• A convocatoria abriuse en xaneiro cun orzamento de 30M€, e desde entón recibíronse xa solicitudes por un importe próximo a esa cifra, motivo polo que o Goberno galego amplía o presuposto nun 70% achegando outros 20M€
• O obxectivo é mellorar as condicións de acceso ao crédito de pemes e autónomos, favorecendo a entrada a instrumentos de débeda nun contexto de aumento dos tipos de xuro
• O programa suma cinco liñas con dúas novidades: os préstamos para financiar a implantación de empresas galegas no exterior; e aqueles para as empresas de transformación e comercialización de produtos da pesca e acuicultura, e para a industria manufactureira

Santiago de Compostela, 17 de xullo de 2024

O Goberno galego, a través da Consellería de Economía e Industria, segue a traballar na mellora da competitividade do tecido empresarial galego, facilitando, entre outras accións, o acceso a financiamento de pemes e autónomos galegos nun escenario como o actual marcado por tipos de xuro máis elevados.

Neste marco, o Diario Oficial de Galicia (DOG) publica hoxe a ampliación da liña de préstamos directos do Igape ata os 50 millóns de euros. Un incremento levado a cabo ante o crecente interese e a demanda do tecido empresarial galego neste programa. No en van, destináronse inicialmente 30M€, abríndose o prazo de presentación de solicitudes o pasado 16 de xaneiro.

Desde entón, téñense recibido xa solicitudes por un importe próximo a eses 30M€, motivo polo que o Goberno galego amplía agora o orzamento inicial nun 70%, achegando outros 20M€ adicionais para facer fronte á demanda estimada ata o fin de prazo establecido, que se mantén a finais do mes de novembro.

Cómpre lembrar que a convocatoria presentaba desta volta dúas grandes novidades: dun lado, a concesión de préstamos para financiar a implantación de empresas galegas no exterior; e, doutro, os préstamos para financiar circulante para as empresas de transformación e comercialización de produtos da pesca e acuicultura, e para a industria manufactureira.

No tocante á liña de internacionalización, está previsto financiar a empresas con centros de traballo en Galicia que poñan en marcha novos establecementos, sucursais ou filiais en ata 60 países dos cinco continentes.

O importe mínimo dos préstamos oscilará entre os 300.000€ e un máximo de 1M€, contribuíndo á expansión do tecido empresarial galego, que segue a consolidar os rexistros históricos en exportacións tras superar o ano pasados os 30.000 M€ en vendas ao exterior.

A segunda novidade céntrase na industria manufactureira, artellándose os mecanismos necesarios para a concesión de préstamos ás empresas do sector na procura de acomodar a devolución dos mesmos ao diñeiro xerado polas operacións da empresa. O  importe dos préstamos oscilará tamén entre 300.000€ e 1M€, cunha duración de oito anos con dous de carencia.

Investimentos estratéxicos, centros tecnolóxicos e naval

Así mesmo, e como vén sendo habitual, o programa atende tamén aos investimentos estratéxicos de pemes e autónomos, promovendo a creación de novas instalacións e a mellora das existentes, ou o incremento da súa capacidade produtiva.

Cubrindo ata o 50% do investimento a financiar, cun máximo de 5M€, neste caso os préstamos terán unha duración de ata doce anos coa posibilidade de incluír carencia na amortización principal.

Ademais, os préstamos directos financiarán actuacións levadas a cabo por centros tecnolóxicos, asociacións empresariais, fundacións e entidades que desenvolvan actividades económicas, de I+D ou de servizos de interese para o tecido empresarial galego. Nestes casos, o seu importe oscilará entre 75.000€ e 1,5M€, cubríndose ata un máximo do 75% do investimento financiable.

Así mesmo, atenderase tamén as operacións levadas a cabo pola industria auxiliar naval, co obxectivo de apoiar a estas empresas facilitándolles o financiamento a longo prazo. O importe mínimo do préstamo será de 300.000 euros e o máximo de 1M€ euros, resultando o prazo de devolución de ata seis anos, incluíndo dous de carencia, cun tipo de xuro bonificado.

