• A directora do Igape destaca o papel do emprendemento como motor dunha Galicia máis innovadora e competitiva
• Subliña que as startups seleccionadas desenvolveron solucións reais para os ámbitos da auga, a construción, o sector primario, os residuos téxtiles e a pegada de carbono
• Sinala que a segunda edición, xa en marcha, conta con 15 proxectos en aceleración e o respaldo, unha vez máis, de empresas tractoras, centros científicos e investidores especializados

Santiago de Compostela, 18 de xullo de 2025

A directora do Igape, Covadonga Toca, participou hoxe na clausura da primeira edición da aceleradora BF ClimaTech, impulsada pola Xunta de Galicia en colaboración co clúster Viratec, e que se salda coa creación de catro novas empresas verdes e máis de 300 contactos comerciais.

Esta primeira edición, expuxo Toca Carús, iniciou a súa andaina en outubro do ano pasado recibindo 31 candidaturas, das cales se seleccionaron cinco proxectos innovadores centrados na transición ecolóxica, a economía circular e a redución de emisións. Ademais das empresas creadas, leváronse a cabo máis dun cento de actividades de apoio -titorizacións, mentorías, encontros con investidores e eventos-, que fortaleceron o ecosistema emprendedor verde en Galicia.

Os proxectos participantes foron BioAqua, un aditivo biolóxico para descontaminar augas, en colaboración con Viaqua; Agrolinera, centrado na dixitalización da recollida de residuos gandeiros, con apoio de Agroamb; Arraigo, que promove vivendas de madeira industrializadas e emisións cero, en colaboración con Finsa; Wastex, que aplica intelixencia artificial para a valorización de residuos téxtiles, con Sogama; e Carbon Manager CO₂, unha ferramenta dixital para calcular e reducir a pegada de carbono empresarial.

No seu discurso, Covadonga Toca puxo en valor o modelo colaborativo da aceleradora, que combina talento emprendedor, apoio científico e implicación do tecido empresarial e financeiro: “A participación activa de empresas tractoras e investidores permitiu validar solucións en contornas reais e acurtar o camiño entre a idea e o mercado”.

A directora do Igape lembrou que BF ClimaTech forma parte da rede de aceleradoras da Xunta, que xa ten apoiado máis de 830 proxectos e xerado máis de 1.400 empregos cualificados en sectores como a automoción, a aeronáutica, a alimentación ou o deporte. Neste sentido, Toca lembrou que ClimaTech se suma a outras iniciativas xa consolidadas como BFAuto, BFAero, BFFood, ViaGalicia ou BFSport.

Toca Carús avanzou tamén que a segunda edición da aceleradora xa está en marcha desde marzo, sumando 15 proxectos que traballan en itinerarios de incubación, aceleración ou consolidación, co acompañamento de centros científicos, empresas e investidores especializados. Esta nova convocatoria prolongarase ata finais de ano.

A directora pechou a súa intervención reafirmando o compromiso da Xunta co emprendemento innovador e coa construción dunha Galicia “máis verde, máis competitiva e máis internacional” a través de instrumentos como a Oficina Económica de Galicia, liñas específicas de financiamento ou o impulso continuo a novas aceleradoras en sectores como a saúde ou as enerxías renovables.

• A directora do Igape, Covadonga Toca, participou no encontro empresarial Talento que transforma: Interim Management para os retos reais das pemes galegas, no que presentou esta iniciativa destinada a incorporar directivos expertos de forma temporal
• A Xunta financiará ata o 75 % do custo do servizo, cun máximo de 200.000 euros en axudas directas, para apoiar procesos de cambio, crecemento ou reorganización
• Destaca que o proxecto enmárcase nunha estratexia máis ampla que aposta polo talento como motor da transformación económica e pola colaboración público-privada

Santiago de Compostela, 17 de xullo de 2025

A directora do Instituto Galego de Promoción Económica (Igape), Covadonga Toca, participou esta mañá en Santiago no encontro empresarial Talento que transforma: Interim Management para os retos reais das pemes galegas, no que presentou o novo proxecto piloto da Xunta de Galicia para facilitar que as pemes en etapas clave da súa evolución poidan contar co asesoramento de directivos experimentados.

