Super User - Igape - Results from #190

Martes, 14 Novembro 2023 19:22

Rueda erixe a sociedade Recursos de Galicia como garante de que a xestión da riqueza natural da comunidade se traduza en riqueza social

Pon en valor que este “ambicioso proxecto sen precedentes” aglutine a máis de 30 empresas que sosteñen máis de 20.000 empregos directos e achegan ao PIB autonómico case 11.000 M€
Destaca que a Xunta será socia maioritaria cun 30 % das accións cunha achega de 30 M€ que se desembolsará progresivamente ata 2027
Sitúa esta nova sociedade mixta como a “punta de lanza” da futura Lei de recursos naturais de Galicia, que exixirá aos proxectos enerxéticos un estudo do impacto socieconómico e medidas para compensalos

Santiago de Compostela, 13 de novembro de 2023

O presidente da Xunta, Alfonso Rueda, puxo en valor hoxe a creación hoxe da sociedade mixta Recursos de Galicia como a “primeira pedra” para garantir que a xestión da riqueza dos recursos naturais galegos se traducirá sempre en riqueza social para a comunidade.

Así o salientou durante o acto de constitución e presentación pública desta nova sociedade mixta no Museo do Pobo Galego, onde estivo acompañado da conselleira de Economía, Industria e Innovación, María Jesús Lorenzana, e dos conselleiros de Facenda e Administración Pública, Miguel Corgos, e Medio Rural, José González.

O mandatario galego destacou o enorme potencial da comunidade galega para ser un “actor de primeiro nivel” na transición enerxética que se está a vivir e advertiu que Galicia non pode desaproveitar a oportunidade que brindan os recursos naturais dos que dispón. “Non imos resignarnos a quedar á marxe do desenvolvemento das enerxías verdes en toda Europa: aspiramos a estar no centro”, aseverou, ao tempo que avogou por que os beneficios da explotación destes recursos repercutan no conxunto do pobo galego e se repartan colectivamente.

Máis de 30 empresas e a Xunta como socia maioritaria

Para isto, defendeu o papel que vai desenvolver a sociedade mixta Recursos de Galicia, á que cualificou de “ambiciosa e sen precedentes na nosa contorna”. Incorpora máis de 30 empresas que sosteñen máis de 20.000 empregos directos e que achegan ao Produto Interior Bruto autonómico case 11.000 millóns de euros cada ano. A todas elas, Rueda agradeceulles a súa vocación de sumarse a un proxecto “en beneficio para Galicia”, a vez considerou que a súa participación demostra a “amplísima unidade” do tecido económico galego.

Entre as empresas que participan en Recursos Galicia están Abanca, Finsa, Megasa, Valtalia, Copasa, Gesuga, o Grupo Nogar, Pérez Rumbao, Jealsa, Revi, Profand, Gadisa, Ence, Exlabesa, ARP Global, AIN Active, Severiano, Intaf, Genesal, Industrial Recense, Mecanizados Acebrón, Cover Global, Edigal, Tecdesoft, Ertec Iberia, Integria Energía Empresas, Eroxona, Sertogal, Twinleads, Wind1000, Epifanio Campo, Aceites Abril e Megaro Foods.

En todo caso, o presidente da Xunta apuntou que as portas desta sociedade están abertas tamén para calquera empresa, sexa cal sexa o seu tamaño, ou Administración local que se queira incorporar aos proxectos específicos que irá desenvolvendo.

Rueda puxo en valor que a carón de todas elas estará a Xunta de Galicia cun 30 % das accións, converténdose así na socia maioritaria de Recursos de Galicia. Segundo precisou, contará cun desembolso progresivo de 30 millóns de euros ata 2027. A súa participación articularase a través de Impulsa Galicia.

Enerxías verdes, aproveitamento riqueza mineral e concesións de augas

Na súa intervención, o titular do Executivo galego precisou que Recursos de Galicia participará directamente en proxectos de xeración de enerxías verdes, de aproveitamento da riqueza mineira ou iniciativas que requiran concesións de augas.

No entanto, Rueda aclarou que non actuará como un operador calquera no mercado, senón que buscará ser unha “referencia e unha guía” para os demais axentes sociais. Deste xeito, fixo especial fincapé en que procurará que os proxectos enerxéticos supoñan beneficios para as comunidades locais coas que comparten territorio. Tamén velará por que se traduzan en máis traballo para as empresas dos seus lugares, á vez que destacou que fomentará o autoconsumo de fontes renovables e a eficiencia enerxética.