Máis de 100 M€ mobilizados

Desde a súa activación no 2019 lévanse concedido operacións ao abeiro deste programa por un importe total de préstamos de máis de 63 millóns que suman un investimento mobilizado de máis de 104 millóns.

Deste xeito, o Goberno galego reforza o seu compromiso cos autónomos e empresas galegas para facilitarlles o acceso ao financiamento nas condicións máis favorables posibles, potenciando o mantemento e creación de emprego, a innovación, o desenvolvemento e mellora das empresas existentes, a creación e posta en marcha de novas iniciativas empresariais e o financiamento.

• Son firmas de sectores tan diversos como o téxtil, o agroalimentario, o sector da maquinaria, as TIC, o farmacéutico, os servizos bancarios ou de consultaría
• Apunta que desde o ano 2019 as exportacións galegas a Alemaña creceron case un 25% e rexistraron o pasado ano os 1.815M€, mentres que as importacións acadaron un volume de 797M€
• Precisa que as empresas galegas que exportan regularmente a aquel país creceu no mesmo período un 15%, ata acadar a día de hoxe as 479, das que 316 o fan xa regularmente
• Manifesta a intención do Goberno galego de continuar abrindo mercado ao tecido empresarial a través de programas como o Plan Foexga e da convocatoria de misións comerciais
• A embaixadora amosa o seu interese pola política de incentivos da Xunta de Galicia para captar investimento foráneo, entre os que figuran a Oficina Económica de Galicia, o plan de aceleración de proxectos industriais e a Lei de Recursos Naturais

Santiago de Compostela, 16 de xullo de 2024

A conselleira de Economía e Industria, María Jesús Lorenzana, destacou hoxe o crecente posicionamento das empresas galegas no mercado alemán, que se reflicte tanto no incremento das exportacións a aquel país como no nivel de implantación.

Nun encontro coa embaixadora de Alemaña en España, Maria Margarete Gosse, con quen abordou as relacións comerciais que mantén Galicia co país xermano e a política industrial da Xunta, Lorenzana salientou que se trata do cuarto mercado receptor das exportacións galegas.

Así, apuntou que desde o ano 2019 as exportacións desde Galicia a Alemaña creceron case un 25% e rexistraron o pasado ano os 1.815M€, mentres que as importacións acadaron un volume de 797M€. A mesma tendencia que se rexistrou canto ao número de empresas galegas que exportan regularmente a aquel país, que creceu no mesmo período un 15%, ata acadar a día de hoxe as 479, das que 316 o fan xa regularmente.

Neste momento, ademais, son aproximadamente 350 empresas galegas as que están implantadas no país, de sectores tan diversos como o téxtil, o agroalimentario, o sector da maquinaria, as TIC, o farmacéutico ou os servizos bancarios ou de consultaría. O téxtil, a automoción, o metalmecánico, o agroalimentario, os produtos minerais e as industrias químicas -cun incremento do 85% desde o ano 2029-, son, de feito, os principais sectores exportadores a Alemaña. 

Política industrial da Xunta e RDG

Na xuntanza, Lorenzana manifestou a intención do Goberno galego de seguir consolidando esta tendencia e continuar abrindo mercado ás empresas galegas no país, a través de programas como o Plan Foexga e da convocatoria de misións comerciais por parte do Instituto Galego de Promoción Económica (Igape), en colaboración coas Cámaras de Comercio.

Igualmente, a embaixadora de Alemaña en España, Maria Margarete Gosse, amosou o seu interese pola política de incentivos da Xunta de Galicia para captar investimento foráneo, entre os que figuran o servizos de asesoramento da Oficina Económica de Galicia, o plan de aceleración de proxectos industriais e a Lei de Recursos Naturais xunto coa sociedade público-privada RDG (Recursos de Galicia).

