• O Diario Oficial de Galicia publica a nova convocatoria dun programa que destina un millón de euros a reforzar a aposta por unha economía circular, inclusiva e eficiente
• As subvencións cubrirán ata o 80 % dos investimentos, cun máximo de 60.000 euros por proxecto, e se contemplan anticipos automáticos do 80 % da axuda concedida
• O prazo de solicitude estará aberto ata o 30 de setembro e as actuacións subvencionables inclúen desde o eco-deseño ata programas de inclusión e transparencia

Santiago de Compostela, 28 de xullo de 2025

O Diario Oficial de Galicia publica hoxe a nova convocatoria de axudas para a implantación de medidas ASG –Ambientais, Sociais e de Gobernanza– nas empresas galegas. Trátase da segunda edición desta liña, dotada con 1 millón de euros, que busca fomentar modelos empresariais máis responsables, aliñados cos principios da economía circular e cos retos ambientais e sociais actuais.

A convocatoria, en réxime de concorrencia non competitiva, está dirixida a empresas, así como a persoas autónomas con centro de traballo en Galicia, e cobre ata o 80 % do custo dos investimentos subvencionables. A Xunta facilitará, ademais, o acceso a un anticipo do 80 % da axuda concedida, sen necesidade de garantías, co obxectivo de impulsar a posta en marcha inmediata dos proxectos.

As empresas poderán obter unha subvención máxima de 60.000 euros por proxecto, ou de ata 30.000 euros no caso de actuacións exclusivamente de consultoría, cun mínimo de investimento de 3.000 euros.

A nova convocatoria abrangue actuacións que permitan avanzar en catro ámbitos: ambiental, social, de gobernanza e global, con medidas como a redución do consumo de recursos naturais, a mellora da eficiencia enerxética, a reutilización de residuos, o desenvolvemento de envases ecoeficientes ou a implantación de prácticas laborais éticas e programas de diversidade.

Tamén se subvencionarán accións como auditorías de riscos ASG, certificacións B-Corp, análise de ciclo de vida dos produtos, mellora da transparencia financeira ou deseño de códigos de conduta empresarial.

O prazo de presentación de solicitudes abrirase cinco días hábiles despois da publicación hoxe no DOG e pechará o 30 de setembro de 2025. As solicitudes tramitaranse por orde de entrada, sen concorrencia competitiva, co fin de facilitar a participación do maior número posible de empresas que cumpran os requisitos.

Con esta nova convocatoria, a Xunta reafirma o seu compromiso coa sustentabilidade e a competitividade do tecido produtivo galego, apostando por unha economía máis verde, responsable e innovadora. A iniciativa busca contribuír á mellora da calidade de vida da cidadanía galega a través do apoio a empresas que apostan pola eficiencia, a igualdade e a transparencia.

• A conselleira de Economía e Industria, María Jesús Lorenzana, visitou esta mañá no Milladoiro (Ames) as instalacións das empresas Binarial e Sinerxia
• A conselleira destaca que estes apoios que xa contaban cun orzamento de 10 millóns de euros foron “un éxito para as empresas” e que a ampliación se publicará no Diario Oficial de Galicia nos vindeiros días
• O novidoso programa IA360 convocado por primeira vez este 2025 busca o desenvolvemento tecnolóxico e a innovación a través do uso da intelixencia artificial
• Lorenzana subliña que para a Xunta é fundamental apoiar e acompañar ás empresas que aportan solucións tecnolóxicas avanzadas á industria para incrementar a súa competitividade

Ames (A Coruña), 29 de xullo de 2025

A conselleira de Economía e Industria, María Jesús Lorenzana, anunciou hoxe a ampliación en 5 millóns de euros das axudas destinadas a proxectos baseados en intelixencia artificial para “chegar ao maior número de empresas posible”.