En resumo, definiu a actividade de Recursos de Galicia como un “catálogo de boas prácticas” para as empresas do sector enerxético e considerou que lles permitirá demostrar a parques eólicos, centrais hidráulicas e solares ou as minas que “non son estranxeiros na terra na que se asentaron” senón figuras “claves” na cohesión e no progreso da veciñanza.

Punta de lanza da Lei de recursos naturais de Galicia

Por este motivos, erixiu a sociedade Recursos de Galicia como “punta de lanza” da futura Lei de recursos naturais de Galicia —coa que comparte obxectivos — e da que salientou o seu carácter “pioneiro” xa que cambia o paradigma da regulación dos proxectos enerxéticos. Así, dentro da xa “moi esixente” avaliación de impacto ambiental, salientou o feito de deberán incorporar tamén un estudo do seu impacto socioeconómico e das medidas que propón a entidade promotora para compensalos.

Como exemplo algunha destas medidas de contrapeso, situaríase a posibilidade da incorporación de investidores ou traballadores locais, o uso de I+D+i producida en Galicia, o reinvestimento dos beneficios en accións sociais e patrimoniais ou a redución dos custos enerxéticos para as persoas da contorna.

Neste senso, Rueda lembrou que en Galicia as tres cuartas partes da enerxía producida xa é renovable, por riba do obxectivo para 2030; a xeración de enerxía supón arredor dun 5 % do PIB; e, ademais de ser a quinta maior consumidora de enerxía para a industria, a Comunidade está atraendo o interese de moitos proxectos que requirirán dun subministro de enerxía a prezos competitivos.

Por todos estes motivos, argumentou que falar de enerxía é falar de postos de traballo, de riqueza e dun dos principais vectores de futuro para a nosa comunidade. Por iso, defendeu que o desenvolvemento enerxética debeabordarse con “rigor, con credibilidade e con valentía” e concluíu que isto é o que teñen claro todos os socios que se suman hoxe a esta “aventura”.

Published in Novas

Tagged under

Ler máis

Martes, 14 Novembro 2023 18:17

A Xunta preside unha nova reunión da mesa polo impulso da actividade económica de As Pontes

A conselleira de Economía, Industria e Innovación, María Jesús Lorenzana, o alcalde das Pontes, e as tres organizacións sindicais volveron reclamar a Endesa o compromiso firme para o mantemento do emprego dos traballadores das auxiliares durante os traballos de pre-desmantelamento da central

Santiago de Compostela, 13 de novembro de 2023

A conselleira de Economía, Industria e Innovación, María Jesús Lorenzana, presidiu esta tarde unha nova reunión da Mesa para o impulso da actividade económica das Pontes, logo da celebrada a finais do mes pasado e na que se solicitara a Endesa a presentación dun cronograma para as labores de desarme da central térmica.

No encontro Xunta, Concello e parte social acordaron reclamar a Endesa que traslade ás empresas participantes no proceso de adxudicación dos traballos de pre-desmantelamento a necesidade de se comprometer co mantemento da totalidade do emprego das empresas auxiliares, ben a través da subrogación por parte da futura adxudicataria, ben a través de recolocacións. Así mesmo, acordaron que Endesa solicite a paralización dos procedementos de despedimento colectivo ata que se resolva o proceso de adxudicación dos ditos traballos de pre-desmantelamento.

No encontro participaron a delegada territorial da Xunta en Ferrol, Martina Aneiros, o alcalde das Pontes, Valentín González Formoso, así como representantes de Endesa, da CIG, UGT e CCOO, da Confederación de Empresarios, da Asociación de Empresarios Seara, da Asociación de Comerciantes, Hostaleiros e Empresarios das Pontes, así como da Xunta e do Instituto de Transición Justa.

Lorenzana volveu a insistir ao remate da Mesa da importancia de contar cun cronograma que achegue certezas para todas as partes implicadas e permita acompasar as labores de pre-desmantelamento así como de desmantelamento da central térmica cos proxectos industriais e enerxéticos nos que se está traballando, logo do peche imposto polo Goberno central o pasado mes de agosto.