A través deste programa, desenvolvido polo Igape en colaboración coa Asociación de Interim Management de España (AIME) e a Asociación para o Progreso da Dirección (APD), as pequenas e medianas empresas poderán incorporar, durante seis meses e con dedicación parcial, profesionais de alta dirección que lideren retos concretos e impulsen procesos de transformación, expansión ou reorganización interna.

O Goberno galego, expuxo Toca Carús, asumirá ata o 75  % do custo do servizo, cun límite de 200.000 euros en axudas directas, mentres que as empresas asumirán o 25  % restante. As solicitudes deberán presentarse telematicamente a través da oficina virtual do Igape ata o 4 de agosto.

Durante a súa intervención, a directora do Igape salientou que “o acceso ao talento non pode ser un luxo, senón unha panca de transformación accesible para todo o tecido empresarial”. Destacou ademais que o interim management permite incorporar liderado estratéxico de maneira flexible e eficaz, sen incrementar a estrutura fixa das organizacións.

A Xunta enmarca esta iniciativa nunha aposta máis ampla por profesionalizar a xestión empresarial, fortalecer a competitividade e consolidar un modelo económico baseado na innovación, o liderado e a sustentabilidade. “Queremos que as nosas pemes poidan avanzar con seguridade e apoio, minimizando riscos e garantindo decisións áxiles e eficaces”, asegurou Toca.

A xornada, que reuniu a representantes empresariais, profesionais da dirección e entidades colaboradoras, serviu tamén para visibilizar exemplos de éxito e debater sobre o papel do liderado estratéxico na evolución das empresas. A directora do Igape concluíu sinalando que “só con empresas ben dirixidas Galicia poderá seguir medrando de forma sostible e xerando oportunidades para todos”.

>>MÁIS INFORMACIÓN SOBRE O PROCEDEMENTO<<

>>FAQS<<

O vindeiro xoves 17 de xullo, ás 11:30 h, no Hotel Oca Puerta del Camino (Santiago de Compostela), terá lugar o encontro empresarial "Talento que transforma: Interim Management para os retos reais das empresas galegas".

A Xunta de Galicia, a través do Igape, en colaboración con APD e AIME, impulsan un proxecto piloto para que as pemes galegas descubran o valor do interim management e teñan acceso a directivos/as expertos/as en etapas críticas da súa evolución. Para iso, celebramos un encontro que pretende dar a coñecer as características e vantaxes deste proxecto piloto que busca achegar solucións de alto valor engadido a empresas que necesitan avanzar en momentos decisivos.

O prazo de solicitude de servizos de Interim Management para as empresas galegas permanecerá aberto ata as 14:00 h do luns 4 de agosto.

As solicitudes deberán ser presentadas telematicamente a través do procedemento IG309.2025.1 - SERVIZOS DE INTERIM MANAGEMENT PARA AS EMPRESAS GALEGAS, accesible a través da oficina virtual do IGAPE.

Interim Management

O Interim Management é un modelo de xestión directiva contrastado que permite incorporar talento directivo senior de forma temporal e flexible, achegando visión estratéxica e capacidade de execución inmediata á empresa para resolver unha necesidade conxuntural nunha empresa durante un período de tempo determinado e cuns obxectivos concretos.

>>MÁIS INFORMACIÓN SOBRE O PROCEDEMENTO<<

>>MÁIS INFORMACIÓN E INSCRICIÓNS AO ENCONTRO<<

>>FAQS<<

1. Prazas e prazo de inscrición

• 3 grupos formativos: 10 alumnos por grupo
• Prazo de inscrición: ata o 8/09/2025 [Prazas xa cubertas]
• Inscrición de balde

2. Destinatarios

Profesionais do ámbito comercial, do márketing e da dirección empresarial de empresas galegas.

3. Descrición xeral

Con unha metodoloxía flexible e centrada no mundo real, este curso ofrece unha experiencia de aprendizaxe 100% en liña, ideal para quen desexe mellorar o seu inglés sen comprometer a súa axenda profesional.

