• A directora do Igape, Covadonga Toca, inaugura a Xornada da Industria no marco da Maker Faire Galicia 2026, onde pon en valor a capacidade do encontro para conectar talento, coñecemento e empresa
• Subliña a importancia de transformar as ideas e o coñecemento en solucións concretas que permitan ás empresas innovar, medrar e competir
• Gaba o talento galego que desenvolve a súa actividade dentro e fóra da Comunidade, contribuíndo á proxección do ecosistema innovador e á creación de novas oportunidades

Santiago de Compostela, 9 de outubro de 2026

A directora do Igape, Covadonga Toca, inaugurou hoxe a Xornada da Industria da Maker Faire Galicia 2026, onde destacou o talento, o coñecemento e a innovación aplicada como elementos clave para reforzar a competitividade do tecido empresarial galego. Durante a súa intervención na Casa das Máquinas de Santiago, puxo en valor a capacidade deste encontro para conectar investigadores, emprendedores, profesionais e empresas, favorecendo novas oportunidades de colaboración.

Neste sentido, salientou a traxectoria dunha iniciativa que suma xa máis de 100.000 asistentes, participantes de máis de 15 países, 1.550 makers e 600 proxectos, contribuíndo a dar visibilidade ao talento e ás novas ideas. Destacou especialmente a presenza de profesionais galegos que desenvolven a súa actividade dentro e fóra de Galicia, mantendo a súa vinculación coa Comunidade e contribuíndo á proxección do ecosistema innovador galego.

A xornada aborda ámbitos como a intelixencia artificial, a biotecnoloxía, a neurotecnoloxía ou a computación cuántica, ademais de dar visibilidade a novas iniciativas a través do tradicional pitch de proxectos.

Innovación ao servizo das empresas

Neste contexto, Toca Carús subliñou que a Xunta traballa para facilitar que o coñecemento se transforme en innovación aplicada e chegue ás empresas en forma de solucións que melloren a súa competitividade.

Finalmente, lembrou que a innovación debe estar ao alcance de empresas de todos os tamaños e sectores, reafirmando o compromiso do Igape de acompañalas para converter ideas e coñecemento en proxectos capaces de xerar actividade e novas oportunidades.

Santiago de Compostela, 8 de outubro de 2026

A conselleira de Economía e Industria, María Jesús Lorenzana, mantivo hoxe en San Caetano un encontro con representantes do Clúster Audiovisual Galego (CLAG) para abordar os retos aos que se terá que afrontar este sector nos vindeiros anos no ámbito da innovación e da internacionalización.

Lorenzana puxo en valor que o clúster, integrado xa por arredor de 60 empresas e entidades, é clave para impulsar a competitividade desta industria e consolidar a súa posición a través da cooperación empresarial. Ademais, na actualidade subliñou que o CLAG busca conectar industria audiovisual, tecnoloxía, investigación e formación co obxectivo de fomentar a captación de investimentos e reforzar o tecido industrial de Galicia.

• A directora do Igape, Covadonga Toca, participa na inauguración da Xornada País Emiratos Árabes Unidos, onde destaca que 279 empresas galegas exportaron ao país o pasado ano, cunhas vendas que alcanzaron os 79,6 millóns de euros
• Subliña o papel da Antena do Igape en Emiratos Árabes Unidos, que ofrece asesoramento, apoio comercial e contactos empresariais para facilitar o acceso a unha rexión de preto de 150 millóns de habitantes
• Avanza que a rede de Antenas, presente xa en seis mercados internacionais, ampliarase proximamente con novas aperturas en Brasil e Arxentina

Santiago de Compostela, 8 de outubro de 2026

A directora do Igape, Covadonga Toca, destacou hoxe as oportunidades que ofrece Emiratos Árabes Unidos para avanzar na diversificación dos mercados das empresas galegas, nun país que se consolidou como un dos principais centros comerciais, loxísticos e financeiros de Oriente Medio e como plataforma de acceso ao conxunto da rexión.

