• O vicepresidente primeiro e conselleiro de Economía, Industria e Innovación, Francisco Conde, participou na presentación en Ferrol desta iniciativa, que se desenvolve en colaboración con Pymar.
• Aposta por que o naval galego traballe conxuntamente desde o punto de vista industrial e tecnolóxico, e impulsando proxectos de innovación vinculados coa dixitalización e a sustentabilidade, ademais da diversificación.

O vicepresidente primeiro e conselleiro de Economía, Industria e Innovación, Francisco Conde, subliñou hoxe na presentación en Ferrol da oficina Conecta Naval que a Xunta impulsa esta iniciativa co obxectivo de posicionar Galicia e poñer de relevo o papel que merece a industria galega do naval no reparto dos fondos europeos Next Generation.

Conde destacou que se busca que toda a cadea de valor traballe de forma conectada, colaborando entre si e contando co apoio da Xunta e de Pymar para o desenvolvemento de proxectos que poidan optar aos fondos do Perte naval. Así, apostou por que o naval galego traballe conxuntamente desde o punto de vista industrial e tecnolóxico, e impulsando proxectos de innovación vinculados coa dixitalización e a sustentabilidade, ademais da diversificación en eidos como o da eólica mariña.

O vicepresidente económico lembrou que hai moito tempo que se está a traballar nestes ámbitos, a través por exemplo de Cesena e Navantia, e tamén no eido da formación e na captación e retención de talento cualificado co obxectivo de impulsar a competitividade do sector. Neste contexto, apuntou que agora existe a posibilidade de reforzar e consolidar ese liderado a través dos investimentos que se poidan vincular ao Perte do naval.

Ata o vindeiro 28 de febreiro está aberto o prazo para presentar candidaturas a esta convocatoria. O obxectivo é que Galicia como comunidade autonómica con máis empresas do sector (preto de 300 en todos os segmentos de actividade) teña un papel significativo.

Tal e como subliñou Conde na reunión, á que asistiron entre outras entidades Aclunaga e Asime, a través de Conecta Naval búscase que as empresas independentemente do seu tamaño teñan a oportunidade de incorporarse a algún dos proxectos primarios que se están traballando por parte de Pymar e a partir de aí que teñan ese soporte tamén da Xunta de Galicia.

• Salienta que as políticas da Xunta ofrecen “estabilidade e seguridade” ao sector, o que permiten impulsar a internacionalización do tecido empresarial galego.
• Destaca que máis de 2.000 firmas galegas xa exportan os seus produtos a América Latina e anima a seguir este camiño de colaboración: “Isto sen dúbida, débese ao bo traballo dos empresarios”, salientou.
• A Xunta conta con diferentes iniciativas para impulsar a presenza das empresas no exterior como a Estratexia de Internacionalización 2021-2025 que contempla diferentes liñas de axudas.

O presidente da Xunta, Alfonso Rueda, resaltou esta mañá que os bos indicadores económicos de Galicia, como o novo récord histórico de exportacións en 2022 ou a previsión de crecemento dun 3,6 %, acreditan o potencial da Comunidade para reforzar os lazos comerciais con Iberoamérica. Ademais, destacou que o Goberno galego aposta por políticas que dean “estabilidade e seguridade” ao tecido empresarial, o que redunda nunha maior internacionalización do sector.

Durante un almorzo organizado polo Consello Empresarial Alianza por Iberoamérica (CEAPI) e o Círculo de Empresarios de Galicia en Vigo, Rueda subliñou que, desde a pandemia, a economía galega está a presentar un mellor comportamento que a española no seu conxunto. Nesta liña, destacou a suba dun 2,5 % do PIB durante o último trimestre do 2022; os máis de 27.400 millóns de euros acadados en exportacións ata novembro -e que xa superan o total de 2021-; ou que Galicia sexa a terceira Comunidade con menor ratio de débeda por habitante e a segunda que paga con máis axilidade as súas facturas.