Combinamos tecnoloxía de vangarda con contidos altamente especializados, garantindo unha formación personalizada adaptada ás necesidades específicas de cada profesional. Dende reunións e negociacións ata redacción de correos formais e presentacións, este curso axudarache a comunicarte con eficacia en calquera situación profesional.

4. Obxectivos

• Desenvolver habilidades comunicativas en inglés para contextos empresariais e de negocios internacionais.
• Adquirir vocabulario especializado para a expansión global de produtos e servizos.
• Aprender a negociar, establecer relacións comerciais e xestionar operacións nos mercados internacionais.
• Adaptarse ás diferenzas culturais e lingüísticas no entorno empresarial global.

5. Duración

• Comezo: 15/09/2025
• Finalización: 17/12/2025

6. Metodoloxía e formato

• Modalidade en liña
• 40 horas en grupo (Inglés para a internacionalización)
• 5 horas One to One (para abordar temas específicos de cada participante)
• 3 clases semanais (Luns – Mércores – Venres)
  Turnos: 8:00 a 9:00 / 9:00 a 10:00 / 20:00 a 21:00
• Inclúe: Proba de nivel, Seguimento personalizado, Campus virtual, Material, Informe de asistencia e Informe de rendemento.

7. Máis información

• Consultas técnicas: Este enderezo de correo está a ser protexido dos robots de correo lixo. Precisa activar o JavaScript para velo. | Este enderezo de correo está a ser protexido dos robots de correo lixo. Precisa activar o JavaScript para velo.
• Consultas académicas: Este enderezo de correo está a ser protexido dos robots de correo lixo. Precisa activar o JavaScript para velo.

Índice de contidos

Cápsula 1: "Entering Global Markets"

• Descrición: Introdución ao vocabulario e ás estratexias clave para acceder a mercados internacionais.

• Contido: Identificación de oportunidades de negocio noutros países e preparación de presentacións efectivas en inglés.

Cápsula 2: "Business Communication and Email Etiquette"

• Descrición: Comunicación empresarial a través de correos electrónicos e mensaxes formais.
• Contido: Redacción de correos claros, concisos e profesionais en inglés, e adaptación aos estilos comunicativos segundo o contexto cultural.

Cápsula 3: "International Negotiation Skills"

• Descrición: Habilidades de negociación efectiva no contexto dos negocios internacionais.
• Contido: Ferramentas para negociar en inglés, dende a presentación de propostas ata a xestión de obxeccións e técnicas para alcanzar acordos beneficiosos respectando as diferenzas culturais.

Cápsula 4: "Building and Maintaining International Business Relationships"

• Descrición: Estratexias para construír e manter relacións comerciais internacionais.
• Contido: Uso adecuado da linguaxe e sensibilidade cultural para establecer vínculos sólidos con socios e clientes internacionais.

Cápsula 5: "Presentations and Public Speaking in International Settings"

• Descrición: Habilidades para facer presentacións efectivas en inglés en contornas internacionais.
• Contido: Estruturación e exposición de presentacións profesionais en reunións, congresos e feiras internacionais.

Cápsula 6: "Cross-Cultural Communication in Business"

• Descrición: A importancia da comunicación intercultural nos negocios internacionais.
• Contido: Comprensión das diferenzas culturais que afectan a comunicación e adaptación do estilo de interacción para evitar malentendidos e fomentar a confianza.

Cápsula 7: "Managing International Projects and Teams"

• Descrición: Xestión de proxectos e equipos en contornos internacionais.
• Contido: Dirección de equipos multiculturais, xestión de proxectos a distancia e coordinación eficaz con colaboradores e socios internacionais.

Cápsula 8: "Global Marketing and Branding"

• Descrición: Adaptación de estratexias de márketing e branding a mercados internacionais.
• Contido: Creación e adaptación de campañas e identidades de marca en inglés para diferentes culturas e mercados.