A conselleira visitou este mediodía no Milladoiro (Ames) as instalacións das empresas Binarial e Sinerxia que xa están a aplicar solucións tecnolóxicas, onde destacou que estes apoios contaban inicialmente cunha dotación de 10 millóns de euros e foron “un éxito para as empresas”. Deste xeito, o Diario Oficial de Galicia (DOG) publicará nos vindeiros días a ampliación do orzamento do novidoso Programa IA360 que se convocou por primeira vez este ano e que está destinado ao desenvolvemento tecnolóxico e da innovación a través da aplicación da intelixencia artificial aos distintos procesos produtivos e á comercialización.

Durante a visita, Lorenzana subliñou que “para nós é fundamental apoiar e acompañar ás empresas que agora mesmo está aportando solucións tecnolóxicas avanzadas á industria que aumentan a competitividade empresarial e modernizan a outras empresas”, apuntou.

Nesta liña, explicou que estas axudas está pensadas para que “pouco a pouco, especialmente as pemes galegas, poidan investir en aumentar a súa competitividade incrementando esas solucións tecnolóxicas e esa aplicación das novas tecnoloxías e da intelixencia artificial a todo o proceso produtivo”.

Finalmente, María Jesús Lorenzana, lembrou o importante apoio do Goberno galego á transformación dixital nesta lexislatura coa creación dunha nova área especifica de innovación dentro do Igape e dotada con máis de 80 millóns de euros para fortalecer o tecido produtivo.

• A directora do Igape, Covadonga Toca, participou no evento “Estartapero”, celebrado na praia de Patos (Nigrán), para presentar as oportunidades que ofrece o programa
• A iniciativa combina lecer e networking para visibilizar o apoio da Xunta ao talento emprendedor e ás empresas emerxentes innovadoras

Nigrán (Pontevedra), 23 de xullo de 2025

A directora do Igape, Covadonga Toca, participou esta tarde no evento “Estartapero”, unha cita informal e participativa co ecosistema emprendedor da zona sur da provincia de Pontevedra, celebrada na praia de Patos, en Nigrán. O encontro, incluído dentro das accións de difusión do programa Re-acciona, tivo como obxectivo achegar os servizos e oportunidades que a Xunta pon á disposición de persoas emprendedoras e pequenas e medianas empresas galegas.

A través dun formato estival e distendido, a xornada serviu para resolver dúbidas, intercambiar ideas e fomentar sinerxías entre empresas emerxentes innovadoras. Durante o acto, a directora do Igape destacou que o Re-acciona ofrece servizos de profesionalización e innovación cofinanciados ao 80 %, orientados á mellora da competitividade, á captación de talento, á sustentabilidade, á optimización financeira e ao lanzamento de novos produtos e servizos.

O evento contou cunha ampla participación de emprendedores, especialmente da área de Vigo e a comarca, que puideron coñecer de primeira man como acceder ao programa a través das entidades colaboradoras. Re-acciona forma parte das ferramentas do Igape para impulsar o tecido empresarial galego, con especial atención ás pemes con capacidade de transformación e crecemento. O evento representou un paso máis no esforzo da Xunta por fomentar unha nova cultura empresarial baseada na colaboración, a innovación e o talento local.

• A directora do Igape destaca o papel do emprendemento como motor dunha Galicia máis innovadora e competitiva
• Subliña que as startups seleccionadas desenvolveron solucións reais para os ámbitos da auga, a construción, o sector primario, os residuos téxtiles e a pegada de carbono
• Sinala que a segunda edición, xa en marcha, conta con 15 proxectos en aceleración e o respaldo, unha vez máis, de empresas tractoras, centros científicos e investidores especializados

Santiago de Compostela, 18 de xullo de 2025

A directora do Igape, Covadonga Toca, participou hoxe na clausura da primeira edición da aceleradora BF ClimaTech, impulsada pola Xunta de Galicia en colaboración co clúster Viratec, e que se salda coa creación de catro novas empresas verdes e máis de 300 contactos comerciais.

