• Adianta que os Orzamentos para o vindeiro ano da Consellería de Economía, Industria e Innovación soben por riba da media, ata acadar máis de 430 millóns de euros
• En liña co que anunciou no Debate do Estado da Autonomía o presidente da Xunta, destaca que se porá en marcha un plan de aceleración de proxectos industriais e unha oficina económica para toda Galicia como interlocutor único coa Administración
• Ademais de crear un fondo público-privado pioneiro entre as comunidades, adianta que se van investir case 100 millóns de euros tanto para facilitar liquidez ás empresas como para préstamos e créditos

Lalín (Pontevedra), 19 de outubro de 2023   A conselleira de Economía, Industria e Innovación, María Jesús Lorenzana, salientou hoxe que os Orzamentos do seu departamento para o vindeiro ano soben por riba da media, ata acadar máis de 430M€, para acelerar a tramitación administrativa, reforzar o financiamento e impulsar a innovación.

Nunha xuntanza coa Asociación de Empresarios Deza, Lorenzana detallou as contas da Consellería de Economía, Industria e Innovación para o ano que vén. Unha contas, dixo, que se incrementan un 5 por cento e teñen como principal obxectivo “dar resposta ás necesidades que teñen as empresas de axilizar as tramitacións administrativas e de eliminar a burocracia”.

Para iso, en liña co que anunciou no Debate do Estado da Autonomía o presidente da Xunta, avanzou que se porá en marcha un plan de aceleración de proxectos industriais e unha oficina económica para toda Galicia como interlocutor único coa Administración que van abranguer un investimento de máis de 6M€. Un reforzo a nivel tecnolóxico e administrativo para garantir que os proxectos industriais en Galicia se van tramitar no prazo dun ano e que “é clave para dar seguridade ás decisión empresariais e tamén para atraer novo tecido produtivo a Galicia”, subliñou.

Outro dos puntos fortes dos Orzamentos da Consellería de Economía, Industria e Innovación, será ofrecer financiamento ás empresas, tanto para facilitarlles liquidez como para préstamos e créditos, para o cal se van investir case 100M€. Nesta liña, tamén mencionou o fondo público-privado que vai impulsar a Xunta de Galicia e destacou que vai ser a primeira vez que unha comunidade autónoma pon en marcha un instrumento desde tipo, pola súa composición e dimensións, que xa se está tramitando na Comisión Nacional do Mercado de Valores.

En terceiro lugar, Lorenzana tamén apuntou a aposta pola innovación que recollen as contas do vindeiro exercicio, tan importante para a competitividade do tecido empresarial, puntualizou. Tal e como avanzou, será a primeira vez que a Xunta de Galicia activa unha liña de axudas específica para startups, ademais proseguir co desenvolvemento dos polos de innovación como é o caso do Polo de Tecnoloxías Cuánticas, e de procurar o binomio coa enerxía para a rebaixa do prezo eléctrico.

• A directora do Igape, Covadonga Toca, participou hoxe en Santiago na presentación deste evento, que se levará a cabo entre o 16 e o 18 do vindeiro mes en Montevideo e Punta del Este en colaboración coa Asociación de Empresarios Galegos do Uruguai
• Salienta a importancia da cooperación público-privado, chave no papel que xogan as asociacións galegas de empresarios no exterior na proxección internacional e na “consolidación da Marca Galicia” en todo o mundo
• Resalta a relevancia da diversificación para crecer nos mercados exteriores, que no caso de Uruguai ten permitido incrementar as vendas en distintos sectores entre os que destacan o agroalimentario e a automoción
• Subliña que as vendas ao exterior ao Uruguai seguen “unha liña claramente ascendente” incrementándose un 47,8% no último lustro ata acadar os 30M€

Santiago de Compostela, 18 de outubro de 2023.- A directora do Igape, Covadonga Toca, participou hoxe en Santiago na presentación do Encontro Mundial de Empresarios Galegos no Uruguai, un evento que se celebrará o vindeiro mes de novembro no país suramericano e que permitirá reforzar a xa importante relación comercial entre ambas rexións.

