• O director do Igape, Fernando Guldrís, visitou Lau Creaciones, empresa de Santiago de Compostela dedicada á comunicación gráfica que, grazas ao programa Galicia Inviste, adquiriu unha nova prensa dixital que lle permite competir en prezo, calidade e capacidade produtiva no mercado actual.
• Salientou a importancia deste programa que, na liña destinada a equipamentos produtivos, permitiu pór en marcha nun só exercicio máis dunha ducia de proxectos que mobilizaron 4,6 M€ na provincia.
• Subliñou a importancia deste e outros programas que facilitan a mellora competitiva do tecido produtivo, como a liña de economía circular, que ten aberta unha nova convocatoria que suma 1,5 M€.

O director do Instituto Galego de Promoción Económica (Igape), Fernando Guldrís, visitou hoxe as instalacións da empresa Lau Creaciones, onde puxo en valor a importancia que ten para a mellora competitiva das pemes locais programas como Galicia Inviste, que facilitan o investimento empresarial permitindo novos proxectos, a diversificación de produtos e a mellora das liñas de produción xa existentes.

Neste sentido, expuxo Guldrís, Lau Creaciones “é un bo exemplo” das posibilidades que ofrecen esta e outras liñas impulsada pola Vicepresidencia primeira e Consellería de Economía, Industria e Innovación a través do Igape. “Neste caso concreto, o programa contribuíu á adquisición dunha nova prensa dixital que lle permite á empresa competir en prezo, calidade e capacidade produtiva no mercado”, subliñou.

Neste contexto, o director do Igape lembrou outros programas xa en marcha e con períodos de solicitude abertos, como os obradoiros de dixitalización, sustentabilidade e loxística avanzada, que promoven proxectos de colaboración máis avanzados e de maior significación cara aos retos principais da economía; ou a liña de Economía Circular, cuxa nova convocatoria suma 1,5M€ para apoiar modelos de negocio circulares mediante a optimización de recursos, a redución no consumo de materias primas e o aproveitamento dos residuos.

• O delegado territorial, Javier Arias, visitou as instalacións de A Vida 013, que está a introducir un sistema integrado de xestión para o mellor control de todas as operacións de produción e administración.

A Xunta de Galicia destina 435.100 euros a 18 pemes   lucenses para a incorporación de proxectos de dixitalización co apoio da Vicepresidencia primeira e Consellería de Economía, Industria e Innovación a través do Instituto Galego de Promoción Económica (Igape). O programa Dixitalización Industria 4.0 pretende impulsar a transformación da industria tradicional cara a modelos tecnolóxicos avanzados, favorecendo modelos de negocio diferenciais baseados na innovación e na tecnoloxía.

O delegado territorial de Lugo, Javier Arias, visitou hoxe no polígono industrial do Ceao as instalacións da empresa A Vida 013, unha das beneficiarias, que se dedica á realización de todo tipo de revestimentos, deseño de interiores e decoración. Conta con varios centros de traballo en Lugo, que acollen a arredor de 150 traballadores e traballadoras.

A firma está a implementar un sistema integrado de xestión para dar soporte aos procesos de compra, fabricación, distribución, facturación, requirimentos legais ou xestión contable. Deste xeito, logran un mellor control de todas as operacións.

Arias destacou o crecemento experimentado por esta empresa nos últimos anos e o feito de que “se apoie na innovación para continuar ampliando os seus horizontes e xerando postos de traballo en Lugo”. Neste sentido, lembrou que estas axudas do Igape “tratan de estender o impacto positivo da innovación baseada na transformación dixital a todas as empresas galegas, en especial ás pemes”.

12 das empresas beneficiarias teñen a sede social no municipio da capital, e as demais están situadas en Sarria, Rábade, Portomarín, Chantada, Begonte e Alfoz. Entre todas suman un investimento apoiado de 1,2 millóns de euros.

O delegado territorial gabou o esforzo que realiza o tecido produtivo da provincia, e subliñou que a substitución de procesos manuais por procesos dixitais supón un aforro en tempo e produtividade e achega información máis fiable para a toma de decisións, co conseguinte incremento da competitividade.

