• Ata o 28 de febreiro poden presentarse solicitudes á convocatoria de axudas da Xunta por 1,5 millóns de euros para favorecer a optimización de recursos, a redución no consumo de materias primas e o aproveitamento dos residuos.
• Os apoios alcanzan o 35 % dos investimentos para as pequenas empresas e o 25 % para as medianas, cun límite máximo subvencionable de 200.000 euros nos proxectos colectivos e de 75.000 euros en iniciativas individuais.
• Os beneficiarios poderán solicitar anticipos de ata o 50 % do importe das axudas, centradas na instalación de sistemas de medición de parámetros produtivos e ambientais; de hardware e software intelixente para a optimización dos recursos; ou na adquisición de maquinaria para reemprego ou reciclaxe de refugallos.
• Ao abeiro da nova Lei de implantación empresarial, outorgaráselles unha puntuación superior aos proxectos que se desenvolvan en Concellos Emprendedores.

A Xunta de Galicia activou unha nova convocatoria da liña de axudas para promover a economía circular entre o tecido produtivo galego, na procura de mellorar a competitividade das pemes e do colectivo autónomo impulsando novos procesos e un consumo máis eficiente.

O programa, que conta cun orzamento de 1,5 millóns de euros, está impulsado pola Vicepresidencia primeira e Consellería de Economía, Industria e Innovación, a través do Instituto Galego de Promoción Económica (Igape). Céntrase na implantación de solucións avanzadas para o desenvolvemento da economía circular, prevéndose que se poidan apoiar arredor de medio cento de proxectos, tanto individuais como colectivos. O obxectivo é promover novos modelos de negocio circulares mediante a optimización de recursos, a redución no consumo de materias primas e o aproveitamento dos residuos.

En réxime de concorrencia competitiva, os apoios, cuxo prazo de presentación de solicitudes estará aberto ata o 28 de febreiro ás 14 horas, cobren o 35 % dos investimentos materiais e inmateriais subvencionables para as pequenas empresas, e o 25 % para as medianas, cun límite máximo subvencionable de 200.000 euros nos proxectos colectivos e de 75.000 euros nos individuais.

Os beneficiarios poden solicitar anticipos de ata o 50 % do importe dos apoios, centrados, entre outros, na instalación de sistemas de medición de parámetros produtivos e ambientais; de hardware e software intelixente para a optimización dos recursos; ou na adquisición de nova maquinaria para reemprego ou reciclaxe de residuos.

Entre os criterios de valoración, cómpre destacar a maior puntuación daqueles proxectos que se leven a cabo en localidades que teñan sido declaradas como Concellos Emprendedores.

Os proxectos propostos deben cumprir distintos obxectivos, entre os que destacan a redución do consumo de recursos no proceso produtivo, a facilidade para o seu reemprego ou reciclaxe, a creación de cadeas de valor máis curtas, ou a implementación de novas oportunidades de negocio que persigan a reparación dos produtos.

Deste xeito, o Goberno galego dá un paso máis na Estratexia Galega de Economía Circular, que establece como principios básicos para a transición cara a este modelo económico a redución, reemprego e reciclaxe e as estratexias de deseño sostible. Así, a través deste programa achéganse axudas directas para facilitar os investimentos das pemes e autónomos de cara á posta en marcha de proxectos para o desenvolvemento da economía circular, o que se traducirá nun aforro de recursos e enerxía e favorecerá o reemprego dos refugallos.

• O vicepresidente primeiro e conselleiro de Economía, Industria e Innovación, Francisco Conde, participou esta mañá nun networking.
• Solicita que se desbloqueen os Fondos de Transición Xusta para convocar as axudas.
• Lembra que desde hoxe se poden solicitar os apoios do programa Bonos de innovación.
• A provincia da Coruña, cun incremento do 55% nas exportacións, está contribuíndo a que Galicia poida pechar 2022 cun novo récord de vendas ao exterior.

