• A nova convocatoria abriu o pasado 21 de xaneiro e permanecerá dispoñible ata o vindeiro 15 de novembro, cun orzamento de 2,8 M€
• Desde que se puxo en marcha no ano 2012, este programa de asesoramento especializado leva prestado máis de 3.000 servizos a empresas

Vigo, 22 de febreiro de 2025

A conselleira de Economía e Industria, María Jesús Lorenzana, salientou hoxe que máis de 2.000 pequenas e medianas empresas galegas xa se beneficiaron nos últimos anos do programa ReAcciona, que inclúe un catálogo de servizos para a mellora da competitividade empresarial.

A conselleira visitou esta mañá en Vigo un dos establecementos de Laguardia & Moreira, beneficiaria desta liña de apoios do Instituto Galego de Promoción Económica (Igape). Unha liña de apoios que inclúe, entre outros, servizos de asesoramento para o relanzamento comercial, para o deseño de produtos innovadores, para a optimización de procesos, a mellora da xestión financeira.

A nova edición deste ano do programa ReAcciona abriu o pasado 21 de xaneiro e permanecerá dispoñible ata o vindeiro 15 de novembro, cun orzamento de 2,8 M€ e subvencións de ata o 80 %.

Desde que se puxo en marcha no ano 2012, este programa de asesoramento especializado leva beneficiado a máis de 2.000 empresas, con máis de 3.000 servizos prestados e un orzamento executado de 14 millóns de euros.

• A directora do Instituto, Covadonga Toca, participa na clausura da xornada de lanzamento da segunda edición desta iniciativa, que se basea na colaboración público-privada e na que participan empresas tractoras, centros de investigación e fondos de investimento
• Destaca que o obxectivo é facilitar a incubación, aceleración e consolidación de proxectos innovadores no sector ambiental, garantindo que estes “conten co apoio necesario para transformar ideas en solucións reais”
• Subliña que a iniciativa enmárcase na rede de aceleradoras da Xunta que inclúe outras como a BFAuto, BFAero, BFFood ou Viagalicia que teñen permitido impulsar xa máis de 830 proxectos innovadores e crear máis de 1.400 empregos cualificados

Santiago, 21 de febreiro de 2025

A directora do Instituto Galego de Promoción Económica (Igape), Covadonga Toca, participou hoxe na xornada de lanzamento da segunda edición da aceleradora Business Factory ClimaTech, iniciativa desenvolvida coa colaboración de Viratec -Clúster Galego de Solucións Ambientais e Economía Circular- que busca consolidar Galicia como un hub de innovación en sustentabilidade e economía circular. Toca Carús destacou o impacto positivo do programa, que na súa primeira edición permitiu o desenvolvemento de proxectos con alto potencial de mercado e impacto ambiental.

Neste sentido, e como destacou a directora, ClimaTech é unha iniciativa baseada na colaboración público-privada, na que participan empresas tractoras, centros de investigación e fondos de investimento. O obxectivo, afondou, é facilitar a incubación, aceleración e consolidación de proxectos innovadores no sector ambiental, garantindo que estes “conten co apoio necesario para transformar ideas en solucións reais”.

Para acadar esta meta, explicou Toca Carús, nesta segunda edición amplíanse as prazas dispoñibles nos tres itinerarios do programa, na procura de facilitar a participación de máis emprendedores e startups.

Empresas tractoras, ciencia e investidores

Así, proseguiu a directora, nesta nova convocatoria, a aceleradora reforza a súa rede de colaboración coa incorporación de novas empresas tractoras como Emalcsa, sumándose a compañías líderes do sector como Vertex, Finsa, Viaqua, Sogama, Gestan, Coregal, Valtalia e Agroamb. Estas entidades non só actúan como patrocinadores, senón que desempeñan un papel activo no desenvolvemento dos proxectos, proporcionando mentorización, infraestruturas e apoio estratéxico.