“Grazas á colaboración da Asociación de Empresarios Galegos do Uruguai (AEGU), podemos anunciar hoxe este encontro, que celebraremos, baixo o lema ‘Un camiño de integración e oportunidades’, entre o 16 e o 18 de novembro en Montevideo e en Punta del Este”, incidiu Toca Carús, que estivo acompañada polo cónsul xeral do Uruguai en Galicia, Ramiro Rodríguez Bausero, e pola prosecretaria da Asociación, Beatriz Doldán Montes.

A directora do Igape agradeceu a AEGU, que suma máis de 200 empresarios, o seu traballo, e puxo en valor a importancia da cooperación público-privada para o desenvolvemento de proxectos como este, que facilitará impulsar novos negocios e que contará coa presenza de delegacións de empresarios de Uruguai, Galicia, Cataluña, Estados Unidos, México, República Dominicana, Brasil e Arxentina.

“Vós sodes os nosos embaixadores no mundo; representades a imaxe dunha Galicia que grazas ao voso traballo reforzou a súa proxección internacional”, afondou Covadonga Toca, salientando a importancia que teñen as asociacións galegas de empresarios no exterior na proxección internacional e na “consolidación da Marca Galicia” en todo o mundo.

Neste marco, a directora do Igape destacou tamén a transcendencia da diversificación para crecer nos mercados exteriores, que no caso de Uruguai ten permitido incrementar as vendas en distintos sectores entre os que destacan o agroalimentario e a automoción. “Ambos os territorios diversificamos as nosas exportacións e importacións, creando oportunidades para o crecemento económico e a colaboración en diversas áreas”, expuxo.

Pola súa banda, o Cónsul de Uruguai, Ramiro Rodríguez, subliñou que “o noso país destaca pola posición estratéxica, con posibilidade de facer negocios con outros países da rexión como Brasil ou Paraguay. A nosa vocación é posicionarnos como Hub loxístico”. Neste sentido, o Cónsul puxo en valor o réxime de portos libres de Uruguai, a promoción do investimento estranxeiro e o seu sistema de zonas francas. Entre os sectores económicos con máis proxección, destacou a aposta polas enerxías renovables.

As vendas a Uruguai seguen unha liña claramente ascendente incrementándose un 47,8% no último lustro ata acadar os 30M€. Un crecemento parello ao que veñen reflexando as exportacións galegas, que acadaron no último ano unha cifra histórica ao sumar case 30.000M€.

• Rueda salienta que o obxectivo é que as empresas galegas sigan batendo récords de exportacións e abríndose “a novos mercados”
• Asegura que as achegas buscan promover actividades “de difusión no exterior” como campañas publicitarias e asistencia a feiras coma apoiar “accións para aumentar as exportacións”
• Explica que o Goberno galego lanza unha nova convocatoria dos programas Galicia Exporta Empresas e Organismos Intermedios para mellorar o posicionamento das empresas galegas no mercado internacional
• Estes apoios súmanse ao programa Galicia exporta dixital, que permite ás pemes avanzar nos seus procesos de internacionalización a través de ferramentas innovadoras
• O presidente resalta que desde a posta en marcha do Galicia Exporta Empresas, no ano 2016, téñense apoiado “preto de 1.500 plans de promoción internacional”, cunha axuda total ata a data de 30,5 M€
• Hai que sumar outros 8,7 M€ e 165 iniciativas promovidas a través do Galicia Exporta Organismos Intermedios

O presidente da Xunta, Alfonso Rueda, informou hoxe dunha nova convocatoria de dúas liñas de axudas -Galicia Expora Empresas e Galicia Exporta Organismos Intermedios- para promover a internacionalización de pemes e autónomos galegos. “Serán 3 millóns de euros para costear accións realizadas ao longo deste ano 2023”, explicou.

