• A directora do Igape, Covadonga Toca, participa no evento "Diálogos Inspiradores: Tecnoloxía, Innovación e Economía Social" onde destaca os instrumentos públicos que impulsan o emprendemento tecnolóxico con impacto social, a través de financiamento, asesoramento e acompañamento integral
• Lembra que o Instituto activou este ano máis de 172 millóns de euros en axudas destinadas á innovación, dixitalización e modernización do tecido produtivo galego, das que poden beneficiarse tamén cooperativas tecnolóxicas e entidades da economía social
• Destaca o papel dos clústeres como ponte entre o coñecemento xerado nas universidades e a súa aplicación na industria

Santiago de Compostela, 25 de marzo de 2025

A directora do Igape, Covadonga Toca, participou hoxe en Santiago no foro “Diálogos Inspiradores”, un espazo de reflexión sobre o papel da tecnoloxía con impacto social no marco da economía social e cooperativa. No seu relatorio, puxo en valor o papel das startups cooperativas como modelo viable, innovador e con futuro para Galicia, e subliñou o compromiso da Xunta por reforzar o seu apoio desde todos os ámbitos institucionais.

“Queremos que os emprendedores coñezan que existen alternativas reais ao modelo empresarial tradicional, como é o cooperativismo, que combina viabilidade económica con propósito social”, asegurou. Neste sentido, destacou que, en 2025, o Igape activa máis de 172 millóns en axudas destinadas á innovación, dixitalización e modernización do tecido produtivo, das que poden beneficiarse tamén cooperativas tecnolóxicas e entidades da economía social.

A maiores, Toca Carús puxo o foco na Oficina Económica de Galicia, que definiu como “moito máis cunha fiestra única”. Así, detallou, este servizo, que ofrece unha nova forma de relacionarse co tecido empresarial, suma máis de 18.000 consultas atendidas desde a súa posta en marcha, ofrecendo acompañamento integral con máis de 100 profesionais especializados en financiamento, fiscalidade, emprendemento ou tramitación administrativa.

Durante a súa intervención, a directora do Igape defendeu que a cooperación público-privada é clave para construír unha economía tecnolóxica máis sostible, inclusiva e conectada co territorio. “Desde a Xunta traballamos man a man co sector privado para facer realidade proxectos que transformen a industria galega”, afirmou.

Neste sentido, destacou o papel dos clústeres empresariais como ponte entre o coñecemento xerado nas universidades e a súa aplicación na industria e salientou tamén o apoio aos clústeres emerxentes, en ámbitos como a saúde, a economía circular, as tecnoloxías mariñas ou a moda sustentable. “Estes espazos son especialmente útiles para as cooperativas, porque permiten achegar innovación e tecnoloxía a entidades que, pola súa dimensión, non sempre poden acceder a ela de forma individual”, explicou.

Aceleradoras, formación e modelo cooperativo

A directora do Igape lembrou que Galicia conta cunha rede de aceleradoras na que tamén se apoian proxectos cooperativos. Entre elas, destacou ViaGalicia, e salientou o modelo das Business Factories (BF), aceleradoras verticais por sectores (alimentación, automoción, aeronáutica, economía circular...), que se ampliarán en 2025 a novos ámbitos como a saúde, o deporte e as enerxías renovables.

Toca Carús concluíu sinalando que “a Galicia emprendedora que queremos é tamén unha Galicia cooperativa, verde, dixital e centrada nas persoas”: “Desde o Igape seguiremos acompañando, financiando e visibilizando proxectos que demostren que se pode innovar con propósito e compartir valor desde o primeiro día”.

• O delegado territorial lembrou que a Xunta, a través do Instituto Económico de Galicia (Igape), abriu o pasado día 21 de xaneiro, o prazo de presentación de solicitudes dunha nova edición deste programa cun orzamento de 2,8 M€
• O representante do Goberno galego explicou que os servizos teñen un carácter práctico e buscan a profesionalización da empresa, resultando clave o acompañamento e a formación ofrecidos
• Desde que se puxo en marcha no ano 2012, este programa de asesoramento especializado leva beneficiado a máis de 2.000 empresas galegas, con máis de 3.000 servizos prestados e un orzamento executado de 14 millóns de euros
• Manuel Pardo concluíu afirmando, que Ourense, como o resto de Galicia, ten que diferenciarse pola calidade dos seus produtos, e para acadar esta meta as empresas necesitan levar a cabo proxectos de mellora para dar resposta aos retos do mercado

