A Escola de Organización Industrial (EOI), ICEX España Exportación e Inversións e a Asociación Española da Economía Dixital (ADIGITAL) lanzan a nova edición do programa formativo "DigitalXBorder". Un ambicioso proxecto que busca acelerar a dixitalización e a expansión internacional das pequenas e medianas empresas españolas, ofrecéndolles unha inmersión intensiva no mundo dixital con especial énfase na intelixencia artificial (IA) e nas estratexias de crecemento global.

Características do programa

O DigitalXBorder ofrece unha formación intensiva de 56 horas distribuídas ao longo de 7 xornadas. Durante estas sesións, os participantes afondarán en temas cruciais para o desenvolvemento empresarial no ámbito dixital, incluíndo a transformación dixital, a innovación, as estratexias de crecemento, a intelixencia artificial e a dixitalización responsable. Cunha orientación eminentemente práctica, o programa está deseñado para que os CEOs poidan aplicar directamente os coñecementos adquiridos, culminando coa elaboración dun plan de acción personalizado para impulsar a dixitalización e a expansión internacional das súas empresas.

Cales son os obxectivos?

A iniciativa DigitalXBorder busca mellorar a competitividade das pemes españolas nun contorno dixital en continua transformación. Entre os seus obxectivos destacan:

• Afianzar o tecido produtivo mediante a diversificación e modernización organizativa e tecnolóxica
• Proporcionar ferramentas para a toma de decisións no ámbito dixital
• Impulsar o crecemento a través das oportunidades de negocio que ofrece o ecosistema dixital

Participación

O programa recorrerá 24 cidades españolas entre 2025 e 2027. No 2025, visitará 10 cidades, entre as que se atopa A Coruña, que acollerá o programa entre o 29 de abril e o 10 de xuño. Cada sesión brindará aos participantes a oportunidade de aprender de expertos en tecnoloxía e negocios, establecer contactos estratéxicos e desenvolver un plan de acción para a dixitalización e expansión internacional das súas empresas.

Este programa está cofinanciado polo Ministerio de Industria e Turismo e o Fondo Social Europeo Plus, sendo gratuíto para os participantes seleccionados.

As empresas interesadas poden atopar máis información e inscribirse na web oficial da iniciativa: https://www.digitalxborder.com/

• O Diario Oficial de Galicia publica hoxe a convocatoria dun novidoso programa que conta cun orzamento de cinco millóns de euros e permitirá subvencionar os xuros de préstamos concedidos con fondos Next Generation EU e Xesgalicia
• A medida busca favorecer a viabilidade económica das empresas beneficiarias e incentivar a utilización destas liñas de préstamos a longo prazo máis adaptadas ás necesidades de financiamento dos proxectos
• As solicitudes poderán presentarse a partir do 14 de marzo e ata o 1 de decembro de 2025

Santiago de Compostela, 6 de marzo de 2025

O Diario Oficial de Galicia (DOG) publica hoxe a convocatoria dunha nova liña de axudas destinada a apoiar a autónomos e empresas galegas a través da subvención dos xuros dos seus préstamos. Cun orzamento de 5 millóns de euros, este programa permitirá aliviar a carga financeira das empresas e favorecer o crecemento e consolidación do tecido produtivo en Galicia.

A medida, impulsada pola Consellería de Economía e Industria a través do Igape, está dirixida ás empresas de calquera tamaño, tanto persoas físicas como xurídicas, que conten con préstamos concedidos con fondos públicos desde o ano 2020 para desenvolver proxectos empresariais en Galicia, e que desenvolvan unha actividade económica empresarial en Galicia.

Así, a liña de axudas cobre os xuros xerados entre o 1 de xaneiro de 2025 e o 31 de outubro de 2026 dos préstamos formalizados con distintas entidades, entre as que se inclúen Xesgalicia, o Instituto de Crédito Oficial (ICO) e o Banco Europeo de Investimentos (BEI). O obxectivo é facer máis accesible o financiamento a longo prazo, garantindo que as empresas poidan afrontar os seus investimentos e plans de crecemento en condicións máis vantaxosas.

A subvención concederase en réxime de concorrencia non competitiva, o que significa que todas as solicitudes que cumpran os requisitos serán atendidas ata esgotar o orzamento dispoñible. O importe máximo a recibir dependerá do volume de xuros xerados e das limitacións establecidas pola propia regulación europea.

Prazos de solicitude 

O prazo para presentar as solicitudes abrirase o 14 de marzo ás 9.00 horas e pecharase o 1 de decembro de 2025 ás 14.00 horas. Unha vez concedida a axuda, os beneficiarios poderán solicitar o seu cobro en dúas fases.