O vicepresidente primeiro e conselleiro de Economía, Industria e Innovación, Francisco Conde, destacou esta mañá, durante un networking nas Somozas, que tres dos catro proxectos industriais estratéxicos declarados en Galicia ata o momento son de Ferrolterra. Trátase da planta de hidróxeno verde de Reganosa e EDP Renovables e a factoría de pneumáticos de Sentury -os dous nas Pontes- así como o proxecto de Forestal del Atlántico en Mugardos para a xeración de metanol, que suman un investimento de 863,3M€.

O encontro enmarcouse nas xornadas que desde a Xunta se están realizando polos concellos galegos para presentar o mapa de axudas que a Administración galega ten á disposición do tecido empresarial, así como para escoitar de primeira man as súas necesidades. Neste caso, As Somozas é un concello emprendedor, o que supón prioridade de acceso ás axudas convocadas pola Xunta a cambio de que o concello ofreza bonificacións de ata o 95% no IBI, IAE e ICIO aos proxectos empresariais de nova implantación ou ampliación, máis simplificación administrativa, así como máis facilidades de acceso ao solo industrial.

Conde puxo en valor que o esforzo conxunto entre as administracións e os empresarios ten permitido xerar oportunidades neste contexto de transformación industrial na comarca de Ferrolterra, onde viron a luz un 14% máis de empresas que no ano 2021. Tamén repasou algúns dos proxectos que buscan implantarse na zona como a planta de IFFE-Biotech para producir aceites omega-3, a bioplanta de Ence, a fábrica de compoñentes de eólica mariña de Nervión Naval Offshore, a planta de valorización de material de rexeitamento Valogreen Recinor ou a central hidroeléctrica reversible de Magtel, ademais dos tres proxectos industriais estratéxicos.

O vicepresidente económico explicou que desde a Xunta estase a traballar para que a iniciativa privada aposte por Galicia a través de medidas como a Lei de simplificación administrativa e, á vez, estanse buscando oportunidades a través da transición enerxética. Neste sentido, reclamou ao Goberno a revisión da planificación da rede eléctrica para incrementar os investimentos nas redes de distribución e transporte, así como o desbloqueo dos Fondos de Transición Xusta para poder convocar as axudas, das que se van beneficiar os principais proxectos previstos para a comarca de Ferrolterra.

Apoios para as pemes

No encontro, repasáronse os apoios que xa están abertos para impulsar a innovación e sustentabilidade entre o tecido empresarial. É o caso dos Bonos de innovación que xa se poden solicitar desde hoxe. Trátase dunha liña destinada a pemes para contratar servizos externos, de tramitación ou proxectos de deseño que lles permita avanzar na I+D+i. Prevese mobilizar 1M€. Por outra banda, destínase 1,5M€ á convocatoria de economía circular para promover entre pemes e autónomos procesos produtivos máis eficientes.

Conde finalizou referíndose á internacionalización e aos bos datos das exportacións galegas que en 2022 marcarán un novo récord, cifras ás que a provincia da Coruña contribuíu entre xaneiro e novembro con 11.130M€ en vendas ao exterior, mellorando as súas estatísticas nun 55% con respecto a 2021.

• Salienta que o reto do tecido empresarial está en innovar en todo o que teña que ver coa eficiencia enerxética, a descarbonización, a economía circular e a optimización de procesos a través da dixitalización.
• Apunta que desde mañá xa se poden solicitar as axudas do Bono de Innovación, dirixidas a incentivar a I+D+i entre pemes e microempresas.

O vicepresidente primeiro e conselleiro de Economía, Industria e Innovación, Francisco Conde, destacou hoxe que, no actual contexto de transición enerxética e dixital, a tecnoloxía é unha aliada da sustentabilidade, o que hai que avaliar como unha oportunidade para Galicia. Así o manifestou na presentación do plan de negocio de Coca-Cola Europacific Partners para o ano 2023 na rexión Noroeste.

Conde salientou a oportunidade para o tecido empresarial de innovar en todo o que teña que ver coa eficiencia enerxética; a descarbonización e a busca de procesos máis limpos e respectuosos co medio ambiente; a economía circular; a mobilidade sustentable e a optimización de sistemas a través da dixitalización.