Sobre esta base, Toca Carús puxo en valor a colaboración co mundo académico como “outro dos piares fundamentais do programa”. “O Comité Científico da BF ClimaTech xoga un papel esencial na selección e validación dos proxectos, garantindo que estes conten cunha base tecnolóxica sólida e estean aliñados cos Obxectivos de Desenvolvemento Sostible (ODS). Ademais, os emprendedores terán acceso a infraestruturas avanzadas de investigación para mellorar e testar as súa solucións”, aclarou.

Así mesmo, a aceleradora conta co respaldo de fondos de investimento privados, facilitando o acceso a financiamento, redes estratéxicas e recursos especializados que permitan a consolidación e escalabilidade dos proxectos.

A rede de aceleradoras

A BF ClimaTech, continuou a directora do Igape, forma parte da estratexia da Xunta de Galicia para o impulso do emprendemento innovador, enmarcándose na rede de aceleradoras que inclúe iniciativas sectoriais como BFAuto, BFAero, BFFood ou Viagalicia. A través da mesma Galicia ten logrado impulsar xa máis de 830 proxectos innovadores, creando máis de 1.400 empregos cualificados.

“Con esta segunda edición, Galicia reafirma o seu compromiso coa sustentabilidade, apostando pola innovación e o emprendemento innovador como motores de crecemento económico e transformación ambiental”, afondou Toca Carús, quen lembrou que o prazo de inscrición para participar na segunda edición de BF ClimaTech permanecerá aberto ata o próximo 28 de febreiro.

Vigo, 17 de febreiro de 2025

A directora do Instituto Galego de Promoción Económica Igape, Covadonga Toca, participou hoxe nun encontro de traballo con empresas dedicadas á construción e reparación naval, organizado pola plataforma empresarial Vigo Ship Repair, onde expuxo as distintas liñas de apoio dispoñibles que, dirixidas a pemes e autónomos, suman un “amplo abano” de 172 millóns de euros para impulsar a modernización, a competitividade e a transformación dixital do tecido empresarial galego.

Neste contexto, Toca Carús subliñou a importancia de sumar esforzos para impulsar proxectos que beneficien tanto aos profesionais como ás empresas e institucións do sector naval. Unha colaboración que permita abordar de maneira máis efectiva os retos que enfronta o sector, de cara a impulsar a súa capacidade de innovación, adaptación ás novas tecnoloxías e consolidación en mercados internacionais.

• A directora do Instituto Galego de Promoción Económica, Covadonga Toca, participa nunha xornada para autónomos e pemes organizada pola Asociación de Empresarios do Deza - AEDEZA
• “O obxectivo principal é reforzar a produtividade das empresas galegas, mellorar a súa adaptación ás novas tecnoloxías e potenciar a transformación dixital do tecido empresarial”, explica
• Destaca o papel da Oficina Económica de Galicia, que en menos dun ano de funcionamento xestionou máis de 16.000 consultas e preto de 200 proxectos estratéxicos, simplificando a interlocución coa administración, reducindo prazos e mellorando a experiencia das compañías na súa relación co sector público

Lalín (Pontevedra), 13 de febreiro de 2025

A directora do Instituto Galego de Promoción Económica (Igape), Covadonga Toca, participou esta mañá nunha xornada informativa organizada pola Asociación de Empresarios do Deza-AEDEZA no Hotel Torre do Deza, onde presentou o novo paquete de axudas para pemes e autónomos activado pola Xunta de Galicia.

Estes apoios, cun “orzamento histórico de 172 millóns de euros”, explicou Toca Carús, estrutúranse en tres grandes bloques: financiamento, competitividade e innovación. “O obxectivo principal é reforzar a produtividade das empresas galegas, mellorar a súa adaptación ás novas tecnoloxías e potenciar a transformación dixital do tecido empresarial”, afondou.

“Unha das maiores barreiras para o crecemento empresarial é o acceso ao financiamento”, explicou a directora. Por este motivo, o Igape destina este exercicio preto de 113 millóns de euros a instrumentos financeiros que faciliten liquidez e permitan investimentos estratéxicos.