Unha primeira, que abrangue do 1 ao 15 de novembro de 2025 para os xuros xerados entre xaneiro e outubro de 2025; e unha segunda, do 1 ao 15 de novembro de 2026, para os xuros xerados entre novembro de 2025 e outubro de 2026.

Con esta medida, a Xunta reforza o seu compromiso co crecemento empresarial e a dinamización económica de Galicia, apostando por ferramentas financeiras que faciliten o acceso ao crédito e impulsen o desenvolvemento de proxectos con impacto positivo na Comunidade.

• Este programa do Igape ten por obxecto estimular a posta en marcha de proxectos de investimento empresarial para dinamizar a actividade económica na Comunidade
• Está dirixido a pequenas e medianas empresas para apoiar tanto proxectos de investimento empresarial xerais como en equipamento produtivo

As Pontes (A Coruña), 6 de marzo de 2025

A delegada territorial da Xunta en Ferrol, Martina Aneiros, ratificou esta mañá o apoio do Goberno galego ás pemes a través da nova convocatoria de axudas a proxectos de investimento empresarial do Instituto Galego de Promoción Económica (Igape) dotada de 10 M€. A responsable autonómica informou destes apoios durante a visita efectuada esta mañá á empresa Steelrent, das Pontes, beneficiaria dunha axuda de 111.750 euros no marco deste programa cofinanciado con fondos Feder.

Durante a visita na que estivo acompañada do alcalde das Pontes, Valentín González Formoso, Aneiros lembrou que o obxectivo das axudas é o de estimular a posta en marcha de proxectos de investimento empresarial en Galicia coa fin de dinamizar a actividade económica na Comunidade, a través da innovación e da creación e posta en marcha de novas iniciativas de negocio.

Esta convocatoria, dotada de 10 M€ ata 2028, está dirixida a pequenas e medianas empresas para apoiar tanto proxectos de investimento empresarial xerais, caso no que o importe do investimento subvencionables deberá ser igual ou superior a 50.000 euros;  como proxectos de investimento en equipamento produtivo -o importe subvencionable deberá ser igual ou superior a 25.000 euros-. En ámbolos dous casos o investimento non poderá superar os 800.000 euros e deberá destinarse á creación dun novo establecemento ou á ampliación da capacidade dos xa existentes.

A delegada territorial valorou o proxecto posto en marcha por Steelrent dedicado á prestación de servizos de alugueiro de maquinaria a terceiros. Concretamente, grazas á achega da Xunta dotáronse dun centro de corte e trade de chapas, dunha liña de pintura automática e dunha máquina de corte por plasma con biselado automático que alugan a terceiros na nave que teñen no polígono de Penapurreira. 

Destacou ademais a aposta da empresa por Ferrolterra, unha iniciativa aliñada coas políticas do Goberno galego e o seu compromiso cos proxectos estratéxicos previstos para a zona como os de Reganosa-EDP Renovables e Ence, nas Pontes, ou o de Forestal del Atlántico, en Mugardos.

Este programa de axudas do Igape, cuxo prazo de presentación de solicitudes está aberto ata o 30 de setembro, enmárcase no Plan estratéxico de Galicia 2022-2030 que entre outros obxectivos pretende impulsar a creación de novas empresas, a consolidación e o crecemento das existentes, a súa internacionalización e o fomento do espírito emprendedor na Comunidade autónoma.

• Trátase das axudas de acceso ao crédito para pequenas empresas, microempresas e autónomos, que convoca o Igape en colaboración coas Sociedades de Garantía Recíproca e as entidades financeiras
• Ofrece préstamos de entre 3.000 e 1 M€ para investimentos, necesidades de liquidez a longo prazo ou para a reestruturación de débedas; así como avais fronte a terceiros en operacións como contratos comerciais, licitacións internacionais ou avais técnicos
• Apunta que a convocatoria deste ano conta cun orzamento de 19 M€ e permanecerá aberta ata o 30 de setembro

A Coruña, 1 de marzo de 2025

A conselleira de Economía e Industria, María Jesús Lorenzana, salientou hoxe que a liña de acceso ao crédito para pequenas empresas, microempresas e autónomos, que convoca o Instituto Galego de Promoción Económica (Igape) en colaboración coas Sociedades de Garantía Recíproca e as entidades financeiras, beneficiou nos últimos catro anos a máis de 1.500 autónomos.