Rueda resaltou que estas achegas van dirixidas tanto a empresas como a clústeres, asociacións empresariais ou consellos reguladores. O presidente indicou que o obxectivo é que as empresas galegas sigan exportando e “abríndose a novos mercados”. Nesta liña, destacou que nos primeiros sete meses de 2023 bateuse un novo récord de exportacións ao chegar “a cifra histórica de 17.374 M€”.

Para iso as axudas buscan impulsar actividades “de difusión no exterior” coma campaña publicitarias e a participación en feiras internacionais así como a accións específicas “para aumentar as exportacións e adaptar os produtos as demandas dos países” onde se van vender.

As axudas, que se poderán solicitar durante un mes desde o día seguinte á publicación no Diario Oficial de Galicia, cobren as actuacións que se celebren desde o 1 de xaneiro de 2023 e ata o 15 de decembro de 2023. O apoio máximo por solicitude e beneficiario chega, no caso do Galicia Exporta Empresas, ata os 95.000 euros e no de Organismos Intermedios, aos 400.000.

O obxectivo destas liñas, impulsadas pola Consellería de Economía, Industria e Innovación, a través do Igape e no marco da Estratexia de Internacionalización, é apoiar a saída ao exterior do tecido empresarial galego, especialmente de pemes e establecementos comerciais, a través de novas canles de comercialización.

Un marco no cal tamén se activará proximamente unha nova convocatoria do Galicia exporta dixital, pois o desenvolvemento das tecnoloxías dixitais supón un enorme potencial para a mellora da competitividade nos mercados internacionais no actual contexto económico. O obxectivo é permitir ás empresas apoiarse en ferramentas innovadoras para acceder aos mercados exteriores.

Neste sentido, tal e como destacou o presidente desde a posta en marcha do Galicia exporta empresas, no ano 2016, “téñense apoiado preto de 1.500 plans de promoción internacional”, con accións de difusión, e asistencia a feiras ou prospección de novos mercados, cunha media de participación de máis de 240 empresas ao ano, o que supuxo unha axuda total ata a data de 30,5 M€.

Cifras ás que se suman os máis de 8,7 M€ e 165 iniciativas promovidas a través do Galicia exporta organismos intermedios. Pola súa banda, o Galicia exporta dixital ten beneficiado xa a máis de 400 empresas por importe de máis de 14 M€ e un investimento inducido de 17,6 M€.

Incremento das exportacións

Todas estas accións englóbanse na Estratexia de internacionalización que está a promover o goberno galego e que ten como principais claves a aposta pola dixitalización e a diversificación dos mercados exportadores.

Grazas a este esforzo conxunto, Galicia segue a bater os seus rexistros de exportacións. Así, a Comunidade sumou nos sete primeiros meses de 2023 vendas ao exterior por valor de 17.374 M€, o que supón un récord histórico, e un 2,5 % máis o período homólogo de 2022.

A balanza comercial galega presenta un saldo positivo de 5.332,1 M€ (773 millóns en xullo), cifra que duplica a obtida o primeiro semestre de 2022 e contrasta co saldo comercial de España, o cal segue lanzando un resultado negativo.

Santiago de Compostela, 16 de outubro de 2023 A directora do Igape, Covadonga Toca, mantivo un encontro de traballo co equipo directivo de Viratec -Clúster Galego de Solucións Ambientais e Economía Circular-. No encontro subliñouse a importancia da colaboración público-privada para contribuír ao desenvolvemento sustentable da sociedade galega e a preservación do seu medio ambiente, baixo os principios da economía circular. Esta cooperación coa Administración e entre empresas xera sinerxías entre distintas áreas de coñecemento, promove a I+D+i, mellora a formación e crea oportunidades de internacionalización.

