Necesitas financiamento para o teu negocio? Ata o 29 de setembro está aberto o prazo para solicitar as axudas do Igape que facilitan o acceso ao financiamento de empresas e persoas autónomas.

O convenio asinado con Afigal S.G.R., Sogarpo S.G.R. e Iberaval S.G.R. permite cubrir operacións de investimento, circulante e garantías por importe de 60 millóns de euros.

Consulta os detalles no apartado "IG535A - Marco de apoio ao acceso ao crédito das pequenas e medianas empresas (financiamento Igape-pemes)" na sección de Axudas.

As empresas están a tempo de solicitar as axudas que promoven o aforro e a eficiencia enerxética. O prazo está aberto ata o 15 de setembro.

A contía das axudas é do 35% do custe elixible para as grandes empresas. Nas compañías medianas do 45% e no caso das pequenas empresas o apoio ascende ao 55%.

Máis detalles, na sede electrónica da Xunta de Galicia.

A directora do Igape, Covadonga Toca, mantivo un encontro co equipo directivo de DIHGIGAL, o hub de innovación dixital para a industria de Galicia, no que se avaliou a importancia da innovación e da transformación dixital nas nosas pemes para acadar unha posición de liderado competitivo a nivel global.

Na reunión púxose de manifesto a necesidade de seguir apostando pola colaboración coas administracións públicas para lograr o maior desenvolvemento do ecosistema industrial e tecnolóxico da nosa Comunidade e fortalecer as competencias das empresas, en especial as pemes industriais, ligadas á transformación dixital.

Xa foi aprobada a Orde PCM/825/2023, de 20 de xullo, pola que se regulan os criterios e o procedemento de certificación de empresas emerxentes que dan acceso aos beneficios e especialidades recoñecidas na Lei 28/2022, de 21 de decembro, de Fomento do ecosistema das empresas emerxentes.

¿Estás interesado en iniciar o proceso de certificación?

• Proceso de certificación
• Guía de certificación
• Orde regulatoria

• A directora do Igape, Covadonga Toca, visitou esta mañá as instalacións do Grupo Itelsis, en Santiago, que ten levado a cabo distintos plans de internacionalización nos últimos anos contando co apoio do Goberno galego.
• Pon en valor liñas como ás do Galicia Exporta, que contarán cunha nova convocatoria no último trimestre e que promoven accións como a creación de tendas en liña, campañas en medios no estranxeiro, a participación en accións de promoción internacional ou a planificación de axendas de contactos e seguimento de clientes no exterior.
• A Xunta segue a reforzar a colaboración co tecido empresarial galego, que mantén no que levamos de ano rexistros históricos no que ás vendas ao exterior se refire, sumando nos cinco primeiros meses máis de 12.300 millóns, un 6,1% máis que no mesmo período do ano pasado.

A directora do Igape, Covadonga Toca, visitou hoxe as instalacións do Grupo Itelsis, en Santiago de Compostela, onde puxo en valor a importancia da internacionalización do tecido empresarial galego, especialmente de pemes e autónomos, no actual contexto económico como clave para mellorar a súa competitividade.  

Neste sentido, Toca adiantou que no último trimestre a Consellería de Economía, Industria e Innovación lanzará unha nova convocatoria dos programas Galicia Exporta, que facilitan o impulso da internacionalización do tecido produtivo, permitindo ás empresas apoiarse en ferramentas innovadoras para acceder aos mercados exteriores a través de novas canles de comercialización.  

“Itelsis é un bo exemplo da colaboración co tecido empresarial que permite ás empresas galegas reforzar a súa aposta na procura de novos mercados”, salientou a directora do Igape, quen apuntou que nos últimos anos o grupo tense beneficiado de ata catro convocatorias do Galicia Exporta Empresas levando a cabo distintos plans de internacionalización. 

Toca sinalou que o obxectivo do programa -que se complementa co Galicia Exporta Organismos Intermedios para iniciativas colectivas coordinados por agrupacións empresariais, e co Galicia Exporta Dixital na promoción de ferramentas innovadoras - é impulsar tanto actividades de difusión como accións de prospección internacional. 

Neste marco, a directora do Igape apuntou que a nova convocatoria facilitará, un ano máis, a promoción de plans de internacionalización que inclúen, entre outras accións, a creación de tendas en liña, campañas en medios no estranxeiro, a participación en accións de promoción internacional ou a planificación de axendas de contactos e seguimento de clientes no exterior. 