Esta primeira edición, expuxo Toca Carús, iniciou a súa andaina en outubro do ano pasado recibindo 31 candidaturas, das cales se seleccionaron cinco proxectos innovadores centrados na transición ecolóxica, a economía circular e a redución de emisións. Ademais das empresas creadas, leváronse a cabo máis dun cento de actividades de apoio -titorizacións, mentorías, encontros con investidores e eventos-, que fortaleceron o ecosistema emprendedor verde en Galicia.

Os proxectos participantes foron BioAqua, un aditivo biolóxico para descontaminar augas, en colaboración con Viaqua; Agrolinera, centrado na dixitalización da recollida de residuos gandeiros, con apoio de Agroamb; Arraigo, que promove vivendas de madeira industrializadas e emisións cero, en colaboración con Finsa; Wastex, que aplica intelixencia artificial para a valorización de residuos téxtiles, con Sogama; e Carbon Manager CO₂, unha ferramenta dixital para calcular e reducir a pegada de carbono empresarial.

No seu discurso, Covadonga Toca puxo en valor o modelo colaborativo da aceleradora, que combina talento emprendedor, apoio científico e implicación do tecido empresarial e financeiro: “A participación activa de empresas tractoras e investidores permitiu validar solucións en contornas reais e acurtar o camiño entre a idea e o mercado”.

A directora do Igape lembrou que BF ClimaTech forma parte da rede de aceleradoras da Xunta, que xa ten apoiado máis de 830 proxectos e xerado máis de 1.400 empregos cualificados en sectores como a automoción, a aeronáutica, a alimentación ou o deporte. Neste sentido, Toca lembrou que ClimaTech se suma a outras iniciativas xa consolidadas como BFAuto, BFAero, BFFood, ViaGalicia ou BFSport.

Toca Carús avanzou tamén que a segunda edición da aceleradora xa está en marcha desde marzo, sumando 15 proxectos que traballan en itinerarios de incubación, aceleración ou consolidación, co acompañamento de centros científicos, empresas e investidores especializados. Esta nova convocatoria prolongarase ata finais de ano.

A directora pechou a súa intervención reafirmando o compromiso da Xunta co emprendemento innovador e coa construción dunha Galicia “máis verde, máis competitiva e máis internacional” a través de instrumentos como a Oficina Económica de Galicia, liñas específicas de financiamento ou o impulso continuo a novas aceleradoras en sectores como a saúde ou as enerxías renovables.

• A directora do Igape, Covadonga Toca, participou no encontro empresarial Talento que transforma: Interim Management para os retos reais das pemes galegas, no que presentou esta iniciativa destinada a incorporar directivos expertos de forma temporal
• A Xunta financiará ata o 75 % do custo do servizo, cun máximo de 200.000 euros en axudas directas, para apoiar procesos de cambio, crecemento ou reorganización
• Destaca que o proxecto enmárcase nunha estratexia máis ampla que aposta polo talento como motor da transformación económica e pola colaboración público-privada

Santiago de Compostela, 17 de xullo de 2025

A directora do Instituto Galego de Promoción Económica (Igape), Covadonga Toca, participou esta mañá en Santiago no encontro empresarial Talento que transforma: Interim Management para os retos reais das pemes galegas, no que presentou o novo proxecto piloto da Xunta de Galicia para facilitar que as pemes en etapas clave da súa evolución poidan contar co asesoramento de directivos experimentados.

A través deste programa, desenvolvido polo Igape en colaboración coa Asociación de Interim Management de España (AIME) e a Asociación para o Progreso da Dirección (APD), as pequenas e medianas empresas poderán incorporar, durante seis meses e con dedicación parcial, profesionais de alta dirección que lideren retos concretos e impulsen procesos de transformación, expansión ou reorganización interna.

O Goberno galego, expuxo Toca Carús, asumirá ata o 75  % do custo do servizo, cun límite de 200.000 euros en axudas directas, mentres que as empresas asumirán o 25  % restante. As solicitudes deberán presentarse telematicamente a través da oficina virtual do Igape ata o 4 de agosto.