Ourense, 24 de marzo de 2025

O delegado territorial da Xunta en Ourense, Manuel Pardo, visitou esta mañá a pastelería ‘Meraki Cakes & Food’ na cidade de Ourense, unha das 26 pequenas e medianas empresas ourensás beneficiadas do programa ReAcciona da convocatoria do ano anterior, no que a Consellería de Economía e Industria investiu preto de 107.000 euros para, a través dun catálogo de servizos, mellorar a competitividade empresarial.

O delegado territorial detallou que o servizo subvencionado neste establecemento, consistiu na optimización da produción e a cadea loxística, para que a empresa poida facer fronte ao incremento esperado na demanda, garantindo que os produtos solicitados desde todas as tendas, estarán dispoñibles na data acordada. 

Neste marco, o Manuel Pardo lembrou durante a súa visita, que a Xunta, a través do Instituto Económico de Galicia (Igape), abriu o pasado día 21 de xaneiro, o prazo de presentación de solicitudes dunha nova edición deste programa cun orzamento de 2,8 M€ , e que permanecerá activo ata o próximo 15 de novembro ofrecendo a pemes e autónomos diferentes ferramentas e servizos avanzados para ser máis competitivos.

O representante do Goberno galego detallou que esta liña de apoios inclúe 13 servizos diferentes para mellorar a competitividade empresarial, sinalando entre outros, o asesoramento para o relanzamento comercial, para o financiamento da innovación; apoio a empresas emerxentes innovadoras;  a análise do cumprimento normativo e os riscos legais (compliance); captación e xestión do talento; optimización dos procesos de produción; ou a mellora da xestión financeira e procura de financiamento.

Así mesmo, explicou que os servizos teñen un carácter práctico e buscan a profesionalización da empresa, resultando clave o acompañamento e a formación ofrecidos. Ademais recalcou, que as empresas que queiran optar a estas axudas de ata o 80% dos importes definidos para cada servizo, deberán ter un mínimo de 3 persoas traballadoras.

Desde que se puxo en marcha no ano 2012, este programa de asesoramento especializado leva beneficiado a máis de 2.000 empresas galegas, con máis de 3.000 servizos prestados e un orzamento executado de 14 millóns de euros.

Manuel Pardo concluíu afirmando, que Ourense, como o resto de Galicia, ten que diferenciarse pola calidade dos seus produtos, e para acadar esta meta as empresas necesitan levar a cabo proxectos de mellora para dar resposta aos retos do mercado a través do coñecemento externo, xunto con metodoloxías e ferramentas de traballo necesarias para promover o cambio.

• A directora do Igape, Covadonga Toca, inaugura o Startup Day da 8ª edición dunha aceleradora que ten impulsado ata o de agora 92 empresas das que preto do 70 % seguen activas, xerando arredor de 500 postos de traballo e máis 45 millóns de euros de facturación
• Destaca que o talento emprendedor “non só xera innovación, senón que tamén contribúe activamente ao crecemento económico de Galicia”
• Pon en valor outras iniciativas como a aceleradora Galicia Avanza para a internacionalización das pemes ou a rede galega de business factories que inclúe alimentación (BFFood), automoción (BFAuto), aeronáutico (BFAero), e a economía circular (Clima Tech)
• Avanza que a Xunta está a traballar para activar novas aceleradoras neste ano 2025 en ámbitos como a saúde e o benestar, a industria do deporte e as enerxías renovables

Nigrán (Pontevedra), 19 de marzo de 2025

A Xunta de Galicia reafirma a súa aposta pola innovación e o emprendemento coa consolidación de ViaGalicia como unha das aceleradoras de referencia no ecosistema empresarial galego. Así o destacou hoxe a directora do Instituto Galego de Promoción Económica (Igape), Covadonga Toca, durante a inauguración no Startup Day da 8ª edición de ViaGalicia, un evento clave que reúne emprendedores, inversores e axentes do ecosistema de innovación da comunidade.