As liñas principais, afondou Toca Carús, inclúen acceso ao crédito con 19 millóns de euros en axudas para financiamento a través de entidades de crédito e sociedades de garantía recíproca ou préstamos directos con 50 millóns de euros en financiamento en condicións vantaxosas para investimentos empresariais.

Competitividade e Innovación

Así mesmo, e como detallou a directora, destínanse tamén máis de 47 millóns de euros para programas que melloren a competitividade das empresas galegas. Entre eles, destacan as axudas para investimentos, con 10 millóns de euros e para atracción de empresas con 12 millóns de euros; as liñas de transformación dixital, con 3 millóns de euros ou o programa ReAcciona, con 2,8 millóns de euros para asesoramento estratéxico e xestión empresarial.

“A innovación é clave para a competitividade global”, proseguiu Toca Carús, detallando que o Igape impulsa programas con 15,2 millóns de euros. Entre estes destacan IA 360 con 10,2 millóns de euros, como programa pioneiro en Galicia para a aplicación da intelixencia artificial no sector produtivo; Ticket Innova, con 1 millón de euros para apoio á certificación e tecnoloxías emerxentes; e Igape Innova, con 4 millóns de euros en modernización de procesos e desenvolvemento de novos produtos.

A Oficina Económica

A directora do Igape destacou tamén o papel da Oficina Económica de Galicia, que en menos dun ano de funcionamento xestionou máis de 16.000 consultas e preto de 200 proxectos estratéxicos, simplificando a interlocución coa administración, reducindo prazos e mellorando a experiencia das compañías na súa relación co sector público.

• O secretario xeral de Industria e Desenvolvemento Enerxético, Nicolás Vázquez, e a directora do Igape, Covadonga Toca, participaron hoxe na xornada de presentación do informe de BDO Retos e perspectivas de investimento en Galicia para 2025
• Nicolás Vázquez destaca que Galicia está comprometida con apoiar as demandas do sector privado para impulsar o seu crecemento e a consolidación das súas iniciativas, especialmente en materia de industria
• Covadonga Toca sinala que Galicia segue a consolidarse como unha das comunidades autónomas máis dinámicas en exportacións, cunha facturación superior aos 30.000 M€ en 2023 e un crecemento do 3,1% en 2024

Vigo, 11 de febreiro de 2025

O secretario xeral de Industria e Desenvolvemento Enerxético, Nicolás Vázquez, puxo hoxe de manifesto a aposta da Xunta por fomentar a diversificación do sector industrial en Galicia para reducir a dependencia do exterior en áreas estratéxicas e gañar, así, competitividade.

Nicolás Vázquez inaugurou hoxe o acto de presentación do informe de BDO Retos e perspectivas de investimento en Galicia para 2025, onde recoñeceu que a industria é un pilar fundamental para o desenvolvemento económico non só pola produción de bens, senón, tamén, pola ampla rede de actividades que xera ao seu redor.

O secretario xeral de Industria e Desenvolvemento Enerxético subliñou que “Galicia está comprometida con apoiar as demandas do sector privado para impulsar o seu crecemento e a consolidación das súas iniciativas, especialmente en materia de industria, facilitando a adaptación aos novos desafíos e aproveitando as oportunidades que ofrece a transición cara a unha economía máis sustentable e dixital”, dixo.

Ao respecto, mencionou as principais liñas de traballo que vén mantendo a Xunta de Galicia con este obxectivo, entre as que citou a axilización administrativa e a desburocratización, os plans directores para os sectores estratéxicos, as medidas de creación e acceso a solo industrial gratuíto ou as que van destinadas a promover a descarbonización da industria e a garantir que o aproveitamento dos recursos naturais xere beneficios económicos e sociais en Galicia.