• O novo programa busca facilitar ás pequenas e medianas empresas o acceso a dotacións dixitais e servizos avanzados a prezos competitivos e con prazos axustados ás súas necesidades
• As axudas financian a posta en marcha de proxectos de creación destes centros dixitais, con apoios que poden chegar ata o 80 % do investimento subvencionable, estando previstos tamén anticipos de ata o 80 %
• As infraestruturas poderán ser para uso exclusivo da empresa promotora do proxecto ou ben para o seu uso aberto e compartido, contribuíndo a reforzar o contorno de empresas e consumidores, e a dixitalización e modernización do tecido produtivo
• O prazo de presentación de solicitudes permanecerá aberto ata o 11 de decembro

Santiago de Compostela, 14 de outubro de 2023

O novo programa de Centros Dixitais promovido pola Consellería de Economía, Industria e Innovación a través do Igape suma preto de 6,5M € para mellorar a dixitalización do tecido empresarial e modernizar a industria galega a través de novos proxectos de creación deste tipo de infraestruturas na provincia da Coruña. O obxectivo é contribuír, tanto a nivel empresarial como local, a mellorar a dixitalización dos procesos empresariais, a contorna das empresas e os consumidores, e a modernizar e desenvolver a base industrial.

Cómpre salientar que a dispoñibilidade local destas infraestruturas dixitais de apoio e reforzo á industria beneficia de xeito especial ás pemes, ao permitirlles acceder a dotacións dixitais e servizos avanzados a prezos competitivos e con prazos axustados ás súas necesidades.

Neste marco, os centros dixitais, que poderán ser para uso exclusivo da empresa promotora do proxecto ou ben para o seu uso aberto e compartido, fomentarán o desenvolvemento de sistemas e conectividade dixital, a monitorización ou xestión remota de activos ou instalacións, e o control e comando de operacións en calquera ámbito de actividade, especialmente para instalacións de produción ou de xeración de enerxías renovables e no ámbito da mobilidade.

Así, o programa permitirá impulsar, entre outros, sistemas de simulación e sistemas de control de activos conectados, frotas de vehículos, captación e almacenamento de datos; sistemas de telemetría e telecomando tamén aplicables a vehículos e frotas, así como a instalacións enerxéticas, zonas de seguridade e espazos loxísticos.

O prazo de presentación de solicitudes estará aberto ata o vindeiro 11 de decembro.
O investimento subvencionable oscilará entre os 100.000 euros e os 3 M€, podendo acadar o importe da axuda ata o 80 % en función da tipoloxía do proxecto. Así mesmo, está prevista a posibilidade de realizar pagamentos anticipados de ata o 80 % do importe da axuda.

A través dos Centros Dixitais o Goberno galego reforza a súa aposta por un modelo de crecemento intelixente, sostible e innovador, contribuíndo á modernización e desenvolvemento da base industrial da zona na que se instalen. Cómpre salientar que a liña se enmarca no programa de Fondos de Transición Xusta, que buscan xerar un impacto económico e social positivo e contribuír á consolidación das pequenas e medianas empresas nos lugares definidos para estas zonas, que se localizan na provincia da Coruña.

O programa dá continuidade a outro tipo de iniciativas deste estilo, como os Centros de Fabricación Avanzada, que veñen de lanzar unha segunda convocatoria logo de pecharse a primeira coa creación de seis centros que suman máis de 16 M€ en apoios e que están a permitir promover proxectos en sectores industriais diversos, como as TIC, o biotecnolóxico, o turismo ou o agroalimentario.

• A directora do Igape, Covadonga Toca, participa na inauguración do encontro El mundo que viene, organizado por APD, no que salienta a importancia da cooperación público-privada para impulsar un “modelo máis sustentable”
• Defende que o talento resulta fundamental para impulsar a innovación, a competitividade e o progreso do tecido produtivo, e vólvese “esencial” na medida na que a automatización e a intelixencia artificial continúan transformando a economía
• Lembra que esta aposta se materializa, tamén, na conquista de novos mercados, contribuíndo a que Galicia estea a acadar “o mellor ciclo exportador da súa historia”

Santiago de Compostela, 10 de outubro de 2023

A directora do Igape, Covadonga Toca, participou hoxe na inauguración do encontro anual organizado por APD El mundo que viene. Un evento que afondou no actual escenario xeopolítico, económico e social ao tempo que permitiu avanzar algunha das claves da intelixencia artificial. Un marco no que Toca resaltou a aposta polo talento e a innovación como chaves para seguir construíndo a Galicia do futuro.