• Indica que no ano 2023, o uso da Intelixencia Artificial nas empresas TIC galegas foi do 29,5%, o que supón un crecemento relativo desde 2021 do 36,6% e un 5% respecto ao ano anterior
• Sinala que as TIC xa teñen un impacto moi significativo no conxunto da economía galega pero, para acrecentalo, a Xunta está a elaborar o plan director do sector
• Destaca que sectores estratéxicos como a automoción, a agroindustria e o sector marítimo-pesqueiro xa comezaron a integrar solucións de Intelixencia Artificial para monitorizar procesos, mellorar as cadeas de subministración e reducir custos

O Grove (Pontevedra), 12 de xullo de 2024

A conselleira de Economía e Industria, María Jesús Lorenzana, apelou hoxe a aproveitar as oportunidades que ofrece a Intelixencia Artificial para o tecido empresarial, mesturando investimento tecnolóxico, formación, colaboración público-privada e un enfoque coidadoso en ética e regulación.

Así o manifestou hoxe durante a súa participación na mesa redonda O impacto da IA na estratexia organizacional, no Encontro da Toxa, onde apuntou que, segundo o Observatorio da Sociedade da Información e Modernización de Galicia (Osimga), no ano 2023, o uso da Intelixencia Artificial nas empresas TIC galegas foi do 29,5%, o que supón un crecemento relativo desde 2021 do 36,6% e un 5% respecto ao ano anterior. En Galicia, sectores estratéxicos como a automoción, a agroindustria e o sector marítimo-pesqueiro xa comezaron a integrar solucións de Intelixencia  Artificial para monitorizar procesos, mellorar as cadeas de subministración e reducir custos.

Segundo dixo, as TIC xa teñen un impacto moi significativo no conxunto da economía galega pero, para acrecentalo, a Xunta está a elaborar o plan director do sector, declarado estratéxico xunto cos da automoción, o naval, o metalmecánico, o forestal-madeira e a loxística industrial. Contará con medidas que permitan impulsar a modernización e a produtividade, implantar modelos de produción máis eficientes e respectuosos co medio ambiente e mellorar a seguridade e onde terá un peso especial, ademais, o talento e a cualificación do capital humano.

Para que as empresas poidan facer fronte a estes retos, a conselleira lembrou que a Xunta, a través do Igape, leva convocando desde 2018 dúas liñas de axuda que suman case 7M€ para facilitar a transformación industrial e a dixitalización de pemes e autónomos, ademais de incentivar investimentos no eido da economía circular. Nestes seis anos, os apoios concedidos suman máis de 20M€ cun mobilizado de 40M€ no tecido empresarial. Referiuse, tamén, ao labor de asesoramento que realiza a Oficina Económica de Galicia nesta materia, así como aos apoios para a constitución de centros de fabricación avanzada.

Galicia foi unha das primeiras comunidades autónomas españolas en aprobar unha estratexia propia de Intelixencia Artificial (a EGIA), ademais de ser designada como sede da primeira axencia estatal de supervisión que se crea en Europa. Na mesma liña, apuntou que se abriu un proceso de consulta pública para a elaboración da futura lei de intelixencia artificial en Galicia.

• En total foron 130 candidaturas as que se presentaron a esta convocatoria, das que oito son proxectos que proceden de fóra de Galicia
• Esta é unha das tres novas convocatorias comprometidas ata 2026, coas que se prevé dar apoio a 60 iniciativas
• A rede de aceleradoras da Xunta (Business Factories) é unha aposta da Administración autonómica por impulsar as startups, con actuacións que abranguen todo tipo de sectores e localizacións territoriais

Santiago de Compostela, 12 de xullo de 2024

A Xunta de Galicia, membro do comité executivo da aceleradora Business Factory Auto (BFAuto) a través do Instituto Galego de Promoción Económica (Igape), resalta o nivel tecnolóxico dos vinte proxectos que van participar na oitava edición deste programa de aceleración.