Ás 10 horas do día 14 de marzo de 2023 terá lugar na sala de xuntas do Instituto Galego de Promoción Económica (Igape), situado no Edificio Administrativo Igape no barrio de San Lázaro en Santiago de Compostela, ante a mesa presidida pola xerente, coa asistencia dun letrado da Asesoría Xurídica, un representante da Intervención Xeral, un representante da Secretaría Xeral Técnica e do Patrimonio da Consellería de Facenda e Administración Pública e un/a empregado/a público/a da Subdirección de RR.HH. e Xestión Administrativa do IGAPE, que actuará como secretario/a, a poxa pública dos bens inmobles patrimoniais do Instituto Galego de Promoción Económica que se describen a seguir e dos que foi acordado o seu alleamento mediante resolución do director xeral do 3 de xaneiro de 2023.

• Descarga | Prego de condicións.
• Consulta | Resolución do director xeral do Igape.
• Consulta | Anuncio do Igape.

• Reclama “unidade” para saldar as “débedas” coa Comunidade e “apoio” ás empresas que crean riqueza.
• Pon a Delta Vigo como exemplo de emprendemento que contribuíu a facer cidade coa súa traxectoria en sectores fundamentais para Vigo e para Galicia como a conserva, o naval, a automoción e, nas últimas décadas, o aeroespacial.

O presidente da Xunta, Alfonso Rueda, aposta pola colaboración público-privada para sacar proveito das oportunidades que se lle presentan a Galicia. Fíxoo hoxe en Vigo, onde interveu nos actos de celebración do 75 aniversario do Grupo Delta Vigo, aos que acudiu acompañado polo vicepresidente primeiro e conselleiro de Economía, Industria e Innovación, Francisco Conde, e pola delegada territorial da Xunta en Vigo, Marta Fernández-Tapias. 

Alfonso Rueda puxo a Delta Vigo como exemplo de emprendemento que contribuíu a facer cidade coa súa traxectoria en sectores fundamentais para Vigo e para Galicia, como a conserva, o naval, a automoción e, nas últimas décadas, o aeroespacial. Desde un pequeno taller en Teis na década dos 40, a firma foi medrando na fabricación de compoñentes para sectores industrias estratéxicos, e ademais de ser a primeira empresa da aeronáutica de capital cen por cen galego, apostou sempre polo I+D+i e pola internacionalización do seu produto. O presidente da Xunta subliñou que se trata dunha firma “punteira en sectores competitivos a nivel mundial”, unha empresa galega que segue en mans da familia que a fundou e que ofrece “riqueza, emprego e esperanza” a moitos galegos e galegas. 

O mandatario galego subliñou que a Xunta estará sempre preto de quen axude a crear riqueza e a mellorar a calidade de vida da poboación, de aí que garantira o apoio do Goberno galego ao desenvolvemento dos sectores cos que traballa Delta Vigo, como fixo sempre que a empresa precisou da colaboración da Administración autonómica para a posta en marcha de diferentes proxectos. “Cando medran as empresas, medran os territorios”, apuntou. 

Rueda reclamou “unidade” da sociedade para salvar a “débeda” coa Comunidade e “apoio” ás empresas que, como Delta Vigo, crean riqueza e contribúen no desenvolvemento dun territorio. Nese sentido, chamou a atención sobre as oportunidades que ofrecen os fondos europeos e puxo como exemplo o cumio celebrado a semana pasada para reclamar, xunto con Asturias e Castela e León, as infraestruturas que precisa o noroeste peninsular. Reiterou, por unha banda, a necesidade de que a automoción galega conte con ditos fondos, e que as achegas habilitadas para o Perte naval cheguen aos seus destinatarios. 

Plan estratéxico do Polo Aeroespacial de Galicia 2021-2025

• Os directores do Igape, Fernando Guldrís, e de XesGalicia, Rubén Aguión, manteñen un encontro con membros do equipo directivo de Enisa (Empresa Nacional de Innovación).
• Destacan a nova Axenda Startups que busca crear un centenar de novas empresas e acelerar 200 startups entre este ano e o que vén.
• “Queremos alentar o talento innovador, dando continuidade a proxectos como as business factories, que sumarán novos campos”, salienta Guldrís.