A aceleradora, promovida pola Xunta en colaboración coa Zona Franca de Vigo, leva impulsadas ata o momento 92 empresas, das que preto do 70 % seguen activas, xerando máis de 500 postos de traballo directos e superando os 45 millóns de euros de facturación acumulada. Estes datos, subliñou Toca Carús, confirman que ViaGalicia é unha ferramenta fundamental para converter ideas innovadoras do talento galego en proxectos empresariais sólidos e competitivos.

A directora do Igape subliñou a importancia de consolidar Galicia como un territorio favorable ao emprendemento, cunha aposta clara por políticas que fomenten a creación de novas empresas, faciliten o acceso ao financiamento e impulsen a internacionalización das startups galegas.

O Startup Day de ViaGalicia é unha xornada clave dentro do proceso de aceleración, xa que permite ás startups presentar os seus proxectos ante un comité de expertos, investidores e representantes institucionais. Nesta edición, as iniciativas seleccionadas contarán cun programa de formación intensivo, acceso a mentorización especializada e posibilidade de optar a financiamento para o seu desenvolvemento.

A aposta polo emprendemento

Ademais de ViaGalicia, explicou Toca Carús, a Xunta de Galicia conta con outras iniciativas para fortalecer o ecosistema emprendedor e impulsar a competitividade das empresas galegas. Entre elas, resaltou a rede galega de business factories, que agrupa aceleradoras especializadas en sectores estratéxicos para Galicia, como BFFood, dedicada á innovación na industria alimentaria; BFAuto, que impulsa proxectos no sector da automoción; BFAero, centrada en innovación aeronáutica; Clima Tech, especializada en proxectos de economía circular e sustentabilidade.

“E xa estamos a traballar para poñer en marcha novas aceleradoras neste ano 2025 en ámbitos como a saúde e o benestar, a industria do deporte e as enerxías renovables”, afondou Toca Carús, poñendo en valor o compromiso da Xunta co desenvolvemento do talento emprendedor galego e a creación dun ecosistema empresarial dinámico, innovador e competitivo.

• Subliña que a nova folla de ruta “estará dotada de 230 millóns de euros ata 2027” para impulsar un sector “que está a vivir a súa propia revolución industrial”
• A Administración galega implantará un sistema de gobernanza para asegurar a correcta execución e seguimento do plan, garantindo a coordinación e a participación activa das diferentes entidades responsables e dos axentes económicos e sociais
• A automoción foi declarada como un dos nove sectores estratéxicos da economía galega, logo de acadar en 2023 unha cifra récord de facturación con 13.000 M€
• O presidente autonómico subliña que esta industria “concentra a máis de 200 empresas e dá emprego a 25.000 persoas”, o 14,8% do emprego industrial de Galicia
• O Goberno galego ten aberta unha liña de apoios dotada con case 60M€ para cooperar coa industria no camiño cara a unha mobilidade máis sustentable e á transición ao vehículo eléctrico
• Concorda coa Unión Europea na necesidade de adoptar medidas urxentes e cambios normativos para ampliar o acceso ás axudas a toda a cadea de valor do sector da automoción e para pedir máis simplificación administrativa, como poñen de relevo os últimos encontros mantidos en Bruxelas e Monza

Santiago de Compostela, 17 de marzo de 2025

O presidente autonómico, Alfonso Rueda, anunciou hoxe a aprobación por parte do Consello da Xunta do Plan director da automoción para o período 2025-2027, que “estará dotado de 230 millóns de euros” para impulsar un sector “que está a vivir a súa propia revolución industrial coa chegada do vehículo eléctrico”. Esta industria foi declarada estratéxica xunto coa metalmecánica, a naval, o sector forestal-madeira, a industria das TIC, a loxística industrial, a industria  da alimentación, o sector téxtil e confección e a industria da construción.

O Plan director da automoción é o resultado dun proceso participativo e colaborativo de interlocución con todo o sector, que busca promover a transformación tecnolóxica e dixital, mellorar a capacitación dos profesionais e fomentar a colaboración entre empresas, centros de investigación e administracións públicas, co fin de acompañar o sector no seu proceso de transición e fortalecer a súa competitividade futura. Desprégase en torno a dous obxectivos estratéxicos, cinco eixes e sete ámbitos de prioridades con 67 medidas que se desenvolverán ata o ano 2027 de apoio ao sector da automoción por parte das distintas consellerías da Xunta de Galicia.