Neste sentido, a directora do Igape salientou a importancia do traballo diario e da cooperación público-privada para seguir camiñando cara un “modelo más sustentable”, capaz de impulsar o binomio industria – sustentabilidade, de apostar pola innovación, de manter o mellor ciclo exportador da historia de Galicia, e de ofrecer desde a administración todos os incentivos e medidas de acompañamiento necesarias.

“A medida que a automatización e a intelixencia artificial continúan transformando a economía, o talento humano vólvese aínda máis esencial para desenvolver, implementar e xestionar estas tecnoloxías de maneira ética e efectiva. O talento humano desempeñará un papel fundamental no mundo que vén, xa que será necesario para impulsar a innovación, a competitividade, a adaptabilidade e o progreso”, defendeu Covadonga Toca.

A directora do Igape puxo en valor, neste marco, o traballo que está a facer Galicia, impulsando, a través dos Fondos Next Generation, unha axenda de proxectos industriais en distintos campos. Así, afondou, no eido da Intelixencia Artificial estase a traballar na posta en macha na Coruña da sede da Axencia Española de Supervisión da Intelixencia Artificial, algo que multiplicaría as posibilidades que xa confire o feito de contar cun dos ordenadores cuánticos más avanzados de Europa no Centro de Supercomputación.

Así mesmo, e no eido da mobilidade, Covadonga Toca fixo referencia a iniciativas como a de Resonac para implantar unha fábrica de ánodos para baterías a partir de grafito; no campo do hidróxeno verde resaltou proxectos como as factorías de hidróxeno verde nas Pontes —de Reganosa e EDP Renovables— e en Meirama (Cerceda) —promovida por Reganosa, Naturgy e Repsol—; e no sector biotecnolóxico, o proxecto Sionlla Biotech, en cuxo centro de servicios xa están a traballar as primeiras empresas interesadas.

“Este modelo non só busca posicionar Galicia como un referente dese mundo que vén, senón que contribúe, tamén, a manter o mellor ciclo exportador da nosa historia”, proseguiu a directora do Igape, quen lembrou que o 2022 pechou cos mellores datos de exportación desde que hai rexistros con preto de 30.000 millóns en vendas ao exterior.

Un ciclo, expuso, onde a diversificación é xa “unha parte fundamental”, cunha presenza cada vez máis importante das empresas galegas en mercados como EEUU (+21,2%), México (+48,4%) ou Oriente Medio (+52,5%).

• As persoas consumidoras terán á súa disposición un desconto de 30 euros para as compras nos establecementos adheridos, que suman xa máis de 4.000
• A Consellería de Economía, Industria e Innovación destina 2,5 millóns á segunda convocatoria do ano deste programa co que se incentiva a demanda e se atrae nova clientela aos establecementos locais

• A directora do Igape, Covadonga Toca, participou esta mañá no encontro loxístico Conectividade de contedor marítimo en Galicia, celebrado no marco da Feira Internacional de Produtos do Mar Conxelados
• Subliña o papel da colaboración público-privada para potenciar o crecemento dos sectores produtivos, unha cooperación que, no caso da industria loxística, se materializa nun acordo co Clúster que está a permitir apostar pola innovación e potenciar a internacionalización
• Explica que accións como a ruta marítima co Porto de Miami na que se está a traballar, ou a participación en eventos como a Feria Transport Logistic de Múnic permiten reforzar e poñer en valor as posibilidades e o papel de Galicia como nodo loxístico internacional

Vigo, 5 de outubro de 2023

A directora do Igape, Covadonga Toca, participou esta mañá no encontro loxístico Conectividade de contedor marítimo en Galicia que, celebrado no marco da Feira Internacional de Produtos do Mar Conxelados – Conxemar, permitiu avaliar e coñecer a situación e as posibilidades deste sector no actual contexto económico. Neste sentido, e como destacou Toca, a loxística configúrase como unha industria clave de cara a mellorar a conectividade e potenciar a internacionalización do tecido produtivo galego.