O director do Igape, Fernando Guldrís, e o director de XesGalicia, Rubén Aguión, acompañados pola subdirectora de Investimentos e Startups do Igape, Fany Suárez, mantiveron hoxe un encontro con Jordi García, director de Fomento do Ecosistema Emprendedor de Enisa (Empresa Nacional de Innovación, S.A.), e Juan Manuel Garrido, director de Operacións, no que afondaron na importancia de impulsar un ecosistema que mesture talento e innovación para mellorar a competitividade do tecido empresarial.

A xuntanza permitiu poñer en valor a cooperación entre administracións na procura de configurar o mellor ecosistema posible sobre a base da innovación, a dixitalización e a sustentabilidade, atraendo talento e capital internacional. Neste contexto, o director do Igape sinalou que “impulsar o talento e a innovación é impulsar a mellor versión de Galicia”, defendendo a importancia de “tomar a creatividade e o talento como punto de partida, e a tecnoloxía como ferramenta clave”.

Sobre estes eixos, expuxo, susténtase a Axenda Startups de Galicia, coa que o Goberno galego aspira a crear un centenar de novas empresas e acelerar 200 startups durante este ano e o que vén, promovendo desde xeito un ecosistema innovador con capacidade para mellorar a competitividade do tecido produtivo.

“Queremos alentar o talento innovador, dando continuidade a outros proxectos como as business factories, que sumarán novos campos como foodtech, biotech, healthtech, edtech, climatetech, loxística ou as cadeas de subministracións”, salientou Guldrís.

Deste xeito, complementarase a rede de aceleradoras actual, que inclúe as business factories de alimentación (BFFood), automoción (BFAuto), aeronáutica (BFAero) ou novos fármacos (BFMedicine); a High Tech Auto, incubadora de alta tecnoloxía no sector da automoción que completa á propia BFAuto; ou a incubadora de alta tecnoloxía en biotecnoloxía (BioIncubaTech).

• Resaltou que este proxecto impulsará a consolidación de Galicia como “referente en materia de biotecnoloxía”.
• Explicou que, cun investimento de 33 M€ na fase inicial, as instalacións localizaranse no polígono industrial O Reboredo e terán como obxectivo a fabricación, produción, acondicionamento e a distribución loxística de produtos estériles farmacéuticos líquidos en diferentes formas de acondicionado.
• O proxecto complementa a cadea de valor do sector da biotecnoloxía, industria estratéxica na Comunidade Autónoma e está aliñado coa Estratexia de especialización intelixente (RIS3) de Galicia.
• O acordo do Consello da Xunta enmárcase dentro da filosofía da Lei de simplificación administrativa, potenciando a captación de investimentos e a xeración de emprego de calidade, e mantendo todas as garantías xurídicas durante a tramitación do proxecto.
• Ata o de agora, son 18 iniciativas as que se adheriron a esta figura en Galicia, cunha mobilización global de 1275 M€.

O presidente da Xunta, Alfonso Rueda, anunciou hoxe que o Consello declarou como iniciativa empresarial prioritaria o proxecto de Indukern para impulsar a instalación dunha planta de fabricación de inxectables en Monforte de Lemos. Deste xeito, dase un paso máis para “contribuír a consolidar Galicia como un referente en materia de biotecnoloxía”.

Rueda resaltou que nesta nova planta “fabricaranse medicamentos de uso humano” e albergará tamén un laboratorio de I+D+i para deseñar “futuros fármacos”. En concreto, cun investimento de 33 M€ na fase inicial e 59,4 M€ en total, o novo centro destinarase á fabricación, produción, acondicionamento e distribución loxística de produtos estériles farmacéuticos líquidos en diferentes formas de acondicionado como ampolas, viarias e xiringas precargadas dependendo do seu uso e tipoloxía de produto.

Elaboraranse medicamentos e realizaranse procesos de apoio como servizos asociados á produción, loxística e administración. O proxecto iniciarase cunha liña de produción de inxectables e coa posibilidade de expansión a catro liñas máis de produción. Tamén se incluirán oficinas para o control da propia planta e laboratorios de análise e desenvolvemento de I+D+i para futuros fármacos, polo que se aliña coa Estratexia de especialización intelixente (RIS3) de Galicia complementando a cadea de valor do sector da biotecnoloxía, unha industria estratéxica na Comunidade Autónoma.