Published in Novas

Tagged under

Ler máis

Venres, 10 Novembro 2023 16:25

Rueda aposta por simplificar trámites, asesorar e apoiar con financiamento ás empresas para consolidar Galicia á vangarda económica de España

Pon en valor medidas como a nova Oficina Económica de Galicia, que será unha canle única de interlocución coas empresas para prestarlles asesoramento técnico e personalizado
Destaca o labor das empresas familiares que apostan por “reinventarse sen renunciar a súa esencia”
Agradece a contribución do tecido produtivo a facer de Galicia “unha marca de prestixio” a través dos produtos que exportan por todo o mundo

Ponteareas (Pontevedra), 10 de novembro de 2023

O presidente da Xunta, Alfonso Rueda, apostou hoxe pola simplificación administrativa, o asesoramento personalizado e o apoio financeiro ás empresas como ferramentas fundamentais para seguir consolidando a posición de Galicia na vangarda económica de España. Así o sinalou durante a súa participación nos actos de conmemoración do 40 aniversario da empresa Kauman, nos que estivo acompañado pola conselleira de Economía, Industria e Innovación, María Jesús Lorenzana.

O titular do executivo galego puxo a esta industria ponteareá como un exemplo representativo de empresas familiares que apostan “por reinventarse” e que chegan a converterse en líderes no seu sector desde Galicia “sen renunciar a súa esencia”. Nesta liña, asegurou que “é un orgullo” ver como seguen a medrar as exportacións de empresas galegas, o que non só implica “emprego” para a comunidade senón que contribúe a promover Galicia como unha “marca de prestixio” a través dos seus produtos.

Así, eloxiou o papel das empresas e industrias galegas que contribúen a xerar riqueza e emprego e considerou que o papel do Goberno galego debe ser “dar facilidades e eliminar obstáculos”, ofrecendo certezas e prestando apoio.

Para conseguilo, destacou que a Xunta está poñendo en marcha distintas medidas como a futura Oficina Económica de Galicia, que se constituirá como a canle única de interlocución coas empresas para prestarlles asesoramento personalizado; a redución da burocracia; a mellora do acceso ao solo empresarial; ou o apoio económico, tanto para investimento inicial como a través de axudas a fondo perdido.

Published in Novas

Tagged under

Ler máis

Xoves, 09 Novembro 2023 16:39

A Xunta avalía co tecido empresarial as novas oportunidades e vías de negocio que ofrece o mercado da República Dominicana

A directora do Igape, Covadonga Toca, mantén un encontro co embaixador da República Dominicana antes de inaugurar, na sede da Confederación de Empresarios da Coruña, a xornada ‘República Dominicana: Un mercado de oportunidade’, onde pon en valor o crecemento das exportacións nun país no que venden máis 250 empresas galegas
Subliña a importancia da colaboración público-privada para seguir medrando a través de actuacións como as misións comerciais impulsadas polo Igape no país no 2022 e neste 2023, nas que participaron un total de 11 empresas galegas
Resalta a aposta da Xunta pola internacionalización, que está a contribuír a que Galicia acade cifras históricas nas vendas ao exterior e que se materializa en accións como as antenas do Igape ou os programas Galicia Exporta Empresas e Organismos Intermedios

A Coruña, 9 de novembro de 2023

A directora do Igape, Covadonga Toca, mantivo esta mañá un encontro co embaixador da República Dominicana, Juan Bolívar Díaz Santana, e co conselleiro responsable de Comercio, Investimento e Turismo do país, José Manuel Vargas D’Oleo, cos que participou, tamén, na xornada República Dominicana: Un mercado de oportunidade, que se celebrou na sede da Confederación de Empresarios da Coruña. Uns encontros que permitiron avaliar as novas oportunidades e vías de negocio que ofrece o país centroamericano ao tecido empresarial galego.

“República Dominicana é un mercado no que as exportacións de Galicia seguiron unha liña notablemente ascendente, incrementándose nun 53% durante o último lustro”, subliñou Toca Carús, quen destacou que, hoxe en día, máis de 250 empresas galegas de diferentes sectores exportan ao país, sumando durante o último ano máis de 49 millóns en vendas ao exterior. Esta cifra, afondou, supón un incremento do 8,2% con respecto ao exercicio precedente, e contribúe ao aumento do saldo da balanza comercial galega, que se situaba en 48,5 millóns de euros no 2022, un 52,8% máis que en 2017.