O vicepresidente económico manifestou que o binomio indivisible que forman a innovación e a sustentabilidade é o que a Xunta de Galicia quere promover en todo o tecido empresarial galego con liñas de axuda como o Bono de Innovación que, a partir de mañá venres, xa se pode solicitar.

Segundo explicou, a previsión é mobilizar máis dun millón de euros na base do sistema, que son as pemes e microempresas, para que incentivar nelas a I+D+i con axudas máximas de ata 35.000 euros que cobren, entre outros, o custo de contratar servizo externos, de tramitación ou proxectos de deseño.

Conde apuntou que na edición do ano pasado se beneficiaron do Bono de Innovación 66 empresas galegas. E puxo de relevo que máis da metade, un 67 por cento, era a primeira vez que optaban a axudas da Axencia Galega de Innovación.

O vicepresidente primeiro da Xunta concluíu destacando os máis de 60 anos que Coca-Cola Europacific Partners leva operando na planta da Coruña e o seu compromiso medioambiental, económico e social con Galicia.

• O director do Igape, Fernando Guldrís, visitou Lau Creaciones, empresa de Santiago de Compostela dedicada á comunicación gráfica que, grazas ao programa Galicia Inviste, adquiriu unha nova prensa dixital que lle permite competir en prezo, calidade e capacidade produtiva no mercado actual.
• Salientou a importancia deste programa que, na liña destinada a equipamentos produtivos, permitiu pór en marcha nun só exercicio máis dunha ducia de proxectos que mobilizaron 4,6 M€ na provincia.
• Subliñou a importancia deste e outros programas que facilitan a mellora competitiva do tecido produtivo, como a liña de economía circular, que ten aberta unha nova convocatoria que suma 1,5 M€.

O director do Instituto Galego de Promoción Económica (Igape), Fernando Guldrís, visitou hoxe as instalacións da empresa Lau Creaciones, onde puxo en valor a importancia que ten para a mellora competitiva das pemes locais programas como Galicia Inviste, que facilitan o investimento empresarial permitindo novos proxectos, a diversificación de produtos e a mellora das liñas de produción xa existentes.

Neste sentido, expuxo Guldrís, Lau Creaciones “é un bo exemplo” das posibilidades que ofrecen esta e outras liñas impulsada pola Vicepresidencia primeira e Consellería de Economía, Industria e Innovación a través do Igape. “Neste caso concreto, o programa contribuíu á adquisición dunha nova prensa dixital que lle permite á empresa competir en prezo, calidade e capacidade produtiva no mercado”, subliñou.

Neste contexto, o director do Igape lembrou outros programas xa en marcha e con períodos de solicitude abertos, como os obradoiros de dixitalización, sustentabilidade e loxística avanzada, que promoven proxectos de colaboración máis avanzados e de maior significación cara aos retos principais da economía; ou a liña de Economía Circular, cuxa nova convocatoria suma 1,5M€ para apoiar modelos de negocio circulares mediante a optimización de recursos, a redución no consumo de materias primas e o aproveitamento dos residuos.

• O delegado territorial, Javier Arias, visitou as instalacións de A Vida 013, que está a introducir un sistema integrado de xestión para o mellor control de todas as operacións de produción e administración.

A Xunta de Galicia destina 435.100 euros a 18 pemes   lucenses para a incorporación de proxectos de dixitalización co apoio da Vicepresidencia primeira e Consellería de Economía, Industria e Innovación a través do Instituto Galego de Promoción Económica (Igape). O programa Dixitalización Industria 4.0 pretende impulsar a transformación da industria tradicional cara a modelos tecnolóxicos avanzados, favorecendo modelos de negocio diferenciais baseados na innovación e na tecnoloxía.