Cadro docente

• Augusto Soto
• Jo-Anne Cardinal

>>DESCARGA O PROGRAMA<<

• A directora do Igape, Covadonga Toca, participa nun encontro de traballo cos proxectos da 6ª edición da Business Factory Aero, achegándolles os servizos da Oficina Económica de Galicia e as principais liñas de axuda activadas este ano polo Instituto
• Desde a súa posta en marcha, a BFAero apoiou 46 proxectos, contribuíndo á creación de 11 novas empresas tecnolóxicas, mobilizando máis de 7,5 millóns de euros en investimento, e facilitando a creación de máis de 220 empregos cualificados
• Esta sexta edición pechou a convocatoria cun récord de 110 iniciativas inscritas, das que un 57% proceden de emprendedores nacionais e internacionais

Santiago de Compostela, 10 de xullo de 2025

A directora do Igape, Covadonga Toca, participou esta mañá nun encontro de traballo coas startups seleccionadas na sexta edición da Business Factory Aero (BFAero), o programa impulsado pola Xunta de Galicia para apoiar o emprendemento no sector aeroespacial, aeronáutico e de vehículos non tripulados.

Na reunión, celebrada na Cidade da Cultura, participaron tamén representantes de empresas tractoras e entidades colaboradoras do ecosistema aeroespacial galego. O obxectivo do encontro foi establecer un diálogo directo entre a administración e os proxectos incubados e acelerados, co fin de detectar as súas necesidades máis urxentes e abrir novas vías de colaboración.

Durante a súa intervención, Covadonga Toca presentou os servizos da Oficina Económica de Galicia, un punto de contacto áxil e personalizado que ofrece atención técnica especializada, apoio operativo e acompañamento estratéxico nunha contorna de proximidade e confianza, especialmente útil para sectores de alta innovación como o aeroespacial.

Así mesmo, a directora do Igape explicou as principais liñas de axuda activadas este ano polo Instituto, destacando os programas dirixidos a startups, os préstamos directos a proxectos estratéxicos, os apoios á transformación dixital ou as novas ferramentas para impulsar a saída ao exterior das empresas galegas.

A xornada concluíu cun espazo de networking no que os representantes das startups –como Kreios Space, Slimop Space, BirdStrikeDrone, Arzeos Aircraft ou Dronomy– puideron compartir en primeira persoa as súas propostas e inquietudes con responsables do Igape e doutros organismos asistentes, como NTT Data, Airbus, Avincis ou a Fundación CEL.

Business Factory Aero (BFAero)

A BFAero ten demostrado nestes anos un forte impacto tanto económico como industrial en Galicia. Desde a súa posta en marcha no ano 2018, apoiou 46 proxectos, contribuíndo á creación de 11 novas empresas tecnolóxicas, mobilizando máis de 7,5 millóns de euros en investimento, e facilitando a creación de máis de 220 empregos cualificados. A sexta edición pechou a convocatoria cun récord de 110 iniciativas inscritas, das que un 57% proceden de emprendedores nacionais e internacionais.

Galicia consolídase así como un dos principais polos de innovación no sector aeroespacial no Estado, cun ecosistema dinámico que integra máis de 55 entidades públicas e privadas, todas elas unidas para impulsar solucións tecnolóxicas que respondan aos retos da industria e da sociedade.

• A directora do Igape, Covadonga Toca, participou hoxe na apertura do III Foro de Sustentabilidade e Economía Circular, destacando o novo contexto europeo e as oportunidades que abre a transición verde
• O Goberno galego activará nos próximos días unha nova convocatoria de axudas para apoiar as pemes na integración de criterios ambientais, sociais e de gobernanza (ASG)
• A liña está dotada con 1M€ e cubrirá ata o 80 % do investimento, incluíndo actuacións como eficiencia enerxética, deseño sostible, inclusión ou certificacións responsables

Santiago de Compostela, 10 de xullo de 2025

A directora do Igape, Covadonga Toca, participou esta mañá na apertura do III Foro de Sustentabilidade e Economía Circular, un encontro organizado pola Asociación para o Progreso da Dirección (APD), en colaboración co Círculo de Empresarios de Galicia e Nordés Club Empresarial, no que salientou o papel clave que xogan a innovación, a responsabilidade social e a eficiencia ambiental como motores de competitividade para o tecido empresarial galego.