Neste contexto, a directora do Igape sinalou as oportunidades que, para seguir medrando, ofrecen sectores como a construción, a industria agroalimentaria, os bens de consumo, a enerxía ou as renovables. “Desde a Xunta facilitamos e poñemos ao dispor das empresas as ferramentas e apoios necesarios para favorecer a súa saída aos mercados internacionais e para a implantación de novos proxectos”, incidiu.

Un marco no que Toca Carús realzou a aposta do Goberno galego pola internacionalización, que está a contribuír a que Galicia acade cifras históricas nas vendas ao exterior. Un compromiso que, como explicou, se materializa en accións como as antenas do Igape -que permiten acompañar ás empresas nos seus procesos de internacionalización- ou os programas Galicia Exporta Empresas e Organismos Intermedios -para apoiar accións de promoción no exterior e que teñen aberta nestes momentos unha nova convocatoria-.

Nesta liña, a directora do Igape avogou por manter e potenciar a colaboración público-privada para seguir medrando a través de actuacións como as misións comerciais impulsadas polo Igape na República Dominicana nas que, nos anos 2022 e 2023, participaron un total de 11 empresas galegas.

Published in Novas

Tagged under

Ler máis

Mércores, 08 Novembro 2023 15:44

Lorenzana recibe ao comité de empresa de Einsa Print

Santiago de Compostela, 8 de novembro de 2023

A conselleira de Economía, Industria e Innovación, María Jesús Lorenzana, mantivo unha reunión co comité de empresa da compañía Einsa Print para escoitar as demandas dos traballadores da planta das Pontes.

Lorenzana comprometeuse á realización dunha análise da situación que está atravesando a compañía para, tal e como lle trasladou ao Comité, posteriormente convocar á empresa para coñecer os seus plans de futuro.

Published in Novas

Tagged under

Ler máis

Luns, 06 Novembro 2023 21:01

O orzamento do Igape chega no 2024 aos 213 M€ na procura de atraer investimentos e consolidar a aposta pola internacionalización e o financiamento

A directora do Instituto Galego de Promoción Económica presenta no Parlamento as contas do seu departamento para o vindeiro exercicio, que aspiran a “seguir construíndo, xuntos, esa Galicia máis sustentable, máis verde, máis preparada, con máis e mellor talento e máis competitiva”
Pon en valor a nova Oficina Económica de Galicia, unha canle única para “todos aqueles interesados en investir na nosa terra” que busca reducir a burocracia administrativa ao máximo
Subliña a “ampla batería de medidas de apoio” impulsadas para mellorar a produtividade, entre as que destacan preto de 80 millóns destinados a ferramentas que permitirán ao tecido empresarial mellorar as súas capacidades competitivas
Avanza unha nova liña de incentivos e apoios para á atracción e implementación de empresas, con 30 M€ en tres anos en proxectos significativos por volume de investimentos e por creación neta de emprego
Sinala que as contas destinan 111 millóns para atender as necesidades de financiamento do tecido empresarial galego, incluíndo máis de 34 M€ en préstamos para investimentos estratéxicos
Salienta a “decidida aposta pola internacionalización” na procura de manter e mellorar “o mellor ciclo exportador da historia de Galicia”

Santiago de Compostela, 6 de novembro de 2023

A directora do Igape, Covadonga Toca, avanzou hoxe que os orzamentos do Instituto para o vindeiro ano chegarán case ata os 213 millóns de euros, unha suba de algo máis do 3% que permitirá tanto a redución de burocracia administrativa para atraer novos investimentos como a consolidación da aposta pola internacionalización e o financiamento.

“Os orzamentos do Igape medran na procura de seguir construíndo, xuntos, esa Galicia máis sustentable, máis verde, máis preparada, con máis e mellor talento e máis competitiva”, apuntou Toca Carús, quen subliñou que as todas as actuacións se sustentan na colaboración público-privada co obxectivo de promover a transformación dixital, apostar polo talento, facilitar o financiamento, impulsar a busca de novos mercados e reducir a burocracia.

Precisamente neste eido, a directora do Igape apuntou unha das grandes novidades do próximo exercicio, a creación da Oficina Económica de Galicia. Esta Oficina, adscrita ao Instituto e dotada con 5,7 M€, explicou, constituirase como canle única para empresa e industria, sendo o punto de contacto de información e entrada para as iniciativas empresariais e proxectos industriais, facilitando información, asesoramento, acompañamento, apoio e acceso a financiamento. Algo para o que contará, tamén, con persoal especializado de todas as áreas, entre outras a industrial.