Durante a inauguración da Xornada País Emiratos Árabes Unidos, celebrada na Cidade da Cultura, Toca Carús puxo en valor a evolución das relacións comerciais con este mercado. En 2025, un total de 279 empresas galegas exportaron a Emiratos, das que 97 o fixeron de maneira regular. As vendas alcanzaron os 79,6 millóns de euros, un 6,6% máis que no exercicio anterior, e acumulan un crecemento próximo ao 40% nos últimos seis anos.

A directora do Igape sinalou que o téxtil e a alimentación concentran máis do 42% das exportacións galegas a Emiratos, ao tempo que existen posibilidades de crecemento noutros ámbitos como o metalmecánico, a automoción, a madeira ou o sector químico.

Neste contexto, salientou o papel da Antena do Igape en Emiratos Árabes Unidos como ferramenta para facilitar a entrada das compañías galegas neste mercado. Desde a súa posta en marcha, vén prestando servizos de información, asesoramento e apoio comercial a empresas de sectores como a alimentación, o téxtil, a saúde, as TIC, a industria, a enxeñaría ou a defensa, ademais de acompañar compañías en feiras e promover contactos empresariais.

A cobertura da Antena, afondou, esténdese tamén a Arabia Saudita, Irán, Baréin, Kuwait, Omán e Qatar, configurando unha área de preto de 150 millóns de habitantes que recibiu exportacións galegas por valor de 224 millóns de euros en 2025.

Acompañamento á internacionalización

Toca Carús incidiu no compromiso da Xunta por acompañar as empresas durante todo o seu proceso de internacionalización, desde a selección dos mercados ata a súa entrada e posterior consolidación, combinando asesoramento, formación e axudas ás accións comerciais.

Neste marco, destacou a rede de Antenas, actualmente presente en Estados Unidos, México, Marrocos, China, Xapón e Emiratos Árabes Unidos, que permite cubrir un mercado potencial superior aos 2.000 millóns de consumidores. A esta rede incorporaranse proximamente Brasil e Arxentina.

A directora do Igape lembrou tamén a boa evolución do comercio exterior galego, con máis de 30.000 millóns de euros en exportacións en 2025 por terceiro ano consecutivo e cun novo incremento do 0,9% entre xaneiro e xullo deste ano.

• Salienta a fiabilidade política e económica que ofrece Galicia aos investidores
• O Goberno galego aposta por facilitar o acceso a solo industrial ou reducir os trámites de proxectos estratéxicos para atraer iniciativas empresariais
• O novo Plan de benestar laboral busca incidir na prevención para reducir o risco de incapacidades temporais e reforzar o apoio ao traballador durante a baixa e tras a súa reincorporación

A Coruña, 1 de outubro de 2026

O presidente da Xunta, Alfonso Rueda, destacou hoxe o compromiso do Goberno galego co tecido produtivo da comunidade, garantindo un marco de estabilidade e a través de diferentes medidas de apoio ante algúns dos principais desafíos das empresas hoxe en día, como mellorar a súa competitividade.

Durante a inauguración da xornada Empresa hoy. Tres desafíos de la empresa española: competitividad, marco legal estable y absentismo laboral, organizada por Nueva Mutua Sanitaria na Coruña, Rueda sinalou que os tres retos “están de absoluta actualidade” e que a este respecto é preciso “debater, escoitar, reflexionar e chegar a conclusións eficaces”. Ademais, lembrou que as empresas son as que xeran riqueza e emprego de calidade nun territorio e que, por iso, a Xunta conta con diferentes liñas de apoio tanto para atraer novos investimentos á comunidade como para axudar as empresas xa instaladas en Galicia a medrar ou diversificarse sen saír da terra. Así, afirmou que “Galicia Calidade tamén é un funcionamento eficaz das nosas empresas, economía e emprendedores”.

Nesta liña, o presidente afirmou que “un país competitivo é un país que avanza”, destacando medidas como a posta a disposición das empresas de solo industrial -o último concurso de venda de parcelas saldouse coa maior adxudicación da década: 90 terreos para 44 empresas-; figuras legais que permiten reducir os prazos para poñer en marcha proxectos estratéxicos sen perder garantías xurídicas ou a Oficina Económica de Galicia -na que calquera emprendedor pode informarse e recibir asesoramento-.