Tal e como sinalou a conselleira de Economía e Industria, María Jesús Lorenzana, ao longo da execución desta folla de ruta irase “traballando arreo para ir adaptando as medidas ás novas variantes que se vaian producindo”, tanto no propio sector como no contexto nacional e internacional.

Lorenzana, que sinalou que a automoción galega está “nun momento de transformación absoluta” e nun “punto de inflexión” debido ao proceso de electrificación e descarbonización, apuntou que o apoio da Administración autonómica chega a toda a cadea de valor do sector, desde a industria de compoñentes, a través do Plan director, ata a comercialización, coa activación de diferentes medidas.

Co fin de garantir unha correcta  execución do plan, a Administración galega implantará un sistema de gobernanza para asegurar a correcta execución e seguimento do plan, garantindo a coordinación e a participación activa das diferentes entidades responsables e dos axentes económicos e sociais. Deste xeito, está prevista a posta en marcha dunha Comisión Sectorial da Automoción, na cal estarán representados os diferentes axentes do sector e se constituirán grupos de traballo en que participarán os diferentes departamentos autonómicos que tomaron parte na elaboración do plan. O obxectivo é implementar un sistema de control e análise continua do impacto das medidas no sector.

Un sector estratéxico para Galicia

A automoción en Galicia representa un dos sectores máis dinámicos e fundamentais para a economía galega, xa que, tal e como subliñou Rueda, conta con “máis de 200 empresas e 25.000 persoas que dependen directamente do sector”. Desde a súa orixe, este sector foi un motor de desenvolvemento económico e tecnolóxico na Comunidade, que xera un impacto significativo no emprego e na competitividade da industria.

Na actualidade, a Administración galega ten activada unha liña de apoios por importe de case 60 millóns de euros con que o Goberno galego busca dar continuidade ao programa iniciado no ano 2024 e que contou con 22 millóns de euros, para reforzar a  cooperación co sector no seu tránsito cara á modernización e á sustentabilidade, e reafirmar o seu compromiso cunha industria clave para a economía galega.

Este novo programa de apoios impulsado desde o Igape estrutúrase arredor de tres grandes eixes. O primeiro atende á transición ao ecosistema de mobilidade eléctrica e conectada, co obxectivo de facilitar aos provedores locais a adaptación cara á produción de compoñentes relacionados coa nova mobilidade verde e conectada, impulsando a súa competitividade no mercado internacional.

O segundo eixe céntrase na descarbonización dos procesos produtivos e loxísticos. Neste sentido, o plan prevé investimentos destinados a transformar as operacións industriais e loxísticas, reducindo a súa pegada ambiental e incrementando a eficiencia dos procesos.

O terceiro atende á adopción de modelos de green factory, na procura de facilitar a transformación integral das plantas industriais galegas para lograr a neutralidade climática, apostando por tecnoloxías innovadoras e sustentables.

Así, o Goberno galego destinará máis de 234 millóns de euros ao sector da automoción no período 2024-2027 no marco do plan director e do programa extraordinario de axudas dirixidas a esta industria, para acompañalo no proceso de transición á mobilidade eléctrica.

En sintonía coa Unión Europea

Tal e como explicou María Jesús Lorenzana, a importancia de fortalecer un sector estratéxico como o da automoción a través de medidas como a aprobada hoxe no Consello da Xunta é unha das demandas que a Administración galega vén reclamando desde hai tempo tanto a nivel nacional como internacional. A última, a pasada semana coincidindo coa presentación do plan de actuación que a Comisión Europea anunciou para o sector da automoción e que o Goberno galego valorou de xeito positivo. 

Neste contexto, a Xunta reclamou en Bruxelas, como antes o fixera en Monza, na III Conferencia anual da Alianza de Rexións Europeas con Industria da Automoción (ARA) e, hai apenas unhas semanas, nun encontro co comisario de Mobilidade Sustentable e Turismo da Comisión Europea, Apostolos Tzitzikostas,  unha actuación firme e decidida sobre catro ámbitos que son clave para o sector: o primeiro, o normativo, ao considerar indispensable que se flexibilicen os regulamentos de emisións; tamén que se dean prazos máis amplos, como se vén de anunciar, así como que se revisen as sancións impostas ás empresas, e cambios na normativa comunitaria para ampliar o acceso ás axudas a toda a cadea de valor e máis simplificación administrativa.