Boas expectativas de crecemento

Pola súa banda, a directora do Instituto Galego de Promoción Económica (Igape), Covadonga Toca, destacou as boas expectativas de crecemento da economía galega en 2025, e subliñou que a estabilidade institucional e a capacidade de adaptación das empresas están a xogar un papel clave.

Neste contexto, sinalou a importancia da internacionalización das empresas galegas como ferramenta para garantir a súa competitividade. Galicia, expuxo, segue a consolidarse como unha das comunidades autónomas máis dinámicas en exportacións, cunha facturación superior aos 30.000 millóns de euros en 2023 e un crecemento do 3,1% en 2024. Un proceso que acompaña o Igape proporcionando apoio, financiamento e asesoramento neste eido.

Así mesmo, a directora do Igape tamén puxo en valor o papel da Oficina Económica de Galicia, que actúa como un punto de referencia único para empresas e industrias que precisen información e asesoramento promovendo unha nova forma de relacionarse co tecido empresarial galego.

Por último, fixo referencia ás novas liñas de axudas postas en marcha polo Igape, cun paquete de 172 millóns de euros dirixido á mellora da competitividade, o financiamento e á innovación das empresas galegas.

• Destaca que no 2023 as exportacións ao país galo acadaron preto de 5.300 millóns de euros
• Insiste en que Galicia é un “territorio atractivo” que ofrece estabilidade, certezas e un entorno favorable para o desenvolvemento empresarial
• Destaca que a prioridade da Xunta é seguir potenciando esta relación económica

Madrid, 10 de febreiro de 2025

A conselleira de Economía e Industria, María Jesús Lorenzana, subliñou hoxe que as exportacións galegas a Francia representaron no ano 2023 case o 20 % do total das vendas ao exterior.

Lorenzana, que participou no Encontro entre a Comunidade franco-española e a súa relación coa Universidade -foro organizado pola Universidade Politécnica de Madrid-, destacou que Francia é un investidor chave e un socio estratéxico co que Galicia comparte unha relación comercial sólida e “mostra disto é que as exportacións ao país galo acadaron preto de 5.300 millóns de euros”, dixo. Na súa intervención, a conselleira puxo en valor que Galicia é un territorio atractivo para o investimento estranxeiro porque “ofrecemos estabilidade, certezas e un entorno favorable para o desenvolvemento empresarial”, subliñou.

Neste sentido, sinalou que o Goberno galego aposta por unha economía aberta e competitiva que exporta calidade, innovación, talento e valor engadido. Segundo explicou, Francia é un aliado fundamental na vocación internacional que ten a economía galega, unha relación que se sustenta en sectores estratéxicos que “definen o noso modelo industrial e produtivo” apuntou.  

Así, fixo alusión á automoción que “é o motor das nosas exportacións”, con máis de 2.000 millóns de euros vendidos a Francia o ano pasado; e aos sectores téxtil ou agroalimentario, “que reforzan aínda máis a nosa presenza no país galo”, sinalou.

Así mesmo, explicou que a prioridade da Xunta é fortalecer os lazos con Francia e seguir potenciando as relacións pois “cremos na cooperación e na competividade”, subliñou.

• A directora xeral do Igape, Covadonga Toca, xunto coa directora xeral de Traballo Autónomo e Economía Social, Marta Mariño, participan na xornada organizada por AGACA
• Toca Carús pon en valor o amplo abano de liñas activado este ano, que suma máis de 172 millóns para promover o impulso á innovación, á dixitalización e á internacionalización do tecido produtivo galego
• A directora xeral de Traballo Autónomo e Economía Social subliña o apoio do Goberno galego ao cooperativismo e a economía social como fórmula xeradora de emprego de calidade e motor dun crecemento sustentable

Santiago de Compostela, 7 de febreiro de 2025

A directora do Igape, Covadonga Toca e a directora xeral de Traballo Autónomo e Economía Social, Marta Mariño, participaron hoxe na xornada de Apoio ao Emprendemento Cooperativo, organizada pola Asociación Galega de Cooperativas Agroalimentarias (AGACA), onde expuxo as principais liñas de axuda que a Xunta de Galicia pon á disposición de cooperativas, startups, pemes e autónomos ao longo de 2025.