Rueda subliñou que xa hai máis de 2.000 empresas galegas que exportan os seus produtos a Iberoamérica e agradeceu o papel crucial que as asociacións de empresarios de orixe galega ou o propio CEAPI desempeñan no impulso e mellora das relacións comerciais coa Comunidade. “Isto, sen dúbida, débese ao bo traballo dos empresarios”, asegurou.

Neste senso, animou a seguir polo camiño da colaboración, que facilitou que América Latina destaque como un mercado fundamental para Galicia, sobre todo en sectores estratéxicos como o da automoción, o téxtil, ou o da maquinaria e aparatos mecánicos, sen esquecer outros nos que Galicia é líder e nos que as relacións comerciais cos países iberoamericanos son estreitas e estables no tempo, como son os combustibles, a pesca e a conserva.

De feito, as relacións con América Latina son claves para a reactivación da economía galega. Tal e como recolle o Instituto Galego de Estatística, as exportacións aos países iberoamericanos suman nos primeiros once meses do 2022 un total de 1.011 millóns de euros, un 17,8% máis que no mesmo período do 2021.

A Xunta puxo en marcha hai dous anos a Estratexia de Internacionalización 2021-2025 para impulsar a presenza das empresas galegas no exterior, con especial atención a América Latina. Neste contexto, a Administración autonómica conta coas oficinas do Igape no exterior para facilitar consultas ou organizar feiras e misións comerciais e diferentes liñas de axudas á exportación mediante Galicia Exporta e Galicia Exporta Organismos Intermedios.

Cumio polas infraestruturas

O presidente aproveitou este encontro con empresarios para recordar o cumio que se vai celebrar este venres en Santiago de Compostela para reivindicar as infraestruturas que o noroeste peninsular precisa para ser competitivo, e no que Alfonso Rueda recibirá o presidente do Principado de Asturias, Adrián Barbón, e o de Castela e León, Alfonso Fernández Mañueco. O mandatario galego agradeceulles aos seus homólogos o seu talante negociador á marxe de cores políticas e remarcou a mensaxe que se quere transmitir desde a Xunta: “Que poñemos os intereses de Galicia por riba de calquera interese político”, subliñou. 

• O director do Igape, Fernando Guldrís, visitou Alfonsín Digital, empresa de Bertamiráns especializada no sector audiovisual que, grazas ao programa Galicia Inviste, implementou a tecnoloxía HDR Dolby Vision.
• Salienta que este programa ten permitido ata o de agora mobilizar máis de 42M€ na provincia da Coruña impulsando proxectos como a implantación de novos establecementos ou os cambios nos procesos de produción.
• Lembra que está aberto o prazo de presentación de solicitudes das axudas para impulsar obradoiros de dixitalización, sustentabilidade e loxística avanzada.

O director do Igape, Fernando Guldrís, visitou hoxe en Bertamiráns (Ames) as instalacións da empresa Alfonsín Digital, onde puxo en valor a importancia que ten para a mellora competitiva das pemes locais programas como Galicia Inviste, que permiten afondar tanto na diversificación de proxectos como na aposta pola innovación de cara a mellorar a competitividade empresarial.

Neste sentido, expuxo Guldrís, Alfonsín Dixital “é un bo exemplo” das posibilidades que ofrecen esta e outras liñas impulsada pola Vicepresidencia primeira e Consellería de Economía, Industria e Innovación a través do Igape. “Neste caso concreto, o programa permitiu a implementación da tecnoloxía HDR Dolby Vision, o que fai desta empresa especializada no sector audiovisual unhas das poucas que ofrece este sistema en España, e a única en Galicia”, subliñou.

Ata o de agora, segundo informou o director do Igape, este programa ten permitido mobilizar máis de 42M€ na provincia da Coruña, impulsando proxectos de mellora como a implantación de novos establecementos, a diversificación ou os cambios nos procesos de produción. Así, nesta provincia aprobáronse desde o 2018 e ata o de agora máis de 115 proxectos no marco do Galicia Inviste, que suman un importe conxunto superior aos 10,5M€.