Tamén á hora de mellorar a competitividade dunha empresa, Rueda salientou a importancia de apostar pola innovación, de “reter e atraer talento” e de axudar na “cobertura de vacantes”.

Ademais, o titular do Executivo galego lembrou que Galicia ofrece estabilidade política e económica, tamén coa aprobación anual dos orzamentos, que o “1 de xaneiro estarán en vigor”, o que fai da comunidade un marco de fiabilidade que atrae investimentos “sendo esixentes e dando seguridade xurídica”.

Plan integral

O presidente da Xunta sinalou que o absentismo laboral “é unha cuestión que hai que abordar, sen demagoxias” e resaltou que o Goberno autonómico vén de aprobar o Plan integral para a mellora da prevención, o benestar laboral e a reincorporación saudable ao traballo en Galicia 2026-2029, dotado de 45 millóns de euros para poñer en marcha 37 medidas.

O obxectivo é incidir na mellora das condicións laborais nos postos de traballo para reducir o número de incapacidades temporais, reforzar o apoio ao traballador de baixa durante o proceso e facilitar a súa recuperación e retorno ao emprego.

O Plan, aprobado no último Consello da Xunta, inclúe medidas centradas na prevención como a posta en marcha da Estratexia Galega do Benestar ou servizos de atención musculoesquelética e de saúde mental para o persoal de pemes, microempresas e autónomos. O mandatario galego salientou que as pequenas compañías tamén contarán con axudas para contratar substitutos no caso de que as baixas se prolonguen no tempo e os traballadores que o desexen contarán cunha persoa que os acompañará ao seu regreso ao posto de traballo para facilitar a súa volta e evitar recaídas.

En paralelo, a Xunta seguirá reforzando a atención sanitaria das persoas en baixa e axilizando trámites que se producen durante o proceso de incapacidade laboral.

• A directora do Igape, Covadonga Toca, destaca en Madrid que Galicia pechou 2025 superando por terceiro ano consecutivo os 30.000 M€ en exportacións
• Salienta o acompañamento ás empresas en todo o proceso de internacionalización, con apoios para acceder a novos mercados, Antenas no exterior, aceleración e formación de talento
• Incide na importancia de combinar a consolidación nos principais destinos europeos coa apertura de novas oportunidades en América, Asia, o norte de África e Oriente Medio

Madrid, 1 de outubro de 2026

A directora do Igape, Covadonga Toca, destacou hoxe en Madrid a evolución positiva das exportacións galegas, que entre xaneiro e xullo de 2026 alcanzaron os 18.409,8 millóns de euros, cun incremento interanual do 0,9 %, mantendo así rexistros superiores aos do mesmo período do ano anterior.

Toca Carús participou no encontro Internacionalización e competitividade empresarial, celebrado na Casa de Galicia en Madrid, onde puxo en valor a fortaleza da base exportadora galega e a súa diversificación sectorial. Neste contexto, lembrou que Galicia pechou 2025 cunhas exportacións de 30.938,9 millóns de euros, superando por terceiro ano consecutivo os 30.000 millóns, e con 2.839 empresas exportadoras regulares.

A directora do Igape sinalou que o obxectivo é seguir ampliando a base de empresas exportadoras e favorecer unha presenza máis estable nos mercados internacionais, acompañándoas desde o diagnóstico inicial ata o acceso e consolidación en novos destinos.

Apoio adaptado a cada empresa

Toca Carús destacou o papel da Oficina Económica de Galicia como porta de entrada para orientar as empresas e conectalas cos recursos máis adecuados. Entre eles, programas como Galicia Exporta Empresas, Galicia Exporta Organismos Intermedios ou Foexga, que apoian accións de promoción exterior, prospección de mercados, participación en feiras e misións empresariais.

A este acompañamento súmase a rede de Antenas do Igape, que ofrece apoio directo ás empresas nos mercados de destino. Actualmente está presente en Estados Unidos, México, Marrocos, Xapón, China e Emiratos Árabes Unidos, coa previsión de ampliarse a Brasil e Arxentina.

Toca Carús puxo tamén en valor Galicia Avanza, a aceleradora de internacionalización pola que xa pasaron 111 empresas nas súas catro edicións, e o programa de bolseiros do Igape, que permitiu formar máis de 400 profesionais con experiencia en máis de 70 países.