Durante a súa intervención, Toca sinalou que “a sustentabilidade xa non é unha opción, senón o camiño que temos que percorrer se queremos que as nosas empresas sigan sendo competitivas, eficientes e comprometidas co futuro”. Así, subliñou que Galicia está a apostar por un modelo económico “máis forte porque é máis sostible, máis xusto porque é máis transparente, e máis competitivo porque está aliñado co futuro”.

A directora do Igape contextualizou os retos actuais nun escenario global marcado pola inestabilidade xeopolítica, o cambio climático ou a fragmentación das cadeas de subministración. Neste marco, destacou que a nova normativa europea, articulada arredor do Pacto Verde, “xa está impactando na actividade empresarial e marcará o rumbo económico dos vindeiros anos”. Medidas como o CBAM, a directiva sobre dilixencia debida ou os informes ASG obrigatorios configuran un novo marco ao que “cómpre adaptarse con visión e acción intelixente”.

Nova convocatoria de axudas ASG para pemes

Entre as medidas concretas impulsadas pola Xunta, Covadonga Toca anunciou que “nos próximos días publicarase unha nova liña de axudas para pemes. Trátase dunha convocatoria dotada con 1 millón de euros, que permitirá financiar ata o 80 % dos investimentos, materiais e inmateriais, cun límite de 60.000 euros por proxecto e coa posibilidade de recibir un anticipo automático do 80 % da axuda concedida.

As actuacións subvencionables abranguen desde a mellora da eficiencia enerxética ata o deseño de envases ecoeficientes, pasando pola implantación de programas de inclusión, ética laboral, transparencia financeira ou certificacións como B-Corp ou ISO 14006. A convocatoria tamén recolle proxectos que aposten polo eco-deseño, a reutilización de residuos ou a implementación de sistemas intelixentes para o control de consumos e emisións.

A directora do Igape avanzou tamén que se está a traballar en novas liñas de apoio para empresas certificadas como B Corp e na adaptación das axudas ao novo programa normativo simplificador en sostenibilidad empresarial aprobado pola Comisión Europea (Paquete Ómnibus), co obxectivo de garantir unha transición verde “realista, ordenada e xusta”.

• Destaca que Galicia vive un momento especialmente atractivo, bo para o emprendemento e cunhas cifras de paro que seguen mellorando
• Pon en valor que a nosa comunidade achega estabilidade, seguridade e brazos abertos aos empresarios quen queira vir a investir

O Grove (Pontevedra), 3 de xullo de 2025

O presidente da Xunta, Alfonso Rueda, salientou hoxe o papel clave da diáspora galega como aliada estratéxica para o desenvolvemento económico da nosa comunidade.

Durante a súa participación no acto de clausura das Xornadas do Encontro Mundial de Galegos, organizadas pola Asociación de Empresarios Galegos no Exterior (AEGAMA), que se celebraron na illa da Toxa (O Grove), Rueda agradeceu o labor da asociación para reforzar os vínculos coa diáspora nun momento para Galicia “especialmente atractivo”, bo para o emprendemento e cunhas cifras de paro que seguen mellorando.

Neste sentido, o titular do Goberno galego referiuse á marca Galicia Calidade como a que “nos fai recoñecibles fora da nosa terra” e sinalou que o triunfo do talento empresarial galego no exterior é positivo para Galicia e un motivo de orgullo, ademais da nosa “mellor marca de identidade”.

Para o presidente, a nosa comunidade achega estabilidade, seguridade e “brazos abertos” a quen queira vir a investir. Como consecuencia, asegurou que moitos empresarios estanse a fixar en Galicia e que o Goberno galego ten unhas “prioridades claras” para axudarlles a solucionar problemas como as vacantes de difícil cobertura ou o absentismo laboral.

A Xunta está traballando para facilitar o retorno das novas xeracións de galegos, con medidas como a Estratexia Galicia Retorna ata 2026, as bolsas BEME para estudos de mestrado ou o apoio a redes empresariais como a propia AEGAMA.