En total foron 130 candidaturas as que se presentaron a esta convocatoria, das que oito son proxectos que proceden de fóra de Galicia: dous internacionais, de Holanda e Francia; e seis nacionais, de Santander, Barcelona, Madrid, Sevilla, Navarra e Lleida. Esta é unha das tres novas convocatorias comprometidas ata 2026, coas que se prevé dar apoio a 60 iniciativas.

Os 20 proxectos seleccionados responden aos retos tecnolóxicos propostos por compañías como Akwel Vigo Spain, Denso Sistemas Térmicos España, Lear, Magna Seating Vigo, Maier Ferroplast, SMRC, Snop Estampación, Stellantis o Plastic Omnium. En concreto, as liñas de investigación están vinculadas coa sustentabilidade, a electrificación e as novas formas de mobilidade.

Entre os proxectos figuran propostas como plataformas modulares baseadas en intelixencia artificial; robots móbiles autónomos para optimizar a loxística; estacións modulares para o intercambio e carga de baterías; sistemas de carga solar ou de refrixeración líquida de compoñentes; xemelgos dixitais; unha motocicleta adaptada eléctrica de tres rodas; equipos especializados para talleres, entre outras.

O obxectivo desta aceleradora é ensanchar a base do sector en Galicia atraendo novas empresas de carácter tecnolóxico. Ofrece, polo tanto, o acompañamento necesario nos primeiros pasos de todo proxecto innovador que xurda no eido da mobilidade. Os participantes contarán con titorizacións e recursos para dar forma ás súas ideas e convertelas en conceptos empresariais, con formación específica adaptada ás necesidades de cada un; ou con talleres grupais impartidos por expertos de prestixio no ámbito nacional e internacional.

O compromiso da Xunta é que Galicia siga sendo un referente para o conxunto do sector en España e para iso a aposta seguirá sendo a vía da colaboración e o diálogo co resto de integrantes do comité executivo da BFAuto: o Clúster de Automoción e Mobilidade de Galicia (Ceaga), Stellantis, o Consorcio da Zona Franca de Vigo (CZFV) e Vigo Activo Sociedade de Capital Risco.

A rede de Business Factories é unha aposta da Administración autonómica por impulsar aceleradoras de empresas, con actuacións que abranguen todo tipo de proxectos e localizacións territoriais. Unha ampla rede que conta co apoio e a colaboración dos axentes e as empresas tractoras dos diferentes sectores, e na que destacan as aceleradoras do sector da automoción (BFAuto), aeroespacial (BFAero), no sector da alimentación (BFFood) ou a nova aceleradora no ámbito da economía circular e as solución ambientais (BFClima Tech). Tamén VíaGalicia, sobre emprendemento innovador, multisectorial, especialmente no ámbito das TIC, agroalimentario ou téxtil, en colaboración co Consorcio da Zona Franca de Vigo.

• O presidente participou na clausura da asemblea xeral da Confederación de Industrias Téxtiles de Galicia (Cointega)
• Asegura que se trata dunha industria “fundamental” que fai “marca país” e que permite levar o nome de Galicia por todo o mundo
• O Goberno galego está poñendo en marcha programas específicos para axudar ás empresas a afrontar novos retos como a dixitalización, innovación ou internacionalización
• O téxtil lidera as exportacións na comunidade galega e representa o 37% do total do sector en toda España

Santiago de Compostela, 10 de xullo de 2024

O presidente da Xunta, Alfonso Rueda, puxo hoxe en valor o peso do sector téxtil no tecido económico e produtivo galego e comprometeu o apoio da Administración autonómica para seguir impulsándoo e consolidando o seu liderado. “É un sector fundamental que fai marca país”, indicou para asegurar que hai tempo que “a moda galega” serviu para poñer á comunidade “no mapa”. 