Finalmente, incidiu na importancia de combinar a consolidación nos principais mercados europeos —a UE concentrou o 70,3 % das exportacións galegas en 2025— coa apertura de novas oportunidades en América, Asia, o norte de África e Oriente Medio.

• A directora do Igape, Covadonga Toca, participa en Pontevedra na inauguración da quinta edición de Ecommerce Days, o principal encontro anual do sector en Galicia
• Pon en valor as oportunidades que ofrecen a intelixencia artificial, a dixitalización e os novos canais de venda para mellorar procesos, chegar a novos clientes e favorecer a internacionalización das pemes

Pontevedra, 1 de outubro de 2026

A directora do Igape, Covadonga Toca, destacou hoxe o potencial do comercio electrónico e das novas ferramentas dixitais para reforzar a competitividade das empresas galegas, mellorar a súa relación cos clientes e facilitar o acceso a novos mercados.

Durante a inauguración da quinta edición de Ecommerce Days, que se celebra no Pazo da Cultura de Pontevedra, Toca Carús puxo en valor a evolución dun encontro que desde a súa posta en marcha en 2022 reuniu xa a máis de 700 asistentes e 80 relatores, consolidándose como a principal cita anual do comercio electrónico en Galicia.

Neste contexto, a directora salientou que o ecommerce vai hoxe moito máis alá da venda por internet e está cada vez máis vinculado á tecnoloxía, aos datos, ao coñecemento do cliente, ao marketing e á apertura de novos mercados. Unha transformación que, segundo apuntou, obriga as empresas non só a coñecer as novas ferramentas, senón a identificar aquelas que poden achegar valor real ao seu negocio.

Así, Toca Carús referiuse especialmente á intelixencia artificial e á necesidade de avanzar desde o coñecemento das súas posibilidades cara á súa aplicación práctica nas empresas. Deste xeito, incidiu no seu potencial para coñecer mellor os clientes, personalizar ofertas, analizar datos, automatizar tarefas ou facer máis eficientes os procesos.

Nesta liña, explicou que a orientación que impulsa a Xunta a través do Igape pasa por favorecer que a innovación e a tecnoloxía se traduzan en resultados concretos para o tecido empresarial, contribuíndo a vender mellor, aforrar tempo, mellorar a toma de decisións e xerar novas oportunidades de negocio.

Porta de entrada a novos mercados

A directora do Igape destacou tamén a capacidade do comercio electrónico para facilitar a internacionalización das pemes galegas. Os canais dixitais, explicou, permiten ás empresas testar mercados, chegar a novos clientes, acceder a marketplaces e construír unha marca no exterior con maiores posibilidades que hai apenas uns anos.

Por este motivo, subliñou a crecente conexión entre dixitalización, innovación e internacionalización, tres ámbitos que forman parte dunha mesma estratexia de crecemento empresarial. Así, unha empresa que incorpora eficazmente as ferramentas dixitais está mellor preparada para competir fóra, do mesmo xeito que unha compañía que aspira a crecer internacionalmente necesita unha estratexia dixital cada vez máis sólida.

Finalmente, a directora puxo en valor o papel do Clúster do Ecommerce Galego e de encontros como Ecommerce Days para conectar empresas, compartir experiencias e coñecemento e favorecer novas colaboracións. Neste sentido, reafirmou a vontade da Xunta e do Igape de seguir traballando en contacto directo co tecido empresarial para adaptar os instrumentos de apoio ás súas necesidades e aos novos retos do mercado.

A Xunta vén ofrecendo actualizacións da situación económica en distintos mercados mundiais a través de Xornadas País coas Antenas da Xunta de Galicia. O obxectivo é transmitir unha información actualizada e afondar en novas oportunidades para as empresas galegas que queiran exportar os seus produtos, neste caso, a Emiratos Árabes Unidos.

A Antena en EAU, o día 8 de outubro, ofrecerá unha visión actualizada das oportunidades para as empresas galegas e das claves prácticas para operar nun contexto condicionado polas tensións xeopolíticas, os cambios nas rutas loxísticas e a necesidade de reforzar a seguridade das operacións. Se está interesado, tamén terá a posibilidade de programar unha reunión individual co responsable da Antena en Emiratos Árabes Unidos durante o día 8 de outubro.