Durante a súa intervención, a directora do Igape salientou que “o acceso ao talento non pode ser un luxo, senón unha panca de transformación accesible para todo o tecido empresarial”. Destacou ademais que o interim management permite incorporar liderado estratéxico de maneira flexible e eficaz, sen incrementar a estrutura fixa das organizacións.

A Xunta enmarca esta iniciativa nunha aposta máis ampla por profesionalizar a xestión empresarial, fortalecer a competitividade e consolidar un modelo económico baseado na innovación, o liderado e a sustentabilidade. “Queremos que as nosas pemes poidan avanzar con seguridade e apoio, minimizando riscos e garantindo decisións áxiles e eficaces”, asegurou Toca.

A xornada, que reuniu a representantes empresariais, profesionais da dirección e entidades colaboradoras, serviu tamén para visibilizar exemplos de éxito e debater sobre o papel do liderado estratéxico na evolución das empresas. A directora do Igape concluíu sinalando que “só con empresas ben dirixidas Galicia poderá seguir medrando de forma sostible e xerando oportunidades para todos”.

>>MÁIS INFORMACIÓN SOBRE O PROCEDEMENTO<<

>>FAQS<<

O vindeiro xoves 17 de xullo, ás 11:30 h, no Hotel Oca Puerta del Camino (Santiago de Compostela), terá lugar o encontro empresarial "Talento que transforma: Interim Management para os retos reais das empresas galegas".

A Xunta de Galicia, a través do Igape, en colaboración con APD e AIME, impulsan un proxecto piloto para que as pemes galegas descubran o valor do interim management e teñan acceso a directivos/as expertos/as en etapas críticas da súa evolución. Para iso, celebramos un encontro que pretende dar a coñecer as características e vantaxes deste proxecto piloto que busca achegar solucións de alto valor engadido a empresas que necesitan avanzar en momentos decisivos.

O prazo de solicitude de servizos de Interim Management para as empresas galegas permanecerá aberto ata as 14:00 h do luns 4 de agosto.

As solicitudes deberán ser presentadas telematicamente a través do procedemento IG309.2025.1 - SERVIZOS DE INTERIM MANAGEMENT PARA AS EMPRESAS GALEGAS, accesible a través da oficina virtual do IGAPE.

Interim Management

O Interim Management é un modelo de xestión directiva contrastado que permite incorporar talento directivo senior de forma temporal e flexible, achegando visión estratéxica e capacidade de execución inmediata á empresa para resolver unha necesidade conxuntural nunha empresa durante un período de tempo determinado e cuns obxectivos concretos.

>>MÁIS INFORMACIÓN SOBRE O PROCEDEMENTO<<

>>MÁIS INFORMACIÓN E INSCRICIÓNS AO ENCONTRO<<

>>FAQS<<

1. Prazas e prazo de inscrición

• 3 grupos formativos: 10 alumnos por grupo
• Prazo de inscrición: ata o 8/09/2025 [Prazas xa cubertas]
• Inscrición de balde

2. Destinatarios

Profesionais do ámbito comercial, do márketing e da dirección empresarial de empresas galegas.

3. Descrición xeral

Con unha metodoloxía flexible e centrada no mundo real, este curso ofrece unha experiencia de aprendizaxe 100% en liña, ideal para quen desexe mellorar o seu inglés sen comprometer a súa axenda profesional.

Combinamos tecnoloxía de vangarda con contidos altamente especializados, garantindo unha formación personalizada adaptada ás necesidades específicas de cada profesional. Dende reunións e negociacións ata redacción de correos formais e presentacións, este curso axudarache a comunicarte con eficacia en calquera situación profesional.

4. Obxectivos

• Desenvolver habilidades comunicativas en inglés para contextos empresariais e de negocios internacionais.
• Adquirir vocabulario especializado para a expansión global de produtos e servizos.
• Aprender a negociar, establecer relacións comerciais e xestionar operacións nos mercados internacionais.
• Adaptarse ás diferenzas culturais e lingüísticas no entorno empresarial global.

