispoñan de ferramentas de financiamento adaptadas, apoio na procura de novos mercados e asesoramento especializado para avanzar en dixitalización, sustentabilidade e innovación”, explicou.

Neste sentido, destacou que o contract galego é “un exemplo claro de como a colaboración público-privada pode transformar un sector”, grazas ao traballo conxunto entre empresas, clústeres e institucións para abrir novos canais de exportación, reforzar a presenza en feiras internacionais e visibilizar o talento galego en proxectos de gran envergadura.

Para rematar, Covadonga Toca celebrou o 15º aniversario da Semana Internacional Contract como “un fito que simboliza a cooperación, o crecemento conxunto e o traballo ben feito”. “O contract galego converte as ideas en proxectos, os espazos en oportunidades e o talento en crecemento para toda Galicia”, concluíu.

• Toca subliñou que Galicia “é hoxe un territorio innovador e con visión de futuro”, no que as ideas se transforman en proxectos grazas á creatividade, á cooperación e ao espírito emprendedor
• Destacou que o Igape acompaña este esforzo con programas que impulsan a modernización tecnolóxica das pemes, apoian a posta en marcha de novas ideas e favorecen a súa internacionalización, consolidando Galicia como un lugar atractivo para innovar e emprender

A Coruña, 8 de outubro de 2025

A directora do Igape, Covadonga Toca, participou hoxe na inauguración da xornada Conexión Maker Faire Galicia, celebrada na Cidade das TIC da Coruña, onde reivindicou o talento galego como motor dunha economía innovadora, sostible e aberta ao mundo. Neste sentido, destacou que Galicia “é hoxe un territorio innovador e con visión de futuro, no que as ideas se transforman en proxectos grazas á creatividade, á cooperación e ao espírito emprendedor”.

A directora do Igape puxo en valor a traxectoria da Maker Faire Galicia, que chega este ano á súa 11ª edición consolidándose como a maior feira maker do sur de Europa, con máis de 100.000 asistentes, 1.550 creadores de 15 países e 600 proxectos presentados. “O importante non son só as cifras, senón o que representan: a capacidade de Galicia para situarse na vangarda da innovación global e conectar o noso talento co mundo”, afirmou.

Durante a súa intervención, fixo referencia a algúns dos proxectos protagonistas desta edición, que mostran como a intelixencia artificial, a transferencia de enerxía en condicións extremas ou a agricultura sustentable con tecnoloxías de control avanzado xa forman parte do ecosistema galego. Exemplos que reflicten a capacidade de Galicia para xerar innovación aplicada a retos reais, dende o coidado do medio ambiente ata a eficiencia enerxética e alimentaria.

Subliñou tamén que Galicia conta cun ecosistema de innovación e emprendemento cada vez máis vivo, no que universidades, centros tecnolóxicos, clústeres, startups e empresas tradicionais colaboran cada vez máis entre si, xerando sinerxías que multiplican o impacto da innovación. Neste camiño, o Igape acompaña con programas que impulsan a modernización tecnolóxica das pemes, achegan a investigación ao tecido produtivo e apoian a posta en marcha de novas ideas.

Ademais, destacou a importancia da rede de aceleradoras especializadas, ás que se engadirán novas iniciativas centradas en saúde e enerxías renovables, así como o programa de axudas para startups, que financia os gastos iniciais para que ningún proxecto quede sen despegar. Xunto coa Oficina Económica de Galicia, que ofrece asesoramento personalizado a emprendedores e empresas, conforman unha infraestrutura clave para que o talento e as ideas innovadoras se transformen en motor colectivo de desenvolvemento.

A Xunta ofrece actualizacións da situación económica en distintos mercados mundiais a través de xornadas virtuais coas Antenas do Igape.

O obxectivo é transmitir unha información actualizada e afondar en novas oportunidades para as empresas galegas que queiran exportar os seus produtos, neste caso, a China.

A Antena en China, o día 9 de outubro, informará sobre as últimas novidades sobre este país, a evolución deste mercado nos últimos meses e falarase especialmente do acceso a feiras e sectores estratéxicos.

Se tes interese neste mercado, tamén existe a posibilidade de programar unha reunión individual cos responsables da Antena do Igape en China, durante os días 13 e 14 de outubro.

Solicite a reunión ao realizar a súa inscrición.

🗓️ Día: 9 de outubro de 2025

⏰ Hora: 09:30-11:10 (ES) | 15:30-17:10 (CH)

💻 En liña

✍️ Inscricións

➡️ Descarga o programa

• A directora do Igape, Covadonga Toca, visitou as instalacións do centro vigués, onde puxo en valor o seu traballo na creación de spin-offs e na posta en marcha do primeiro fondo de investimento deep tech impulsado por un centro tecnolóxico en Europa
• Destaca que a capacidade de transformar coñecemento en proxectos empresariais innovadores “é un activo fundamental para Galicia, e o Igape está a acompañar estes procesos desde a súa nova área de Innovación”

Vigo, 2 de outubro de 2025

A directora do Instituto Galego de Promoción Económica (Igape), Covadonga Toca, visitou hoxe as instalacións de Gradiant en Vigo, centro tecnolóxico galego especializado en solucións de telecomunicacións e tecnoloxías dixitais aplicadas á industria, con máis de 400 clientes e un forte crecemento en facturación e emprego nos últimos anos.

Durante a visita, Toca Carús puxo en valor a traxectoria de Gradiant como referente europeo en innovación dixital, destacando a súa aposta pola intelixencia artificial, a ciberseguridade, a análise de datos e as comunicacións avanzadas. Neste ámbito, lembrou que o Igape conta con novas liñas de apoio para proxectos baseados en IA, dirixidas a reforzar a competitividade do tecido empresarial galego.

A directora subliñou tamén a relevancia do emprendemento tecnolóxico que se xera arredor de Gradiant, que xa deu lugar a varias spin-offs de éxito internacional e que vén de lanzar TRL13, o primeiro fondo de investimento deep tech en Europa impulsado por un centro tecnolóxico español.

“A capacidade de transformar coñecemento en proxectos empresariais innovadores é un activo fundamental para Galicia, e o Igape está a acompañar estes procesos desde a súa nova área de Innovación”, sinalou.

Covadonga Toca concluíu destacando que “Galicia ten que seguir avanzando cara a unha economía innovadora, dixital e competitiva, e centros como Gradiant son aliados imprescindibles para facelo posible, combinando ciencia, tecnoloxía e emprendemento co apoio da Xunta”.