Solicite a reunión ao realizar a súa inscrición.

Día: 8 de outubro de 2026 | Hora: 09:30-14:30 | Modalidade: Presencial no Edificio Fontán da Cidade da Cultura (Santiago de Compostela)

✍️ Inscricións

➡️ Descarga o programa

• A directora do Igape, Covadonga Toca, participa en Sevilla no Al-Andalus Innovation Venture, onde pon en valor o papel da Administración como facilitadora e conectora entre startups, empresas, tecnoloxía, financiamento e mercado
• Destaca o modelo galego das Business Factories, desenvolvido da man de empresas tractoras para responder a retos reais dos sectores estratéxicos e favorecer que as solucións innovadoras cheguen ao tecido produtivo
• Sinala que un dos grandes retos pasa por acompañar os proxectos máis alá das súas fases iniciais para que consigan clientes, capten investimento, se internacionalicen e gañen escala

Sevilla, 22 de setembro de 2026

A directora do Igape, Covadonga Toca, destacou hoxe a aposta da Xunta por "industrializar a innovación", favorecendo que as novas solucións tecnolóxicas se traduzan en actividade empresarial, investimento, crecemento e emprego. Fíxoo durante a súa participación en Sevilla no Al-Andalus Innovation Venture, dentro da mesa redonda A importancia da Administración pública nos ecosistemas rexionais, na que abordou o papel que deben desempeñar as administracións para facilitar o desenvolvemento dos proxectos innovadores.

Neste contexto, Toca Carús defendeu unha Administración que actúe como facilitadora do ecosistema, conectando as capacidades xa existentes e acompañando ás empresas ao longo das diferentes etapas do seu desenvolvemento. Así, incidiu en que o reto non pasa unicamente por favorecer o nacemento de novos proxectos, senón por conseguir que os que demostran potencial poidan atopar clientes, financiamento e mercado para crecer.

"Temos talento, coñecemento, startups, empresas, centros tecnolóxicos e financiamento. O seguinte salto pasa por conectar cada vez mellor todas estas capacidades arredor de proxectos empresariais reais", sinalou a directora, apuntando á importancia de vincular tecnoloxía e necesidades empresariais para que a innovación teña impacto efectivo sobre a economía.

Neste ámbito, puxo en valor a rede galega de Business Factories, aceleradoras especializadas en sectores estratéxicos e desenvolvidas en colaboración co propio tecido empresarial. Un modelo que permite que as startups traballen desde o inicio sobre retos reais da industria e estean en contacto con compañías que poden actuar como espazos de validación, socios tecnolóxicos, primeiros clientes ou portas de entrada ao mercado.

Sobre esta base, Toca Carús incidiu na necesidade de medir o éxito dos programas de emprendemento innovador máis alá do número de proxectos participantes, atendendo á súa capacidade para conseguir clientes, captar investimento, introducir as súas solucións na industria e crecer. “A aceleración non é o punto de chegada; o obxectivo é pasar do piloto ao mercado e da startup a unha empresa con capacidade para crecer”, subliñou.

A directora do Igape concluíu que Galicia conta xa con talento, coñecemento, empresas, tecnoloxía e financiamento, polo que o seguinte paso pasa por conectar cada vez mellor estas capacidades arredor de proxectos empresariais reais. “Máis que engadir novas pezas ao ecosistema, temos que conseguir que as que xa temos funcionen cada vez mellor xuntas”, afirmou, destacando a conexión entre innovación, industria, financiamento e mercado como clave para que máis proxectos gañen escala.

• Destaca a importancia de medrar e competir a nivel internacional “sen perder as raíces e a base”
• Salienta que Galicia conta coas condicións e o talento necesarios para competir ao máis alto nivel global, servindo ademais como un polo de atracción para profesionais doutros lugares do mundo
• Subliña a calidade e o deseño arquitectónico das novas instalacións de Bandalux que exemplifican a modernidade, a innovación e o confort do sector galego do contract

Santiago de Compostela, 22 de setembro de 2026

O presidente da Xunta, Alfonso Rueda, participou hoxe na inauguración oficial do novo edificio corporativo de Bandalux no polígono da Sionlla, en Santiago de Compostela. Durante o acto, no que estivo acompañado pola conselleira de Economía e Industria, María Jesús Lorenzana, o presidente destacou o papel clave que xoga a empresa familiar na economía galega como eixo do tecido produtivo e principal xeradora de riqueza e emprego de calidade na comunidade.