O delegado territorial de Lugo, Javier Arias, visitou hoxe no polígono industrial do Ceao as instalacións da empresa A Vida 013, unha das beneficiarias, que se dedica á realización de todo tipo de revestimentos, deseño de interiores e decoración. Conta con varios centros de traballo en Lugo, que acollen a arredor de 150 traballadores e traballadoras.

A firma está a implementar un sistema integrado de xestión para dar soporte aos procesos de compra, fabricación, distribución, facturación, requirimentos legais ou xestión contable. Deste xeito, logran un mellor control de todas as operacións.

Arias destacou o crecemento experimentado por esta empresa nos últimos anos e o feito de que “se apoie na innovación para continuar ampliando os seus horizontes e xerando postos de traballo en Lugo”. Neste sentido, lembrou que estas axudas do Igape “tratan de estender o impacto positivo da innovación baseada na transformación dixital a todas as empresas galegas, en especial ás pemes”.

12 das empresas beneficiarias teñen a sede social no municipio da capital, e as demais están situadas en Sarria, Rábade, Portomarín, Chantada, Begonte e Alfoz. Entre todas suman un investimento apoiado de 1,2 millóns de euros.

O delegado territorial gabou o esforzo que realiza o tecido produtivo da provincia, e subliñou que a substitución de procesos manuais por procesos dixitais supón un aforro en tempo e produtividade e achega información máis fiable para a toma de decisións, co conseguinte incremento da competitividade.

Ás 10 horas do día 14 de marzo de 2023 terá lugar na sala de xuntas do Instituto Galego de Promoción Económica (Igape), situado no Edificio Administrativo Igape no barrio de San Lázaro en Santiago de Compostela, ante a mesa presidida pola xerente, coa asistencia dun letrado da Asesoría Xurídica, un representante da Intervención Xeral, un representante da Secretaría Xeral Técnica e do Patrimonio da Consellería de Facenda e Administración Pública e un/a empregado/a público/a da Subdirección de RR.HH. e Xestión Administrativa do IGAPE, que actuará como secretario/a, a poxa pública dos bens inmobles patrimoniais do Instituto Galego de Promoción Económica que se describen a seguir e dos que foi acordado o seu alleamento mediante resolución do director xeral do 3 de xaneiro de 2023.

• Descarga | Prego de condicións.
• Consulta | Resolución do director xeral do Igape.
• Consulta | Anuncio do Igape.

• Reclama “unidade” para saldar as “débedas” coa Comunidade e “apoio” ás empresas que crean riqueza.
• Pon a Delta Vigo como exemplo de emprendemento que contribuíu a facer cidade coa súa traxectoria en sectores fundamentais para Vigo e para Galicia como a conserva, o naval, a automoción e, nas últimas décadas, o aeroespacial.

O presidente da Xunta, Alfonso Rueda, aposta pola colaboración público-privada para sacar proveito das oportunidades que se lle presentan a Galicia. Fíxoo hoxe en Vigo, onde interveu nos actos de celebración do 75 aniversario do Grupo Delta Vigo, aos que acudiu acompañado polo vicepresidente primeiro e conselleiro de Economía, Industria e Innovación, Francisco Conde, e pola delegada territorial da Xunta en Vigo, Marta Fernández-Tapias. 

Alfonso Rueda puxo a Delta Vigo como exemplo de emprendemento que contribuíu a facer cidade coa súa traxectoria en sectores fundamentais para Vigo e para Galicia, como a conserva, o naval, a automoción e, nas últimas décadas, o aeroespacial. Desde un pequeno taller en Teis na década dos 40, a firma foi medrando na fabricación de compoñentes para sectores industrias estratéxicos, e ademais de ser a primeira empresa da aeronáutica de capital cen por cen galego, apostou sempre polo I+D+i e pola internacionalización do seu produto. O presidente da Xunta subliñou que se trata dunha firma “punteira en sectores competitivos a nivel mundial”, unha empresa galega que segue en mans da familia que a fundou e que ofrece “riqueza, emprego e esperanza” a moitos galegos e galegas. 

