• A conselleira subliña que a convocatoria de apoios se publicará mañá no DOG e anima a presentar a súa solicitude a todos os empresarios que precisen facer unha reforma no ámbito da eficiencia enerxética
• Como novidade, amplíase o prazo de presentación de solicitudes que pasa de dous a oito meses e incorpora a posibilidade de subvencionar instalacións novas
• Lorenzana pon en valor o proxecto que contou con apoios da Xunta e subliña que “para nós é moi importante ver que as axudas están chegando aos empresarios”

Vigo, 8 de xaneiro de 2025

A conselleira de Economía e Industria, María Jesús Lorenzana, anunciou hoxe unha nova convocatoria de axudas por importe de 7,5 millóns de euros para promover o aforro de enerxía e que “permitirá reducir 4,5 millóns na factura eléctrica das empresas galegas e das persoas autónomas”, subliñou.

Segundo avanzou, a convocatoria de apoios que se publicará mañá no Diario Oficial de Galicia (DOG) e que se poderán solicitar a partir do venres da vindeira semana, “apoiará proxectos conxuntos que melloren a eficiencia nas edificacións” polo que animou a todos os empresarios e autónomos que precisen calquera tipo de reforma no ámbito da eficiencia enerxética “a que presenten a súa solicitude”.

Esta convocatoria ten como novidade que se amplía o prazo de presentación de solicitudes de dous a oito meses e que incorpora a posibilidade de subvencionar instalacións novas e aquelas actuacións que promovan un Certificado de Aforro Enerxético. O Goberno galego, vén convocando desde hai 11 anos esta liña de axudas, cun orzamento de case 56 millóns de euros e 1.640 proxectos aprobados.

Apoio da Xunta

Durante a visita ao Atendo Senior Living, a titular de Economía e Industria, puxo en valor o carácter innovador e interxeneracional deste proxecto “que presta unha atención diferente aos nosos maiores cunha nova fórmula e un novo modelo de coidados”, sinalou.

Neste marco, explicou que a Xunta participou na rehabilitación integral do edificio para a posta en marcha deste novo centro cunha subvención de algo máis de 105.000 euros. “Para nós é moi importante ver que as axudas do Inega está chegando aos nosos empresarios”, destacou.

As axudas permitiron, entre outras cousas, instalar unha caldeira de aerotermia, un sistema de ventilación mecánica, iluminación led, fachada con cámara e fiestras de aluminio ou ascensores hidráulicos.

• As subvencións oscilan entre os 10.000 e os 20.000 euros e cobren o cen por cento
• Trátase dunha liña de apoios que se puxo en marcha por primeira vez o pasado ano para impulsar iniciativas empresariais emerxentes de carácter innovador e tecnolóxico
• En Galicia hai actualmente 311 startups, que xeran 2.662 empregos e suman unha facturación conxunta de máis de 241,2 M€
• A rede de aceleradoras da Xunta vai contar cun investimento de 7 M€ e vaise ampliar con tres novas no eido da saúde e o benestar, a industria do deporte e as enerxías renovables

Santiago de Compostela, 6 de xaneiro de 2025

A Consellería de Economía e Industria, a través do Instituto Galego de Promoción Económica (Igape), convocará a mediados deste mes a liña de axudas específica para startups que, por segundo ano, volverá contar cun orzamento de 1,5 M€.

Trátase dunha liña de apoios que se puxo en marcha por primeira vez o pasado ano para impulsar iniciativas empresariais emerxentes de carácter innovador e tecnolóxico. As axudas, por concorrencia non competitiva, oscilan entre os 10.000 e os 20.000 euros e cobren o cen por cento dos gastos ou investimentos necesarios durante a fase de lanzamento ou consolidación do proxecto.