“Hai empresas familiares moi potentes en toda España e noutros lugares, pero aquí en Galicia especialmente, que foron quen de crecer e ir cos tempos, pero sen perder as raíces e a base, e agora están traballando en moitísimos sitios, polo que comprometo o apoio da Xunta de Galicia para que sigan medrando dende as súas orixes”, indicou.

Así, o titular do Executivo autonómico felicitou á familia García e a todo o equipo de Bandalux pola celebración dos seus 40 anos de traxectoria e pola súa aposta decidida por instalar a súa nova sede na capital galega. Neste sentido, puxo especial énfase en que empresas como esta demostran que en Galicia hai talento suficiente para liderar mercados internacionais e competir ao máis alto nivel.

“Hai moitísimas razóns para que a xente que ten talento poida seguir traballando aquí e tamén para que profesionais doutros lugares do mundo atopen motivos para vir desenvolverse profesional e persoalmente en Galicia”, sinalou. Nese sentido, reafirmou a responsabilidade das administracións de crear as condicións axeitadas, dar facilidades, eliminar trabas e acompañar ás empresas no seu crecemento.

Así mesmo, puxo en valor que os produtos de Bandalux contan co selo Galicia Calidade e son un expoñente do prestixio do sector do contract galego a nivel internacional.

Un edificio referente en arquitectura e confort

Durante a visita ás instalacións, o titular da Xunta felicitou ao arquitecto Mauro Lomba e a todo o equipo polo deseño do novo inmoble, ao que definiu como un exemplo de arquitectura ambiciosa, moderna e sostible que combina á perfección “continente e contido”. Do mesmo xeito, remarcou a importancia de crear espazos de traballo acolledores que regulen a iluminación, a temperatura e o confort.

O presidente concluíu garantindo que a Xunta seguirá sendo o mellor aliado de quen arrisca, inviste e crea riqueza na comunidade: “Se a estas grandes empresas consolidadas lles vai ben e seguen cos pés na terra, na súa terra, iso quere dicir que a Galicia lle vai ben”, asegurou.

• Sitúa á comunidade como un territorio atractivo para investir, grazas á vantaxes como a estabilidade institucional e o apoio da Administración aos proxectos estratéxicos

Santiago de Compostela, 21 de setembro de 2026

O presidente da Xunta, Alfonso Rueda, reuniuse esta mañá cunha delegación do conglomerado chinés Citic Group (China International Trust and Investiment Corporation), co obxectivo de avaliar os proxectos que o grupo xa está desenvolvendo en Galicia e estudar posibles vías de colaboración de cara ao futuro.

O Citic Group é un dos conglomerados máis grandes e diversificados de China, con presenza en sectores clave como os servizos financeiros, as tecnoloxías industriais, os materiais avanzados, as telecomunicacións ou as infraestruturas de nova xeración.

Actualmente, o grupo ten unha base produtiva no Porriño -Citic Hic Gandara Censa- que traballa na produción de grandes compoñentes para sectores como a minaría, o petróleo ou as enerxías renovables.

Na reunión, o presidente puxo en valor que Galicia se ten consolidado como un territorio seguro e atractivo para investir. Entre outras vantaxes, recordou que Galicia ofrece estabilidade institucional e seguridade xurídica, ademais dunha posición xeográfica estratéxica e un apoio decidido da Administración autonómica á hora de facilitar e axilizar a implantación de proxectos de calado no territorio galego.

Esta reunión encádrase nunha serie de contactos previos con este grupo empresarial. Neste sentido, cómpre recordar que Rueda se reuniu co presidente de Citic en maio do ano pasado; e que a conselleira de Economía e Industria, María Jesús Lorenzana, mantivo un encontro cos seus representantes durante a viaxe a China do mes de abril.