O proxecto cumpre cos requisitos para recibir esta declaración, en concreto supera o volume de investimento mínimo fixado nun millón de euros (serán 33 M€ na primeira fase e 59,4 en total); a creación de 62 empregos na primeira fase; así como complementar cadeas de valor ou pertencer a sectores estratéxicos como é, neste caso, a biotecnoloxía.

Esta declaración enmárcase dentro da filosofía da Lei de simplificación administrativa que supón, na práctica, a redución á metade dos prazos de tramitación para levar a cabo un proxecto, ratificando igualmente todas as garantías xurídicas durante o procedemento. Así, poténciase a captación de investimentos para Galicia e a creación de emprego de calidade.

Deste xeito xa son 18 as iniciativas empresariais prioritarias declaradas e lideradas por Cortizo (Padrón), Albo (Salvaterra de Miño), Oviganic (Monforte de Lemos), Sogama (Vilanova de Arousa), Ignacio González Montes (Ribeira), Bionerxías de Lugo e Sarreaus (Ourense), Novafrigsa (Lugo), Agroamb Prodalt (Castro de Rei), Hornos de Lamastelle (Carballo), Armonía Green Galicia (A Coruña), Cafés Candelas (Lugo), Bioenergía A Coruña (A Laracha), Valogreene Recinor (As Somozas), Green Umia (Caldas de Reis), Green Meiga (Begonte), Naturgy Nuevas Energías (en Meirama, Cerceda) e Kern Pharma (Monforte de Lemos).

“Estas 18 iniciativas contan cuns investimentos previstos de 1.275 M€”, indicou Rueda. Polo tanto, esta figura busca potenciar novas oportunidades empresariais e laborais en Galicia con máis simplificación administrativa; máis incentivos fiscais ás empresas; e máis facilidades para acceder ao solo empresarial.

A declaración de proxectos empresariais como prioritarios implica tamén a concorrencia de razóns de interese público para tramitar de maneira urxente os procedementos administrativos, así como o seguimento e impulso dos trámites posteriores necesarios por parte da Xunta de Galicia para contribuír á eliminación de barreiras á actividade empresarial.

• O vicepresidente primeiro e conselleiro de Economía, Industria e Innovación, Francisco Conde, participou na presentación en Ferrol desta iniciativa, que se desenvolve en colaboración con Pymar.
• Aposta por que o naval galego traballe conxuntamente desde o punto de vista industrial e tecnolóxico, e impulsando proxectos de innovación vinculados coa dixitalización e a sustentabilidade, ademais da diversificación.

O vicepresidente primeiro e conselleiro de Economía, Industria e Innovación, Francisco Conde, subliñou hoxe na presentación en Ferrol da oficina Conecta Naval que a Xunta impulsa esta iniciativa co obxectivo de posicionar Galicia e poñer de relevo o papel que merece a industria galega do naval no reparto dos fondos europeos Next Generation.

Conde destacou que se busca que toda a cadea de valor traballe de forma conectada, colaborando entre si e contando co apoio da Xunta e de Pymar para o desenvolvemento de proxectos que poidan optar aos fondos do Perte naval. Así, apostou por que o naval galego traballe conxuntamente desde o punto de vista industrial e tecnolóxico, e impulsando proxectos de innovación vinculados coa dixitalización e a sustentabilidade, ademais da diversificación en eidos como o da eólica mariña.

O vicepresidente económico lembrou que hai moito tempo que se está a traballar nestes ámbitos, a través por exemplo de Cesena e Navantia, e tamén no eido da formación e na captación e retención de talento cualificado co obxectivo de impulsar a competitividade do sector. Neste contexto, apuntou que agora existe a posibilidade de reforzar e consolidar ese liderado a través dos investimentos que se poidan vincular ao Perte do naval.

Ata o vindeiro 28 de febreiro está aberto o prazo para presentar candidaturas a esta convocatoria. O obxectivo é que Galicia como comunidade autonómica con máis empresas do sector (preto de 300 en todos os segmentos de actividade) teña un papel significativo.