Lorenzana visitou esta mañá o restaurante coruñés Mexican Vlend, beneficiario deste programa que ofrece préstamos de entre 3.000 e 1 M€ (a entre 3 e 15 anos) para investimentos, para cubrir necesidades de liquidez a longo prazo ou para a reestruturación de débedas; así como avais fronte a terceiros en operacións como contratos comerciais, licitacións internacionais ou avais técnicos.

En concreto, apuntou que desde 2020, 4.926 empresas se levan beneficiado destes préstamos, cun orzamento total de 30,6M€. Por sectores, a maior parte das empresas e autónomos pertencen ao comercio (44,4 %), seguido da industria (30,2 %) e a hostalería-turismo (25,4 %).

A conselleira lembrou que a convocatoria deste ano, que saíu publicada no DOG o pasado 13 de xaneiro e abriu o 21 dese mesmo mes, conta cun orzamento de 19 M€ e permanecerá dispoñible ata o 30 de setembro.

• Este programa cobre tanto proxectos individuais como colectivos relacionados coa conectividade dixital, a automatización, o tratamento de datos, a ciberseguridade ou o control virtual dos sistemas loxísticos
• Nas nove convocatorias anteriores, desde 2018, rexistráronse 1.304 solicitudes con axudas que suman 26,8 M€ e un investimento mobilizado de 65,1 M€

Ames (A Coruña), 1 de marzo de 2025

A conselleira de Economía e Industria, María Jesús Lorenzana, apuntou hoxe que, ata o vindeiro venres 7 de marzo, aínda se poden solicitar as axudas que a Xunta de Galicia pon á disposición de pemes e autónomos para que poidan dotarse de mellores sistemas de conectividade dixital, automatización ou tratamento de datos, entre outros.

Lorenzana visitou hoxe as instalacións do centro deportivo Squash Santiago, beneficiario deste programa que ten aberta neste momento a súa décima edición, por un importe de 3 M€ e que cobre ata o 35 % dos investimentos para os autónomos e as pequenas empresas, e o 25 % para as medianas, mentres que para os gastos de consultaría a intensidade de subvención acada o 50 %

Esta liña de axudas abrangue tanto proxectos individuais como colectivos en ámbitos como o desenvolvemento de interfaces dixitais, a automatización ou o control virtual dos sistemas loxísticos, a ciberseguridade, a xeolocalización e sensorización, a aplicación do big data, etc.

Nas nove convocatorias anteriores, desde 2018, rexistráronse 1.304 solicitudes de autónomos e pemes, con axudas que suman 26,8 M€ e un investimento mobilizado de 65,1 M€.

Segundo dixo, a prioridade é axudar a que as pequenas e medianas empresas e ás persoas autónomas se beneficien das vantaxes que ofrecen as tecnoloxías dixitais a nivel de operatividade, eficiencia e produtividade.

• A directora do Igape, Covadonga Toca, participa na clausura do IV Encontro Nacional de EDIHs - European Digital Innovation Hubs Network onde pon en valor a importancia da colaboración entre entidades, hubs de innovación e administracións públicas para impulsar o crecemento do tecido empresarial
• Salienta que Galicia conta con dous hubs de innovación dixital estratéxicos, recoñecidos pola súa capacidade: Dihgigal, especializado na industria manufacturera e na modernización dos procesos produtivos, e DataLife, centrado na biotecnoloxía e nas ciencias da vida
• Lembra que o Igape ten activo un amplo abano de programas entre os que destacan, en innovación, o Ticket Innova, para axudar ás empresas a certificarse, mellorar o seu deseño industrial e integrar novas tecnoloxías; o Igape Innova para desenvolver produtos e servizos sostibles; e a liña IA360, para impulsar a intelixencia artificial no tecido empresarial galego

Santiago de Compostela, 26 de febreiro de 2025

A directora do Igape, Covadonga Toca, participou hoxe no IV Encontro Nacional de Hubs de Innovación Dixital, celebrado na Cidade da Cultura, onde reafirmou o compromiso da Xunta de Galicia coa innovación e a dixitalización empresarial. Durante a súa intervención, destacou a aposta do Goberno galego pola modernización do tecido produtivo e a colaboración cos Digital Innovation Hubs (DIH) para garantir a competitividade das empresas galegas nun mercado globalizado.

Toca Carús puxo en valor o papel fundamental que xogan os hubs de innovación dixital na transformación do tecido produtivo, permitindo ás empresas galegas acceder a ferramentas avanzadas en ámbitos como a intelixencia artificial, a ciberseguridade ou a sustentabilidade industrial. “A dixitalización e o desenvolvemento tecnolóxico xa non son unha opción, senón unha necesidade para garantir a competitividade das nosas empresas”, afirmou

Neste marco, a directora do Igape subliñou que Galicia conta con dous hubs de innovación dixital estratéxicos, recoñecidos polo Goberno galego pola súa capacidade para impulsar a transformación tecnolóxica das empresas galegas: Dihgigal, especializado na industria manufactureira e na modernización dos procesos produtivos, e DataLife, centrado na biotecnoloxía e nas ciencias da vida.