O mandatario galego subliñou que a Xunta estará sempre preto de quen axude a crear riqueza e a mellorar a calidade de vida da poboación, de aí que garantira o apoio do Goberno galego ao desenvolvemento dos sectores cos que traballa Delta Vigo, como fixo sempre que a empresa precisou da colaboración da Administración autonómica para a posta en marcha de diferentes proxectos. “Cando medran as empresas, medran os territorios”, apuntou. 

Rueda reclamou “unidade” da sociedade para salvar a “débeda” coa Comunidade e “apoio” ás empresas que, como Delta Vigo, crean riqueza e contribúen no desenvolvemento dun territorio. Nese sentido, chamou a atención sobre as oportunidades que ofrecen os fondos europeos e puxo como exemplo o cumio celebrado a semana pasada para reclamar, xunto con Asturias e Castela e León, as infraestruturas que precisa o noroeste peninsular. Reiterou, por unha banda, a necesidade de que a automoción galega conte con ditos fondos, e que as achegas habilitadas para o Perte naval cheguen aos seus destinatarios. 

Plan estratéxico do Polo Aeroespacial de Galicia 2021-2025

• Os directores do Igape, Fernando Guldrís, e de XesGalicia, Rubén Aguión, manteñen un encontro con membros do equipo directivo de Enisa (Empresa Nacional de Innovación).
• Destacan a nova Axenda Startups que busca crear un centenar de novas empresas e acelerar 200 startups entre este ano e o que vén.
• “Queremos alentar o talento innovador, dando continuidade a proxectos como as business factories, que sumarán novos campos”, salienta Guldrís.

O director do Igape, Fernando Guldrís, e o director de XesGalicia, Rubén Aguión, acompañados pola subdirectora de Investimentos e Startups do Igape, Fany Suárez, mantiveron hoxe un encontro con Jordi García, director de Fomento do Ecosistema Emprendedor de Enisa (Empresa Nacional de Innovación, S.A.), e Juan Manuel Garrido, director de Operacións, no que afondaron na importancia de impulsar un ecosistema que mesture talento e innovación para mellorar a competitividade do tecido empresarial.

A xuntanza permitiu poñer en valor a cooperación entre administracións na procura de configurar o mellor ecosistema posible sobre a base da innovación, a dixitalización e a sustentabilidade, atraendo talento e capital internacional. Neste contexto, o director do Igape sinalou que “impulsar o talento e a innovación é impulsar a mellor versión de Galicia”, defendendo a importancia de “tomar a creatividade e o talento como punto de partida, e a tecnoloxía como ferramenta clave”.

Sobre estes eixos, expuxo, susténtase a Axenda Startups de Galicia, coa que o Goberno galego aspira a crear un centenar de novas empresas e acelerar 200 startups durante este ano e o que vén, promovendo desde xeito un ecosistema innovador con capacidade para mellorar a competitividade do tecido produtivo.

“Queremos alentar o talento innovador, dando continuidade a outros proxectos como as business factories, que sumarán novos campos como foodtech, biotech, healthtech, edtech, climatetech, loxística ou as cadeas de subministracións”, salientou Guldrís.

Deste xeito, complementarase a rede de aceleradoras actual, que inclúe as business factories de alimentación (BFFood), automoción (BFAuto), aeronáutica (BFAero) ou novos fármacos (BFMedicine); a High Tech Auto, incubadora de alta tecnoloxía no sector da automoción que completa á propia BFAuto; ou a incubadora de alta tecnoloxía en biotecnoloxía (BioIncubaTech).

• Resaltou que este proxecto impulsará a consolidación de Galicia como “referente en materia de biotecnoloxía”.
• Explicou que, cun investimento de 33 M€ na fase inicial, as instalacións localizaranse no polígono industrial O Reboredo e terán como obxectivo a fabricación, produción, acondicionamento e a distribución loxística de produtos estériles farmacéuticos líquidos en diferentes formas de acondicionado.
• O proxecto complementa a cadea de valor do sector da biotecnoloxía, industria estratéxica na Comunidade Autónoma e está aliñado coa Estratexia de especialización intelixente (RIS3) de Galicia.
• O acordo do Consello da Xunta enmárcase dentro da filosofía da Lei de simplificación administrativa, potenciando a captación de investimentos e a xeración de emprego de calidade, e mantendo todas as garantías xurídicas durante a tramitación do proxecto.
• Ata o de agora, son 18 iniciativas as que se adheriron a esta figura en Galicia, cunha mobilización global de 1275 M€.