Así o sinalou hoxe durante a clausura da asemblea xeral da Confederación de Industrias Téxtiles de Galicia (Cointega), na que resultou elixida a súa nova xunta directiva.

O titular do Executivo galego destacou que a moda é un elemento que “sempre vai estar presente” na vida dos cidadáns e resaltou o compromiso da Xunta en apoiar a toda a cadea de valor do téxtil galego nos retos que ten por diante. Nesta liña, falou de “formación, contar con profesionais cualificados, a internacionalización” ou adaptar as estruturas de distribución as necesidades “tanto das grandes cadeas coma do pequeno comercio”.

Para apoiar ás empresas do sector, e a todo o tecido produtivo galego, o Goberno autonómico está poñendo en marcha un amplo abano de medidas para facilitar o investimento, como a redución da burocracia, os plans de aceleración ou a Oficina Económica de Galicia; ademais de programas específicos para axudalas a afrontar novos retos como a dixitalización, a innovación, a internacionalización e a sustentabilidade.

Peso do sector téxtil

Este eido, segundo os datos de 2023, foi o principal sector exportador en Galicia, por diante de automoción e alimentación; e representou o 37% das exportacións téxtiles de todo o país.

• A Consellería de Economía e Industria amplía en preto de 6M€ a liña que favorece o financiamento, tanto coa bonificación dos tipos de xuro dos préstamos de xeito moi favorable, como coa obtención de avais sen custo algún
• A convocatoria abriuse en xaneiro coa previsión de poñer en circulación ata 80M€ recibíndose xa solicitudes por importe superior a esa cifra, motivo polo que se prevé este incremento orzamentario que permitirá chegar ata os 120M€ en operacións
• A través deste programa, desde o 2020 aprobáronse preto de 3.500 solicitudes, moitas delas vencelladas ao Reaval Covid posto en marcha no contexto da pandemia, e se formalizaron operacións por valor de máis de 227M€
• A liña complementa ao programa de préstamos directos, que mellora tamén as condicións de acceso ao crédito do tecido produtivo, e que ven de ampliar ata os 50M€ o seu orzamento ante o interese amosado polo tecido empresarial

Santiago de Compostela, 5 de xullo de 2024

O Goberno galego, a través da Consellería de Economía e Industria, segue a traballar na mellora da competitividade do tecido empresarial galego, facilitando, entre outras accións, o acceso a financiamento de pemes e autónomos galegos nun escenario como o actual marcado por tipos de xuro máis elevados.

Neste marco, o Diario Oficial de Galicia (DOG) publica hoxe a ampliación da liña de acceso ao crédito que, a través dun convenio coas entidades de crédito e as Sociedades de Garantía Recíproca (SGR), pon a disposición de pemes e autónomos préstamos nas condicións máis vantaxosas. En concreto, achéganse 5,8M€ máis, que se suman aos preto de 12M€ previstos inicialmente, na procura de que os beneficiarios soliciten tanto a bonificación do tipo de xuro dun préstamo como a obtención do aval sen custo algún.

A ampliación da resposta así a boa acollida empresarial da liña. No en van, a convocatoria, aberta no mes de xaneiro, prevía poñer en circulación ata 80M€, recibíndose xa solicitudes por importe superior a esa cifra. Agora, e con este incremento, se prevé chegar ata aos 120M€ en operacións nas que pemes e autónomos poden financiar investimentos e circulante, ou refinanciar préstamos anteriores que se materializasen en condicións menos vantaxosas. 

O obxectivo é posibilitar ao tecido empresarial galego o acceso a préstamos a longo prazo para financiar investimentos produtivos e circulante estrutural, pagamentos e reestruturación de débedas e tamén para favorecer a capacidade das empresas para outorgar garantías fronte a terceiros.

A modalidade de apoio poderá consistir na bonificación do tipo de xuro dos préstamos, na bonificación da comisión do aval, e no reaval do risco asumido polas SGR que faciliten o acceso ao crédito.