5. Duración

• Comezo: 15/09/2025
• Finalización: 17/12/2025

6. Metodoloxía e formato

• Modalidade en liña
• 40 horas en grupo (Inglés para a internacionalización)
• 5 horas One to One (para abordar temas específicos de cada participante)
• 3 clases semanais (Luns – Mércores – Venres)
  Turnos: 8:00 a 9:00 / 9:00 a 10:00 / 20:00 a 21:00
• Inclúe: Proba de nivel, Seguimento personalizado, Campus virtual, Material, Informe de asistencia e Informe de rendemento.

7. Máis información

• Consultas técnicas: Este enderezo de correo está a ser protexido dos robots de correo lixo. Precisa activar o JavaScript para velo. | Este enderezo de correo está a ser protexido dos robots de correo lixo. Precisa activar o JavaScript para velo.
• Consultas académicas: Este enderezo de correo está a ser protexido dos robots de correo lixo. Precisa activar o JavaScript para velo.

Índice de contidos

Cápsula 1: "Entering Global Markets"

• Descrición: Introdución ao vocabulario e ás estratexias clave para acceder a mercados internacionais.

• Contido: Identificación de oportunidades de negocio noutros países e preparación de presentacións efectivas en inglés.

Cápsula 2: "Business Communication and Email Etiquette"

• Descrición: Comunicación empresarial a través de correos electrónicos e mensaxes formais.
• Contido: Redacción de correos claros, concisos e profesionais en inglés, e adaptación aos estilos comunicativos segundo o contexto cultural.

Cápsula 3: "International Negotiation Skills"

• Descrición: Habilidades de negociación efectiva no contexto dos negocios internacionais.
• Contido: Ferramentas para negociar en inglés, dende a presentación de propostas ata a xestión de obxeccións e técnicas para alcanzar acordos beneficiosos respectando as diferenzas culturais.

Cápsula 4: "Building and Maintaining International Business Relationships"

• Descrición: Estratexias para construír e manter relacións comerciais internacionais.
• Contido: Uso adecuado da linguaxe e sensibilidade cultural para establecer vínculos sólidos con socios e clientes internacionais.

Cápsula 5: "Presentations and Public Speaking in International Settings"

• Descrición: Habilidades para facer presentacións efectivas en inglés en contornas internacionais.
• Contido: Estruturación e exposición de presentacións profesionais en reunións, congresos e feiras internacionais.

Cápsula 6: "Cross-Cultural Communication in Business"

• Descrición: A importancia da comunicación intercultural nos negocios internacionais.
• Contido: Comprensión das diferenzas culturais que afectan a comunicación e adaptación do estilo de interacción para evitar malentendidos e fomentar a confianza.

Cápsula 7: "Managing International Projects and Teams"

• Descrición: Xestión de proxectos e equipos en contornos internacionais.
• Contido: Dirección de equipos multiculturais, xestión de proxectos a distancia e coordinación eficaz con colaboradores e socios internacionais.

Cápsula 8: "Global Marketing and Branding"

• Descrición: Adaptación de estratexias de márketing e branding a mercados internacionais.
• Contido: Creación e adaptación de campañas e identidades de marca en inglés para diferentes culturas e mercados.

Cadro docente

• Augusto Soto
• Jo-Anne Cardinal

>>DESCARGA O PROGRAMA<<

• A directora do Igape, Covadonga Toca, participa nun encontro de traballo cos proxectos da 6ª edición da Business Factory Aero, achegándolles os servizos da Oficina Económica de Galicia e as principais liñas de axuda activadas este ano polo Instituto
• Desde a súa posta en marcha, a BFAero apoiou 46 proxectos, contribuíndo á creación de 11 novas empresas tecnolóxicas, mobilizando máis de 7,5 millóns de euros en investimento, e facilitando a creación de máis de 220 empregos cualificados
• Esta sexta edición pechou a convocatoria cun récord de 110 iniciativas inscritas, das que un 57% proceden de emprendedores nacionais e internacionais

Santiago de Compostela, 10 de xullo de 2025

A directora do Igape, Covadonga Toca, participou esta mañá nun encontro de traballo coas startups seleccionadas na sexta edición da Business Factory Aero (BFAero), o programa impulsado pola Xunta de Galicia para apoiar o emprendemento no sector aeroespacial, aeronáutico e de vehículos non tripulados.