“O Igape reactívase, así, sumando un papel decisivo á batería de medidas de apoio ás empresas, que buscan dar un salto en innovación tecnolóxica, automatizando e axilizando os procesos internos e facilitando un entorno intuitivo e amigable; que buscan, en definitiva, mellorar a competitividade empresarial no cambiante escenario do noso tempo”, apostilou Toca.

A mellora da competitividade empresarial

Esta aposta pola competitividade, aclarou, centrará gran parte dos programas do vindeiro exercicio, sumando preto de 80 M€ do total do orzamento do Igape. Deste xeito, afondou a directora, habilitaranse distintas ferramentas, entre as que destacou a nova liña de incentivos e apoios para á atracción e implementación de empresas, con 30 millóns en tres anos en proxectos significativos, tanto por volume de investimento -entre 800.000 e 10 M€ en activos fixos tanxibles e intanxibles- como por creación neta de emprego -máis de 25 novos postos de traballo-.

Unha liña, continuou Toca Carús, que se complementa con outra das novidades para o 2024, o programa de apoio a sustentabilidade e competitividade das empresas galegas, para o que se destinarán 1,3M€ en dous anos promovendo investimentos específicos para os proxectos de todo o campo ASG (Ambientais, Sociais e de Gobernanza).

Así mesmo, a directora do Igape avanzou tamén o mantemento doutras actuacións como os Centros de Fabricación Avanzada, que sumarán 7,2 millóns para seguir a promover espazos colaborativos e infraestruturas locais que permiten o desenvolvemento da contorna das empresas e os consumidores; e os obradoiros e os programas para a dixitalización, con case 8 millóns para facilitar proxectos neste eido.

Acceso ao financiamento

“E máis alá do compromiso inalterable polo crecemento continuo do tecido produtivo galego, os orzamentos do Igape atenden, como cada ano, ás necesidades de financiamento de empresas, pemes e autónomos”, proseguiu a directora do Igape, que indicou que as contas prevén máis de 111 millóns para a posta en marcha de instrumentos financeiros que, conxuntamente e en coordinación cos fondos xestionados por XesGalicia, serviran para mobilizar o gasto empresarial.

Neste campo están previstos máis de 34 millóns en préstamos para investimentos estratéxicos, que por primeira vez terán en conta tamén ás grandes empresas e do que, como sinalou a directora, se espera “acadar un forte efecto multiplicador na economía galega e a modernización tecnolóxica do tecido produtivo”.

Así mesmo, activaranse outros instrumentos como os préstamos parcialmente reembolsables, que, cun orzamento de máis de 7,2 millóns, permiten financiar proxectos de investimentos como a compra de maquinaria e renovación dos equipos nas empresas; ou os convenios con entidades bancarias e sociedades de garantía recíproca (SGR), que facilitan o acceso ao financiamento das empresas para circulante, e para os que haberá un investimento de máis de 7 millóns que permitirán mobilizar 80 millóns nas empresas.

O mellor ciclo exportador da historia de Galicia

A directora do Igape destacou, tamén, o reforzo da aposta pola internacionalización que supoñen as contas de 2024. Un compromiso, afondou, que busca seguir contribuíndo “ao mellor ciclo exportador da historia de Galicia”, que permitiu rozar os 30.000 millóns de euros en vendas ao exterior o ano pasado, e levar, no acumulado ata agosto deste exercicio, máis de 19.500 millóns exportados, un 1,6% por riba con respecto ao mesmo período de 2022.

“Queremos seguir acompañando ao tecido empresarial na busca de novos mercados para manter o impulso das exportacións apoiados na marca Galicia”, afondou Toca Carús, quen destacou unha nova liña de apoio á internacionalización de empresas para impulsar a promoción no exterior e a exportación de produtos e servizos así como a implantación noutros mercados. Unha novidade que se complementa con outras liñas que xa se veñen desenvolvendo, como os bolseiros e xestores de internacionalización, para os que se destinan 1,6 millóns; as liñas Galicia Exporta Empresas e Organismos Intermedios e Galicia Exporta Dixital, que sumarán preto de 5 millóns para seguir promovendo plans de promoción internacional e accións de internacionalización dixital; ou a apertura de dúas novas antenas do Igape.

“Estes orzamentos do Igape están pensados para poñer a Galicia no mapa de atracción industrial, para fortalecer o tecido empresarial e para mellorar a vida das familias e das galegas e dos galegos”, concluíu a directora.