Segundo o informe nacional anual “Empresas Tech e Innovadoras”, en Galicia hai actualmente 311 startups, que xeran 2.662 empregos e suman unha facturación conxunta de máis de 241,2 M€. Concéntranse, na súa maioría, nas cidades de Vigo (54), A Coruña (49), Santiago de Compostela (38), Lugo (23), Nigrán (22), Pontevedra (19) e Oleiros (A Coruña) (12). Por sectores, a maior parte delas pertencen aos ámbitos biotecnolóxico, agroalimentario, ao da saúde, a analítica software, o turismo, o comercio en liña ou enerxía, entre outros.

Xunto coa liña de axudas que se vai convocar proximamente, as startups galegas teñen á súa disposición a rede de aceleradoras da Xunta que coordina o Igape. Dela forman parte a BFAuto, especializada no sector da automoción; a BFAero, no aeroespacial; a BFFood, no sector da alimentación; Climatech, no eido ambiental; VíaGalicia, que abrangue o ámbito das TIC, o sector agroalimentario ou o téxtil, en colaboración co Consorcio da Zona Franca (Vigo e Lugo); e outras iniciativas como a BFMedicines, Agrobiotech, Bioincubatech, Galicia Avanza ou Turislab.

Este ano, esta rede vai contar cun investimento de 7 M€ e vaise ampliar coa posta en marcha tres novas aceleradoras no eido da saúde e o benestar, a industria do deporte e as enerxías renovables, o cal converte Galicia nun ecosistema singular de emprendemento innovador.

O conxunto de aceleradoras con participación da Xunta, leva apoiado máis de 830 proxectos innovadores, dos cales 270 recibiron financiamento para a creación de novas empresas ou para a posta en marcha de proxectos en empresas xa existentes. E, ademais, contribuíu á promoción e impulso de 1.400 postos de traballo cualificados directos.

A través do Igape, a Xunta quere dar maior pulo ao emprendemento innovador, que tamén conta cos servizos da Oficina Económica de Galicia.

• O servizo atendeu 13.731 consultas de empresas, persoas autónomas ou emprendedoras nos seus primeiros oito meses en funcionamento, das que máis do 80 % foron resoltas no momento
• O equipo formado por máis de 100 profesionais de diferentes sectores tamén prestou asesoramento a 204 proxectos de especial relevancia para o territorio galego e mantivo 583 reunións presenciais
• Neste ano 2025, a Xunta abrirá unha nova sede da Oficina Económica de Galicia na Casa de Galicia en Madrid para reforzar a dinamización empresarial e a captación de investimentos

Santiago de Compostela, 2 de xaneiro de 2025

A nova Oficina Económica de Galicia, impulsada pola Consellería de Economía e Industria, xa funciona a pleno rendemento recibindo unha media de máis de 1.700 consultas ao mes. Desde a súa posta en marcha no mes de abril, o servizo vén asesorando, apoiando e acompañando a empresas, persoas autónomas ou emprendedoras para que implanten e desenvolvan os seus proxectos empresariais en Galicia.

A área dependente do Instituto Galego de Promoción Económica (Igape), dirixida por Natalia Barros e formada por máis de 100 profesionais de diferentes sectores, funciona como unha canle única entre empresas e Administración que ofrece información e atención individualizada, personalizada e especializada. Tan só nos seus oito primeiros meses de actividade, a Oficina xa recibiu un total de 13.731 consultas, das que o 82 % foron resoltas no momento, e prestou asesoramento a 204 proxectos de especial relevancia para o territorio galego.

Durante o mes de decembro, o servizo continuou a súa actividade crecente: aumentou nun 11,61 % o número de consultas atendidas e elevou ata 583 as reunións presenciais. Con este labor de asesoramento e apoio, a Oficina Económica de Galicia facilita a xestión dos proxectos empresariais para que as tramitacións sexan máis rápidas e, en definitiva, máis sinxelas.