A concesión das axudas, dispoñibles ata o 30 de setembro, é por concorrencia non competitiva, sendo subvencionables todos os proxectos que cumpran os requisitos establecidos nas bases reguladoras ata o esgotamento do crédito.  

A Consellería de Economía e Industria segue así a facilitar o acceso a préstamos ao tecido empresarial galego, principalmente a pemes e autónomos ao ser estes os que sofren maiores dificultades para acadar o financiamento adecuado ás súas necesidades, dando continuidade a unha liña moi ben acollida.

Neste sentido, desde o 2020 aprobáronse xa, no marco deste programa, preto de 3.500 solicitudes, moitas delas vencelladas ao programa Reaval Covid posto en marcha no contexto da pandemia, formalizándose operacións por valor de máis de 227 millóns.

Así mesmo, esta liña complementa ao programa de préstamos directos, cuxo obxectivo vencéllase tamén á mellora das condicións de acceso ao crédito do tecido produtivo, favorecendo a entrada a instrumentos de débeda, e que ven de ampliar ata os 50M€ o seu orzamento ante o interese amosado polo tecido empresarial galego.

• O presidente participou na 19ª edición da cena de gala da Asociación de Empresarios Galegos de Cataluña (AEGA-CAT)
• Destaca iniciativas como a Oficina Económica de Galicia ou o plan de aceleración e impulso de proxectos empresariais

Barcelona, 5 de xullo de 2024

O presidente da Xunta, Alfonso Rueda, puxo hoxe en valor as medidas que está tomando o Executivo autonómico para consolidar Galicia como o mellor lugar do mundo para vivir e para investir.

Así o explicou durante a 19^a edición da cea de gala organizada pola Asociación de Empresarios Galegos de Cataluña (AEGA-CAT), na que estivo acompañado pola conselleira de Economía e Industria, María Jesús Lorenzana.

Alí, trasladoulles as iniciativas que está impulsando Galicia para favorecer o investimento, como a Oficina Económica de Galicia, que funciona como unha canle única onde se centralizan todos os trámites entre a Administración autonómica e os empresarios; ou o plan de aceleración e impulso de proxectos empresariais. “Esa Galicia que algúns situaban hai anos no vagón de cola é agora unha locomotora, unha Galicia potente”, sinalou Rueda.

O presidente tamén puxo en valor outros avances sociais, como a gratuidade das escolas infantís 0-3 anos, que a partir de setembro se estenderá ás matrículas universitarias; ou o calendario de vacinas máis completo do mundo.

Valorou que todas estas medidas, xunto coas políticas de retorno, teñen contribuído a que Galicia deixase de ser unha terra de despedida para selo de benvidas. Neste sentido, destacou que a Estratexia Retorna ten como obxectivo fomentar a volta de 30.000 galegos ata 2026.

Títulos de Excelencia Galega 2024

No acto, a AEGA-CAT fixo entrega dos Títulos de Excelencia Galega 2024, que recoñecen o talento de profesionais de distintos sectores. Nesta edición os galardoados foron a doutora en astrofísica Begoña Vila; o futbolista Francisco González Pérez “Fran”; o deseñador de moda Roberto Verino; o xornalista Jenaro Castro; o doutor en Ciencias Políticas e Socioloxía, Xosé Luis Barreiro Rivas; a CEO do Grupo Lence, Carmen Lence; e a presidenta do grupo AMA, Ana Pastor.