Tal e como subliñou Conde na reunión, á que asistiron entre outras entidades Aclunaga e Asime, a través de Conecta Naval búscase que as empresas independentemente do seu tamaño teñan a oportunidade de incorporarse a algún dos proxectos primarios que se están traballando por parte de Pymar e a partir de aí que teñan ese soporte tamén da Xunta de Galicia.

• Salienta que as políticas da Xunta ofrecen “estabilidade e seguridade” ao sector, o que permiten impulsar a internacionalización do tecido empresarial galego.
• Destaca que máis de 2.000 firmas galegas xa exportan os seus produtos a América Latina e anima a seguir este camiño de colaboración: “Isto sen dúbida, débese ao bo traballo dos empresarios”, salientou.
• A Xunta conta con diferentes iniciativas para impulsar a presenza das empresas no exterior como a Estratexia de Internacionalización 2021-2025 que contempla diferentes liñas de axudas.

O presidente da Xunta, Alfonso Rueda, resaltou esta mañá que os bos indicadores económicos de Galicia, como o novo récord histórico de exportacións en 2022 ou a previsión de crecemento dun 3,6 %, acreditan o potencial da Comunidade para reforzar os lazos comerciais con Iberoamérica. Ademais, destacou que o Goberno galego aposta por políticas que dean “estabilidade e seguridade” ao tecido empresarial, o que redunda nunha maior internacionalización do sector.

Durante un almorzo organizado polo Consello Empresarial Alianza por Iberoamérica (CEAPI) e o Círculo de Empresarios de Galicia en Vigo, Rueda subliñou que, desde a pandemia, a economía galega está a presentar un mellor comportamento que a española no seu conxunto. Nesta liña, destacou a suba dun 2,5 % do PIB durante o último trimestre do 2022; os máis de 27.400 millóns de euros acadados en exportacións ata novembro -e que xa superan o total de 2021-; ou que Galicia sexa a terceira Comunidade con menor ratio de débeda por habitante e a segunda que paga con máis axilidade as súas facturas.

Rueda subliñou que xa hai máis de 2.000 empresas galegas que exportan os seus produtos a Iberoamérica e agradeceu o papel crucial que as asociacións de empresarios de orixe galega ou o propio CEAPI desempeñan no impulso e mellora das relacións comerciais coa Comunidade. “Isto, sen dúbida, débese ao bo traballo dos empresarios”, asegurou.

Neste senso, animou a seguir polo camiño da colaboración, que facilitou que América Latina destaque como un mercado fundamental para Galicia, sobre todo en sectores estratéxicos como o da automoción, o téxtil, ou o da maquinaria e aparatos mecánicos, sen esquecer outros nos que Galicia é líder e nos que as relacións comerciais cos países iberoamericanos son estreitas e estables no tempo, como son os combustibles, a pesca e a conserva.

De feito, as relacións con América Latina son claves para a reactivación da economía galega. Tal e como recolle o Instituto Galego de Estatística, as exportacións aos países iberoamericanos suman nos primeiros once meses do 2022 un total de 1.011 millóns de euros, un 17,8% máis que no mesmo período do 2021.

A Xunta puxo en marcha hai dous anos a Estratexia de Internacionalización 2021-2025 para impulsar a presenza das empresas galegas no exterior, con especial atención a América Latina. Neste contexto, a Administración autonómica conta coas oficinas do Igape no exterior para facilitar consultas ou organizar feiras e misións comerciais e diferentes liñas de axudas á exportación mediante Galicia Exporta e Galicia Exporta Organismos Intermedios.

Cumio polas infraestruturas

O presidente aproveitou este encontro con empresarios para recordar o cumio que se vai celebrar este venres en Santiago de Compostela para reivindicar as infraestruturas que o noroeste peninsular precisa para ser competitivo, e no que Alfonso Rueda recibirá o presidente do Principado de Asturias, Adrián Barbón, e o de Castela e León, Alfonso Fernández Mañueco. O mandatario galego agradeceulles aos seus homólogos o seu talante negociador á marxe de cores políticas e remarcou a mensaxe que se quere transmitir desde a Xunta: “Que poñemos os intereses de Galicia por riba de calquera interese político”, subliñou.