Por sectores, as principais consultas proveñen de ámbitos coma o enerxético, a automoción, a economía circular, o sector mar-industria, o turismo, as TIC, a loxística, o contract ou a construción. Ademais, a Oficina realiza labores de coordinación con outros axentes e entidades externas, tanto de forma directa como a través de ICEX/Invest in Spain, á hora de detectar obstáculos administrativos e identificar novas oportunidades de investimento.

Estas medidas, entre outras, enmárcanse no proceso de desburocratización que impulsa a Xunta para continuar simplificando os trámites ao tecido produtivo e ofrecendo unha resposta áxil, rápida e útil. E, deste xeito, posicionar Galicia como un polo de atracción empresarial na Península e nunha Comunidade atractiva tanto para as empresas que xa están instaladas no territorio como para os novos investimentos.

Tras a apertura en setembro dunha sede física da Oficina Económica de Galicia en Santiago de Compostela, o servizo ofrece múltiples vías para facilitar a mellor atención posible adaptada a cada caso. Por iso, empresas, autónomos ou emprendedores poden recibir atención tanto de forma presencial no Complexo administrativo de San Lázaro, sede do Igape, en Santiago de Compostela, como por vía telefónica no número 900 815 151 e online a través de oficinaeconomicagalicia.xunta.gal.

Neste ano 2025, a Xunta abrirá unha nova sede da Oficina Económica de Galicia na Casa de Galicia en Madrid. Segundo explicou a conselleira de Economía e Industria, María Jesús Lorenzana, o Goberno galego dá un paso máis abrindo a primeira oficina fóra de Galicia para reforzar a dinamización empresarial e a captación de investimentos e, así, continuar simplificando o camiño ás empresas que queiran implantarse na Comunidade.

• Será aprobada no vindeiro Consello da Xunta, cun orzamento de 10,3 M€
• Lembra que, por primeira vez, o Igape conta cunha área específica de innovación empresarial, que vai manexar un investimento de 60 M€ e desde a que se vai xestionar esta nova liña de apoios
• “É un orgullo enorme ter empresas familiares en Galicia como esta: máis de 60 anos de tradición familiar, de esforzo, de talento e de intelixencia para converterse nunha fábrica que é líder no sur de Europa”, di sobre Pontevedresa Group

Pontevedra, 21 de decembro de 2024

A conselleira de Economía e Industria, María Jesús Lorenzana, avanzou hoxe que o vindeiro Consello da Xunta aprobará a primeira convocatoria de axudas en Galicia para promover o uso da intelixencia artificial nas empresas.

Nunha visita ás instalacións de Pontevedresa Group, Lorenzana informou de que se trata dunha liña de apoios por valor de 10,3 M€ que implica, dixo, apostar por que as pequenas e medianas empresas non tecnolóxicas poidan contratar servizos doutras compañías que incorporen a intelixencia artificial nos seus procesos produtivos e que, polo tanto, melloren na súa eficiencia e competitividade, explicou.

A conselleira, que estivo acompañada polo delegado territorial da Xunta en Pontevedra, Agustín Reguera, lembrou que, por primeira vez, o Instituto Económico de Galicia (Igape) conta cunha área específica de innovación empresarial, que vai manexar un investimento de 60 M€ e desde a que se vai xestionar esta liña nova liña de apoios.

Con 65 anos de traxectoria, Pontevedresa Group é na actualidade o fabricante independente máis antigo de España no sector nacional do vidro, líder en todo o sur de Europa na fabricación de vidro tépedo ultra lixeiro de alta resistencia, baixo espesor e gran formato.

“É un orgullo enorme ter empresas familiares en Galicia como esta: máis de 60 anos de tradición familiar, de esforzo, de talento e de intelixencia para converterse nunha fábrica que é líder no sur de Europa no tipo de vidro que fabrica, provedora de moitos sectores industriais”, dixo. “Vidro fabricado en Galicia para o mundo”, enfatizou.