Neste sentido, durante a súa intervención, Toca Carús destacou que o Igape está a activar un amplo abano de apoios, que suman máis de 172 millóns de euros, e que permiten mellorar a competitividade empresarial, facilitar o acceso ao financiamento e impulsar a innovación e a dixitalización do tecido produtivo galego.

Dentro deste paquete, expuxo, existen programas dos que se poden beneficiar tanto as novas cooperativas como as startups en sectores estratéxicos para Galicia. Así, entre as liñas, a directora do Igape fixo fincapé na importancia do financiamento, que contará, entre outras accións, con 50 millóns de euros en préstamos directos e créditos preferentes para a modernización e dixitalización.

Así mesmo, Toca Carús subliñou o papel da innovación como motor de transformación empresarial, salientando o programa IA 360, dotado con 15,2 millóns de euros, que facilitará a incorporación da intelixencia artificial ao tecido produtivo galego.

Sobre esta base, proseguiu a directora, actívanse outros programas clave para a transformación dixital e a mellora da eficiencia. Entre eles, destacou os 12 millóns en incentivos para atraer novas empresas a Galicia, ou o asesoramento especializado, no que o programa ReAcciona, con 2,8 millóns de euros, ofrecerá un ano máis servizos de optimización da xestión e mellora da eficiencia.

A Oficina Económica

A directora do Igape destacou tamén o papel da Oficina Económica de Galicia, que en menos dun ano de funcionamento xestionou máis de 14.000 consultas e 200 proxectos estratéxicos, facilitando o acceso á administración e á financiación para pemes, autónomos e emprendedores.

Trátase dun servizo integral de apoio ás empresas que axiliza trámites administrativos, facilita o acceso a financiamento e simplifica a interlocución coa administración, reducindo prazos e mellorando a experiencia das compañías na súa relación co sector público.

Pola súa banda, a directora xeral de Traballo Autónomo e Economía Social, Marta Mariño, fixo fincapé no compromiso da Xunta coa promoción do cooperativismo e a economía social, impulsando a actividade económica destas fórmulas de negocio como un motor de crecemento sustentable e xerador de emprego de calidade. Ademais, remarcou que o Goberno galego ten en marcha na actualidade a segunda Estratexia da economía social, unha planificación con horizonte 2027 e un orzamento de 174 millóns de euros coa aspiración de xerar 4.000 empregos e posicionar este modelo nos sectores tecnolóxico, verde e industrial. Neste senso, a directora xeral mencionou diferentes apoios dispoñibles, como a recente publicación no Diario Oficial de Galicia da convocatoria do programa Aprol Economía Social —que cun orzamento de 5M€ busca beneficiar unhas 170 entidades e promover a incorporación de 325 persoas socias— ou a nova edición lanzada hoxe da convocatoria de axudas dirixidas ás máis de 100 entidades de economía social que forman parte da Rede Eusumo.

Así mesmo, na xornada de hoxe tamén se deu conta dos apoios específicos para o colectivo autónomo, que este ano como novidade —e perseguindo o fin do Executivo autonómico de reducir a burocracia— están unificados na mesma orde, pretendendo beneficiar arredor de 8.700 traballadores por conta propia e contando cun orzamento de 40,7 M€.

• A directora xeral do Instituto Galego de Promoción Económica (Igape), Covadonga Toca, participou na IX edición das xornadas Inspiring women leaders in the digital era, organizada por Women Startup Community
• Anuncia que mañá abre o prazo da nova convocatoria da liña de axudas para startups, cun orzamento de 1,5 M€

A Coruña, 6 de febreiro de 2025

A directora xeral do Instituto Galego de Promoción Económica (Igape), Covadonga Toca, participou hoxe na IX edición  das xornadas Inspiring women leaders in the digital era, organizada por Women Startup Community, onde reafirmou o compromiso da Xunta de Galicia co impulso do emprendemento feminino no sector tecnolóxico.