• O vicepresidente primeiro e conselleiro de Economía, Industria e Innovación, Francisco Conde destacou o papel que as sociedades de garantía recíproca desempeñan na xestión de solicitudes da liña de reavais do Goberno galego.

O vicepresidente primeiro e conselleiro de Economía, Industria e Innovación, Francisco Conde, mantivo esta semana unha reunión coa directiva de Sogarpo na sede que esta sociedade de garantía recíproca ten en Vigo.

O obxectivo do encontro era presentalles, de primeira man, a Axenda financeira da Xunta de Galicia, que este ano porá un total de 140M€ a disposición do tecido produtivo galego.

Deste xeito, a Axenda contará con instrumentos para o reforzo do capital e fondos propios da empresa, a través de XesGalicia; incluirá varias liñas de préstamos a través tanto de XesGalicia como de Igape; así como os programas de avais directos e reavais en colaboración coas SGRs e as entidades financeiras, con especial atención aos que garanten operacións a pemes afectadas polas consecuencias económicas da invasión a Ucraína.

Neste sentido, Conde puxo en valor o traballo realizado polas SGRs, como é o caso de Sogarpo, na xestión deste tipo de solicitudes e explicou que durante o ano 2020, esta sociedade recibiu o 40% de reavais Covid que se pediron en Galicia. Ademais, nos dez primeiros meses de 2022 outorgou avais a preto de 400 empresas por 33,3M€, un importe comparable a exercicios completos tanto previos como posteriores á pandemia. Isto permitiu consolidar 5249 postos de traballo, segundo as cifras da propia Sogarpo.

• O vicepresidente primeiro e conselleiro de Economía, Industria e Innovación, Francisco Conde, visitou esta mañá o polígono do Morelle en Sarria, onde se mobilizaron preto de 150.000 euros en obras viarias.
• Pon en valor a colaboración institucional para captar novos investimentos cara ao tecido industrial.
• Estes apoios súmanse aos 3,5M€ dirixidos á posta en marcha de novos viveiros industriais e de reforzo nas redes de distribución eléctrica dos parques empresariais, destinando en total 5,6M€ este ano á mellora e modernización dos polígonos.

O vicepresidente primeiro e conselleiro de Economía, Industria e Innovación, Francisco Conde, acompañado polo delegado territorial da Xunta de Galicia en Lugo, Javier Arias, visitou esta mañá o polígono do Morelle en Sarria, onde mantivo un encontro con empresarios da zona e visitou as diferentes melloras realizadas en obras viarias neste parque empresarial, nas que o Concello de Sarria mobilizou preto de 150.000 euros co apoio da Administración autonómica.

Durante a visita, o responsable de Economía, Industria e Innovación puxo en valor a colaboración institucional para captar novos investimentos cara ao tecido industrial galego. Neste eido, a Xunta destina este ano 5,6 millóns de euros en axudas para a mellora e modernización dos parques empresariais, e dentro destes apoios, ata o 2 de febreiro está aberto o prazo de presentación de solicitudes da convocatoria para a mellora de infraestruturas dos parques empresariais galegos, á que a Administración autonómica destina un total de 2,1M€. Esta liña ten como obxectivo dar resposta ás novas necesidades que teñen estas instalacións co obxectivo de modernizalas e ofrecer un mellor servizo para favorecer a fixación e implantación de compañías, así como promover o emprego local.

Os apoios son de concorrencia competitiva e están dirixidos aos concellos galegos que queiran realizar melloras relativas á implantación de iluminación pública eficiente, plantas de depuración de auga, xestión de residuos, infraestruturas viarias, instalación de sistemas de seguridade, contraincendios e contra o roubo de cable, así como servizos centralizados de subministración de gas e hidróxeno verde.

As axudas teñen unha intensidade do 80% ata un límite máximo de 120.000 euros no caso de solicitudes individuais e de 138.000 no caso de que sexan conxuntas. Prevense, ademais, anticipos de ata o 25% da axuda concedida. Na selección de proxectos teranse en conta criterios como se é Concello Emprendedor.