Lorenzana apuntou que a empresa acumula nos últimos anos un gran esforzo investidor tanto nesta planta –o primeiro proxecto singular declarado pola Xunta que se implantou no polígono da Reigosa–, como na que posúe no parque empresarial do Campiño (Pontevedra).

Todo isto fai de Pontevedresa Group o maior investidor industrial e empregador do sector do vidro en Galicia, cun récord de máis de 100 empregos directos, que representa un incremento do 70 por cento desde antes da pandemia.

• Lorenzana destaca o papel da oficina que funciona coma un canal único de atención especializada para as empresas e a industria
• Pola súa banda, José González valora positivamente o establecemento dun modelo regulatorio que dote de uniformidade os procedementos de posta en marcha de actividades comerciais sempre e cando se respecten a singularidades das CC.AA. e dos concellos
• Os titulares de Economía e Comercio da Xunta volveron reclamar ao Goberno central unha política económica que favoreza a atracción de investimentos e o asentamento de empresas, piares do crecemento dun país

Santiago de Compostela, 18 de decembro de 2024

A conselleira de Economía e Industria, María Jesús Lorenzana, e o conselleiro de Emprego, Comercio e Emigración, José González, participaron esta tarde por videoconferencia na Conferencia Sectorial para la Mejora Regulatoria y el Clima de Negocios. Unha xuntanza na que os representantes da Xunta volveron insistir nos importantes avances en materia de desburocratización, axilización e simplificación administrativa que está levando a cabo o Goberno galego para acompañar ás empresas.

Neste marco, a titular de Economía e Industria, destacou a creación da Oficina Económica de Galicia que depende do Igape, e a figura dos proxectos industriais estratéxicos, que se benefician dunha tramitación acelerada nun prazo máximo dun ano, permitindo así que as empresas desenvolvan as súas iniciativas dun xeito máis rápido e gañen en competitividade.

Segundo expuxo, a Oficina Económica de Galicia que tamén terá sede en Madrid -a primeira fóra da Comunidade- funciona coma un canal único para as empresas e a industria, e é o punto de contacto de información e entrada para as iniciativas empresariais e proxectos industriais, facilitando información, asesoramento e acompañamento. Desde a súa posta en marcha no mes de abril xa atendeu unhas 13.000 consultas.

Lorenzana explicou ademais que este servizo de atención especializada e próxima ás empresas permite a Galicia posicionarse como destino atractivo e diferenciado para o investimento, atraer e facilitar a implantación de novos negocios, seleccionar e captar os investimentos que complementen as cadeas de valor, e favorecer o mantemento e ampliación dos investimentos que xa existen na Comunidade.

Ordenanza tipo de comercio minorista

Pola outra banda, no marco da conferencia sectorial de hoxe, abordouse tamén a aprobación dunha ordenanza tipo de comercio minorista, que ten como obxectivo establecer un procedemento uniforme en todos os concellos —actualizando o modelo de 2013— relativo á supresión das licenzas municipais vinculadas á apertura dos establecementos comerciais permanentes de menos de 750 m², substituíndooas por outros medios de control máis áxiles, como as declaracións responsables.

O conselleiro de Emprego, Comercio e Emigración, José González, valorou positivamente o establecemento dun modelo regulatorio que dote de uniformidade os procedementos de posta en marcha de actividades comerciais, sempre e cando, remarcou, se respecten as singularidades das diferentes comunidades autónomas e concellos.

Nesta liña, destacou que a redución de trabas burocráticas é unha liña prioritaria pola que vén apostando de xeito estratéxico o Goberno galego e que constitúe un elemento clave para favorecer que máis emprendedores se animen a abrir os seus negocios, o que redunda, remarcou, na xeración de riqueza e emprego. Ademais, indicou que o impulso ao comercio en Galicia é unha prioridade para a Xunta, polo que no primeiro trimestre do ano que vén está previsto aprobar o Plan estratéxico do comercio 2025-2030.