Toca Carús subliñou a aposta da Administración autonómica por construír un espazo emprendedor máis inclusivo, equitativo e sustentable para superar a fenda de xénero que, dixo, aínda segue a ser unha realidade no eido tecnolóxico e empresarial. Amosou, así, a importancia de impulsar redes de apoio a iniciativas emerxentes e innovadoras que teñan o talento feminino como valor engadido.

Neste contexto, remarcou o papel da Xunta como aliada das empresas e persoas emprendedoras, non só co traballo que vén facendo a prol da desburocratización, senón coas diferentes liñas de axuda, neste caso, para promover o emprendemento innovador.

Mencionou, ao respecto,  a rede de aceleradoras de Galicia, que leva permitido crear máis de 250 proxectos, dar apoio a 440 empresas e xerar máis de 1.400 postos de traballo cualificados. E tamén a liña de axudas específica para startups que a Administración autonómica convocou por primeira vez o ano pasado, con 84 iniciativas apoiadas.

Nesta liña, anunciou que mañá, 7 de febreiro, abre o prazo da nova convocatoria, cun orzamento de 1,5 millóns de euros, para seguir reforzando un ecosistema que una emprendemento e innovación, como motor para diversificar a economía.

• A conselleira de Economía e Industria, María Jesús Lorenzana, xunto co titular de Facenda e Administración Pública, Miguel Corgos, participou hoxe nunha xornada sobre o Fondo de Transición Xusta
• En total suman 16,2 M€ e financiarán a implantación de plantas de fabricación de compoñentes e almacenamento enerxético, o uso do hidróxeno renovable, a produción de biogás ou biometano e o desenvolvemento de tecnoloxías renovables mariñas
• Lorenzana apunta que a Galicia lle corresponden para o período 2021-2027 máis de 100 M€ deste fondo, que se xestionan desde o Igape (71,5 M€) ou o Inega (28,8 M€) para diferentes actuacións na provincia da Coruña, Zona de Transición Xusta
• O conselleiro de Facenda e Administración Pública pon en valor a xestión exemplar que está facendo Galicia dos recursos que achega o MRR, con máis de 45.000 persoas físicas, case 8.200 autónomos e máis de 5.200 entidades e sociedades beneficiadas ata o momento

A Coruña, 5 de febreiro de 2025

A conselleira de Economía e Industria, María Jesús Lorenzana, anunciou hoxe que a Xunta de Galicia vai convocar este ano tres novas liñas de axuda para descarbonización industrial e enerxías renovables que suman 16,2 M€ con cargo ao Fondo de Transición Xusta.

Nunha xornada empresarial sobre instrumentos financeiros que clausurou o conselleiro de Facenda e Administración Pública, Miguel Corgos, Lorenzana avanzou que a Galicia lle corresponden para o período 2021-2027 máis de 100 M€ deste fondo, que se xestionan desde o Igape (71,5 M€) ou o Instituto Enerxético de Galicia (Inega) (28,8 M€) para diferentes actuacións na provincia da Coruña, Zona de Transición Xusta.

En concreto, apuntou que unha das novas liñas, que se vai convocar previsiblemente no primeiro trimestre deste ano, será para financiar proxectos relacionados coa implantación ou adaptación de plantas de fabricación de compoñentes de enerxías renovables e almacenamento enerxético, cun orzamento de 3,8 M€.

O segundo programa de axudas subvencionará proxectos de aplicación e uso de hidróxeno renovable e tamén de valorización enerxética de residuos orgánicos para a produción de biogás ou biometano non destinado ao autoconsumo. Estará dotada cun orzamento de 7,6 M€ e tamén se estima que saia publicada no primeiro trimestre de 2025.