• A directora do Igape, Covadonga Toca, inaugura o II Foro de Sustentabilidade onde avoga por impulsar o binomio dixitalización – sustentabilidade para mellorar a competitividade do tecido empresarial
• Lembra que o Goberno galego activou este ano unha nova liña de axudas para desenvolver proxectos centrados nos factores ASG nas pemes, outra convocatoria do programa de apoio á transformación dixital de empresas e autónomos, ou ten en marcha unha ampla rede de aceleradoras en “ámbitos clave” da economía galega
• Destaca o compromiso da Xunta co talento e a formación, materializado en programas como o Capacita Directivos, no marco do cal se desenvolve esta xornada e que ata o de agora ten permitido realizar máis de 80 actividades formativas nas que participaron máis de 18.000 asistentes

Santiago de Compostela, 4 de xullo de 2024

A directora do Igape, Covadonga Toca, inaugurou esta mañá o II Foro de Sustentabilidade organizado por APD en Santiago, un escenario no que destacou a importancia de seguir a traballar nunha industria que se sustente na propia sustentabilidade, na innovación e no talento para garantir o futuro.

“Non temos dúbida de que o esforzo que vimos realizando no impulso á transformación dixital, agora ten que ser un binomio dixitalización – sustentabilidade”, incidiu Toca Carús, que puxo de manifesto que, deste xeito, o tecido empresarial galego mellorará a súa competitividade de cara a afrontar os “retos decisivos” que ten por diante.

Entre estes a directora do Igape apuntou á propia aceleración da dixitalización, a promoción dun modelo enerxético sustentable, a potenciación do talento e da innovación, o impulso da economía circular ou o reforzo da internacionalización. Aspectos, afondou, nos que a Xunta vén traballando desde a cooperación público-privada promovendo distintas iniciativas.

Entre elas, Toca Carús destacou unha nova liña de axudas para desenvolver proxectos para a mellora dos factores ASG nas pemes, que conta cun orzamento dun millón de euros; outra convocatoria do programa de apoio á transformación dixital de empresas e autónomos, á que se destinaron este ano 5 millóns; ou a rede de aceleradoras en “ámbitos clave” da economía galega como a automoción (BFAuto), a alimentación (BFFood), a aeronáutica (BFAero), destacando a nova aceleradora BFClimaTech que atende á sustentabilidade ambiental como forma de garantir un crecemento sustentable a longo prazo.

• A directora do Igape, Covadonga Toca, participou nun evento no marco das actuacións do programa ONCE INNOVA, onde puxo en valor a importancia de impulsar iniciativas innovadoras que sexan quen de “construír un futuro máis sostible e equitativo”
• Subliña a aposta do Goberno galego por unha innovación que actúa como motor de reforzo da modernización e diversificación da economía e polo fortalecemento dos ecosistemas de innovación en Galicia, para asegurar que sexan inclusivos e sostibles
• Destaca a nova área de innovación empresarial do Igape, centrada na creación de empresas, na transferencia de tecnoloxía ao tecido produtivo, na captación de fondos ou nas estratexias de internacionalización da innovación

Santiago de Compostela, 28 de xuño de 2024

A directora do Igape, Covadonga Toca, asistiu hoxe a un evento centrado na innovación inclusiva levado a cabo en Santiago no marco das actuación do programa ONCE INNOVA, un escenario no que avogou por unha “innovación inclusiva e sostible” capaz de “reducir fendas e mellorar a calidade de vida das persoas”.

“A innovación ten o poder de transformar a vida das persoas. Ao aproveitar o seu potencial podemos construír un futuro máis sostible e equitativo para todos”, incidiu Toca Carús, resaltando as posibilidades que as novas tecnoloxías e a aposta pola vangarda ofrece de cara a “mellorar os servizos para a poboación e garantir que ninguén se quede atrás”.

A directora do Igape resaltou o “papel crucial” que a administración pública xoga no desenvolvemento desta innovación inclusiva, deseñando e implementando políticas públicas que promovan prácticas innovadoras e sostibles, financiando con liñas de apoio e incentivos fiscais este tipo de innovación, apostando pola formación e capacitación e regulando a participación de diferentes actores no ecosistema de innovación.