Finalmente, os titulares de Economía e Comercio da Xunta reclamaron unha vez máis ao Goberno central que desenvolva unha política económica centrada no tecido produtivo, que favoreza a atracción de novos investimentos e o asentamento de empresas, piares fundamentais para o crecemento dun país.

• A directora xeral de Estratexia Industrial e Solo Empresarial, Margarita Ardao, reúnese cos promotores da startup, a primeira española centrada en desenvolver un sistema de propulsión eléctrica para satélites que operan en órbitas baixas
• Subliña que Kreios é “un exemplo de retorno para a comunidade, tanto desde a óptica de captación e retención de talento, como de impulso de iniciativas orientadas a reforzar o ecosistema tecnolóxico galego”

Lugo, 18 de decembro de 2024

A directora xeral de Estratexia Industrial e Solo Empresarial, Margarita Ardao, reuniuse hoxe cos promotores de Kreios Space nunha visita ás instalacións desta startup, xurdida na Business Factory Aero, o programa de incubación, aceleración e consolidación de empresas da Civil UAVs Initiative, na Fundación CEL, en Lugo. Durante a visita, a directora destacou a achega de Kreios Space á diversificación e á internacionalización do sector aeroespacial galego.

Margarita Ardao coñeceu o traballo de Kreios Space da man do seu CEO, Adrián Senar, e de parte do seu equipo, aos que felicitou pola consecución de 1,12 M€ na resolución provisional da última convocatoria do Programa Tecnolóxico Espacial (PTE) do Centro para el Desarrollo Tecnológico y la Innovación (CDTI) para as dúas propostas nas que participou en consorcio con outras empresas. Este financiamento permitiralle á startup, especializada no desenvolvemento de sistemas de propulsión eléctrica para satélites, avanzar nas súas solucións.

O investimento súmase a outros fondos que a startup  logrou captar: 760.000 euros nunha rolda de investimento privada liderada por XesGalicia e GrowVenture Partners xunto cun exitoso crowdfuding. Durante o seu percorrido en BFAero, tamén obtivo 1,3 millóns de euros en financiamento público da man de programas coma o NEOTEC do CDTI ou o Programa de Centros de Fabricación Avanzada do Igape.

Kreios Space foi seleccionada no itinerario de incubación da 4ª edición da Business Factory Aero (2022) e no itinerario de aceleración da 5ª edición cun proxecto para o desenvolvemento dun sistema de propulsión eléctrico para satélites que permite mantelos indefinidamente en órbitas moi próximas á terra (VLEO), aumentando a resolución das imaxes recollidas e reducindo os custes.

A startup é un exemplo de creación e atracción de talento e empresas a Galicia co apoio da Xunta, xa que trasladou a súa sede social a Galicia logo do seu paso pola BFAero, onde está desenvolvendo novos proxectos, acometendo melloras técnicas no seu sistema de propulsión para satélites e impulsando unha estratexia de internacionalización. O seu obxectivo é chegar a Europa, América, Asia, Oriente Medio, Oceanía nun prazo de catro anos. “Kreios é un exemplo de retorno para a comunidade, tanto desde a óptica de captación e retención de talento como de impulso de iniciativas orientadas a reforzar o ecosistema tecnolóxico galego”, destacou Ardao.

Tal e como explicaron os promotores de Kreios, a súa previsión é duplicar o cadro de persoal nos vindeiros 12 meses para afrontar retos como a transformación das instalacións da súa cámara de baleiro en Vigo -financiada polo Programa de Centros de Fabricación Avanzada do Igape e que estará operativa a partir de marzo- nun centro estratéxico para a industria satelital europea.

O Programa Tecnolóxico Espacial (PTE) en Galicia

A directora Xeral de Estratexia Industrial e Solo Empresarial puxo en valor que tres empresas galegas teñan recibido financiamento na resolución provisional desta última convocatoria do Programa Tecnolóxico Aeronáutico por un importe superior a 2,8 millóns de euros. Trátase de Kreios Space, coa participación en dúas propostas; de Televés e de Alén Space.