Na reunión, celebrada na Cidade da Cultura, participaron tamén representantes de empresas tractoras e entidades colaboradoras do ecosistema aeroespacial galego. O obxectivo do encontro foi establecer un diálogo directo entre a administración e os proxectos incubados e acelerados, co fin de detectar as súas necesidades máis urxentes e abrir novas vías de colaboración.

Durante a súa intervención, Covadonga Toca presentou os servizos da Oficina Económica de Galicia, un punto de contacto áxil e personalizado que ofrece atención técnica especializada, apoio operativo e acompañamento estratéxico nunha contorna de proximidade e confianza, especialmente útil para sectores de alta innovación como o aeroespacial.

Así mesmo, a directora do Igape explicou as principais liñas de axuda activadas este ano polo Instituto, destacando os programas dirixidos a startups, os préstamos directos a proxectos estratéxicos, os apoios á transformación dixital ou as novas ferramentas para impulsar a saída ao exterior das empresas galegas.

A xornada concluíu cun espazo de networking no que os representantes das startups –como Kreios Space, Slimop Space, BirdStrikeDrone, Arzeos Aircraft ou Dronomy– puideron compartir en primeira persoa as súas propostas e inquietudes con responsables do Igape e doutros organismos asistentes, como NTT Data, Airbus, Avincis ou a Fundación CEL.

Business Factory Aero (BFAero)

A BFAero ten demostrado nestes anos un forte impacto tanto económico como industrial en Galicia. Desde a súa posta en marcha no ano 2018, apoiou 46 proxectos, contribuíndo á creación de 11 novas empresas tecnolóxicas, mobilizando máis de 7,5 millóns de euros en investimento, e facilitando a creación de máis de 220 empregos cualificados. A sexta edición pechou a convocatoria cun récord de 110 iniciativas inscritas, das que un 57% proceden de emprendedores nacionais e internacionais.

Galicia consolídase así como un dos principais polos de innovación no sector aeroespacial no Estado, cun ecosistema dinámico que integra máis de 55 entidades públicas e privadas, todas elas unidas para impulsar solucións tecnolóxicas que respondan aos retos da industria e da sociedade.

• A directora do Igape, Covadonga Toca, participou hoxe na apertura do III Foro de Sustentabilidade e Economía Circular, destacando o novo contexto europeo e as oportunidades que abre a transición verde
• O Goberno galego activará nos próximos días unha nova convocatoria de axudas para apoiar as pemes na integración de criterios ambientais, sociais e de gobernanza (ASG)
• A liña está dotada con 1M€ e cubrirá ata o 80 % do investimento, incluíndo actuacións como eficiencia enerxética, deseño sostible, inclusión ou certificacións responsables

Santiago de Compostela, 10 de xullo de 2025

A directora do Igape, Covadonga Toca, participou esta mañá na apertura do III Foro de Sustentabilidade e Economía Circular, un encontro organizado pola Asociación para o Progreso da Dirección (APD), en colaboración co Círculo de Empresarios de Galicia e Nordés Club Empresarial, no que salientou o papel clave que xogan a innovación, a responsabilidade social e a eficiencia ambiental como motores de competitividade para o tecido empresarial galego.

Durante a súa intervención, Toca sinalou que “a sustentabilidade xa non é unha opción, senón o camiño que temos que percorrer se queremos que as nosas empresas sigan sendo competitivas, eficientes e comprometidas co futuro”. Así, subliñou que Galicia está a apostar por un modelo económico “máis forte porque é máis sostible, máis xusto porque é máis transparente, e máis competitivo porque está aliñado co futuro”.