“Este é o compromiso da Xunta, que traballa nestes retos desde hai anos, apostando por un ecosistema concreto, capaz de conxugar a posta en marcha de novas iniciativas coa innovación para actuar como motor de reforzo da modernización e diversificación da economía de Galicia”, afondou Toca Carús.

Neste sentido, a directora do Igape destacou a aceleradora Galicia Avanza para a internacionalización das pemes; ViaGalicia, aceleradora de proxectos innovadores que acolle propostas de todos os sectores produtivo; ou a rede galega de business factories que inclúe alimentación (BFFood), automoción (BFAuto), aeronáutico (BFAero), e a economía circular (Clima Tech).

Por último, a directora do Igape resaltou tamén a nova área de innovación empresarial do Instituto, centrada na creación de empresas, na transferencia de tecnoloxía ao tecido produtivo, na captación de fondos ou nas estratexias de internacionalización da innovación. “Esta área responde á aposta decidida pola innovación e o talento, entendidos como elementos fundamentais para impulsar unha verdadeira transformación social, capaz de mellorar as nosas condicións de vida”, sinalou.

• A directora do Igape, Covadonga Toca, asistiu á entrega do premio Peme do ano 2024 onde salientou a importancia de recoñecer o labor das pequenas e medianas empresas e a súa capacidade para promover o desenvolvemento empresarial en Galicia
• Animou ás pemes a traballar na procura de novos mercados e lembrou que nestes momentos está aberta a liña para a contratación de xestores de internacionalización, o programa de bolseiros ou o plan de misión comerciais Foexga
• Destacou a posta en marcha, este ano, da Oficina Económica de Galicia, unha canle única para a entrada das empresas á administración, facilitando información, asesoramento e acompañamento

A Coruña, 26 de xuño de 2024

A directora do Igape, Covadonga Toca, asistiu esta mañá na Coruña á entrega do premio Peme do ano 2024, un acto no que animou ao tecido empresarial galego a seguir apostando pola innovación e a internacionalización na procura de “adaptarse ás exixencias dos novos tempos e aos retos asociados co contexto que nos toca vivir”.

“Xa sexa en termos de internacionalización, de innovación e transformación dixital, de formación e emprego, ou de sustentabilidade, hai un tema común que vos une a todos, un eixo transversal que define e orienta a vosa actuación: a vontade por mellorar e crecer”, salientou Toca Carús, quen puxo en valor o papel fundamental que xogan as pemes, que representan máis do 99% do tecido empresarial.

Neste sentido, a directora do Igape salientou a importancia de recoñecer o labor das pequenas e medianas empresas e a súa capacidade para promover o desenvolvemento empresarial en Galicia. Un traballo, resaltou, no que contan co apoio da Xunta na aposta pola “innovación e as novas tecnoloxías, pola dobre  transformación dixital e sostible, pola internacionalización e, como non, polo talento”.

“O noso traballo pasa por acompañarvos no voso camiñar diario”, proseguiu a directora do Igape, quen resaltou os programas que promove o Instituto para facilitar a internacionalización e a innovación das pemes.

Así, no primeiro eido, Toca Carús lembrou que nestes momentos está aberta a liña para a contratación de xestores de internacionalización, o programa de bolseiros ou o plan de misión comerciais Foexga. Estes programas, salientou, teñen contribuído aos rexistros históricos que están a acadar as exportacións galegas, que o ano pasado superaron por primeira vez a barreira dos 30.000 millóns.

Así mesmo, Toca Carus referiuse tamén á posta en marcha, este ano, da Oficina Económica de Galicia, unha canle única para a entrada das empresas á administración, facilitando información, asesoramento e acompañamento.

“As pemes galegas sodes un exemplo de como a dedicación e o esforzo poden transformar unha rexión, impulsando non só a economía local, senón tamén mellorando a calidade de vida de todos os seus habitantes. Estou convencida de que a través dun maior esforzo en innovación, competitividade e internacionalización, e cos apoios necesarios, lograredes chegar onde vos propoñades”, concluíu.