Por outra banda, a terceira das liñas será para proxectos de tecnoloxías relacionadas coas enerxías renovables mariñas e o almacenamento enerxético a desenvolver na zona experimental de Punta Langosteira (A Coruña), cun orzamento de 4,8 M€ e a previsión de que sexa convocada no terceiro trimestre do ano.

Xunto con isto, Lorenzana lembrou que acaba de saír convocada a liña de préstamos reembolsables do Igape para grandes empresas, por valor de 37 M€; e a do Inega para proxectos de redución de emisións e eficiencia enerxética en empresas do sector industrial (12,5 M€). Ambas as dúas, do Fondo de Transición Xusta para a provincia da Coruña, que se suman ás de creación de centros dixitais para soporte tecnolóxico ás pemes (8 M€).

“Cremos que non é tanto falar de transición xusta ou non, senón de facer as cousas con sentido común, de xeito equilibrado e flexible”, dixo a conselleira, para lembrar que a clave está en que os territorio declarados Zonas de Transición Xusta “sufran o menos posible”, desde o punto de vista socioeconómico e laboral e “saian reforzados” de todo este proceso.

Nese sentido, animou ás empresas da provincia da Coruña a que concorran a estas convocatorias de axudas encamiñadas a promover a reindustrialización e a dinamización económica de toda a contorna das Pontes e Meirama e a mitigar o impacto que comporta o peche das respectivas centrais térmicas.

Exemplar execución dos fondos comunitarios

Pola súa banda, o conselleiro de Facenda e Administración Pública, Miguel Corgos, lembrou que, en materia de fondos, Galicia ten demostrado sobradamente o seu exemplar comportamento na execución dos recursos comunitarios, que teñen contribuído de maneira notable no desenvolvemento económico e social da Comunidade.

Neste sentido, referiuse ao Programa Galicia FEDER 2021-2027, que constitúe unha firme aposta polo apoio ao tecido empresarial galego, en particular no contexto da innovación, a dixitalización, a internacionalización e a transicións enerxética. Ademais de destacar a importancia para a provincia da Coruña do Fondo de Transición Xusta que busca a diversificación económica dos territorios máis afectados pola transición climática.

Miguel Corgos puxo tamén en valor a xestión da Comunidade dos recursos que achega o Mecanismo de Recuperación e Resiliencia (MRR); unha execución que ten o seu impacto na economía real, con máis de 45.000 persoas físicas, case 8.200 autónomos e máis de 5.200 entidades e sociedades beneficiadas ata o momento.

“O obxectivo final ten que ser que os recursos do mecanismo cheguen á cidadanía e ás empresas de maneira áxil”, aseverou, incidindo en que, desde a Administración autonómica, xa se ten demandado ao Goberno central algúns cambios para mellorar a xestión, cun sistema de cooperación e cogobernanza, para apoiar con maior axilidade e eficiencia ás empresas galegas.

O conselleiro de Facenda e Administración Pública concluíu a súa intervención asegurando que a Xunta seguirá a traballar para que as empresas poidan dispoñer de instrumentos financeiros flexibles e áxiles, que se adapten ás necesidades de cada momento.

Santiago de Compostela, 3 de febreiro de 2025

A directora do Igape, Covadonga Toca, mantivo un encontro de traballo con representantes do Clúster da Industria do Deporte Galego co obxectivo de analizar posibles liñas de colaboración que favorezan o desenvolvemento de accións conxuntas entre ambas as partes. Durante a xuntanza, abordáronse diferentes iniciativas que poden mellorar a visibilidade e o impacto do sector deportivo, así como fortalecer a colaboración entre ambas entidades.

Toca Carús destacou a importancia de sumar esforzos para impulsar proxectos que beneficien tanto aos profesionais do deporte como ás empresas e institucións do sector. A través desta colaboración, preténdese crear un marco de acción conxunto, de cara a mellorar a competitividade e a sustentabilidade do deporte na nosa rexión.