O presidente da Xunta, Alfonso Rueda, anunciou hoxe que o Consello declarou como iniciativa empresarial prioritaria o proxecto de Indukern para impulsar a instalación dunha planta de fabricación de inxectables en Monforte de Lemos. Deste xeito, dase un paso máis para “contribuír a consolidar Galicia como un referente en materia de biotecnoloxía”.

Rueda resaltou que nesta nova planta “fabricaranse medicamentos de uso humano” e albergará tamén un laboratorio de I+D+i para deseñar “futuros fármacos”. En concreto, cun investimento de 33 M€ na fase inicial e 59,4 M€ en total, o novo centro destinarase á fabricación, produción, acondicionamento e distribución loxística de produtos estériles farmacéuticos líquidos en diferentes formas de acondicionado como ampolas, viarias e xiringas precargadas dependendo do seu uso e tipoloxía de produto.

Elaboraranse medicamentos e realizaranse procesos de apoio como servizos asociados á produción, loxística e administración. O proxecto iniciarase cunha liña de produción de inxectables e coa posibilidade de expansión a catro liñas máis de produción. Tamén se incluirán oficinas para o control da propia planta e laboratorios de análise e desenvolvemento de I+D+i para futuros fármacos, polo que se aliña coa Estratexia de especialización intelixente (RIS3) de Galicia complementando a cadea de valor do sector da biotecnoloxía, unha industria estratéxica na Comunidade Autónoma.

O proxecto cumpre cos requisitos para recibir esta declaración, en concreto supera o volume de investimento mínimo fixado nun millón de euros (serán 33 M€ na primeira fase e 59,4 en total); a creación de 62 empregos na primeira fase; así como complementar cadeas de valor ou pertencer a sectores estratéxicos como é, neste caso, a biotecnoloxía.

Esta declaración enmárcase dentro da filosofía da Lei de simplificación administrativa que supón, na práctica, a redución á metade dos prazos de tramitación para levar a cabo un proxecto, ratificando igualmente todas as garantías xurídicas durante o procedemento. Así, poténciase a captación de investimentos para Galicia e a creación de emprego de calidade.

Deste xeito xa son 18 as iniciativas empresariais prioritarias declaradas e lideradas por Cortizo (Padrón), Albo (Salvaterra de Miño), Oviganic (Monforte de Lemos), Sogama (Vilanova de Arousa), Ignacio González Montes (Ribeira), Bionerxías de Lugo e Sarreaus (Ourense), Novafrigsa (Lugo), Agroamb Prodalt (Castro de Rei), Hornos de Lamastelle (Carballo), Armonía Green Galicia (A Coruña), Cafés Candelas (Lugo), Bioenergía A Coruña (A Laracha), Valogreene Recinor (As Somozas), Green Umia (Caldas de Reis), Green Meiga (Begonte), Naturgy Nuevas Energías (en Meirama, Cerceda) e Kern Pharma (Monforte de Lemos).

“Estas 18 iniciativas contan cuns investimentos previstos de 1.275 M€”, indicou Rueda. Polo tanto, esta figura busca potenciar novas oportunidades empresariais e laborais en Galicia con máis simplificación administrativa; máis incentivos fiscais ás empresas; e máis facilidades para acceder ao solo empresarial.

A declaración de proxectos empresariais como prioritarios implica tamén a concorrencia de razóns de interese público para tramitar de maneira urxente os procedementos administrativos, así como o seguimento e impulso dos trámites posteriores necesarios por parte da Xunta de Galicia para contribuír á eliminación de barreiras á actividade empresarial.