No eido da innovación, incidiu, o Igape ten activo un amplo abano de programas, como a liña Ticket Innova, deseñada para axudar ás empresas a certificarse, mellorar o seu deseño industrial e integrar novas tecnoloxías; o programa Igape Innova, destinado o desenvolvemento de produtos e servizos sustentables e dixitais; ou a iniciativa IA360, para o impulso da intelixencia artificial no tecido empresarial galego.

Para concluír, a directora fixo un chamamento á colaboración entre empresas, administracións e hubs de innovación. “O camiño cara á dixitalización é unha viaxe conxunta. Contamos coa tecnoloxía, cos recursos e co talento necesario para seguir avanzando. Traballemos xuntos para facer de Galicia unha referencia en innovación e competitividade”, incidiu.

Madrid, 25 de febreiro de 2025

A directora do Igape, Covadonga Toca, participou hoxe no XIX Encontro de direccións xerais do Foro ADR, organización que reúne ás Axencias de Desenvolvemento Rexional españolas, onde puxo en valor a aposta da Xunta de Galicia tanto pola innovación e a transformación dixital como pola proximidade e simplificación dos trámites administrativos na procura de seguir a mellorar a competitividade do tecido empresarial galego abrindo novas oportunidades de negocio. 

Así mesmo, a directora referiuse tamén á posta en marcha da Oficina Económica de Galicia, unha canle única para promover a desburocratización, facilitando a entrada das empresas á administración. Un Oficina que está a impulsar unha nova forma de conectar co tecido empresarial galego, achegando un asesoramento personalizado e un plan individual de apoios ás empresas, ao tempo que se simplifica o camiño e se axilizan os trámites para a posta en marcha de proxectos empresariais en Galicia.

Business Factory Aero (BFAero), a incubadora e aceleradora de empresas promovida pola Xunta de Galicia, a través do Instituto Galego de Promoción Económica (IGAPE) e XesGalicia, anunciou o lanzamento da súa 6ª edición. O programa busca impulsar solucións e tecnoloxías innovadoras nos sectores aeronáutico, aeroespacial e de vehículos non tripulados, fortalecendo o tecido empresarial galego e atraendo investimentos á rexión.

BFAero, xestionada pola Fundación CEL Iniciativas por Lugo (FCEL), ofrece aos proxectos seleccionados acceso a financiamento, espazo de traballo, networking, titorización especializada e visibilidade, entre outros recursos. Ademais, os participantes teñen a oportunidade de colaborar con empresas líderes do sector e acceder a infraestruturas clave como o aeródromo de Rozas e o Centro de Investigación Aeroportada de Rozas (CIAR).

O programa conta con 3 modalidades, adaptadas ao grao de madurez de cada proxecto:

• Incubación: Para proxectos en fase temperá, sen unha proposta de valor validada. Duración de ata 12 meses.
• Aceleración: Para proxectos cun Produto Mínimo Viable (PMV) desenvolvido e que están realizando as súas primeiras vendas. Duración de ata 8 meses.
• Consolidación: Para empresas cun produto ou servizo definido e vendas reais, que buscan escalar o seu negocio. Duración de ata 6 meses.

BFAero non só está dirixida a iniciativas promovidas por emprendedores individuais, senón tamén a ideas innovadoras que se desenvolvan dentro de empresas existentes ou con orixe en centros de coñecemento, incluindo startups, spin-outs e spin-offs.

As empresas interesadas en participar deberán inscribirse a través da páxina web bfaero.com antes do 20 de marzo de 2025.

• A nova convocatoria abriu o pasado 21 de xaneiro e permanecerá dispoñible ata o vindeiro 15 de novembro, cun orzamento de 2,8 M€
• Desde que se puxo en marcha no ano 2012, este programa de asesoramento especializado leva prestado máis de 3.000 servizos a empresas

Vigo, 22 de febreiro de 2025

A conselleira de Economía e Industria, María Jesús Lorenzana, salientou hoxe que máis de 2.000 pequenas e medianas empresas galegas xa se beneficiaron nos últimos anos do programa ReAcciona, que inclúe un catálogo de servizos para a mellora da competitividade empresarial.