Xunto con estas axudas, o Goberno galego seguirá executando en 2023 os apoios concedidos a maiores -por importe de 3,5M€- para a posta en marcha de sete viveiros industriais e para o reforzo e extensión das redes de distribución de tres polígonos.

• Conde tamén visitou dous establecementos comerciais, Ginzo Hombre-Mujer e ¡Hola! Ola, onde destacou as cifras do Bono Activa Comercio no concello de Ribadeo, con 105 establecemento adheridos e un investimento mobilizado de máis de 192.000 euros.
• Informa de que está aberta a primeira convocatoria do fondo tecnolóxico para o comercio, xestionado pola Xunta, que destina 2,7M€ en axudas para fomentar o emprego de novas tecnoloxías no sector.

O vicepresidente primeiro e conselleiro de Economía, Industria e Innovación, Francisco Conde, ratificou hoxe o compromiso da Xunta de Galicia co sector do comercio, que definiu como vital para a dinamización económica das vilas e cidades galegas e que este ano vai contar cun investimento público de 24M€.

Conde mantivo esta tarde unha xuntanza con representantes da Asociación de Comerciantes, Industriais, Servizos e Autónomos (ACISA) de Ribadeo, a quen trasladou o recoñecemento da Administración autonómica na súa tarefa de promover o comercio local.

Con eles, avaliou o impacto das principais liñas de apoio que a Xunta puxo en marcha para impulsar a modernización do comercio de proximidade en Galicia e para incentivar a demanda, como se busca con campañas como o Bono Activa Comercio, que se desenvolveu no último trimestre do pasado ano.

O vicepresidente tivo ocasión de visitar dous establecementos da localidade, Ginzo Hombre-Mujer e ¡Hola! Ola, onde puxo en valor as cifras acadadas con esta iniciativa no concello de Ribadeo, con 105 establecemento adheridos e un investimento mobilizado de máis de 192.000 euros.

Xunto con isto, tamén informou de que, no marco do Plan de Recuperación, Transformación e Resiliencia, está aberta a primeira convocatoria do fondo tecnolóxico para o comercio, xestionado pola Xunta, que destina 2,7M€ en axudas para fomentar o emprego de novas tecnoloxías no sector: autónomos, pemes e asociacións de comerciantes.  

• O vicepresidente primeiro e conselleiro de Economía, Industria e Innovación, Francisco Conde, visitou hoxe en Viveiro as instalacións de RegalXunqueira, onde subliñou a importancia do sector artesán na dinamización cultural e económica.
• Este obradoiro vende as súas pezas en tendas especializadas e galerías de toda España, parte de Europa, América e Asia.
• A marca Artesanía de Galicia, que engloba a 789 obradoiros que realizan 88 actividades artesanais diferentes, é recoñecida a nivel nacional e internacional como sinal de calidade.

O vicepresidente primeiro e conselleiro de Economía, Industria e Innovación, Francisco Conde, visitou esta mañá as instalacións de RegalXunqueira, do artesán ceramista Alfonso Otero Regal, onde destacou que a traxectoria deste obradoiro é un exemplo do papel vertebrador da Artesanía de Galicia, e a importancia do sector artesán na dinamización cultural e económica.

Regal Cerámica, cuxa traxectoria se iniciou na década dos 70 e que celebrou en 2022 os 40 anos como obradoiro,  vende as súas pezas en tendas especializadas e galerías de toda España, parte de Europa, América e Asia. A empresa ten participado en diferentes programas da Xunta de Galicia para impulsar a dixitalización e a modernización, o fomento da comercialización, ou a formación de aprendices.

Ademais, o complexo cultural e museístico RegalXunqueira, que hoxe coñeceu Francisco Conde, consolidouse como un referente para a cerámica en Galicia, tanto na súa aplicación utilitaria como na súa vertente artística.

Durante a visita, o vicepresidente primeiro apuntou que a marca Artesanía de Galicia, que engloba a 789 obradoiros que realizan 88 actividades artesanais diferentes, é recoñecida a nivel nacional e internacional como sinal de calidade, representando a innovación e a tradición que van da man no sector artesán galego.