Estratexia da internacionalización 2021-2025

No ámbito económico, destacan os bos resultados da Estratexia da internacionalización 2021-2025, que permitiu superar por primeira vez os 31.000 millóns de euros en exportacións e sumar xa máis de 9.300 empresas exportadoras, así como a creación da Oficina Económica de Galicia, que abrirá a súa primeira sede fóra da Comunidade en Madrid. Ademais, xa se está a traballar na nova Estratexia de Internacionalización 2026-2030 para diversificar mercados e apoiar a proxección internacional das empresas galegas.

A partir das 9:00 h do 3 de xullo de 2025 ábrese o prazo de solicitude de servizos de Interim Management para as empresas galegas. O prazo permanecerá aberto ata as 14:00 h do luns 4 de agosto.

As solicitudes deberán ser presentadas telematicamente a través do procedemento IG309.2025.1 - SERVIZOS DE INTERIM MANAGEMENT PARA AS EMPRESAS GALEGAS, accesible a través da oficina virtual do IGAPE.

En que consiste?

O Interim Management consiste na incorporación temporal de profesionais altamente cualificados e con experiencia comprobada para xestionar situacións excepcionais nun tempo determinado e con obxectivos concretos, como reestruturacións empresariais, procesos de transformación, substitución temporal dun directivo, desenvolvemento de novos negocios ou mercados, expansión internacional, xestión de crises, etc. Estes expertos aportan unha visión externa, neutral e orientada a resultados, que lle permite á empresa implementar cambios en prazos máis curtos e con maior efectividade.

O valor do Interim Management radica na súa capacidade para ofrecer solucións áxiles e adaptadas ás necesidades específicas da empresa, reducindo riscos e optimizando recursos. Ademais, o seu enfoque temporal con prazo reducido e determinado, permite ás empresas manter o control dos seus custos, mentres se benefician de coñecementos estratéxicos que fortalecen a súa posición competitiva no mercado.

En definitiva, o Interim Management non só brinda soporte en situacións críticas, senón que tamén impulsa o crecemento e a innovación nas empresas, axudándoas a superar os seus desafíos con éxito e a prepararse para un futuro sostible.

Características básicas dos servizos prestados

• Asumirán unha misión executiva concreta
• Durante un período de tempo determinado
• Con obxectivos previamente definidos

Os servizos asignado de Interim Management, garantirán os recursos necesarios, en particular:

• Profesionais cualificados para a xestión das empresas seleccionadas
• Capacidade para a supervisión dos procesos

Custo do servizo

Cada servizo de Interim Management asignado terá unha duración de 6 meses, cunha dedicación á empresa de 20 horas semanais por parte do Manager asignado.

Estipúlase un custo de 30.000 € por servizo especializado, do que o IGAPE asume o 75 % (22.500 €) e a empresa beneficiaria o 25 % (7.500 €), mais o IVE do custo total se fose de aplicación.

Condicións necesarias para a convocatoria de empresas participantes no proxecto piloto

Esixiranse ás empresas solicitantes as seguintes declaracións:

1. Que non incorre en ningunha das circunstancias previstas no artigo 10.2 e 10.3 da Lei 9/2007, do 13 de xuño, de subvencións de Galicia.
2. Que non está suxeita a unha orde de recuperación pendente tras unha decisión da Comisión que teña declarada unha axuda ilegal e incompatible co mercado común.
3. Que non ten percibido outras subvencións que de xeito acumulado coa prevista neste proxecto piloto superen o 100% do custo para a realización da actividade.
4. Que non percibiu axudas en réxime de minimis nos tres últimos anos mais o que vai do presente ano que, acumuladas á axuda para o servizo de Interim Management, superen os 300.000 €.

AIME e APD deberán recadar das empresas, unha vez seleccionadas e antes de iniciar os servizos a seguinte documentación, que será remitida ao Igape:

• Escritura de constitución e estatutos debidamente inscritos no rexistro competente, e modificacións posteriores destes.
• Certificado de estar ao día no pagamento coa Seguridade Social.
• Certificado de estar ao día no pagamento coa Consellería de Facenda e Administración Pública.
• Certificado de estar ao día nas obrigas tributarias coa AEAT.
• Certificado da AEAT de alta no Imposto de Actividades Económicas (IAE).