Ardao fixo un chamamento ás empresas galegas a unir esforzos e crear sinerxías para optar a convocatorias nacionais e internacionais que, como a do CDTI, permitan sumar capacidades ao sector aeronáutico e aeroespacial en Galicia.

A Business Factory Aero

A Business Factory Aero, programa de incubación, aceleración e consolidación de empresas do sector aeroespacial da Civil UAVs Initiative, apoiou ao longo das súas cinco edicións un total de 46 proxectos empresariais, que mobilizaron un investimento de preto de 7,8 millóns de euros e que rexistraron unha facturación conxunta de 9,2 millóns.

• Na actualidade Xesgalicia contabiliza un volume de investimento de 462 millóns de euros en 520 operacións aprobadas de 330 empresas

Santiago de Compostela, 17 de decembro de 2024

A Xunta destacou hoxe o labor que desempeña Xesgalicia como canle de financiamento público para impulsar a creación e a consolidación das empresas galegas.

Esta tarde tivo lugar o acto de celebración do XXV Aniversario de Xesgalicia, unha sociedade que na actualidade contabiliza un volume de investimento de 462 millóns de euros en 520 operacións aprobadas (entre participacións en capital e préstamos participativos) de 330 empresas.

Neste sentido, a sociedade leva 25 anos sendo un apoio fundamental para o fortalecemento do tecido empresarial galego e un brazo investidor para dar soporte e impulso ás empresas nos seus plans de negocio como é o caso de CZ Veterinaria, Innolact, Origo Biofarma, Galega de Economía Social (Cogami), a Agrupación de Cooperativas Lácteas ou a Adega Condes de Albarei, entre outras.

Xesgalicia seguirá traballando nesta liña para ver nacer novas iniciativas e medrar as xa asentadas en Galicia. Así, para 2025, contará con saldos para investimentos por importe de 140 millóns de euros, dos que se prevén utilizar 22 millóns; e ademais os apoios do Igape ás empresas en materia de financiamento pasarán de 104 millóns de euros no 2024 a 152 millóns, o orzamento máis alto dos últimos cinco anos.

• A directora do Igape, Covadonga Toca, mantivo unha reunión de traballo con representantes da Unión de Cooperativas de Galicia – EspazoCoop, no que se puxo en valor a importancia do cooperativismo para o desenvolvemento económico de Galicia
• Resalta o papel da Oficina Económica de Galicia como “unha nova forma de conectar coas empresas, facilitando e promovendo a desburocratización, e achegando ao tecido produtivo unha administración máis accesible”
• Lembra que o 2025 será o Ano Internacional das Cooperativas e subliña a importancia deste modelo como motor para a creación dun futuro máis sustentable, xusto e participativo

Santiago de Compostela, 16 de decembro de 2024

A directora do Igape, Covadonga Toca, participou hoxe nun encontro de traballo con representantes da Unión de Cooperativas de Galicia – EspazoCoop. No encontro, no que estivo acompañada por Natalia Barros, directora da Oficina Económica de Galicia, dependente do Igape, púxose en valor a importancia da colaboración público-privada para impulsar a competitividade e o crecemento sustentable do tecido empresarial galego, especialmente no sector cooperativo.

Durante a reunión, Toca resaltou a importancia do papel da Oficina Económica de Galicia “para conectar coas empresas, facilitando e promovendo a desburocratización e achegando unha administración máis accesible”​, o que permitirá potenciar o desenvolvemento das iniciativas empresariais a través dun acompañamento máis áxil, directo e eficaz.