Oleiros (A Coruña), 16 de marzo de 2025

A conselleira de Economía e Industria, María Jesús Lorenzana, subliñou esta mañá a calidade, competitividade e transversalidade do contract en Galicia. Un sector do que destacou á súa aposta pola innovación e a sustentabilidade e que está integrado por máis dun centenar de empresas galegas que, coa súa presencia en 100 países, levan a marca Galicia por todo o mundo.

A titular de Economía e industria visitou o Boutique Hotel Noa en Santa Cruz de Oleiros, un espazo que para Lorenzana é un bo exemplo das cualidades do contract galego e que amosa as últimas tendencias do sector en sustentabilidade, eficiencia enerxética, ecodeseño, ecoinnovación ou novos materiais.

• A conselleira de Economía e Industria, María Jesús Lorenzana, visitou hoxe as instalacións da compañía UARX Space en Nigrán

Nigrán (Pontevedra), 14 de marzo de 2025

A conselleira de Economía e Industria, María Jesús Lorenzana, destacou hoxe as “inmensas posibilidades” do sector aeroespacial en Galicia e animou ás empresas a apostar máis que nunca por esta industria.

Lorenzana visitou esta mañá as instalacións da compañía UARX Space en Nigrán, unha das 10 empresas, segundo a NASA, máis innovadoras no mundo do desenvolvemento de tecnoloxía para naves espaciais pequenas. 

Neste sentido, explicou que UARX Space “fai un traballo único” en loxística espacial, no desenvolvemento de dispositivos e servizos necesarios para o lanzamento e despregamento en órbita de satélites, e isto “tamén fai a Galicia única”, subliñou. “É un orgullo que a nosa Comunidade poida presumir de tanto talento nun sector tan prometedor”, engadiu.

Na visita tamén puxo en valor o traballo xa feito en Galicia co Polo Aerosespacial e animou a “apostar máis ca nunca” por este sector que no ano 2023 incrementou un 25% o seu nivel de facturación e un 5% o de empregos.

• A conselleira de Economía e Industria, María Jesús Lorenzana, participou esta tarde na inauguración do XXXIV Salón do Automóbil Vigo 2025
• Apunta que recolle axudas de 234 M€ dos cales 75 M€ son apoios directos de fondos propios da Xunta para todas as empresas que conforman a cadea de valor do sector en Galicia

Vigo, 12 de marzo de 2025

A conselleira de Economía e Industria, María Jesús Lorenzana, anunciou hoxe que o Consello da Xunta do vindeiro luns aprobará definitivamente o Plan director da automoción, con axudas de 234 M€ dos cales 75 M€ son apoios directos de fondos propios da Xunta para todas as empresas que conforman a cadea de valor deste sector en Galicia.

Lorenzana participou esta tarde na inauguración do XXXIV Salón do Automóbil Vigo 2025, onde sinalou que a automoción representa un 15 % do emprego industrial da Comunidade e reiterou a compromiso da Xunta con esta industria.

Ao respecto, lembrou que o Goberno galego leva tempo demandando no seo da Comisión Europea medidas de flexibilización como as que recolle o novo plan europeo da automoción aprobado a pasada semana, que a Xunta apoia, dixo, pero que debe implantarse “de xeito áxil, que é o que necesita agora mesmo todo o sector”.

Neste eido, proseguiu, “a Xunta defende unha transición xusta que teña en conta os empregos, a formación das persoas, a transformación que teñen que facer as industrias” pero, tamén, aos consumidores finais, dixo como marco á celebración deste salón, a cuxos organizadores felicitou “porque foron quen de sumar e de facer máis grande esta feira” que exhibe “o que representa Vigo e Galicia en materia de automoción”, concluíu.

O martes 25 de marzo celebrarase o evento titulado "Estratexias Dixitais para a Competitividade Internacional de Galicia - Norte de Portugal", unha iniciativa que se desenvolve no marco do proxecto Digital CoLogistics.

A xornada, que terá lugar na Autoridade Portuaria de Vilagarcía de Arousa a partir das 17:00 horas, reunirá a expertos e profesionais do sector loxístico para abordar os retos e oportunidades que enfronta a rexión no ámbito da loxística internacional.