Desde a posta en marcha do Galicia Exporta Empresas, no ano 2016, téñense apoiado preto de 1.500 plans de promoción internacional, cunha axuda total ata a data de 30,9M€. Cifras que, como expuxo a directora, dan “boa conta” da importancia da colaboración da Xunta co tecido empresarial galego neste eido, que se enmarca no contexto da Estratexia de Internacionalización que ten como principais claves a aposta pola dixitalización e a diversificación dos mercados exportadores. 

Unha cooperación que, como sinalou a directora do Igape, está a permitir manter as cifras históricas acadadas xa o ano pasado, cando as exportacións galegas rozaron os 30.000 millóns. Neste 2023, mantéñense estes rexistros récord, sumando nos cinco primeiros meses máis de 12.300 millóns, un 6,1% máis que no mesmo período do exercicio pasado. 

A directora do Igape, Covadonga Toca, mantivo recentemente un encontro con representantes da Conferencia de Reitores das Universidades do Suroeste Europeo (Crusoe) e do Cluster TIC e Audiovisual no que avaliaron, entre outros aspectos, os proxectos que están a desenvolver no eido do emprendemento e a innovación. Neste marco, durante a xuntanza Toca Carús puxo en valor a importancia da aposta polo talento como motor da economía do coñecemento, da economía verde e dixital. 

Santiago de Compostela, 26 de xullo de 2023.-

A directora do Igape, Covadonga Toca, mantivo hoxe un encontro co equipo directivo de INEO e coa súa nova presidenta, Lourdes Guerra, no que se avaliou a importancia das TIC na innovación e o papel da entidade para facer de Galicia un referente do sector TIC e impulsar a cultura innovadora.

Na reunión púxose de manifesto a necesidade de seguir apostando pola colaboración institucional nesta nova etapa, co obxectivo de apoiar a todas as empresas que forman a asociación para continuar mellorando nos procesos que definen a súa actividade, como son a innovación, formación, internacionalización ou o emprendemento e o traslado e aplicación do coñecemento do sector a toda a sociedade.

• A directora do Igape, Covadonga Toca, mantivo un encontro de traballo coa asociación no que subliñou que accións como a ruta marítima co Porto de Miami na que se está a traballar e a participación en eventos como a Feira Transport Logistic de Múnic permiten reforzar o papel de Galicia como nodo loxístico internacional

Santiago de Compostela, 18 de xullo de 2023

A directora do Igape, Covadonga Toca, mantivo un encontro de traballo con representantes do Clúster da Función Loxística de Galicia de cara a avaliar e avanzar en novas accións para contribuír á eficiencia do sector, con especial atención á innovación e á internacionalización das empresas que forman parte da súa cadea de valor.

O encontro permitiu afondar no traballo feito durante o último ano, así como sentar as bases sobre as que seguir avanzando. Neste sentido, Toca Carús subliñou a relevancia da formación e da internacionalización como eidos sobre os que continuar impulsando a competitividade do sector. Durante o encontro, que supuxo a primeira toma de contacto da nova directora co clúster loxístico, avaliáronse tamén as accións que se veñen impulsando nos últimos meses, entre as que destaca a ruta comercial directa co Porto de Miami na que se está a traballar. A directora do Igape lembrou que este Porto xa ten relación coas autoridades portuarias de Vigo, A Coruña e Ferrol, polo que a ruta potenciará tanto á loxística de frío e a sustentabilidade dos portos da Comunidade como a situación de Florida como hub loxístico.

Así mesmo,  destacouse a participación en maio na  Feira Transport Logistic de Múnic, que contribuíu á posta en valor do potencial de Galicia como nodo loxístico internacional. “A Xunta ten claro que a loxística constitúe a base para a apertura comercial, a competitividade e a globalización económica, converténdose en peza fundamental para o crecemento económico”, apuntou Covadonga Toca. Por último, outro dos temas tratados no encontro foi a importancia de saír ao exterior cunha marca única, Galicia Logistics, que busca potenciar o papel que a Comunidade galega pode ter na loxística internacional, reivindicándoa como un “enclave estratéxico para fluxos de mercadorías e para investimentos de alto compoñente loxístico”.