A directora do Igape tamén lembrou que o 2025 será o Ano Internacional das Cooperativas, unha conmemoración global que subliña a relevancia deste modelo como motor para a creación dun futuro máis sustentable, xusto e participativo​. Neste sentido, destacou o papel das cooperativas como un dos piares fundamentais da economía galega e incidiu na necesidade de apostar pola innovación e a dixitalización para consolidar o seu crecemento a longo prazo.

Covadonga Toca fixo fincapé na importancia de traballar man a man co sector cooperativo, “un modelo organizativo que achega valor social e económico, favorece o emprego de calidade e promove a igualdade de oportunidades”​.

A visita concluíu cun chamamento á colaboración público-privada para seguir consolidando o cooperativismo e a economía social como ferramentas clave para o desenvolvemento económico sustentable en Galicia.

• A directora do Igape, Covadonga Toca, participa na inauguración da Xornada da Industria, no marco da X Edición da Maker Faire Galicia, onde pon en valor a nova área de innovación do Instituto para modernizar e desenvolver tecnolóxicamente ás pemes galegas e impulsar a transferencia de tecnoloxía entre centros de investigación e empresas
• Destaca o Biopolo da Sionlla, espazo no que se celebrou o acto, como “manifestación do compromiso de Galicia coa creación de ecosistemas que fomenten a innovación e o desenvolvemento empresarial”
• Felicita á Maker Faire Galicia no décimo aniversario por converterse nun “referente internacional da creatividade e da tecnoloxía, posicionando a nosa comunidade como un faro de innovación no ámbito global”

Santiago de Compostela, 13 de decembro de 2024

A directora do Igape, Covadonga Toca, destacou esta mañá durante a inauguración da Xornada da Industria, celebrada no marco da X Edición da Maker Faire Galicia, o papel esencial da innovación como ferramenta para impulsar a competitividade das empresas galegas e xerar valor engadido no tecido produtivo. O evento tivo lugar no Biopolo da Sionlla.

Durante a súa intervención, Toca Carús subliñou o traballo realizado desde o Igape coa creación da nova área de innovación empresarial, que busca “modernizar e desenvolver tecnolóxicamente ás pemes galegas, promover a creación de empresas innovadoras en sectores estratéxicos e impulsar a transferencia de tecnoloxía entre centros de investigación e empresas”. 

Neste marco, a directora do Igape animou ás empresas galegas a asumir a innovación como un enfoque estratéxico para o seu crecemento. “A innovación non é só unha ferramenta; é unha mentalidade que impregna toda a estrutura dunha organización”, explicou, antes de sinalar que a Xunta de Galicia seguirá apostando pola cultura da innovación, promovendo iniciativas que permitan ás empresas incorporar tecnoloxías avanzadas, dixitalizar procesos e mellorar a súa competitividade.

Así mesmo, Toca Carús aproveitou a ocasión para felicitar ao equipo organizador da Maker Faire Galicia polo seu décimo aniversario. “Grazas ao seu esforzo, a Maker Faire Galicia converteuse nun referente internacional da creatividade e da tecnoloxía, posicionando a nosa comunidade como un faro de innovación no ámbito global”, afirmou. 

O papel do Biopolo da Sionlla como motor de transformación

A Xornada da Industria celebrouse no Biopolo da Sionlla, un espazo clave para o desenvolvemento da biotecnoloxía en Galicia. Segundo a directora do Igape, “o Biopolo da Sionlla é moito máis ca un espazo físico; é unha manifestación do compromiso de Galicia coa creación de ecosistemas que fomenten a innovación e o desenvolvemento empresarial”. 

Nesta xornada participaron representantes de empresas punteiras, centros de investigación e emprendedores que están a liderar o desenvolvemento de solucións tecnolóxicas avanzadas. O espazo, segundo Toca, simboliza o compromiso de Galicia coa creación de ecosistemas innovadores capaces de atraer e reter talento, industrializar sectores emerxentes como a biotecnoloxía e potenciar a sustentabilidade como eixo central do crecemento económico.