Programa do Focus Group

O encontro comezará cunha benvida e contextualización xeral a cargo de Ramon Tubio, quen introducirá o obxectivo do Focus Group e a súa conexión co proxecto Digital CoLogistics. A continuación, abordarase o tema central: o posicionamento internacional do sector loxístico galego.

A parte central do evento consistirá nunha discusión interactiva sobre os principais retos e oportunidades do sector, centrándose en aspectos clave como:

• Infraestrutura e conectividade intermodal
• Dixitalización e competitividade
• Colaboración e comercio transfronteirizo
• Barreiras regulatorias
• Novos nichos e estratexias

O Focus Group concluirá cunha síntese das principais conclusións, seguida dun espazo para networking entre os participantes.

• Sinala que esta compañía “engloba toda a cadea de valor da propia fabricación pero tamén da innovación e a comercialización”
• Pon valor o labor de Xesgalicia, brazo investidor do Igape, “co que imos acompañando ás empresas para facelas medrar”
• Lembra que para este 2025 Xesgalicia conta con 140 millóns de euros dispoñibles para investimentos “dos que prevemos utilizar máis de 20 millóns”, di

O Porriño (Pontevedra), 11 de marzo de 2025

A conselleira de Economía e Industria, María Jesús Lorenzana, destacou hoxe o papel da Xunta como canle alternativa de financiamento para apoiar fortalecemento das empresas galegas.

Lorenzana visitou esta mañá as instalacións do grupo Zendal con máis de 30 anos de traxectoria e que, segundo dixo “pon enriba da mesa o valor que a industria da biotecnoloxía en Galicia”. Ademais, tal e como explicou, “engloba toda a cadea de valor da propia fabricación pero tamén da innovación e o desenvolvemento previo e a comercialización”.

Durante a visita, a conselleira puxo en valor o labor de Xesgalicia, “o brazo investidor do Igape” e sinalou que “precisamente esta empresa é un exemplo de como a colaboración e a participación de Xesgalicia foi capaz de acompañar a esta compañía ata converterse no grupo empresarial que é na actualidade”.

Neste sentido, a titular de Economía e Industria, subliñou que a día de hoxe, Xesgalicia conta cun volume  de investimento de preto de 500 millóns de euros en 520 operacións aprobadas (entre participacións en capital e préstamos participativos) en máis de 300 empresas. “Imos acompañando a estas empresas para facelas medrar e para converternos desde o primeiro momento en socios e colaboradores, e nunha alternativa ao financiamento privado”, subliñou.

Finalmente, explicou que no 2025 Xesgalicia conta con 140 millóns de euros dispoñibles para investimentos “dos que prevemos utilizar máis de 20 millóns”, dixo, ao que hai que engadir tamén que, para este ano, os apoios do Igape ás empresas en materia de financiamento superan os 150 millóns de euros, cun incremento do 45%, o orzamento máis alto dos últimos cinco anos.

O Grupo Zendal

Zendal é a marca corporativa do grupo biotecnolóxico enfocado na investigación, o desenvolvemento, a fabricación e a comercialización de vacinas e outros produtos farmacéuticos de alto valor engadido para a saúde. Neste momento conta con tres centros de I+D e diversas plantas de produción farmacéutica nos seus laboratorios do Porriño, León, Barcelona, e Paredes de Coura en Portugal.

Nos últimos cinco anos, Zendal investiu máis de 100 millóns de euros para fortalecer o seu liderado no sector da saúde. Este esforzo materializouse nun importante investimento en I+D para o desenvolvemento de vacinas para a saúde humana e animal, a construción de novas instalacións biofarmacéuticas con capacidade produtiva a grande escala, así como tamén na adquisición de dúas compañías do sector.

Grazas a isto, a capacidade produtiva en viais de vacinas medrou un 1.480 % consolidando o compromiso de Zendal coa saúde global e a produción farmacéutica de vacinas.

• Na Coruña, Compostela e Vigo, con visitas a espazos tecnolóxicos clave, xuntanzas e actividades de networking con empresas socias
• Supón unha excelente oportunidade para amosar o potencial tecnolóxico galego e establecer pontes de colaboración para posicionarse a nivel global

Santiago de Compostela, 11 de marzo de 2025.- O Clúster TIC Galicia organiza, dende o 11 ata o 13 de marzo, unha misión comercial inversa na que participan quince empresas de carácter innovador, organismos de transformación dixital e entidades financeiras procedentes de Latinoamérica e Estados Unidos.