A directora do Igape contextualizou os retos actuais nun escenario global marcado pola inestabilidade xeopolítica, o cambio climático ou a fragmentación das cadeas de subministración. Neste marco, destacou que a nova normativa europea, articulada arredor do Pacto Verde, “xa está impactando na actividade empresarial e marcará o rumbo económico dos vindeiros anos”. Medidas como o CBAM, a directiva sobre dilixencia debida ou os informes ASG obrigatorios configuran un novo marco ao que “cómpre adaptarse con visión e acción intelixente”.

Nova convocatoria de axudas ASG para pemes

Entre as medidas concretas impulsadas pola Xunta, Covadonga Toca anunciou que “nos próximos días publicarase unha nova liña de axudas para pemes. Trátase dunha convocatoria dotada con 1 millón de euros, que permitirá financiar ata o 80 % dos investimentos, materiais e inmateriais, cun límite de 60.000 euros por proxecto e coa posibilidade de recibir un anticipo automático do 80 % da axuda concedida.

As actuacións subvencionables abranguen desde a mellora da eficiencia enerxética ata o deseño de envases ecoeficientes, pasando pola implantación de programas de inclusión, ética laboral, transparencia financeira ou certificacións como B-Corp ou ISO 14006. A convocatoria tamén recolle proxectos que aposten polo eco-deseño, a reutilización de residuos ou a implementación de sistemas intelixentes para o control de consumos e emisións.

A directora do Igape avanzou tamén que se está a traballar en novas liñas de apoio para empresas certificadas como B Corp e na adaptación das axudas ao novo programa normativo simplificador en sostenibilidad empresarial aprobado pola Comisión Europea (Paquete Ómnibus), co obxectivo de garantir unha transición verde “realista, ordenada e xusta”.

• Destaca que Galicia vive un momento especialmente atractivo, bo para o emprendemento e cunhas cifras de paro que seguen mellorando
• Pon en valor que a nosa comunidade achega estabilidade, seguridade e brazos abertos aos empresarios quen queira vir a investir

O Grove (Pontevedra), 3 de xullo de 2025

O presidente da Xunta, Alfonso Rueda, salientou hoxe o papel clave da diáspora galega como aliada estratéxica para o desenvolvemento económico da nosa comunidade.

Durante a súa participación no acto de clausura das Xornadas do Encontro Mundial de Galegos, organizadas pola Asociación de Empresarios Galegos no Exterior (AEGAMA), que se celebraron na illa da Toxa (O Grove), Rueda agradeceu o labor da asociación para reforzar os vínculos coa diáspora nun momento para Galicia “especialmente atractivo”, bo para o emprendemento e cunhas cifras de paro que seguen mellorando.

Neste sentido, o titular do Goberno galego referiuse á marca Galicia Calidade como a que “nos fai recoñecibles fora da nosa terra” e sinalou que o triunfo do talento empresarial galego no exterior é positivo para Galicia e un motivo de orgullo, ademais da nosa “mellor marca de identidade”.

Para o presidente, a nosa comunidade achega estabilidade, seguridade e “brazos abertos” a quen queira vir a investir. Como consecuencia, asegurou que moitos empresarios estanse a fixar en Galicia e que o Goberno galego ten unhas “prioridades claras” para axudarlles a solucionar problemas como as vacantes de difícil cobertura ou o absentismo laboral.

A Xunta está traballando para facilitar o retorno das novas xeracións de galegos, con medidas como a Estratexia Galicia Retorna ata 2026, as bolsas BEME para estudos de mestrado ou o apoio a redes empresariais como a propia AEGAMA.

Estratexia da internacionalización 2021-2025

No ámbito económico, destacan os bos resultados da Estratexia da internacionalización 2021-2025, que permitiu superar por primeira vez os 31.000 millóns de euros en exportacións e sumar xa máis de 9.300 empresas exportadoras, así como a creación da Oficina Económica de Galicia, que abrirá a súa primeira sede fóra da Comunidade en Madrid. Ademais, xa se está a traballar na nova Estratexia de Internacionalización 2026-2030 para diversificar mercados e apoiar a proxección internacional das empresas galegas.