Criterios de selección das empresas obxecto do servizo piloto de Interim Management

1. Obxectivo do servizo solicitado. Serán prioritarios, por este orde os seguintes servizos:

1. Abordar unha ameaza importante de insolvencia ou quebra empresarial.
2. Xestión dun cambio organizativo importante.
3. Desenvolvemento de novos negocios ou novos mercados.
4. Profesionalización dunha startup.
5. Substitución temporal dun cargo directivo.
6. Outras situacións empresariais propicias para a intervención de IM.

2. Tamaño da empresa. Pola tipoloxía do servizo a prestar, serán prioritarias segundo o seu tamaño, polo seguinte orde de prelación:

1. As medianas empresas.
2. As pequenas empresas.
3. As grandes empresas.
4. As microempresas e autónomos.

3. Actividade. As actividades empresariais priorizaranse do seguinte xeito:

1. Actividades industriais.
2. Actividades de servizos.

Solicitudes

A través do enlace facilitado na oficina virtual do IGAPE, os solicitantes deberán cubrir os datos no formulario de solicitude.

Para poder presentar a solicitude por medios electrónicos, os solicitantes deberán reunir os seguintes requisitos:

1. As solicitudes subscribiranse directamente polas persoas interesadas ou por persoa que acredite a súa representación por calquera medio válido en dereito.
2. Ter en vigor un certificado dixital dos validados pola plataforma @firma da Administración Xeral do Estado (http://administracionelectronica.gob.es/PAe/aFirma-Anexo-PSC).

Unha vez asinado o formulario de solicitude, mediante certificado dixital, procederase á anotación dunha entrada no Rexistro Electrónico da Xunta de Galicia. No momento da presentación o rexistro expedirá, empregando as características da aplicación telemática, un recibo no que quedará constancia do feito da presentación.

>>FAQS<<

• A directora do Igape, Covadonga Toca, participou hoxe nunha xornada sobre gobernanza e retos do sector organizada pola Cámara de Comercio de Santiago, Abanca e a Universidade Intercontinental da Empresa (UIE)
• Reafirma o compromiso do Goberno galego no acompañamento á empresa familiar en procesos como o relevo xeracional, a profesionalización ou a dixitalización
• Lembra que máis do 92 % do tecido empresarial en Galicia está formado por empresas familiares, que xeran o 82 % do emprego privado e achegan o 85 % do Valor Engadido Bruto

Santiago de Compostela, 01 de xullo de 2025

A directora do Igape, Covadonga Toca, participou esta mañá na xornada Retos e sistemas de gobernanza na empresa familiar, organizada pola Cámara de Comercio de Santiago, Abanca e a Universidade Intercontinental da Empresa (UIE), onde destacou a importancia estratéxica da empresa familiar como “columna vertebral do tecido económico e social galego”.

Durante a súa intervención, a representante da Xunta puxo en valor o peso deste modelo empresarial na comunidade, que representa máis do 92 % das empresas activas, xera o 82 % do emprego privado e achega o 85 % do Valor Engadido Bruto, situándose moi por enriba da media estatal. “As empresas familiares achegan estabilidade e confianza nun contexto económico global volátil e cambiante”, sinalou Toca Carús, quen tamén subliñou o seu compromiso co desenvolvemento local e a súa vocación de permanencia.

A directora do Igape apuntou tamén aos desafíos que afronta o sector, como a adaptación tecnolóxica, as novas dinámicas fiscais ou as tensións comerciais internacionais, e asegurou que o Goberno galego traballa para ofrecer respostas e facilitar o camiño ao crecemento e á continuidade destas empresas.

Apoio ao relevo xeracional e á boa gobernanza

Toca Carús puxo o foco na importancia da boa gobernanza como ferramenta para asegurar a continuidade, aliñar os intereses familiares e empresariais e abrirse ao talento e á innovación. “Unha boa gobernanza permite manter o carácter familiar sen renunciar á profesionalización”, sinalou.