A conselleira visitou esta mañá en Vigo un dos establecementos de Laguardia & Moreira, beneficiaria desta liña de apoios do Instituto Galego de Promoción Económica (Igape). Unha liña de apoios que inclúe, entre outros, servizos de asesoramento para o relanzamento comercial, para o deseño de produtos innovadores, para a optimización de procesos, a mellora da xestión financeira.

A nova edición deste ano do programa ReAcciona abriu o pasado 21 de xaneiro e permanecerá dispoñible ata o vindeiro 15 de novembro, cun orzamento de 2,8 M€ e subvencións de ata o 80 %.

Desde que se puxo en marcha no ano 2012, este programa de asesoramento especializado leva beneficiado a máis de 2.000 empresas, con máis de 3.000 servizos prestados e un orzamento executado de 14 millóns de euros.

• A directora do Instituto, Covadonga Toca, participa na clausura da xornada de lanzamento da segunda edición desta iniciativa, que se basea na colaboración público-privada e na que participan empresas tractoras, centros de investigación e fondos de investimento
• Destaca que o obxectivo é facilitar a incubación, aceleración e consolidación de proxectos innovadores no sector ambiental, garantindo que estes “conten co apoio necesario para transformar ideas en solucións reais”
• Subliña que a iniciativa enmárcase na rede de aceleradoras da Xunta que inclúe outras como a BFAuto, BFAero, BFFood ou Viagalicia que teñen permitido impulsar xa máis de 830 proxectos innovadores e crear máis de 1.400 empregos cualificados

Santiago, 21 de febreiro de 2025

A directora do Instituto Galego de Promoción Económica (Igape), Covadonga Toca, participou hoxe na xornada de lanzamento da segunda edición da aceleradora Business Factory ClimaTech, iniciativa desenvolvida coa colaboración de Viratec -Clúster Galego de Solucións Ambientais e Economía Circular- que busca consolidar Galicia como un hub de innovación en sustentabilidade e economía circular. Toca Carús destacou o impacto positivo do programa, que na súa primeira edición permitiu o desenvolvemento de proxectos con alto potencial de mercado e impacto ambiental.

Neste sentido, e como destacou a directora, ClimaTech é unha iniciativa baseada na colaboración público-privada, na que participan empresas tractoras, centros de investigación e fondos de investimento. O obxectivo, afondou, é facilitar a incubación, aceleración e consolidación de proxectos innovadores no sector ambiental, garantindo que estes “conten co apoio necesario para transformar ideas en solucións reais”.

Para acadar esta meta, explicou Toca Carús, nesta segunda edición amplíanse as prazas dispoñibles nos tres itinerarios do programa, na procura de facilitar a participación de máis emprendedores e startups.

Empresas tractoras, ciencia e investidores

Así, proseguiu a directora, nesta nova convocatoria, a aceleradora reforza a súa rede de colaboración coa incorporación de novas empresas tractoras como Emalcsa, sumándose a compañías líderes do sector como Vertex, Finsa, Viaqua, Sogama, Gestan, Coregal, Valtalia e Agroamb. Estas entidades non só actúan como patrocinadores, senón que desempeñan un papel activo no desenvolvemento dos proxectos, proporcionando mentorización, infraestruturas e apoio estratéxico.

Sobre esta base, Toca Carús puxo en valor a colaboración co mundo académico como “outro dos piares fundamentais do programa”. “O Comité Científico da BF ClimaTech xoga un papel esencial na selección e validación dos proxectos, garantindo que estes conten cunha base tecnolóxica sólida e estean aliñados cos Obxectivos de Desenvolvemento Sostible (ODS). Ademais, os emprendedores terán acceso a infraestruturas avanzadas de investigación para mellorar e testar as súa solucións”, aclarou.

Así mesmo, a aceleradora conta co respaldo de fondos de investimento privados, facilitando o acceso a financiamento, redes estratéxicas e recursos especializados que permitan a consolidación e escalabilidade dos proxectos.

A rede de aceleradoras

A BF ClimaTech, continuou a directora do Igape, forma parte da estratexia da Xunta de Galicia para o impulso do emprendemento innovador, enmarcándose na rede de aceleradoras que inclúe iniciativas sectoriais como BFAuto, BFAero, BFFood ou Viagalicia. A través da mesma Galicia ten logrado impulsar xa máis de 830 proxectos innovadores, creando máis de 1.400 empregos cualificados.

“Con esta segunda edición, Galicia reafirma o seu compromiso coa sustentabilidade, apostando pola innovación e o emprendemento innovador como motores de crecemento económico e transformación ambiental”, afondou Toca Carús, quen lembrou que o prazo de inscrición para participar na segunda edición de BF ClimaTech permanecerá aberto ata o próximo 28 de febreiro.