“Unha das aprendizaxes extraídas da pandemia foi, sen dúbida, tomar consciencia da importancia da loxística e o transporte no noso día a día. Os sectores produtivos medran en Galicia grazas á loxística, e a loxística medra grazas aos sectores produtores”, apuntou a directora do Igape, quen puxo en valor o papel da colaboración público-privada neste contexto, destacando o traballo conxunto que está a realizar o Goberno galego xunto ao Clúster da Función Loxística de Galicia.

Esta cooperación, afondou Covadonga Toca, plásmase nun acordo de colaboración que se estende ata o 2024, e que permite analizar datos de conectividade internacional, buscar solucións para as necesidades do sector en cuestións de actualidade como a distribución urbana de mercadorías e as infraestruturas do transporte, apostar pola innovación en iniciativas como o proxecto europeo Cologistics -que impulsa a colaboración transfronteiriza no ámbito do transporte e a loxística da Eurorrexión Galicia-Norte de Portugal-, ou potenciar a internacionalización da loxística de Galicia. 

Neste escenario, a directora do Igape salientou algunha das accións máis importantes que se están a levar a cabo de cara a potenciar Galicia como nodo loxístico internacional, como os avances na ruta comercial directa co Porto de Miami, que busca impulsar tanto a loxística de frío e a sustentabilidade dos portos da Comunidade como a situación de Florida como hub loxístico; ou a participación na Feria Transport Logistic celebrada en Múnic, que contribuíu á posta en valor do potencial de Galicia como nodo loxístico internacional.

“A Xunta ten claro que a loxística constitúe a base para a apertura comercial, a competitividade e a globalización económica, converténdose en peza fundamental para o crecemento económico”, apuntou a directora do Igape, que explicou tamén que, sen un bo servizo loxístico, “hoxe non poderiamos falar de que durante o último ano Galicia superou o récord histórico de exportacións, rozando a barreira dos 30.000 millóns de euros”.

• A conselleira de Economía, Industria e Innovación, María Jesús Lorenzana, asistiu hoxe á inauguración en Oleiros da XIII Semana Internacional Contract Galicia
• Subliña a transversalidade, espírito asociativo e internacionalización deste ‘sector de sectores’

Oleiros (A Coruña), 4 de outubro de 2023

A conselleira de Economía, Industria e Innovación, María Jesús Lorenzana, destacou esta mañá en Oleiros o alto nivel de calidade, diferenciación e competitividade do contract galego, algo que, en gran medida, se debe á aposta pola innovación e o avance no uso de materiais máis sustentables. Lorenzana participou esta mañá na inauguración da XIII Semana Internacional Contract Galicia.

Na súa intervención, a conselleira definiu o contract como “sector de sectores” e subliñou tanto a súa transversalidade como o espírito asociativo e de cooperación que o define, agrupando tanto a empresas como organismos e entidades que permiten abordar proxectos conxuntos con maior proxección internacional.

Precisamente, Lorenzana explicou que máis dun centenar de empresas galegas forman parte deste sector e están presentes en 100 países, con máis de 1.000 proxectos realizados en 600 cidades de todo o mundo.

O acto celebrouse na Boutique Hotel Noa de Oleiros, un espazo que para a conselleira é un bo exemplo das cualidades do contract galego e que amosa as últimas tendencias do sector en sustentabilidade, eficiencia enerxética, ecodeseño, ecoinnovación ou novos materiais.

Lorenzana finalizou coa confianza en que este foro anual permita entablar futuros proxectos de negocio para que o contract galego poida continuar coa súa expansión no mercado internacional.