A directora repasou tamén os principais instrumentos de apoio do Igape, como o programa Reacciona, os plans de formación para directivos, as liñas de impulso á dixitalización, á internacionalización e á innovación, así como as medidas para avanzar en criterios Ambientais, Sociais e de Gobernanza (ASG). Tamén destacou a función da Oficina Económica de Galicia na simplificación administrativa.

No peche da súa intervención, a directora do Igape apelou á cooperación institucional como ferramenta para reforzar a competitividade e a sustentabilidade da empresa familiar galega. “Desde o Igape reafirmamos o noso compromiso con este modelo empresarial e reiteramos a nosa plena disposición a seguir traballando conxuntamente para facer de Galicia unha terra de oportunidades, de arraigo e de innovación”, concluíu.

A Rexión de Murcia acollerá o vindeiro 12 de novembro a gala de entrega da segunda edición dos Recoñecementos Top 101 Spain Up Nation ao emprendemento con impacto en España, organizados pola Asociación Española de Axencias de Desenvolvemento Rexional (Foro ADR) e a Empresa Nacional de Innovación (ENISA), en representación da marca Spain Up Nation. A presentación de candidaturas estará aberta ata o 12 de setembro a través da web destes premios Top 101 Spain Up Nation, onde tamén se atopan as bases da convocatoria.

O obxectivo deste recoñecemento é identificar, recoñecer e apoiar, desde o sector público, o emprendemento innovador e o crecemento empresarial de recente traxectoria no país. Neste sentido, poden participar empresas de calquera sector de actividade, creadas nos últimos cinco anos e cun alto compoñente de innovación, así como potencial de crecemento.

Ademais de distinguir e apoiar o emprendemento innovador, estes premios teñen como finalidade fomentar, compartir e difundir as claves da innovación para transformar proxectos e empresas en novos modelos de produción, distribución e consumo, máis competitivos, sostibles e exportables; dar visibilidade a empresas con valor engadido, innovadoras, tecnolóxicas e creativas, con potencial para competir no mercado global; e identificar aquelas empresas que, polo seu impacto social, económico e medioambiental, achegan valor á sociedade contribuíndo ao logro dos Obxectivos de Desenvolvemento Sostible (ODS).

O certame, que conta coa colaboración de todas as ADR de España, desenvolverase en dúas fases: unha rexional e outra nacional, onde se seleccionarán as empresas en función de distintos criterios. Na fase rexional, teranse en conta a capacidade e liderado do equipo emprendedor, o grao de innovación do modelo de negocio e o potencial de escalabilidade e capacidade de internacionalización. Así mesmo, avaliarase a viabilidade e a previsión económico-financeira da empresa e o seu impacto social, segundo a súa contribución aos ODS. Pola súa parte, na fase nacional, ademais dos criterios anteriores, realizarase unha avaliación do modelo de impacto social, de negocio e medioambiental integrado na empresa.

A Consellería de Empresa, Emprego e Economía Social da Rexión de Murcia, a través do Instituto de Fomento, será a encargada de organizar a gala final da segunda edición destes recoñecementos, que se celebrará o vindeiro 12 de novembro no Teatro Romea de Murcia. Nela reuniranse as 101 empresas TOP101, das cales, entre as que teñan maior capacidade de investir, terán a oportunidade de asistir e facer un pitch no Foro de investimento WaykUp, que tamén organiza o Instituto de Fomento nesas datas.

Proceso de selección

Para seleccionar as empresas que poderán optar aos recoñecementos Top101 Spain Up Nation, os Comités Rexionais que nomearán as Axencias de Desenvolvemento Rexional de cada comunidade ou cidade autónoma realizarán unha valoración inicial na que seleccionarán catro empresas finalistas cada un. De aí sairán ata un total de 76 empresas finalistas, que pasarán á fase nacional. As 25 restantes, ata conformar o TOP101 Spain Up Nation, serán seleccionadas con independencia do territorio no que se atope cada unha delas, por un Comité Nacional.

As empresas interesadas poden consultar as bases e presentar a súa candidatura a través da web oficial dos premios Top 101 Spain Up Nation.