A xornada de traballo comeza hoxe cunha visita a Abanca e a inauguración oficial no Centro de Servizos Avanzados (CSA) da Cidade das TIC a cargo do presidente do Clúster TIC Galicia, Antonio Rodríguez del Corral. O responsable amosará aos visitantes o propio centro e, posteriormente, os socios da entidade terán a oportunidade de reunirse con carácter individual cos diferentes convidados.

A axenda continuará mañá en Santiago de Compostela e o xoves en Vigo, con visitas a espazos tecnolóxicos clave, como o CESGA, Gradiant ou o CTAG, encontros e actividades de networking con empresas socias do Clúster TIC Galicia. O obxectivo é estreitar lazos comerciais coas organizacións, ademais de amosarlles os avances tecnolóxicos máis destacados da nosa rexión.

Entre os organismos convidados figuran Totalplay (México), empresa de telecomunicacións que ofrece servizos de televisión por cable, internet de fibra óptica e telefonía fixa en México e Colombia; EMCALI (Colombia), que tamén opera en áreas clave como as telecomunicacións, en cuxa representación estará Kevin Estivens, responsable de tecnoloxía, que desempeña un papel clave na infraestrutura tecnolóxica da entidade; ou Grupo Energía de Bogotá (Colombia), que subministra enerxía eléctrica e gas natural en Colombia, Perú, Brasil e Guatemala, co seu asesor de Datos de Analítica, Gustavo Alberto Angulo.

Así mesmo, estarán Ximena Duque, presidenta executiva da Federación Colombiana de Software e Tecnoloxías (Fedesoft), con máis de 500 afiliados e 30 anos de traxectoria; e o viceministro de Innovación e Tecnoloxía do Ministerio de Innovación da República Dominicana, Armando José Manzueta Pena.

No ámbito da transformación dixital, o Clúster TIC Galicia contará coa presenza de Edgar Ariel Rodríguez, director de Modernización e Desenvolvemento Institucional do Órgano Xudicial de Panamá, encargado da administración de xustiza no país; Adolfo José Fábrega, Administrador Xeral da Autoridade Nacional para a Innovación Gobernamental (AIG) de Panamá, cuxa función principal é impulsar a transformación dixital do sector público no país; e Marva Roxana Dalby, xerente de Sistemas Funcionais da Autoridade do Canal de Panamá, responsable da operación, administración, mantemento e modernización do propio Canal.

En canto ás entidades financeiras, participarán Juan Ramón Anria, xerente de Seguridade Dixital e Ciberseguridade da Caixa de Aforros de Panamá; diferentes representantes do Banco Interamericano de Desenvolvemento-BID (EE. UU.), que ofrece apoio financeiro e técnico a gobernos nacionais e subnacionais, así como outras entidades de América Latina e o Caribe; e Mónica María Gómez, vicepresidenta de ASOBANCARIA (Colombia), gremio que agrupa ao sector financeiro colombiano, promovendo o seu desenvolvemento, eficiencia, modernización e seguridade.

Esta acción, que conta coa colaboración do Igape, supón unha excelente oportunidade para amosar o potencial tecnolóxico galego, a través de solucións innovadoras en áreas como a intelixencia artificial, a ciberseguridade, a dixitalización industrial ou o IoT. Ademais, permitirá establecer posibles pontes de colaboración que contribúan ao fortalecemento da competitividade e a innovación tecnolóxica a nivel global.

Sobre o Clúster TIC Galicia

O Clúster TIC Galicia é unha asociación sen ánimo de lucro integrada por 145 socios, entre grandes empresas (15), pequenas empresas (125) e centros tecnolóxicos, colexios e asociacións profesionais (5), que supoñen unha facturación conxunta de 1,17 millóns de euros e arredor de 19.000 traballadores.

O seu obxectivo, dende a súa fundación en 2008, é impulsar a colaboración e sinerxias entre empresas, administracións e institucións para incrementar a competitividade, a transformación tecnolóxica, saída a novos mercados e favorecer o cambio de modelo produtivo cara a unha economía baseada na innovación, capaz de crear riqueza e emprego de calidade.