Published in Novas

Tagged under

Ler máis

Domingo, 29 Outubro 2023 16:04

Lorenzana pon en valor o esforzo do tecido empresarial por comercializar produtos e servizos no mercado internacional

A conselleira de Economía, Industria e Innovación, María Jesús Lorenzana, visitou hoxe as instalacións de D-Due
Apunta que un dos obxectivos da Xunta de Galicia é impulsar a internacionalización da economía galega e que pemes, autónomos e establecementos comerciais teñan acceso a novas canles e destinos de comercialización
Informa de que, desde o pasado 23 de outubro e ata o vindeiro 23 de novembro, está aberta a convocatoria dos programas Galicia Exporta Empresas e Galicia Exporta Organismos Intermedios, que suman máis de 3 M€

Rianxo (A Coruña), 28 de outubro de 2023

A conselleira de Economía, Industria e Innovación, María Jesús Lorenzana, visitou hoxe as instalacións da firma D-Due, onde puxo hoxe en valor o esforzo que o tecido empresarial galego está facendo por diversificar mercados e comercializar os seus produtos e servizos noutros países.
Lorenzana apuntou que un dos obxectivos da Xunta de Galicia é impulsar a internacionalización da economía galega e que pemes, autónomos e establecementos comerciais teñan acceso a novas canles e destinos de comercialización.

Ao respecto, informou de que, desde o pasado 23 de outubro e ata o vindeiro 23 de novembro, está aberta a convocatoria das dúas liñas de axuda neste sentido, que son o Galicia Exporta Empresas e o programa Galicia Exporta Organismos Intermedios, que suman máis de 3 M€, con axudas máximas que roldan os 95.000 euros e os 400.000 euros, respectivamente.

D-Due é una das 240 empresas que se teñen beneficiados destas ordes de axuda nos últimos anos, que lle serviron de apoio na súa estratexia de expansión internacional, especialmente, cara a países como Xapón, onde dispón de tenda propia.

Published in Novas

Tagged under

Ler máis

Xoves, 26 Outubro 2023 21:22

A Xunta destaca na Coruña as posibilidades que ofrece a intelixencia artificial para mellorar a competitividade empresarial a través da innovación e as novas tecnoloxías

A directora do Igape, Covadonga Toca, participa na xornada ‘Benvido, futuro: proxectando Galicia’, onde avoga pola colaboración público-privada para avaliar e avanzar nas posibilidades que ofrece a intelixencia artificial para optimizar procesos e mellorar procedementos
Salienta a recente posta en marcha do Centro de Servizos Avanzados da Cidade das TIC que, coas máquinas de intelixencia artificial más avanzadas, permitirá ás empresas galegas dispor do mellor entorno de traballo posible
O encontro celebrouse no marco do programa Capacita Directivos, unha iniciativa que permitiu, nas seis primeiras edicións, realizar preto de 80 actividades formativas nas que participaron arredor de 17.000 asistentes, en presencial e en liña

A Coruña, 26 de outubro de 2023

A directora do Igape, Covadonga Toca, participou esta mañá na Coruña na inauguración da xornada ‘Benvido, futuro: proxectando Galicia’, que tivo lugar na sede de Nordés Club Empresarial, e onde puxo en valor as posibilidades que ofrece a intelixencia artificial de cara a mellorar a competitividade do tecido produtivo reforzando a aposta pola innovación e as novas tecnoloxías.

“A intelixencia artificial xa está a transformar a nosa forma de vivir e traballar, abríndose paso na maioría das esferas da actividade humana”, salientou Toca, quen avogou pola colaboración público-privada neste campo para seguir avanzando e permitir ao tecido empresarial “solucionar problemas, novos niveis de velocidade e precisión ou unha maior eficacia e novas formas de traballar”.

Un esforzo conxunto que, como indicou a directora do Igape, debe atender tamén a aqueles aspectos máis delicados, como as preocupacións sobre a privacidade das persoas, os ciberataques ou a xestión do cambio e a formación. Factores para os que, precisou, resulta fundamental a aposta polo talento como “motor da economía do coñecemento”.

Covadonga Toca resaltou a importancia dese talento nas organización de cara a “desenvolver, implementar e xestionar tecnoloxías de maneira ética e efectiva”. “A medida que a automatización e a intelixencia artificial continúan transformando a economía, o talento humano vólvese aínda máis esencial”, apuntou.