• A directora do Igape, Covadonga Toca, participa no acto homenaxe ás empresas que compren 25 anos na Asociación Área Empresarial do Tambre, á que sitúa como “exemplo” de como a colaboración entre empresas, asociacións e administracións pode transformar un territorio
• Subliña a relevancia da colaboración público-privada para fomentar a innovación e fortalecer o talento, impulsar a internacionalización, e facilitar o acceso ao financiamento
• A directora da Axencia Galega de Sangue, Órganos e Tecidos (ADOS), Marisa López García, que interveu en nome dos galardoados, destaca a solidariedade e o traballo conxunto como unha das fortalezas do tecido empresarial, comercial e social galego

Santiago de Compostela, 11 de decembro de 2024

A  directora do Igape, Covadonga Toca, e a directora da Axencia Galega de Sangue, Órganos e Tecidos (ADOS), Marisa López García, participaron hoxe no acto organizado pola Asociación Área Empresarial do Tambre para homenaxear a nove compañías que celebran 25 anos de actividade no Polígono do Tambre, entre as que está a propia axencia de doazón. Durante a súa intervención, Toca destacou a importancia de valores como “a innovación, a resiliencia e a aposta pola calidade como claves para o éxito empresarial e o desenvolvemento económico sustentable en Galicia”.

Covadonga Toca definiu o Polígono do Tambre como un exemplo de como a colaboración entre empresas, asociacións e administracións pode transformar un territorio, creando emprego e riqueza. “As case 600 empresas que operan aquí, xerando máis de 7.000 postos de traballo directos, son unha proba de que a unión de esforzos e visión pode facer realidade proxectos que fortalecen o tecido económico e social”, sinalou.

Neste marco, durante a súa intervención, a directora do Igape subliñou a importancia da cooperación público-privada como ferramenta para fomentar a innovación, fortalecer o talento e impulsar a internacionalización das empresas galegas. 

Toca resaltou o traballo desenvolvido desde a Xunta de Galicia para facilitar o acceso ao financiamento e acompañar as empresas no camiño cara á modernización tecnolóxica e a competitividade global. Ademais, fixo referencia á creación da Oficina Económica de Galicia, un punto de contacto único que ofrece unha “nova maneira de relacionarse coas empresas de forma máis próxima, áxil e eficiente”.

A directora do Igape tamén destacou o papel do Biopolo da Sionlla, como un dos principais nodos de coñecemento biotecnolóxico de Galicia. Este espazo, froito da colaboración público-privada, ofrece infraestruturas avanzadas para o desenvolvemento de proxectos innovadores, consolidando Santiago como un referente no sector biotecnolóxico.

Toca eloxiou o compromiso das empresas homenaxeadas, que, segundo ela, representan os mellores valores do tecido empresarial galego. “Hoxe recoñecemos o labor de compañías que apostaron pola innovación e a excelencia durante 25 anos, xerando emprego e riqueza para Galicia. Son un exemplo para as novas xeracións e un motivo de orgullo para todos nós”, declarou.

Un galardón para ADOS

Pola súa banda, a directora da Axencia Galega de Sangue, Órganos e Tecidos (ADOS,) Marisa López García, foi a encargada de pronunciar unhas palabras en representación dos galardoados e salientou que o establecemento de sinerxías, o compromiso solidario e o desenvolvemento de liñas de traballo conxunto son unha das fortalezas do noso tecido empresarial, comercial e social.

Este compromiso solidario tense traducido, no caso da Axencia, nunhas cifras de doazón especialmente salientables no caso da cidade de Santiago de Compostela que, no pasado 2023, acadou un índice de 88 doazóns por cada 1.000 habitantes, a cifra máis elevada de entre as sete cidades galegas, con 8.686 doazóns de sangue.

Marisa López animou a todos os colectivos a continuar artellando unha rede de solidariedade e colaboración que redunde na consolidación dunha conciencia social favorable aos distintos xeitos de doazón"