Neste contexto, a directora do Igape salientou que Xunta ten clara a necesidade de adoptar as tecnoloxías emerxentes, xa que as empresas poden obter vantaxes competitivas e oportunidades de crecemento. Por este motivo, lembrou, vense de inaugurar, o pasado día 20, o Centro de Servizos Avanzados da Cidade das TIC.

Este espazo, explicou, está chamado a ser “un núcleo tractor, aberto e colaborativo, coas máquinas de intelixencia artificial máis avanzadas”, o que permitirá ás empresas galegas, especialmente ás do sector TIC, dispoñer dunha “contorna de traballo inigualable e de altas capacidades”. “O progreso da Cidade dás TIC vai ser crucial, e por este motivo desde a Xunta apoiaremos aos proxectos que dentro desta singular contorna váianse xerando”, incidiu.

Xornada Capacita Directivos

O acto de hoxe tivo lugar no marco do programa Capacita Directivos, que inclúe a organización de encontros como o desta mañá, que buscan concienciar e promover a colaboración entre empresas, emprendedores, administracións, clústeres e centros de coñecemento.

Este programa do Igape, xa consolidado, ten permitido nas súas seis primeiras edicións realizar preto de 80 actividades formativas nas que participaron arredor de 17.000 asistentes, xa fose en presencial ou en liña, que puideron afondar en eidos como a mobilidade sustentable, as fontes renovables, a aeronáutica ou a loxística do futuro.

Published in Novas

Tagged under

Ler máis

Luns, 23 Outubro 2023 12:05

A Xunta abre mañá o prazo para solicitar as axudas dos programas Galicia Exporta Empresas e Organismos Intermedios

Son un total de 3 M€ destinados a pemes e autónomos galegos para incentivar a realización de accións de promoción exterior que xeren vantaxes competitivas na proxección e o posicionamento de empresas e organismos galegos nos mercados internacionais
Ambas liñas impulsan actividades de difusión e a participación en eventos expositivos no exterior, así como accións de prospección internacional para proxectos individuais -Exporta Empresas- ou coordinados por agrupacións empresariais -Exporta Organismos Intermedios-
Desde a posta en marcha do Galicia Exporta Empresas, no ano 2016, téñense apoiado preto de 1.500 plans de promoción internacional, cunha axuda total ata a data de 30,5 M€, aos que se suman outros 8,7 M€ e 165 iniciativas promovidas a través do Galicia Exporta Organismos Intermedios

Santiago de Compostela, 23 de outubro de 2023

O Diario Oficial de Galicia (DOG) publica hoxe a convocatoria dos programas Galicia Exporta Empresas e Galicia Exporta Organismos Intermedios, dúas liñas de apoio que sumarán máis de 3 M€ no que queda de ano na procura de promover a diversificación de mercados e a internacionalización de pemes e autónomos galegos. O prazo de solicitudes comeza mañá e estenderase ata o vindeiro 23 de novembro.

A través da liña específica para proxectos individuais Galicia Exporta Empresas e da destinada a apoiar proxectos colectivos coordinados por agrupacións empresariais Galicia Exporta Organismos Intermedios, impúlsanse tanto actividades de difusión como a participación en eventos expositivos no exterior e accións de prospección internacional.

As axudas cobren as actuacións que se celebren desde o 1 de xaneiro de 2023 e ata o 15 de decembro de 2023. O apoio máximo por solicitude e beneficiario chega, no caso do Galicia Exporta Empresas, ata os 95.000 euros e no de Organismos Intermedios, aos 400.000.

O obxectivo destas liñas, impulsadas pola Consellería de Economía, Industria e Innovación, a través do Igape e no marco da Estratexia de Internacionalización, é apoiar a saída ao exterior do tecido empresarial galego, especialmente de pemes e establecementos comerciais, a través de novas canles de comercialización.

Un marco no que tamén se activará proximamente unha nova convocatoria do Galicia Exporta Dixital, pois o desenvolvemento das tecnoloxías dixitais supón un enorme potencial para a mellora da competitividade nos mercados internacionais no actual contexto económico. O obxectivo é permitir ás empresas apoiarse en ferramentas innovadoras para acceder aos mercados exteriores.

Neste sentido, cómpre destacar que desde a posta en marcha do Galicia Exporta Empresas, no ano 2016, téñense apoiado preto de 1.500 plans de promoción internacional, con accións de difusión, e asistencia a feiras ou prospección de novos mercados, cunha media de participación de máis de 240 empresas ao ano, o que supuxo unha axuda total ata a data de 30,5 M€.

Cifras ás que se suman os máis de 8,7 M€ e 165 iniciativas promovidas a través do Galicia Exporta Organismos Intermedios. Pola súa banda, o Galicia Exporta Dixital ten beneficiado xa a máis de 400 empresas por importe de máis de 14 M€ e un investimento inducido de 17,6 M€.

Todas estas accións englóbanse na Estratexia de Internacionalización que está a promover o goberno galego e que ten como principais claves a aposta pola dixitalización e a diversificación dos mercados exportadores.

Published in Novas

Tagged under

Ler máis

Luns, 23 Outubro 2023 09:34

O luns abre o prazo de solicitude da nova liña de axudas para pemes e autónomos dirixida a neutralizar a suba de tipos de xuro

Destínanse preto de 2M € para a subvención de ata 3,5 puntos nos tipos de xuro das operacións
Desde o luns, 23 de outubro, ata o 30 de novembro pódense beneficiar da nova liña os titulares de operacións de préstamos directos concedidos polo Igape, cuxo tipo de referencia a aplicar para determinar o tipo de xuro sexa maior do 0% e que se atopen ao corrente dos pagamentos
O programa complementa aos programas de reavais e préstamos directos que desenvolve cada ano a Xunta de cara a facilitar o acceso ao crédito ao tecido empresarial galego

Santiago de Compostela, 21 de outubro de 2023

O Goberno galego, a través da Consellería de Economía, Industria e Innovación, pon en marcha un programa que suma case 2 millóns de euros e que busca axudar a pemes e autónomos a facer fronte á suba de tipos de xuro que se veñen producindo durante o último ano.

Neste marco, a liña ten por obxectivo aliviar a carga financeira dos titulares de operacións de préstamos directos do Igape, favorecendo así a súa viabilidade económica e a capacidade de reembolso do principal das operacións.

Cómpre salientar que, nestes momentos, o Igape conta cunha ampla carteira de operacións de préstamo, moitos dos cales foron concedidos a tipos fixos moi baixos ou a tipo 0%, contemplando outros xuros variables en función do euríbor ou do tipo de referencia establecido.

Na actual conxuntura, coa suba dos tipos de referencia, prodúcese un aumento moi significativo das cotas a pagar polos titulares destes préstamos a tipo de xuro variable. Así mesmo, nas novas operacións a tipo fixo, o tipo de referencia determinado no momento da concesión resulta moi elevado.

Para aliviar esta situación marcada polo mercado financeiro, a nova liña de axuda subvencionará ata 3,5 puntos nos tipos de xuro das operacións. Unha porcentaxe que será aplicada sobre o capital vivo de cada unha das operacións de préstamo, en cada unha das liquidacións periódicas. Deste xeito, o programa favorece a viabilidade económica das empresas e facilita a capacidade de reembolso dos préstamos.

Todos aqueles interesados poderán solicitar a axuda desde o luns, 23 de outubro, ata o vindeiro 30 de novembro, resultando beneficiarios os titulares de operacións de préstamos directos concedidos polo Igape, cuxo tipo de referencia a aplicar para determinar o tipo de xuro sexa maior do 0%, e que se atopen ao corrente dos pagamentos.

Outras actuacións

Esta liña complementa os programas de reavais e préstamos directos que desenvolve cada ano a Xunta de cara a facilitar o acceso ao crédito ao tecido empresarial galego. Neste sentido, e no marco da Axenda Financeira que está a desenvolver o Goberno galego, estanse a facilitar, un ano máis, operacións de investimento, circulante e garantías para pemes e autónomos galegos por importe de 60 millóns.

Así, ata o pasado 29 de setembro, artellouse un novo convenio de colaboración entre o Igape, as sociedades de garantía recíproca (SGR) e as entidades de crédito con modalidades de apoio consistentes na bonificación do tipo de xuro dos préstamos, na bonificación da comisión do aval, e no reaval do risco asumido polas SGR. E seguen en marcha, ata finais de ano, as liñas de préstamos directos para investimentos estratéxicos ou para infraestruturas de centros tecnolóxicos, as liñas para financiar a operativa da industria auxiliar naval ou os préstamos para o financiamento das empresas no actual contexto de incremento xeneralizado do custo das materias primas e da enerxía.

Published in Novas

Tagged under

Ler máis